Ɖúù 3

Jɔ̃́ɔ́ nyɔ-níɔ-po-nyɔ̀ɔ̀ Gèɖèpɔ́ɔ̀-wùɖù wáɖá-wáɖá

(Máfíò 3:1-12; Máà 1:1-8; Jɔ̃́ɔ́ 1:19-28)

1Ɖé Síízɛ̀ Tàbíɖìà Wóɖóùn-ɓòɖòɔ̀ wuɖuí-kɔ̃̀-kɔ̃̀ɔ̀ zɔ̃ ɓaɖa-bùè sè hm̀m̌ nììnɔ̀ xwíníín nyɛɛ, Pɔ̃́cà Páɖè kɔ̃̀ ma Júɖìà-ɓòɖòɔ̀ wuɖuí. Ké Hɛ́wɔ̀ɖɔ̀ mɔ̀ ma Gáɖàɖíì-ɓòɖòɔ̀ nàìn-nyɔ̀, ké ɔ ɖíí-gàà Féɖò mɔ̀ ma pá ɓě ɓɛ́ wa mɔ̀ ma Étòwíɖíà kè Tàɖàkònátà kɛɛ nàìn-nyɔ̀. Ké Ɖàsánìà mɔ̀ ma Àbìɖínì-ɓòɖòɔ̀ nàìn-nyɔ̀. 2Ké Ánàsì kè Kádyáfà mɔ̀ ma sáa-zà-nyɔ̀ vɛ̀nɛ̀ ɓě. Ɓó tia ɓaɖaa, Gèɖèpɔ́ɔ̀ wùɖùìn ma Jɔ̃́ɔ́ mɔ̀à Zɛ́kɔ̀wáɖádyàà dyú-gààɔ̀ kɛɛ mú ɖé gbǎùn-fúɖúáɔ̀ kɔ̃. 3Ké Jɔ̃́ɔ́ mu ma ɓóɖó séín ɓě nì ma Jɔ́nì-nìɔ̀ wĩin nyɛɛ mú, ké ɔ nì ma zio poɛń. Ɖɛ ɔ nì ma kà zio mú pòɛ̌n nyɛɛ mɔ̀ ɓɛ́ nyɔǔn ké waà nàmàǔn-kpèɖèɔ̀ dyi táà, ɓɛ́ wa ké níɔ kpá, ɓɛ́ Gèɖèpɔ́ɔ̀ ké waà nàmàǔn ɓěɔ̀ kɔ̃in zĩ̀ìn. 4Kǎà ɔ nyu kà céèɛ̀ ɖé Àzédyà mɔ̀à kpáá-ɖɛ̀-cɛ̃-nyɔ̀ɔ̀ kɛɛ céè-ɖɛ̀ɔ̀ mú. Céè-ɖɛ̀ɔ̀ wuɖu ɖá,

“À wɔ̃́ nyɔ ɖòɛ̀ wuɖu ɖé gbǎùn-fúɖúáɔ̀ kɔ̃, ké nyɔɔ̀ ɖá,

‘Ɓě nyu hwìè ɖò ɓó Bounɓoɔ̀ bìì.

Ɓě nyu hwìè sɛ́ɖɛ́ìn dyí ɖò ɓó ɔ bìì.

5Ɓě dyíìn bɔɔ-kpà séín mú,

ɓɛ́ ɓě ké toɖo mɛ́nɛ́-mɛ́nɛ́ kèɛ̀ vɛ̀nɛ̀-vɛ̀nɛ̀ séín ɓíɖíi dyà.

Ɓě nyu hwìèɔ̀ dɛ̀ ɓě kíɖíìn múin nyɛ, ɓɛ́ ɓó ké dyí sɛ́ɖɛ́ìn,

ké ɓě nyu dɛ̀ ɓě kpáìn ɓíín dyiɛ, ɓɛ́ ɓó ké ɓɔ̀ɖɔ̀ɔ̀-ɓɔ̀ɖɔ̀ɔ̀ nì.

6Ɔ ɖǎ ná nìǐn, nyɔǔn séín mu Gèɖèpɔ́ɔ̀ pó-póɔ̀ dyéìn.’ ”

7Ɓó tia ɓaɖaa, nyɔ kúɖúú ɓě dyi ma Jɔ̃́ɔ́ gbo, ɓɛ́ ɔ ké ma wa níɔ po. Ké ɔ cɛ̃ɛ ma wa gbo, ké ɔ ɖá, “Ɓě mɔ̀ sɛɛ̀ dyú ɓě kɛɛ, nyɛ́ po ɓě náún, ɓɛ́ ɓě ké Gèɖèpɔ́ɔ̀ dyoɖo nìà dyiɛń nyɛɛ dyúa gbǔɛ́? 8Ɓě mɛ nyu ɖɛ ɓě ɓɛ́ wa muɛ nyɔǔn dyí tɛ̀mɛ̀ìn kà ɓɛ́ ɓě ɖǎ ɓěɛ̀ nàmàǔn-kpèɖèɔ̀ dyi táà kɛ. Ɓěǐn ɖá ɓɛ́ ɓě kéɛ ɖéɛ ɓě hwòɖǒ bũ̌ cɛ̃iń nì, ɓɛ́ ɓě ké níiń, ‘À mɔ̀ Ééɓòɖòhɛ̃́ɛ̀ nyúà-dyú ɓě.’ Ḿ cɛ̃ɛ ɓě gbo kà ɓɛ́ Gèɖèpɔ́ɔ̀ ɓɛ́ìn sɔ́ɔ́-kpò ɓě nìà kɛ dyí ɖúɛ, ɓɛ́ ɔ ké wa Ééɓòɖòhɛ̃́ɛ̀ nyúà-dyú ɓě mú nyuɛ. 9Gèɖèpɔ́ɔ̀ ɖǎ jùɛ̀ɔ̀ ti dyéìn, ɓɛ́ ɔ ké cu ɓěɔ̀ ɖéé ɖé waà gmɛ̀nɛ̀ɛ̀ ɓěɔ̀ gbo ɖàɓàìn. Ɔ mu cu séín ɓě ɓɛ́ wa se ɓo nɔ̀mɔ̀ dyíin tòɖòɛɛ ɖaɓaùn, ké ɔ mu wa dyéɖé poùn.”

10Ké nyɔ ɓěɔ̀ diè ma ɔ dyi, ké wa ɖá, “Ké nìí, ɖɛ́ à mɛ nyuɛ́?”

11Ké ɔ zà ma ɖé wuɖu, ké ɔ ɖá, “Nyɔ mɔ̀ nyɔ ɓɛ́ ɔ ɓéɖé wáɖá-ɖɔ̀ sɔ̃́ kɛɛ, ɔ mɛ nyí nyɔ mɔ̀ùn se ɖò ɓéɖéɛɛ ɖò. Ké nyɔ ɓéɖé ɖii-ɖɛ̀ kɛɛ, ɔ mɛ nyu ɖɛ dyúáɖòɔ̀ ɖekè.”

12Ké tácì-kpɔ̃-nyɔ̀ ɓě dyi ma ɖekè, ɓɛ́ ɔ ké ma wa níɔ po, ké wa diè ma ɔ dyi, ké wa ɖá, “Nyɔ-ɖɛ-tɛ̀mɛ̀ìn-nyɔ̀, ɖɛ́ à mɛ nyuɛ́?”

13Ké ɔ cɛ̃ɛ ma wa gbo, ké ɔ ɖá, “Ɓěǐn ɖá ɓɛ́ ɓě ké ɖɛ wa ɖá ɓě mɛ kpɔ̃ kɛɛ kɔ̃ zĩ̀ìn.”

14Sójà ɓě diè ma ɔ dyi ɖekè, ké wa ɖá, “Xwɛ̌ à mɔ̀ùn jè nìɛ́? Ɖɛ́ à mɛ nyuɛ́?”

Ké ɔ cɛ̃ɛ ma wa gbo, ké ɔ ɖá, “Ɓěǐn ɖá ɓɛ́ ɓě ké ɖɛ ɖò nyɔ ɖò xwa zà gana-kà. Ɓěǐn ɖá ɓɛ́ ɓě ké ɖɛ ɖò nyɔ ɖò xwa zà ɖé nyɔɔ̀ se-wĩin-tɔ́mɔ́ìn-tɔ́mɔ́ìn mú. Ɓěɛ̀ hwòɖǒ mɛ dè dyi ɓó ɓěɛ̀ pɛ́ɛ̀-wìɖì ɓěɔ̀ jè.”

15Ké nyɔ ɓěɔ̀ nì ma ɖɛ ɖò jè hwìɖǐi dèɛ̌n cá, ké wa nì ma hwìɖǐi poɛ̌n kà ɓɛ́ Jɔ̃́ɔ́ ɓɛ́ìn ma Kɛ́ɖɛ́ìɔ̀ jǔɛ kɛ. 16Ɔ jèɛɛ, Jɔ̃́ɔ́ cɛ̃ɛ ma wa séín gbo, ké ɔ ɖá, “Ḿ po ɓě níɔ, kɛɛ nyɔ kɔ̃̀ kpé ɓúá dyí ké ɔ zi ḿ níǐn dyíɛɛ, ɔ nì dyiɛń. Ḿ se ɖɛ kpa, ɓɛ́ ḿ ké ɔ bǎ-ɖúú buɛ̀ dyɛ mɔ̀ùn. Ɔ mu ɓě níɔ poùn ɖé Zùù Hwɛ̀ǐn-hwɛ̀ǐnɔ̀ ɔ kè nyɛ mú. 17Ɔ ɓéɖé ɔ dùǎɔ̀ xwa, ké ɔ mu ɔ hwítìɔ̀ mú vũùn, ké ɔ mu ɔ hwítìɔ̀ ɖé sáɖáún dyí poìn. Kɛɛ ɔ mu hwítì-fèɖèɔ̀ fɔ̃ùn, ké ɔ nyɛɔ̀ se mɔ́ɔ mu fɔɔ.”

18Ɖé hwìè kò-kò pàɖǎ ɓě múɛɛ, Jɔ̃́ɔ́ dyi ma nyɔ ɓěɔ̀ bɔ̃̌ nɔ̀mɔ̀ dyíinɔ̀ gbo cɛ̃iń nìǐn, ɔ nyí ma wa kpéí-po-wùɖù. 19Kɛɛ Jɔ̃́ɔ́ wùɖù ma ɓóɖóɔ̀ nàìn-nyɔ̀ mɔ̀à Hɛ́wɔ̀ɖɔ̀ kɛɛ gbo ɓó Hɛ̀wóɖóɖìà ɓɛ́ ɔ mɔ̀ ma kà ɔ ɖíí-gàà gmàà kɛɛ jè. Ké ɔ wùɖù ma ɔ gbo ɓó ɖɛ gbà tɔ̀ɔ̀ séín ɓě ɓɛ́ ɔ ɖǎ ma nyuɛɛ jè. 20Ké ɖɛ vɛ̀nɛ̀ ɓɛ́ Hɛ́wɔ̀ɖɔ̀ nyu ma ɓó ɖɛ ɓěa kɔ̃in ɖeɛɛ kɛà kɛ̀. Ɔ po ma Jɔ̃́ɔ́ kpɔɖɔ ɖeín.

Jízɛ̀ níɔ-po-po

(Máfíò 3:13-17; Máà 1:9-11)

21Ti ɓɛ́ nyɔ séín ɓěɔ̀ ɖǎ ma níɔ kpáa, Jízɛ̀ mɔ̀ùn kpá ma níɔ ɖekè. Ti ɓɛ́ ɔ nì ma ɓaàǔn wɛ̃ɛ, dyɔɔ̀ kaà ma wɔ̃, 22ké Zùù Hwɛ̀ǐn-hwɛ̀ǐnɔ̀ dyi ma ɔ kɔ̃ kà gbúɛ́ nìà kɛ. Ké wuɖu ɖò sɔ̀ìn ma ɖé dyɔún, ké wuɖuɔ̀ ɖá, “Mɔ̀ mɔ̀ ní hwòɖǒ-kɔ̃-dè-dyù. Ní hwòɖǒ dèìn m̀ múin.”

Jízɛ̀ ɓǎ nììn ɓǎ ɓě

(Máfíò 1:1-17)

23Ti ɓɛ́ Jízɛ̀ nyuá ma zɔ̃ kpáɖá-nyɔ ɓaɖa-bùè kɛɛ, ɔ dè ma ɔ kũ̀àɔ̀ nyuɛ gbɔ. Nyɔ ɓě ɖá ɔ mɔ̀ ma Jòséɛ̀ dyú-gàà. Híɖàà wóɖóìn Jòsé. 24Mátáɖà wóɖóìn Híɖàà. Ɖíìváà wóɖóìn Mátáɖà. Mɛ́kà wóɖóìn Ɖíìváà. Jánà wóɖóìn Mɛ́kà. Jòsé wóɖóìn Jánà. 25Mátàtádyà wóɖóìn Jòsé. Emɔ́ wóɖóìn Mátàtádyà. Néhɔ̃̀ wóɖóìn Emɔ́. Ɛ́sàɖà wóɖóìn Néhɔ̃̀. Nágà wóɖóìn Ɛ́sàɖà. 26Méà wóɖóìn Nágà. Mátàtádyà wóɖóìn Méà. Sɛ́míà wóɖóìn Mátàtádyà. Jòsɛ́ wóɖóìn Sɛ́míà. Jódà wóɖóìn Jòsɛ́. 27Jòánàùn wóɖóìn Jódà. Wíɖísà wóɖóìn Jòánàùn. Zɛ̀wáɖáɓèɓò wóɖóìn Wíɖísà. Sɛ́àtíè wóɖóìn Zɛ̀wáɖáɓèɓò. Níwàɖà wóɖóìn Sɛ́àtíè. 28Mɛ́kà wóɖóìn Níwàɖà. Ádì wóɖóìn Mɛ́kà. Kósã̀ wóɖóìn Ádì. Ɛ́màdà wóɖóìn Kósã̀. Ɛ́ɛ̀ wóɖóìn Ɛ́màdà. 29Jasúé wóɖóìn Ɛ́ɛ̀. Ɛ̀ɖìɛ́zɛ̀ wóɖóìn Jasúé. Jówíɖíìn wóɖóìn Ɛ̀ɖìɛ́zɛ̀. Mátáɖà wóɖóìn Jówíɖíìn. Ɖíìváà wóɖóìn Mátáɖà. 30Símìɔ̀ wóɖóìn Ɖíìváà. Júɖà wóɖóìn Símìɔ̀. Jòsé wóɖóìn Júɖà. Jónìà wóɖóìn Jòsé. Ɛ̀ɖìákĩ̀ìn wóɖóìn Jónìà. 31Míɖìà wóɖóìn Ɛ̀ɖìákĩ̀ìn. Mínà wóɖóìn Míɖìà. Màtátà wóɖóìn Mínà. Nétɔ̃̀ wóɖóìn Màtátà. Dèɓé wóɖóìn Nétɔ̃̀. 32Jɛsé wóɖóìn Dèɓé. Óɓè wóɖóìn Jɛsé. Bóà wóɖóìn Óɓè. Sámɔ̀ wóɖóìn Bóà. Násɔ̀ùn wóɖóìn Sámɔ̀. 33Ámìnáɖà wóɖóìn Násɔ̀ùn. Ádɛ̃̀ wóɖóìn Ámìnáɖà. Ánì wóɖóìn Ádɛ̃̀. Hɛ́wɔ̀ɖɔ̀ùn wóɖóìn Ánì. Pɛ́wɛ̀ɖɛ̀ wóɖóìn Hɛ́wɔ̀ɖɔ̀ùn. Júɖà wóɖóìn Pɛ́wɛ̀ɖɛ̀. 34Jékɔ̀ wóɖóìn Júɖà. Áázè wóɖóìn Jékɔ̀. Ééɓòɖòhɛ̃́ɛ̀ wóɖóìn Áázè. Tíwàɖà wóɖóìn Ééɓòɖòhɛ̃́ɛ̀. Néhɔ̀ wóɖóìn Tíwàɖà. 35Sɛ́wùɖù wóɖóìn Néhɔ̀. Wɛ́ɖɛ́dyù wóɖóìn Sɛ́wùɖù. Pɛ́ɖɛ̀ wóɖóìn Wɛ́ɖɛ́dyù. Éɓɛ̀ wóɖóìn Pɛ́ɖɛ̀. Séɖà wóɖóìn Éɓɛ̀. 36Káínà wóɖóìn Séɖà. Àfázà wóɖóìn Káínà. Cɛ̃́ìn wóɖóìn Àfázà. Nóà wóɖóìn Cɛ̃́ìn. Ɖémɛ̀ wóɖóìn Nóà. 37Màtúzìɖà wóɖóìn Ɖémɛ̀. Ínɔ̀ wóɖóìn Màtúzìɖà. Jáwɛ̀ɖɛ̀ wóɖóìn Ínɔ̀. Máhàɖáɖèò wóɖóìn Jáwɛ̀ɖɛ̀. Kénàùn wóɖóìn Máhàɖáɖèò. 38Ínɔ́sì wóɖóìn Kénàùn. Sɛ́ɛ̀ wóɖóìn Ínɔ́sì. Áɖɔ̀ùn wóɖóìn Sɛ́ɛ̀. Ké Gèɖèpɔ́ɔ̀ mɛ Áɖɔ̀ùn.

Currently Selected:

Ɖúù 3: ƁB02

Highlight

Copy