YOHANES 5

Yesus, jipit taka, Betesda take ajaoromtaere atakam

1Emesare. Yahudi owe pakambwi aemes. Yesusam Yerusalem aesose. 2Me Yerusalem ere, era jimsap juas “Domba” setep, take daytu aemese. Ibrani atakam ere, era take juas Betesda. Era take poman poman tasanko daytu ban taka aemaptetere. 3Era tame bomon, owe tanane apakeamses. Era damo oweam, banamek kapie oweam, jindi kamwe oweam, kam oweam, emes owe are. [Are malaikat, era bwi bau bapuupum, banamek apemes. 4Tuhan malaikat, era bwi bau bapuupum, andaea ajaie. Are bare taka andaea, emes aema ajaie. Are era bwi bambwi afafasima, ajaie ere, era bwi bonak andaesa ajaie jipit apaye, taot apaye, era damo pak takes ajaorema ajaie.] 5Emesare, era asan aemanse ipit taka, tahun 38 asan pota aemansaarir. 6Yesusam era ipit era asan aemanse apore. Are era asan tarainak aemansaarir apore. Armat Ipit arawa, “Wore damo bakokoem akot ape?” Emes atakam aesime.

7Era damo ipit arawa, “Dot! Era bwi bambwi afafasimto ere, bwi, dera bandaetaesem owe apok. Dere era bwi bandaes aemaptey, wan owe era bwi bonak tandaesa ememas.” Emes atakam aesime. 8Yesus arawa, “Bawasitey! Wotapiniam bataerey, wanam bajarey.” Emes atakam aesime. 9Emesare, era ipit damo ametejaoreme. Are atapini ataere, wanam aesose.

Emesare, era aemes pak, Yahudi Owe Samayen Bare afeamse are. 10Emesare, Yahudi owe atakam era damo ajaoreme ipit akoromes. “Waa Yahudi Owe Samayen Bare afeamsar. Erarawa wore wotapini bataer bas. Wore daagama basakamtam atakam aoomarem.” Emes atakam aesimes. 11Era ipit arawa, “Dedamo ajaoroman ipit atakam aoesimtaman. ‘Wotapini bataerey, wanam bajarey.’ Emes atakam aesiman.” Era ipit emes atakam aesime. 12Era owerawa, era ipit ajatepores. “Me wotapini bataer wanam bajar atakam wora asakamtaman ipit tanam?” Emes atakam aesimes. 13Me Yesus ere, era asan owe tanane apore, wanam aotasieme. Erarawa era damo ajaoreme ipit emes atakam asakamtame Ipit amsam apok.

14Emesare. Yesus era ipit Allah Tame bomon, bimnuk aemamtaere. Are atakam era ipit aokorome. “Emesare, wore damo akokoemmarem. Erarawa wore dosa bamompimey. Wore asan potanak baemap-ombar.” Emes atakam aesime. 15Era ipitam Yahudi owepu ambareme, wanam atakam era owe aokorome. “Era damo ajaoromtaeran Ipit, ere Yesus are.” Emes atakam aesime. 16Emesare, Yahudi owe Yesus era pak Yahudi Owe Samayen Bare apores. Erarawa Yesus bajurusum era bare aeetaeres.

17Yesus ere, atep era owe ajite. “Waa ajiiream Deritipit karai aeaareme. Erarawa Denom karai aemin.” Emes atakam aesime. 18Emesare, Yahudi owe, Armat Ipit, Yahudi agama Samayen Bare basakamtam aooe apores. Wanam, are, “Allah Deritipit.” Emes atakam aesime. Emes atakam, Are Allah awar aememe atakam are. Erarawa Yahudi owe, Armat Ipit batatii, jati daytinak aees.

Allah Andep fiak pak atakam

19Yesus atakam era owe aokorome. “Atakamnak, Allah Andep pak amba baemeem asan apok. Andep Aritipit aememar pak apormar, wanam Are emes pak taka aemum. Me Andep, Aritipit aememar pak jipu aemum. 20Me Aritipit Andep afaimum. Are era aemmar pak takes Andep aporomtamum. Me, waa aporomtammar pak koser. Asep bare, Are daytinak pak Andep aporomtamtem. Era pak tare jinim bae pak erare. 21Aritipit, dambir owe ajaoromwasumtumum, wanam jiinenak era owe atetamum. Emesamare, Andep, jiinenak, era aereremartaamar owe atetamum. 22Aritipitam owe adosa atakam basakamtii apoknak aemum. Me, Are, owe adosa atakam basakamtii fiak pak, Andep atetame. 23Are owe takes Andep basitim akot— era owe Aritipit asitimmas emes tamen are. Erarawa Are era fiak pak Andep atetame. Me Andep basitim apok owe, Aritipitam basitim apok aemmas. Me Aritipit, ere Andep ambirimemome Ipit arare.

24Atakamnak, owe deatakam jane ajimas, wanam dera ambirimemomen ipit eemnak ambesemkorommas, are jiinenak atoomemas. Denom era owe era aemes dosa atakam basakamtii apok aemtemin. Era oweam dambir baem apok aemtemas. Me, are jiinenak owe aememmas. 25Atakamnak, era aemamesto bare, dambir aemes owe, Allah Andep era akoreto atakam, jane ajitemas. Era atakam jane ajitas owe, jiinenak owe aememtemas. Era baream, ere ememanse. 26Aritipit, era jiinenak batetamaar Ipit. Erarawa Are era jiinenak batetam fiak pak Andep atetame. 27Me Andep, ere Asamot Anakot Ajaoreme Ipit are. Aritipitam, dosa atakam basakamtii fiak pak, Andep atetame. 28Tare ara atakam jinim bae bas. Era aemamesto bare era dambir asan owe takes, Andep akoreto atakam, jane ajitemas. 29Wanam era owe era dambir asan ajisemtetertemas. Era akot pak aemes owe, ajaorwasittemas, ararawa jiinenak aememaartemas. Era pota pak aemes oweam ajaorwasittemas. Ararawa, era bajirisem asan aemapaartemas.”

Yesus, Allah Andep, emes baporomtam atakam

30“Denom pak dema baemeem asan apok. Me, Dere owe adosa atakam asakamtiitey, Dere Deritipit atakam jane ajitey pak jipu atakam asakamtiimin. Dere era akot aportey pak jipu baem apok. Me, Dera ambirimemomen Ipit akot apormar pak jipu aemmin. Erarawa era asakamtiitey atakam ere, akot.

31Dere era aemmin pak, ateman dema atamomtey, owe era ateman atamtey atakam baemebesem asan apok. 32Me, wan ipit deateman atamomatem. Era ipit, deateman atamomatmar atakam, ere atakamnak. Emes pak demsam. 33Tare owe Yohanespu ambirimemomekem. Me Yohanes arawa, atemannak atame. 34Emesare, Dere asamot ateman batam atakam bajanim apok. Me, Dere Yohanes atame ateman, atakam tara akorommin. Era ateman, tare eemnak Dera bamesemkorom are. Tanom eemnak Dera ambesemkoromtankum ajoremtemakam. 35Me Yohanes, asareape lampu tamen asareape. Me akoretame atakam, lampu tamen are. Me aatakam jane bajie, jak akot baemapom are. Tanom jirao bajateemem apok, aatakam jane bajie akot ajiekem. 36Yohanes deateman atame atakam, ere fiak apok. Era ateman atammin atakam ere, fiaknak. Deritipit, Dere jinim bae pak baem, ataendaemen. Denom era jinim bae pak aemmin. Era jinim bae pak ere, Deritipit Dera ataendaemen, emes aporomtamum. Erarawa, owe Deritipit Dera ataendaemen apormas. 37Me Deritipit ataendaemen. Armat Ipitam deateman atame. Tare ere, aatakam jane bajie apoknak. Tanom abi bapor apoknak. 38Tare Armat Ipit ataendaeme Ipit bamesem apok. Erarawa Deritipit atakamam tajak bomon baemapaar apok. 39Tabimak binip ere, ‘Era Alkitab, jiinenak baememaar atakam,’ emes atakam aesimemakam. Erarawa tare Alkitab aoorporaaremakam. Emesare, Alkitabam deatakamkor akoremara. 40Tare Dera ajamkaitankum, tare jiinenak aememaartemakam. Me, tare Dera bajamkai pota ajimakam.

41Denom asamot owe, ‘Yesus akotnak,’ emes bajie, jak baseseromem apok. 42Me, tare takes demsam. Tajak bomon, tare Allah bafaim apoknak apormin. 43Deritipit ataendaemen. Me, tare Dera bamesem apoknak. Wan ipit ere, bambi ajinaoto, tare era ipit eemnak ambesemkoromtemakam. 44Tare tarmamon, ‘Are owe akotnak,’ emes bajie, jak aseseromemakam. Allah, ere takakor. Me, tare Allah, ‘Are akotnak,’ emes bajie, jak baseseromem apoknak. Erarawa tare Dera baemebesem asan apok. 45Dere tare Deritipit bipu batamsem, emes bimak binip batetaram bas. Dere emes baem apok. Tare ere, Musa jiirey aeeaarukum. Emesare, armat ipit tara atamsemteman. 46Me Musa, deatakam, buku aeapome. Erarawa tare Musa buku aeapome atakam bamesem ere, tanom Dera ambesemmankuma. 47Tare ere, Musa atakam bamesem apok apaye, tanom era akoremin atakam baemebesem asan apok.” Yesus emes atakam aesime.

Currently Selected:

YOHANES 5: LAIASC

Highlight

Copy