Jɛ́nɛ́sì 43

Jòséɛ̀ ɖíí-gàà ɓěɔ̀ kpa Bɛ̃́címà ɖé Íjè-ɓòɖòɔ̀ kɔ̃

1Ɓó tia ɓaɖaa, mɔ́ɔ̀ ku ma wɔ̃ ɖé Kénà-ɓòɖòɔ̀ kɔ̃ ke mìɔ. 2Ɔ jèɛɛ, ti ɓɛ́ Jékɔ̀ kè ɔ gbǒ-xwíníín-nyɔ̀ ɓěɔ̀ ɖǎ ma ɖii-ɖɛ̀ ɓɛ́ ɔ dyú-gàà ɓěɔ̀ zà ma kà ɖé Íjè-ɓòɖòɔ̀ kɔ̃ɛɛ ɖiɛ hwɔɛɛ, wa ɓǎ Jékɔ̀ cɛ̃ɛ ma wa gbo, ké ɔ ɖá, “Ɓě mu ɖé Íjè-ɓòɖòɔ̀ kɔ̃ ɖe, ɓɛ́ ɓě ké à bìì ɖii-ɖɛ̀ wè dɔ̃.”

3Kɛɛ Júɖà cɛ̃ɛ ma ɔ gbo, ké ɔ ɖá, “Gàa mɔ̀à ɓóɖóɔ̀ wuɖuí-kɔ̃̀-nyɔ̀ɔ̀ kɛɛ cɛ̃ɛ ma kóɖó-kóɖó, ké ɔ ɖá, ‘Ɓě se ní dyúa dyéɛ mu ɖe, ɔ sèìn ɓě kè ɓěɛ̀ ɖíí-gàà dyùwèɔ̀ dyi dyɛ hwɛ̀.’ 4Ɔ jèɛɛ, ɔ jǔ ké m̀ dyi wɔ̃́ ɓɛ́ à kè à ɖíí-gààɔ̀ ké mu ní, nìí, à mu wɔ̃́ùn ɓɛ́ à ké nì ɖii-ɖɛ̀ɔ̀ dɔ̃ɔ́ mu. 5Kɛɛ m̀ se wɔ̃́ ɓɛ́ m̀ ké ɔ tò ní, nìí, à se muɛ́ mu. Sepóɛɖé gàaɔ̀ cɛ̃ɛ ma à gbo, ké ɔ ɖá, ‘Ɓě se ní dyúa dyéɛ mu ɖe, ɔ sèìn ɓě kè ɓěɛ̀ ɖíí-gàà dyùwèɔ̀ dyi dyɛ hwɛ̀.’ ”

6Hwɛ̀ ké Éézùɖùɛ̀ mɔ̀à Jékɔ̀ kɛɛ diè ma ɖɛi, ké ɔ ɖá, “Ɖɛ́ kɔ̃̀ jè ɓě cɛ̃ɛ gàaɔ̀ gbo kà ɓě ɓéɖé nɔ̄ ɖíí-gàà ɖò ɖe, ɓɛ́ ɓě dyià ḿ fũ̀à-fṹá nìà kɛ kɔ̃ dyà kɛ́?”

7Wa jǔ ma ɔ gɔ̃̌, ké wa ɖá, “Gàaɔ̀ diè ma à dyi kóɖó-kóɖó ɓá à mìɔùn kè à gbǒ-xwíníín-nyɔ̀ ɓě jè dyí, ké ɔ ɖá, ‘Ɓě ɓǎ nì cĩ́ɛń keè? Ɓě ɓéɖé ɖíí-gàà ɖò ɖeè?’ Ɖɛ ɓě ɔ diè ma à dyiɛɛ, wa kɔ̃̀ jè à cɛ̃ ɔ gbo nyɛ̀nɛ̀ɛ̀. Xwɛ̌ à ɓɛ́ìn dyuòɛ̀ kà ɔ muɛ ma cɛ̃ìn, ɓɛ́ ɔ ké níiń, ‘Ɓě dyà nɔ̄ ɓěɛ̀ ɖíí-gàà dyùwèɔ̀o’ wɛ́?”

8Hwɛ̀ ké Júɖà cɛ̃ɛ ma ɔ ɓǎ gbo, ké ɔ ɖá, “Dèìn ḿ gàa-dyùɔ̀ xwa, ɓɛ́ à ké mu wàɖà, ɓɛ́ à kè mɔ̀ùn kè à dyú ɓěɔ̀ ní kɔ̃̀ ɖà mɛ́. 9Ḿ mìɔùn mu ɔ m̀ gbo ɖe dyàùn ɖé gìɖìǐ mú. Mɔ̄ mɔ̀ nyɔ m̀ mɛ dyuò dyí ɓó ɔ jè. Ɔ jǔ ké ḿ se ɔ m̀ gbo dyà ɖe ní, nìí, mɔ̄ mɔ̀ nyɔ mɛ ɖúɛ kpa dyí ɖé m̀ gbo ɖé ní fɛ̀ɛ̀-wè séín mú. 10Ɔ jǔ ké à seɔ́ ti zĩ̀ìn ní, nìí, à ɖǎɔ̌ má mu, ké à ɖǎɔ̌ má ɖe-dyììn-kpà sɔ̃́ nyu ɓó tiɛ̀ǐn.”

11Púɛɛ, wa ɓǎ Éézùɖùɛ̀ cɛ̃ɛ ma wa gbo, ké ɔ ɖá, “Ɔ jǔ ké ɔ dyi ɓéɖé, ɓɛ́ ɔ ké ná nì wɛ̃́ɛ́ ní, nìí, ɖɛ ɓě mɛ nyuɛɛ kɛà kɛ̀. Ɓě ɖú ɓóɖóɛ̀ ɖɛ kpa ɖɛ ɖíɛ́ ɓě dyí, ɓɛ́ ɓě kéɛ ɖéɛ ɓěɛ̀ ɓɔ̀ɔ̌ ɓěɔ̀ mú po, ɓɛ́ ɔ ké gàaɔ̀ kɔ́ìn-ɖɛ̀ ɓě jǔ, ɓɛ́ ɓě kéɛ ɔ gbo kpa. Ɖɛ ɓěɔ̀ mɛ mɔ̀ nyɔ́ún-nɔ̀mɔ̀-ɖɛ̀-dù kò-kò ɓě kè kũùn ɓɛ́ wa sɔ̀ cu ɓě bũ̌ɛ kè ɖo kè pìtákìò-cùɔ̀ dyúà ɖíɛ́ ɓě ɔ kè ámɔ̀-dyùà ɖíɛ́ ɓě. 12Ɓó kɔ̃in ɖeɛɛ, ɓě mɛ kpa wíɖí nì ma kà ɖé ɓěɛ̀ ɓɔ̀ɔ̌ ɓěɔ̀ múɛɛ dú sɔ̃́-sɔ̃́, sepóɛɖé ɓě ɓéɖé ɓɛ́ ɓě ké wíɖí ɓɛ́ wa po ma kà ɖé ɓěɛ̀ ɓɔ̀ɔ̌ ɓěɔ̀ mú ɖeɛɛ ɖe tò. Ti ɖíɛ́ ɓě ní, wa bĩ ma ɖɛ xwa ɓóɛ jè. 13Ké ɓě mɛ ɖú ɓěɛ̀ ɖíí-gààɔ̀ dyí ɖekè, ɓɛ́ ɓě ké ɖé gàaɔ̀ gbo ɖe mu wàɖà. 14Kpé-séín-ɓéɖé-Gèɖèpɔ́ɔ̀ mɛ nyuɛ ɓɛ́ gàaɔ̀ ké ɓě wìǐn dyé, ɓɛ́ ɔ ké ɓě ɖíí-gààɔ̀ dyɛ mɔ̀ɔ̀ kè Bɛ̃́címà dyi táà, ɓɛ́ ɓě kè wa ké ɖe dyi. Kɛɛ ɓá mɔ́ún jè dyíɛɛ, ɔ jǔ ké ní dyú ɓěɔ̀ dyi ḿ xwai hwɛ̀ɛ̌ muùn ní, wa mɛ hwɛ̀ ḿ xwai pū.”

15Ɔ jèɛɛ, gàa ɓěɔ̀ ɖú ma kɔ́ìn-ɖɛ̀ ɓěɔ̀ kè waà wíɖíɔ̀ dú sɔ̃́-sɔ̃́ ɔ kè Bɛ̃́címà dyí. Ké wa fṹà, ké wa mu ma ɖé Íjè-ɓòɖòɔ̀ kɔ̃, ɖé Jòsé gbo. 16Ti ɓɛ́ Jòsé dyé ma Bɛ̃́címà wa hwìɛ̀ kɛɛ, ɔ cɛ̃ɛ ma ɔ gbo-nì-nyɔ̀ vɛ̀nɛ̀ɔ̀ gbo, ké ɔ ɖá, “Kpa gàa ɓěɛ̀ ɖé ḿ ɓíɖí-taún, ɓɛ́ m̀ ké nyúà-ɖɛ̀ ɖò ɖáɓá, ɓɛ́ m̀ ké ɖii-ɖɛ̀ nyu, ɓɛ́ ḿ kè wa ké ɖɛ ɖi ɓó dyóɖóàǔn.” 17Hwɛ̀ ké gbo-nì-nyɔ̀ vɛ̀nɛ̀ɔ̀ nyu ɖɛ Jòsé cɛ̃ ma kà ɔ gboɛ. Ɔ kpa ma gàa ɓěɔ̀ ɖé Jòsé ɓíɖí-taún.

18Ti ɓɛ́ gàa ɓěɔ̀ nyini ma ɖé Jòsé ɓíɖí-taún wɛ̃ɛ, púɛɛ, wa fɛ̃̀ìn ma mìɔ cá. Ké wa nìɛ̀ ma gbo cɛ̃ìn cɛ̃̀ǐn, ké wa ɖá, “Ɖɛ kɔ̃̀ jè wa dyàà nɔ̄ à kɛɛ mɔ̀ wíɖí ɓɛ́ wa po ma kà à ɓɔ̀ɔ̌ ɓěɔ̀ múɛɛ jè. Wa mu à gbààǔn poùn, ɓɛ́ wa ké à kpɔ̃, ɓɛ́ à ké gǐì jǔ, ɓɛ́ wa ké à jǎkasì ɓěɔ̀ xwa zà.” 19Ɔ jèɛɛ, wa sɔ̀ dyí, ké wa mu ma ɖé Jòséɛ̀ gbo-nì-nyɔ̀ vɛ̀nɛ̀ɔ̀ gbo, ɓó Jòséɛ̀ gbǒɔ̀ wĩín, ké wa cɛ̃ɛ ma ɔ gbo, 20ké wa ɖá, “Ɓɔ̌ɔ̀, à ɓaà m̀ ní, tò ɖùǔ. À dyi ma nɔ̄ ɖii-ɖɛ̀ dɔ̃ùn kĩ́ín. 21Ké à kɔ́ìn ma ɖe. Kɛɛ ti à nyini ma pá ɖò mú, ɓɛ́ à ké ma ɓó pɛ̃́, ké à kaà ma à ɓɔ̀ɔ̌ ɓěɔ̀ dyíɛɛ, púɛɛ, à dyéɛ kà wíɖí à séín tò ma ɓó ɖii-ɖɛ̀ɔ̀ jèɛɛ wóɖóìn ɖé à ɓɔ̀ɔ̌ ɓěɔ̀ múɛ. Ɔ jèɛɛ, à ɖǎa séín ɖe dyà ɓó kàǔn. 22Ké à ɖǎ wíɖí ɖò dyà ɖe ɓó kɔ̃in, ɓɛ́ à ké ɖii-ɖɛ̀ dɔ̃. À se nyɔ ké wíɖíɔ̀ ɖé à ɓɔ̀ɔ̌ ɓěɔ̀ mú po ɖeɛɛ dyí dyuò.”

23Hwɛ̀ ké gbo-nì-nyɔ̀ vɛ̀nɛ̀ɔ̀ ɖá, “Ɔ se ɖɛ ɖò. Ɓě ɓɔ́ fɛ̃̀ìn. Ḿ ɓéɖé ɓěɛ̀ wíɖíɔ̀ ní. Ɓě ɓǎà Gèɖèpɔ́ɔ̀ mɔ̀à ɓěɛ̀ Gèɖèpɔ́ɔ̀ kɛɛ mɔ̀ nyɔ ɖǎ wíɖíɔ̀ dyɛ mɔ̀ɔ̀ ɖé ɓěɛ̀ ɓɔ̀ɔ̌ ɓěɔ̀ mú po.” Ké ɔ síìn ma Símìɔ̀ píé ɓó wa gbo.

24Hwɛ̀ ké gbo-nì-nyɔ̀ vɛ̀nɛ̀ɔ̀ dyáìn ma wa ɖé Jòséɛ̀ gbǒɔ̀ mú. Ké ɔ nyí wa ní, ɓɛ́ wa ké ɓoi dèɖè, ké ɔ tò ma ɖii-ɖɛ̀ ɓó waà jǎkasì ɓěɔ̀ bìì. 25Hwɛ̀ ké wa dyéìn ma Jòséɛ̀ kɔ́ìn-ɖɛ̀ ɓěɔ̀ ti, hwɛ̀ ɓɛ́ ɔ ké ma taún dyi ɓó dyóɖóaún, sepóɛɖé wa wɔ̃́ɔ ma kà wa mu ma ɖɛ ɖiìn ɖé ɔ ɓíɖí-taún wɛ̃. 26Ti ɓɛ́ ɔ dyi ma taún wɛ̃ɛ, wa tò ma ɔ kɔ́ìn-ɖɛ̀ ɓě ɓɛ́ wa dyà ma kà ɖé gbǒɔ̀ múɛ. Ké wa taɓa ma dú hwuɖu ɓó ɔ dyúa. 27Ké ɔ diè ma wa dyi kɛbì ɖé wa gbo pɛɛ̀ ní. Ké ɔ diè ma wa dyi ɖe, ké ɔ ɖá, “À wɔ̃́ ɖé ɓě ɓǎ sùà kɔ̃̀ jè ɓě cɛ̃ ma kà ḿ gboɛɛ gboe? Ɔ nì toɖo kɔ̃ keè?”

28Ké wa jǔ ma ɔ gɔ̃̌, ké wa ɖá, “À ɓǎ mɔ̀à nì gbo-nì-nyɔ̀ɔ̀ kɛɛ nì toɖo kɔ̃ ke, ké ɔ káná dyi.” Púɛɛ, wa taɓa ma dú hwuɖu, ɓɛ́ wa ké ma ɔ dya dè.

29Ti ɓɛ́ ɔ gmɔ̀ ma ɖé wa hwìɛ̀, ké ɔ dyé ma ɔ ɖíí-gàà Bɛ̃́címà ɓɛ́ ɔ kèɔ̀ wóɖóà ɖe dyúáɖò múɛɛ, púɛɛ, ɔ diè wa dyi, ké ɔ ɖá, “Ɓěɛ̀ ɖíí-gàà dyùwè kɔ̃̀ jè ɓě cɛ̃ ma kà ḿ gboɛɛ kɛà kɛ̀ɛ̀? Gèɖèpɔ́ɔ̀ mɛ po m̀ mana kɔ̃o, ní dyú.” 30Jòséɛ̀ hwòɖǒ nì ma sĩɛń, ti ɔ dyé ma ɔ ɖíí-gààɔ̀ kɛ, ké ɔ fṹà, ké ɔ mɔ́ ma dà ɖò dyi, ɓɛ́ ɔ ké ma ɖé vĩ̌ìn. Ɔ jèɛɛ, ɔ mu ma ɖé ɔ ɓí-dyùɔ̀ mú, ké ɔ vĩ̌ìn ma ɖé. 31Hwɛ̀ ké ɔ kpɔ̃ ma ɔ mìɔùn dyí, ké ɔ dèɖè ma dyúa, ké ɔ sí ma ɓó wa gbo, ké ɔ ɖá, “Ɓě po ɖii-ɖɛ̀ɔ̀ téɓèɖè kɔ̃.” 32Hwɛ̀ ké wa po ma Jòsé ɖòùn nììn ɖii-ɖɛ̀ téɓèɖè ɖò kɔ̃. Ké gàa ɓěɔ̀ nììn nì ma téɓèɖè ɖò kɔ̃, ké Íjè-nyɔ̀ ɓě ɓɛ́ ɔ kè wa ɖi ɖɛ kɛɛ nììn nì ma téɓèɖè tɔ̀ɔ̀ kɔ̃. Ɖɛ kɔ̃̀ jè ɔ nìà ná kɛɛ mɔ̀ Íjè-nyɔ̀ ɓěɔ̀ kè Híìbúɖúù-nyɔ̀ ɓěɔ̀ ní ɖììn téɓèɖè dyúáɖò kɔ̃ ɖɛ, sepóɛɖé ɔ mɔ̀ dyi-nyàìn-ɖɛ̀ ɓó Íjè-nyɔ̀ ɓěɔ̀ bìì. 33Ké wa po ma gàa ɓěɔ̀ kò-naín hwɔ ɓó Jòsé nììn téɓèɖèɔ̀ dyúa dyíɛ. Kà wa nyu ma wa pá mú poɛ kɛɛ mɔ̀ kà waà wóɖó-wóɖóɔ̀ nyu ma ɖeín dyi deɛ̀n sɔ̀ìn ɖé nyíɔ́-dyùɔ̀ gbo, ké kpàǔn-hwɛ̀ǐnɔ̀ dyɛ̀ìn nyɛ. Púɛɛ, wa gmɔìn gmɔ̀ìn ma dya, sepóɛɖé wa giniìn ma dyi. 34Ti ɓɛ́ Jòsé tò ma waà ɖii-ɖɛ̀ɔ̀ kɛɛ, Bɛ̃́címà nììnɔ̀ vò ma dyí mìɔ ké ɔ zi ma wa séín dyí. Ɔ nììnɔ̀ mɔ̀ ma nyɔ ɖò-ɖò séín nììnɔ̀ dú hm̀m̌. Ké wa kè Jòsé ɖi ma ɖɛ, ké wa ná ma mìɔ.

Currently Selected:

Jɛ́nɛ́sì 43: ƁB02

Highlight

Copy