Jɛ́nɛ́sì 39

Jòsé kè Pɔ́tífàà gmààɔ̀

1Ti ɓɛ́ Ésìméò-nyɔ̀ ɓěɔ̀ kpa ma Jòsé ɖé Íjè-ɓòɖòɔ̀ kɔ̃, ké Pɔ́tífà mɔ̀ ma kà sójà ɓě mɔ̀ ma Féwòɖò dyí-gmɔ̀-nyɔ̀ɛɛ nyɔ vɛ̀nɛ̀ kɛɛ dɔ̃ ma ɔ wa gboɛɛ,#39:1 Gmɔ̀ ɖé Jɛ́nɛ́sì 37:36 mú. 2ɖɛ séín Jòsé kpa sɔ̃ún wɛ̃ɛ wóɖó ma gbɔ̀ɖɔ̀, sepóɛɖé Bounɓoɔ̀ nì ma ɓó ɔ gbo jè. Ké ɔ cĩ́ ma ɖé ɔ gbo-nì-ɓǎ mɔ̀à Íjè-nyɔ̀ɔ̀ kɛɛ ɓíɖí-taún. 3Ti ɓɛ́ ɔ gbo-nì-ɓǎɔ̀ dyéɛ ma kà Bounɓoɔ̀ nì ma ɓó ɔ gbo, ké kà ɔ nyuɛ ké ɔ sɔ̃ún-kpa-ɖɛ̀ séín wóɖó ma gbɔ̀ɖɔ̀ɛɛ, 4púɛɛ, Pɔ́tífà hwòɖǒ dèìn ma ɔ múin, ké ɔ nyu ma ɔ gbo-nì-nyɔ̀ xwɛ̃́ìn ɔ bũ̌in mìɔ kɛɛ mú. Ɓó kɔ̃in ɖeɛɛ, ɔ nyu ma ɔ nyɔ vɛ̀nɛ̀ mú ɓó ɔ taà gànáɔ̀ kɔ̃in. Ɔ po ma ɔ kɔ̃̀ɔ̀-ɖɛ̀ séín ɓěɔ̀ ɔ xwaún dyi. 5Ti ɓɛ́ Pɔ́tífà mɔ̀à Íjè-gààɔ̀ kɛɛ ɖǎ ma ɔ taà gàná mɔ̀à ɔ kɔ̃̀ɔ̀-ɖɛ̀ séínɔ̀ kɛɛ Jòsé xwaún dyi poɛɛ, púɛɛ, Bounɓoɔ̀ po ma gàaɔ̀ taà gànáɔ̀ mana kɔ̃ ɓó ɔ jè. Bounɓoɔ̀ manaɔ̀ nì ma Pɔ́tífàà kɔ̃̀ɔ̀-ɖɛ̀ séín ɔ ɓéɖé ma ɖé ɔ ɓíɖí-taún kè ɖé ɔ ɓíɖí-geɖeín nyɛɛ kɔ̃. 6Ɔ jèɛɛ, ɔ kɔ̃̀ɔ̀-ɖɛ̀ séín ɓěɔ̀ nì ma Jòsé xwa, ké ɔ dyéɖé se ma ɔ kɔ̃̀ɔ̀-ɖɛ̀ séín ɓěɔ̀ ɖò gbo nì, ɔ sèìn ɖii-ɖɛ̀ ɓɛ́ ɔ ɖiɛɛ ɖòùn.

Jòsé mɔ̀ ma dyíin-nɔ̀mɔ̀-nyɔ̀. 7Ti ɓɛ́ ti wè ɖǎ ma ziɛɛ, púɛɛ, Jòséɛ̀ gbo-nì-ɓǎà gmààɔ̀ dyéɖé nì ma ɔ dya, ké ɔ ɖá, “Ní mɔ́ m̀ ní.”

8Kɛɛ Jòsé nɔ́ɔ̀ ma, ké ɔ ɖá, “Dyéɛ kà ní gbo-nì-ɓǎɔ̀ ɖǎ ɔ kɔ̃̀ɔ̀-ɖɛ̀ séín ḿ xwaún dyi poɛ. Ɔ dyéɖé se ɖɛ séín ɓě ɔ ɓéɖéà nɔ̄ ɔ ɓíɖí-taàɛ̀ múɛɛ ɖò jè gbo nì. 9Nyɔ ɖò se kpé ɓéɖé nɔ̄ taà nìà kɛ mú, ɓɛ́ ɔ ké ḿ dyɛ̀ìn. Ké ní gbo-nì-ɓǎɔ̀ se ḿ ɖɛ ɖò dyí pũ, ɔ sèìn m̀ ɖòùn, sepóɛɖé m̀ mɔ̀ ɔ gmàà jè. Ɔ nìà náa, nìí, xwɛ̌ ḿ ɓɛ́ìn hwòɖǒ-kɔ̃in-nyìnììn-ɖɛ̀ nì kà kɛɛ nyuɛ, ɓɛ́ ḿ ké Gèɖèpɔ́ɔ̀ nàmàǔn bũ̌ nyu kɛ́?” 10Ké ɔ gã̀ ma Jòsé ɖeín dyi nìɛ̌n dyi tee. Kɛɛ Jòsé nɔ́ɔ̀ ma ní ɓó ɔ mɔ́ jè, ké ɔ se mɔ́ ɓɛ́ ɔ ké ma ɔ bũ̌in xwɛ̃́ìn dyɛ mɔ̀ùn.

11Wé ɖòɛ̀ ɓaɖaa, ti Jòsé mu ma ɖé gbǒɔ̀ mú, ɓɛ́ ɔ ké ma ɔ kũ̀àɔ̀ nyuɛɛ, gbo-nì-gàà ɓěɔ̀ ɖò se ma ɖé gbǒɔ̀ mú nì. 12Púɛɛ, màaɔ̀ kpɔ̃ ma Jòséɛ̀ wáɖá-ɖɔ̀ nì ma ɔ múɛ, ké ɔ ɖá, “Dyi, ɓɛ́ à ké ɓó da nì.” Kɛɛ Jòsé sè ma ɔ wáɖá-ɖɔ̀ɔ̀ xwaún, ké ɔ gbǔ ma, ké ɔ sɔ̀ gbǒɔ̀ mú. 13Ti ɓɛ́ màaɔ̀ dyéɛ ma kà ɔ gbǔ ma, ké ɔ sɔ̀ ma gbǒɔ̀ mú, ké ɔ wáɖá-ɖɔ̀ɔ̀ sè ma ɔ xwaún wɛ̃ɛ, 14púɛɛ, ɔ páná ma mú, ké ɔ ɖá ma ɔ gbo-nì-gàà ɓěɔ̀, ké ɔ ɖá, “Ɓě gmɔ̀ nɔ̄, ní dyú-ɓǎɔ̀ dyà Híìbúɖúù-nyɔ̀ nìà kɛ nɔ̄ à taà mú, ké ɓó kàǔn wɛ̃ɛ, ɔ nìǎ à zùǔn zàǐn. Ɔ dyiɔ́ má ḿ gbo paùn, kɛɛ ḿ pánáɔ́ má mú. 15Ti ɓɛ́ ɔ wɔ̃́ɔ́ ní mú-páná-wùɖùɔ̀ kɛɛ, púɛɛ, ɔ sè ɔ wáɖá-ɖɔ̀ɔ̀ ɓíɖíi, ké ɔ gbǔ, ké ɔ sɔ̀ gbǒɔ̀ mú.”

16Púɛɛ, ɔ pɛ̃́ìn ma Jòséɛ̀ wáɖá-ɖɔ̀ɔ̀ ɔ mìɔùn bũ̌in, ké Jòséɛ̀ gbo-nì-ɓǎɔ̀ dyi ma taún hwɛ̀. 17Ti ɓɛ́ ɔ dyú-ɓǎɔ̀ dyi ma kɛɛ, ɔ cɛ̃ɛ ma ɔ gbo, ké ɔ ɖá, “Gǐì-gàà mɔ̀ Híìbúɖúù-dyù ɓɛ́ m̀ dyàà dà kɛɛ dyiɔ́ má ḿ gbo paùn. 18Kɛɛ ti ɓɛ́ ḿ páná mú, ɓɛ́ nyɔ ɖò ké dyi nyɛ̀nɛ̀ɛ̀ kɛɛ, púɛɛ, ɔ sè ɔ wáɖá-ɖɔ̀ɔ̀ ɓíɖíi, ké ɔ gbǔ, ké ɔ sɔ̀ gbǒɔ̀ mú.”

19Ti ɓɛ́ Pɔ́tífà mɔ̀à Jòséɛ̀ gbo-nì-ɓǎɔ̀ kɛɛ wɔ̃́ ɖɛ ɓɛ́ ɔ gmààɔ̀ cɛ̃ ma kà ɔ gbo, ɓɛ́ ɔ dyi níiń, “Ɖɛ nìà kɛ nì gǐìɔ̀ nyu ḿ bũ̌oɛɛ,” púɛɛ, ɔ dyoɖo-hwòɖòɔ̀ dyá ma ní. 20Ɔ jèɛɛ, ɔ kpɔ̃ ma Jòsé, ké ɔ po ma ɔ kpɔɖɔ ɖeín ɖé dɛ̀ ɓɛ́ wa po kã́áɔ̀ nììn kpɔɖɔ-ɖeín-kpá-nyɔ̀ ɓěɛ. Kɛɛ ti ɓɛ́ ɔ nì ma ɖé kpɔɖɔ ɖeín nyɛɛ, 21Bounɓoɔ̀ nì ma ɓó ɔ gbo, ké ɔ po ma ɔ mana kɔ̃, ké ɔ nyuɛ ké kpɔɖɔ-ɖeín-kpá-nyɔ̀ ɓěɔ̀ dyí-gmɔ̀-nyɔ̀ɔ̀ hwòɖǒ dèìn ma ɔ múin. 22Púɛɛ, kpɔɖɔ-ɖeín-kpá-nyɔ̀ ɓěɔ̀ dyí-gmɔ̀-nyɔ̀ɔ̀ nyu ma Jòsé kpɔɖɔ-ɖeín-kpá-nyɔ̀ séín ɓěɔ̀ wuɖuí-kɔ̃̀-nyɔ̀ mú. Ké ɔ mɔ̀ ma ɖɛ séín wa nyu ɖé kpɔɖɔ-ɖeín-kpáìn-naínɔ̀ kɛɛ wuɖu-kɔ̃-zà-nyɔ̀, hwɛ̀ ké wa nyuɛ. 23Ɔ jèɛɛ, kpɔɖɔ-ɖeín-kpá-nyɔ̀ ɓěɔ̀ dyí-gmɔ̀-nyɔ̀ɔ̀ dyéɖé se ma ɖɛ séín ɓě ɔ po ma kà Jòsé xwaún dyiɛɛ ɖò gbo nì, sepóɛɖé Bounɓoɔ̀ nì ma ɓó Jòsé gbo, ké ɔ nyuɛ ké ɖɛ séín ɓɛ́ ɔ kpa sɔ̃ún wɛ̃ɛ wóɖó ma mú mìɔ.

Currently Selected:

Jɛ́nɛ́sì 39: ƁB02

Highlight

Copy