San Marcos 1

(Mt. 3:1-12; Lc. 3:1-9, 15-17; Jn. 1:19-28)

1Squé guzulo de didxzaac xte Jesucrist Lliin Dios.

2Guu tuby profet ni bcuaa xtiidx Dios, laab bdialáb Isaías. Chiy laab bcuaab de diidxré:

Nare rxiaalda tuby bniety ni sanɨɨdy loo

par cuxnezgab de bniety par chalee icuadiagdeb xtiidxu.

3Ríeny rsee tuby bniety nez lo yiubiz rut quɨt tu rbezti ax rniib:

“Gulganzaac nez xte Xtadnɨ Dios.

Gulxal tuby nezldí.”

4Ziy xquel beed Juany ni btiubnis de bniety. Laab gulezbɨ nez lo yiubiz rut quɨt tu rbezti. Chiy raipbɨ de bniety dec ná par yialaazdeb pur de xtulddeb ne yaicquideb cun Dios te gacdeb perdón ax irubnisdeb. 5Irate de bniety ni rbez nez Judea ne nez Jerusalén bdiiadeb güecuadiagdeb ni rnii Juany ax bxubdulddeb. Ne btiubnis Juany laadeb lo gueeu Jordán.

6Púrzi cun guichlady camey gucchuu xab Juany. Chiy tuby cinturon guidy bllii láanbɨ. Ne púrzi guxady cun dzɨny ni nuu nez lo guiix bquiinbɨ. 7Chi guninéb de bniety ax raipbɨ laadeb:

—Después de nare gueed tuby bniety ni mazru rnabee que naa, ax niclɨ lo xcurachny quɨt riáldtia ixaicquia pur ni mazru sacny que naa. 8Nare rtiubnisa laat cun nis, per bniety ni gueedqui laany itiubnisny laat cun Spíritu Sant.

(Mt. 3:13-17; Lc. 3:21-22)

9Láani de dxiqui bdiia Jesús láani guɨdx Nazaret ni ná nez Galilea. Chiy btiubnis Juany laany lo gueeu Jordán. 10Chi bdiia Jesús lo nis, hóracqui gunány bllal llayabaa zedyiat Spíritu Sant zec tuby palom axtquɨ quiany. 11Chiy bíeny rsee ni gunii desde llayabaa:

—Liú noo Llingaana ni quesentiand rcaaza ne ni quesentiandza rzaclaaznía.

(Mt. 4:1-11; Lc. 4:1-13)

12Chiyru güené Spíritu Sant Jesús nez rut ná púrpac yiubiz rut quɨt tu rbezti. 13Nezqui guzuguaany cuarent dxi ne guxin laaizny cun de many guiix. Chiy güegaany Satanás prueb laany par nisaclony Dios, ax de ánglɨ xte Dios baany sirvɨ lony.

(Mt. 4:12-17; Lc. 4:14-15)

14Chi biaagu Juany Bautist, Jesús güeny nez Galilea güeniiny de didxzaac xte Dios. 15Chiy raipny de bniety:

—Abdzɨny dxi ni inabee Dios. Pur ningui, gulyaicqui cun Dios ne gulchaldilaaz de didxzaac xtenny.

(Mt. 4:18-22; Lc. 5:1-11)

16Deni zezá Jesús ruxchu nis xte Galilea, chiy gunány Simóny cun betsbɨ Andrés. Laadeb cacuaadeb tarray xtendeb lo nisqui par canaazdeb beld. 17Chiy raipy Jesús laadeb:

—Gulzanald nare te iseeda laat xa xquel gúntɨ par itoptɨ bniety xlat ni inaaztɨ beld.

18Hóracqui bsáandeb de xtarraydeb ax zenaldacdeb Jesús.

19Ne Jesús güelaaru zény, ax delantqui gunány de llingaan Zebedeo, Jacob cun Juany. Nuudeb láani barcu cayunzaacdeb de xtarraydeb 20ax gurɨdxny laadeb. Chiy bsáanacdeb xtaddeb Zebedeo láani barcuqui cun de mos. Ax iroptedeb zenaldacdeb Jesús.

(Lc. 4:31-37)

21Deni bdzɨnnédeb Jesús guɨdx Capernaum, chiy dxi ni rzilaaz bniety biiu Jesús láani yudoo xte de bniety Israel ax guzulo caliuuny laadeb. 22Ne laadeb quesentiand rdxalodeb zec ni rliuuny, te pur rliuuny laadeb zecpac tuby ni nap guelrnabee gati zec ni rliuu de maistrɨ ni nán ley. 23Láani yudooqui guu tuby bniety nguiu ni guu tuby bɨndxab láanni ax gurɨxtiab:

24—¿Xínii riutébiu cun dunnɨ, Jesús de Nazaret? ¿Ta zéedbiu par initlobiu dunnɨ? Per nare rumbiia laabiu, ne nánna dec laabiu nábiu Bniety sant xte Dios.

25Chiy gudildné Jesús bɨndxabqui raipniy:

—¡Dxichgaruu! ¡Bdiia láani bnietquɨ!

26Bɨndxabqui bzáaldiy bnietqui gucbɨ zec ni rac guelguidx ratiia, ne quesentiand diip gurɨxtiab ax bdiia bɨndxabqui láanbɨ. 27Irate de bniety ni zuguaa ruy rdxalodeb ne rnabdidxsaazadeb:

—¿Xi cosquɨ ningui laany irɨnquɨ caliuuny dunnɨ? Ne, ¡quesentiandza napny guelrnabee, axt de bɨndxab rcuadiag xtiidxny!

28La gueeld brɨɨch rson xte Jesús iduibte nez Galilea.

(Mt. 8:14-15; Lc. 4:38-39)

29Chiy chi bdiiadeb láani yudooqui, Jesús güenény Jacob cun Juany liz Simóny cun Andrés. 30Per xnansuegrɨ Simóny nágaab racxúb. Nuub xliaa. Chiy gudixteedeb lo Jesús dec laab racxúb. 31Chiyru gubii Jesús gunaazny naa bnietqui ax bldiasteny laab. Hóracqui gubicá xliaaqui ax guzulo bíub laadeb.

(Mt. 8:16-17; Lc. 4:40-41)

32Deni bieezy gubidx chi biiu guxin, guzulo rené de bniety irate de bɨny racxú rut zuguaa Jesús ne güenézadeb de bɨny ni nuu bɨndxab láanni. 33Irate bɨnguɨdxqui bdxasaa ruu puert rut zuguaanyqui. 34Jesús bsiacny zieny bniety ni gúp iralote guelguidx ne guléezacny zieny bɨndxab láani de bnietqui. Per quɨt nisaantiny xi ninii de bɨndxabqui te pur rumbeedengui laany.

(Lc. 4:42-44)

35Anste iragueel, Jesús güesteny zeczi nacayru. Bdiiany láani guɨdxqui par güeny tuby lat rut quɨt tu rbezti par güenaabny lo Dios. 36Simóny cun de xcumpnierbɨ güetíilydebny. 37Ne chi bdxialdebny, raipdebny:

—Irate de bniety caguíily laabiu.

38Per laany raipny laadeb:

—Gultoo stuby de guɨdx ni ná gaxru par iniia xtiidx Dios te par ziy zelda.

39Chiyru gunii Jesús xtiidx Dios láani de yudoo xte de bniety Israel iduibte nez Galilea ne guléeny de bɨndxab láani de bniety.

(Mt. 8:1-4; Lc. 5:12-16)

40Tuby bniety nguiu ni rac guelguidx ni lá lepra güebiib rut zuguaa Jesús. Chiy guzullibbɨ lony ax guniib:

—Laabiu zelee isiacbiu nare belati sigueldbiu.

41Jesús bgány laab ax bguaaldny tɨɨxbɨ guniigany:

—Rcaazla. Quebiac.

42Chi gunii Jesús ziy, hóracqui gubicá guelguidxqui ax bía tɨɨxbɨ 43chiyru gulunezny laab, raipny laab:

44—Bcuadiag ni iniia liú. Quɨt tu gaiptiu xa xquel guc biacu. Lo bxozzi quegüeliuu liú, ne güené ni riáld chaníu lo Dios zec ni gunii Moisés, par gacbee irate bniety dec abiacu.

45Per bnietqui chi zéb, guzulo rtɨɨchbɨ diidx, gudixteeb lo tutixpac dec abiacbɨ. Parzi aquɨtru güeleeti cuntispac níiu Jesús láani de guɨdx ax cuandzány de nez lo guiix. Per iranezte zá de bniety ni güeguiaa laany.

Currently Selected:

San Marcos 1: zab

Highlight

Copy