Lúcas 23

Ore jno Jesús údi aja eduguéjnai Piláto

(Matéo 27:1-2, 11-14; Márcos 15:1-5; Juan 18:28-38)

1Enga jé u uje judíode ore asutedie, ore chague jmame jnese ga ore chijna Jesús aja ore asutépise, rómagosi, uje i u Piláto. 2Uje ore chimate rágaja Piláto iquei ga ore chijnime darade ome Jesús uje ore chaguhéta cuchade gai jnese. Ga ore chósi tome:

–Eduguéjnai Piláto á, yico jnani udé iji ijnimingone dara gai ome yocurasade judío diríca. Chiese que yocajnei tu gotique ujetiga yoco yocoré ome rómagosode uaqueduguéjna cuchábi. Mu que gusu udojo mu chingopo raja uyoque rĩ enga chiese yoquijnati Crísto u ujetiga yoco yoqueduguéjna cuchábi iji.–

3Jecute Piláto jĩrique doi ga catecã́ri ga chojningame Jesús:

–¿Ga jec ũré ga judíode ore eduguéjnai gotique u ua ya?–

Enga Jesús chajnai ga chósi tome:

–Cachi jé u arĩ́e baruode udore quigode uje bẽ́caraja yu que.–

4Enga jé u uje Piláto chojningame judíode ore eduguéjna cuchábode ore:

–Que yisípise jnani tuté bárique gotique jõ.–

5Mu judíode asutedie ore chajopise rágaja dájningai ome. Ga ore chojningame Piláto:

–Cachi uté bádatéode upúsu arĩ́e uje chijnime darade ome yocurasade ore iji Judéa údode jnese ujetiga ca ore tangaripísi deduguéjnane, rómagosode ore. Mu chajnerame dacajnaqué gajnaréngone gaté uje chacate ore iji Galiléa iji taningapísi ga jé chuságaja udé deréjnai ome Jerusalén idaisórone ore uyoque to.–

Ore jno Jesús údi gaté aja Heródes

6Uje Piláto chudute udore ore ojningane cucha ga chojningame ore:

–¿Ga jec ũré uaque ga galiléagosípise uté a?–

7Uje jec ũrepise ore ome uje galiléagose ga Piláto chojninga:

–Jé arec ujeta aróchobája ore eduguéjna cuchábi uje uté i tu Heródes ga chimope to.–

Uje qui tu gu uje Galiléa jogosórone ore eduguéjnai uté gajnepídi tu ujeta doi dasocárique ome.

Ga a ca piraque ore áyipiedie ome ñane gotique uje e dimane Heródes iji Jerusalén idaisórone ore gari iji dirode udore. Jecute jĩrique ore jnosi Jesús údi aja ore eduguéjnai Heródes. 8Uje Heródes uté gotique chimo Jesús to ga nínapúsu yui. Uje diyajmaque gu uje chudute uté ujnoméone to ga jecucha potapísa jeta chimo uté to. Ga potapísa ujetiga Jesús pésabu dapesute cucha pibojma iji uté edomitígo to. 9Heródes catecã́ri jóroque Jesús ome cuchade, mu que Jesús chajnai gotique. 10Mu qué judíode ore asutepísedie sacerdote déji uté to, jé aja Moisés urusarane atatasórone ore. Enga ore chaguhéta cuchade Jesús gai enga ore chajo raja daruode quigode. 11Enga Heródes, jé aja soldádode que ore ajéngome Jesús go uje ore chujñieta. Uje ore doi ga ore na Jesús aja iguidé ueradedie uje cho eduguéjnane iguidedie. Ga jĩrique Heródes chirógapo aja Piláto rĩ. 12Enga jĩrique Piláto, Heródes ore chise dáringane pimeserãque ome ñane jé iji diri uté. Uje ore umajósõre ñane nanique iji taningárique.

Ore chimanipise dáyipiedie ome Jesús úringárique chuque

(Matéo 27:15-26; Márcos 15:6-15; Juan 18:39–19:16)

13Iji cucha dacadode udojo quigade ga jé u uje Piláto chamáta judíode ore asutepísedie sacerdote, jé aja Moisés urusarane atatasórone ore aja ñane, jé aja ayorébui ore rĩ. 14Enga chósi tome ore:

–Judíode uacaríño jnani uté údi que aja yu. Uje uacojnichome yu que: "Jnani tudé que chajire re ome dajnimingone dara ome yocurasade." Yicatecãripísi jnani tuté que ome cuchade udore jnese. Mu que cucha marínga yise uté bárique cucha que, uje yucué jórogui uacaborátajade cucha ome que múñi. 15Que yujoi eduguéjna Heródes chise bárique to go, jecute jĩrique chatire yoquibai. Jecute que yirajagopise yoquisocáringome uté ome úringárique chuque. Uje que yico bárique cucha gu.–

16Jecute chojninga:

–Gusu jne ujetiga yo yujuñame uté mu a jĩrique yĩrapome jne rĩ.–

17(Uje e chise ore jnusinamáni dire ga Piláto gajnei tu ujetiga chirame dajurúgayode chojmarárique, mu jecucha doi judíode ajegaitíguiji pujurúgayode ore ujetiga chirame.)

18Mu que ayorébui chise Piláto áyipiedie unétique. Ga ore jnese chojningame:

–¡Úngare, a ca u bojningai uté gotique, mu jec arec ujeta Barrabás u baramérique jne!–

19Barrabás uté gotique bade u uje nejéna ujode judío aja ujetiga ore tagu ore eduguéjnane áyipiedie aja iji ore idai údode. Jé bade upo rĩ uje chujé dojórique ayoré. Jecute ore suru gai nanique. 20Mu qué Piláto catecã́ri ayorébui gaté ujetiga iramei jé u jórogu Jesús. 21Mu ayorébui ore chinguíra dabijnanone aja uje ore chejnápusu ga ore chojningame:

–¡Jé ajéyo Jesús uté, ga ajóyo aja curesérique gai!–

22Enga e chise gadióguei uje Piláto qué catecãrápoi ore gaté rĩ ga chósi tome ore:

–¿Jé uté ipesutique cucha gajnareque que a? Uje yajiripise uté adode aja quigode mu que yise uté bárique gotique ome úringárique chuque. A yope yujuñame ga a jĩrique yĩrapome jne rĩ.–

23Mu ayorébui chajnerame dájningane ome. Ga judíode eduguéjnane sacerdóteo, jé aja ayorébui ore, ore chinguíra dabijnanone aja jnese uje ore ajegaidi tu ome úringárique chuque gu. Mu Piláto chachopise ore ipojnaquéode gu uje ore chajnera dájningane údi ome. 24Ga jé jogadi tu uje tẽra Jesús ome ore ujetiga ore doi dasocáringome. 25Enga Piláto uté doi ore áyipiedie enga chirame Barrabás, dajurúgai uté uje suru gai ome bárigo ica. Uje bade u páyipie gajnaréngueringui ome deduguéjnane ore, jé aja uje ayoré yungore to ica rĩ. Jé basa ga juéga Jesús ome ore ga chojninga:

–Beyoi uacasocáringome uté jne.–

Ore chajo Jesús aja curesei gai

(Matéo 27:32-44; Márcos 15:21-32; Juan 19:17-27)

26Uje ore jno Jesús údi aja cachodi yui ujeta ore chajo aja curesei gai ga ore chise jnanírique uje idai tu Cirene. Enga jnani uté i tu Simón, enga uté quene tṍraji erámi. Mu soldádode ore doi uté ga ore chisi ome Jesús gajnei curesé ome uté ujetiga chijnongamája Jesús quigade aja cachodi yui. Enga que togome Simón uté gotique ujetiga chetaque soldádode áyipie ome re.

27Enga ayoréburique ore nóna to, jé aja chequebúrique ore to rĩ. Ga chequedíe ore chisa dabade aja daquigode uje ore poji Jesús ejode ome dajnusiétigade ome uté. 28Mu Jesús chaquĩ́ra ore ome ugoi ga chojningame ore:

–Jerusaléngotodie uaque á, jé ca abóyo yejode. Mu uacagoyedie jé gajnetodie urásu uaque. Jé gajnesórone urásu uacabode rĩ. 29Uje a chise deréjnai jne ujetiga Jerusalén idaisórone uacajnei pujuyaquérique chise uaque. Enga a ore chojninga: "Omi turásu ujetiga abere yoque enga íjnoque yocabode." 30Uje a Dupade ca chajire re ome dajuyaquédatéi tome uaque dirome. Jecute a ayoréode ore edosari jóroque raque dirome iji jmainie ga a ore chojningame raque dirome: "Jé gotique gu a uje que cucarãte cuchábode udore péro yoquibáyode jnese. Uje que yipótago yimóngo jóroque Dupade ujuyaquei tuté gotique to a. Jeoga yocajéode u jórogu ujetiga cucarãte orocórigui chaco jóroque yoquibáyode." 31Dupade cho pore ijõre iji yu ome yúringai ayoré paraque marínga, jé juegate yu ujetiga ajéyo yu uje uacamácho yu aja jnumi. Jé basa ga Dupade cho pore togué iji uaque ome uacáringane ayoré sijnácho. Mu jecute a dopísi datéringáringo ome uaque jne ome uacáringáringo pumajo.–

32Ca gusu Jesús go uje ore jno údi ome cachodi uté mu ore cháta ayoré gárerigo to uje oriechoqui cuchape ore ujeta ore cho dabaya Jesús to. 33Mu ore chise ore gajmitique uje i tu Patodé Ajnoquei. Ga ore chicha Jesús ore cachodi aja. Ga jé ore chátaja jnani oriechoqui gareiso ore uje ore chajo ore aja cureséode to. Ga ore chicha uñai aja Jesús ãrachua. Jé basa ore chicha uñai aja arasé. 34Mu qué ore déji Jesús gari uje ore chajo aja curesei ga Jesús catecã́ri dayé Dupade ome ore ga chósi tome:

–Yapá, ca o bajocaningame ore jne. Que ore chiraja uyu gosi gu.–

Uje e ore chimate Jesús ore aja cureséode ga soldádode ore canáriji Jesús iguidedie ejode ujetiga ore ajñamini yungónique gajnei Jesús iguidedie. 35Mu ayorébui ore toji Jesús gai jnese. Enga ore asutérigui chujñietapise gaté ga ore chósi tome:

–Cajicho to uté. Chiqueta ayoré unejátigo diríca múñi que doi ga chiquetape re gajneri. A yimóngorase ujetiga jé ũrepise ome uje chiese Crísto u, Dupade ajegaidipísi uté gotique.

36Enga jé cho soldádode to uje que ore ajéngome gotique rĩ. Ga ore chujñieta to. Ga ore sose yui ga ore chisi ome cucha otatique ome uje sujnapise ujetiga chóji. 37Enga ore chanire ga ore chósi tome:

–Ga jé ũrepise ga judíode ore eduguéjna cuchábi gotique ua ya, ga be ga aquetape ua iji uté.–

38Mu ore chicha dajuyárigo darusãraque aja Jesús gatoi gai iji gajnei curesé. Uje ore urusarane udore u purusãraque quedéjnane. Ga gréciagosode ore urusãraque uñane. Jé rómagosode ore urusãraque uñane. Jé judíode ore urusãraque uñane. Enga quigode u udojo: "Judíode ore eduguéjna cuchábi u udé."

39Mu oriechoquíode uñeque qué tṍra daruode aja Jesús to uje e déji gaté to múñi uje ore chajója curesei. Ga qué pojna Jesús to ga chósi tome:

–¿Jé gotique gu a uje chiese Crísto u ua múñi jé qué be ga aqueta ua, ga aquetápo yoque to jne rĩ?–

40Mu oriechoqui uñai chajnai dajõrai uruode ome Jesús uje chirota Jesús gu. Ga chósi tome:

–¿Gotique gu a uje a ca atodo Dupade to a? ¿Ga jé ca amo to a uje yocopise ñane ome yocúringane pujuya iji cureséode udojo gatéode a? 41Yirajágo uje que ore chujé yoque bisideque go. Mu ore chiraja yoquibade cucha. Jecute yocajnenguíraso ore ujuyaquéode udore. Mu jé basa ga jnani tuté iji yocujai, que bárique cusipise mu jé ore chujé bisideque to.–

42Enga jé u uje jnani oriechoqui tuté uje chirota Jesús qué catecã́ri Jesús ga chósi tome:

–Jesús á, ujetiga ese báringárique dacasuté dirome iji bedai ga ca báyipieraque jnoji yu to dirome.–

43Enga Jesús chajnai uté uruode ga chósi tome:

–Jé ũrepise yu ome yuruode uje yósi te ome ua, a jĩrique yimóngo ñane gajneri iji yapade idai iji gaté, jnupe ueradi, uje baqui jé u to gu.–

Jesús itoringai u

(Matéo 27:45-56; Márcos 15:33-41; Juan 19:28-30)

44Enga a e déji guedé gatócoro iji deréjnai tuté. Mu ore chunina mu deréjnai tocade ome ore ga topiepise jnumi ga jé chuságaja guedé uje cho jñuque uje topiéjna jnumi. 45Jecute que guedé pusapoi dáringárique guedé rĩ. Ga topiepise edo. Mu jé basa ga borapeque cuchábi casé iji Dupade iguíjna cuchábi ajei puyai yui dajúguiji gatócoro. 46Mu cuchade udojo chejna daguesi ga jé u uje Jesús tibite. Ga chósi te:

–¡Yapá, yẽra yáyipie tome ua ujetiga yijíñome yu iji bajmainie jne é!–

Mu chejna daruode udojo guesi ga jé u uje toi.

47Uje soldádode ore eduguéjnai rómagotique pañaji Jesús adode udojo ga jec u uje tija Dupade ga chósi tome:

–¡A jé ũrepise uje jnani ujñapetaque uté jõ!–

48Uje ayorébujnane ore chimo cuchade udore ome raque uje chiquetápise raja ore ga jé jogadi tu uje chajuguipise ore agutedie. Ga ore jnoji uté ga ore chujé daróbedie aja daquigode, uje imoi tu gu uje jnusiétaguipíse ore ga ore chopise dáyugu raque. 49Mu Jesús jõráringo jnanío jnese, jé aja chequérigui rĩ uje ore chajna Jesús iji Galiléa, qué ore cháji Jesús cachodi ujetiga ore chirote iji. Mu ore ujánique cuse iji cachodi tuqué.

Josérique chijóchame Jesús uje Arimatéa idáisõre

(Matéo 27:57-61; Márcos 15:42-47; Juan 19:38-42)

50-51Enga jnani parátique déji nanique uje uté i tu José uje idai i tu Arimatéa iji ore uniri Judéa. Uje judíode eduguéjna cuchábode jõra uté; e mu cãra dasocade ome ore, uje ũrepísome isocade. Jecute chetaguipise dojode eduguéjna ore isocade ome Jesús ucácasé uje ore chimanipise aja jnumi. José uté changuretapise yui ujetiga Dupade chácariji dáringai eduguéjna cuchape ome darasade ore jnese.

52Uje Jesús e toi, enga José uté jno ga chijócha Piláto ajei údi ujetiga Piláto juégabá Jesús ga chañuru Jesús guio ujetiga chijóchamome. 53Enga Piláto juéga ome ga jé u uje José uté jno ga chicai Jesús ore cachodi. Ga chiramurase Jesús iji curesei ga chipocásu gai iji ore itarãtique borapeque ueradéjna. Ga jé u uje jno údi aja ducóderigui. Enga chise ore ejopiéraque iji cucarané cucháberaque uje edo dimane ore imané. Mu cáma pijmarique ayoré totígaja gotique. Jecute jĩrique na Jesús taja. 54Mu uje dire puyai tu dirome, enga jé u uje ayoréode ajiriguipise dasagode ujetiga ca ore chisa dejórique iji dire puyai tuté dirome.

55Mu uje cáma chise dire puyai tuté ga galiléagotodie ore chajmita Jesús ode jogatique to. 56Enga uje ore chajni aja daguíjnane ga ore socárome datígo uje ore pésu dadode ome Jesús yui ujetiga ore chaguñéra gai dirome ome doitígo cucha otate ai unéño, acéiteode ore. Mu a ca togome ore ujetiga ore chajmitápo ode rĩ iji diri uté. Uje jé ore gaidode u Moisés iroquéode urusarane quigode gu ujetiga ca ore chó iroquérique gánique uje que pujuegate cucha pisatíguiji dire puyai tuté.

Currently Selected:

Lúcas 23: Ayore

Highlight

Copy