Lúcas 21

Chequé ecáraque chamáta Dupade gajnenie pláta aja to

(Márcos 12:41-44)

1Uje Jesús qué déji Dupade iguíjna cuchábi ajei ga chimo ayoré atade ore uje ore chijmare daplátadie aja pírique uje ore amátajai u ome Dupade. 2Uje chajire mu chimo chequé ecáraque to uje jmataguepise. Ga chijmarósi dapláta guebeque garatígo aja pi tuté to. Enga ore ipláta guebei tuté i tu cobre nanique uje ca urénga oréraque cuse nanique. 3Jecute Jesús narare ga chojninga:

–Jé ũrepise yu ome yuruode udojo uje chequé eca jmatague tuaté chejnási daplátabidie aja Dupade uje chisi ome. Ga gueranenie sué ore gai jnese. 4Chamáñaje udore uñane ore chisi ome dapláta soguedie ome Dupade. Mu chequé eca uaté uje jmatague, chisi ome dapláta ugurábidie ome Dupade.–

Jesús chatata uje Dupade iguíjna cuchábi a íjnoque jogatique jne

(Matéo 24:1-2; Márcos 13:1-2)

5Mu qué uñéngo tijapísa Dupade iguíjna cuchábi uje ueradipíso jogosórone cucha jnese. Uje ayoréode guẽrapáicho. Ga jé chopome cucaranenie rĩ uje ore chujé aja ñane gáyode iji dosadode. Enga ueradepísi to rĩ.

6Mu Jesús chudute ore uruode udore ga chojninga:

–A chise dínique jne ujetiga ore chajnangarasipise aja tijode Dupade iguíjna cuchábi udé. Ga a ca pimópo cucaranéringui jogatique jne rĩ ujetiga chuguéja ñane gánique.–

Cucha tocachutígo jne ome erámi eruei yui u udojo

(Matéo 24:3-28; Márcos 13:3-23)

7Uje ore chudute Jesús uruode udore ga jĩrique ore catecã́ri ome. Ga ore chojningame:

–Yocacadisṍri á, ¿jé cho rique jne a, ujetiga cuchade udore tocade a? ¿Jé chopo rique cuchade gãrapiérigui jne rĩ a ujetiga di iji yoque a?–

8Enga Jesús chojningame ore:

–A yingoba quigode aja uaque jne. Mu añuchopúsu uaqueo ujetiga ca pãraque uaque. Uje a jiépisi ayorérigo ore jne ujetiga ore chósi tome uaque: "Cachi uacangarádejnai Crísto uyu arĩ́e. Beyoi ga angáchoi yu." Jeoga ore nararirásome uaque jne ga ore chojningárasome uaque: "Erámi eruei e u udé." Mu jé ca angáchoi udore gotígo ore jne. 9A angáchoi pujnoméringo ome pocaningane iji erámi údode jne. A adúchopo rĩ ujeta ore tagu yoqueduguéjnane aja ome dajocaningane ujeta ore chejna ñane iji erámone údode. Mu jé ca chajuque uacagutedie gotique. Uje a arajáyo jne uje bajácho cuchade udore jnese ujetiga tocade. Mu erámone eruei cáma upúsu gotique jne.–

10Qué Jesús jno dacajnaquéode udore údi ga chósi tome ore:

–Mu a arajáyo erámi eruei yúode jne ujetiga ayorébuode ore socárome ñane iji erámi údode ome dajocaningádatérigo ome ñane. 11Ga a jnupe tãrarachutígo chise uaque to. Jé aja chaguhéode ujetiga socárome uaque. Jé aja dequejnaréquedatérigo rĩ ujetiga tṍraji dajñarenie ome uaque. Jé basa ga cuchárigo a tṍraji gaté to jne ujetiga cucha pimojma ujetiga chajuque ayoréode uacagutedie iji jnumi tudé jnese jne.

12Mu ujetiga cáma cuchade udore tocade jne enga a qué ore chisa uaque bajaque jne ujetiga ore socárome uaque ga ore cho damajo uaque. Ga a jé u ujetiga ore jno uacádi aja judíode ore aquiningaméone ujetiga ore chaquĩ́ra uágome yadode. Jeoga ore suruábu uacabai. Jeoga ore chijna uágaja ore eduguéjna cuchátigo ujetiga uacabade u yadode ujeta atatayo. 13Mu ca acusúyo uágome cuchade udore jne jã. Uje a qué piotiguei tu jne ujetiga acacho ore to ome yadode. 14Mu jé ca oyo uacáyugu uaque ome uacarúrigo ome ore ujetiga ãraracho uacabánique. 15Uje a yerané uacáyipie etotiguérigo to ome uaque jne, jé aja pirajatigárique rĩ ujetiga arajáyo uacaru quitígo ome ore. Uje a ca uacamajosórone chiraja daru quitígo ome uaque jne gu ujetiga ore chajnai uaque. 16Mu a chise dínique to jne ujetiga ore tẽrame uágome ore jne ujetiga ore chujé uaque. Enga a uaquẽrasórone u uacayode jne, jeoga uacajõráringo, jeoga uacaguiotígo, jeoga uacojórigo ayoré rĩ. Jecute a ore chujé uacuñéngo to jne. 17Mu a chise dínique to jne ujetiga ayoréode iji erámi údode ore chetaguipise uaque. Mu a uacabade u yadode uje uacatatayo. 18Mu ca oyo uacáyugu uaque jne, uje a Dupade chiqueta uaque jnese jne. Uje a ca toc ujetiga uacuñeque bijna ome. 19Mu ujetiga adotayopísa uáguiji uacanguretigai enga a eso uacáringáringo ueca jne iji deréjnane jnese.

20Mu ujetiga amóño ore idai tudé Jerusalén ujetiga umajosórone ore chĩro ore gai, ga a arajáyo jne uje qui tu gu ujetiga ore chejna ore gajneri. 21Ujetiga udojo tocade jne ga cucha ueradi u ujetiga judéagosode jĩrique chayome ore ga ore chicáji cucaranone ójodie. Jé basa ga jerusaléngosode, ujetiga ore chayorásome ore to ga ore chayója dedáidatéi eruéode iji guesode. Ujetiga uñéngo déji erámi ga jé arec ujetiga ca ore chajnésara uraque dedáidatéi. 22Uje dirode udore u gu uje Dupade ujuyaquédatéi chise ore uje jnani bajade, Dupade uruode urusãrasórone, ore urusarane quigode a tocade jnese jne gu. 23Yosõripísi jóroque chequérigui ore yui jõ iji dirode udore ujetiga qué ore icárigui déji ore ajéode. Jeoga qué ore chacucãrirase dabatígo. Uje a ore chejnarenguipisirase raque jnese iji puniri uté údode jnese. Uje a gajnarenguipise Dupade ujuyaquei uté ome ore uje a ore chisa jóroque dabade iji jmanéringui jne. 24Uacuñéngo a déji jne ujetiga chuque uáguiji pocaningáringo. Mu a uacuñéngo dépoji jne rĩ ujetiga pisaque uáguiji ore jocaningane, ga ore chijna uágaja punirone uñéngo jnese. A purása quedéjnane ore sué jerusaléngosode gáyode jne ga a ducañerájma ore idai tuté iji ore jmainie jne jé aja ujeta Dupade chaquĩ́ra ore ome ore ájningáringo ome ore.

Dupade utocaidi Crísto isocade u udojo jne jeta diapo rĩ

(Matéo 24:29-35, 42-44; Márcos 13:24-37)

25Mu cuchade udojo quigade enga jé basa ga erámi unirisórone a ore chimópo ore ingongóningáringo ome guedé, guedoside, guédodie ore rĩ. Ga a jogadi tu jne ujetiga chajuque erámi unirisórone ore agutedie jnese. Uje a yote quedéjnane chijocase re iji jnumone jne ujetiga pésu dajocarãque cuchátigo. 26Jecute a erámi jogosórone a ore cho sere iji jmainie jne ome ore isadodéringáringo. Uje ore áyipiedie déji cuchade udore gu ujetiga tocade iji erámi údode jnese. Ujetiga doi datéringáringo ome guedé, guedoside, guédodie ujetiga ore chijocase re iji gaté jne rĩ. 27Mu a ore chejna cuchade udojo guesi jne ga jé u ujeta yiqueta yu aja ore ujetiga ore chimo Dupade utocaidi uyu. Mu ujetiga yṍraji gaté ome ore ga yibiéraque u gue abujáraque aja jnumi ujetiga ore pañaji yúringai ujopíerãque, yúringai pujnuéngaisṍre rĩ. 28Ujetiga adúcho uje yojningane udore uñane e tocade, beyoi enga ajnusoi uágome. Enga ajicho gaté ome uacaquetasṍri uyu yiríringai yui.–

29Jesús qué jno dacajnaquéode údi mu pésu ejémplo ga chacãra dacajnaquéode aja poria uje i tu higuéra, jé aja poridie uñanie jnese. Enga chósi tome ore: 30–A arajáyo poridie isocade arĩ́e. Uje poridie acarane e sué ga imoi tu gu uje é idógosi sequeré. 31Mu jé isocai tupo rĩ ome cuchade udojo jnese uje tocade ga a arajáyo to gu ome ore uje a idógosipise Dupade diringai ujetiga uté chácariji dáringai eduguéjna cuchape ga oyópo uacarása iji rĩ iji jnumi tudé.

32Jé ũré yojñane uje cuchade udore jnese a tocade jne uje cáma ore toi iji deréjnane unojo. 33Gaté, jnumi a ore íjnoque jnese jne. Mu jé basa ga a ca yuruode íjnoque to jne. A ore chise dáringane tocachucho jnese.

34Jecute añuchopúsu uacadode guio. Socaseti ca anínaño yu jeta yise uáguiji uacate gajnarétigo gánique: ujetiga qué beyoi piboqueréringai adode ome uaque to, jeoga qué ójiyo yote pioi ga yote pioi yuque uaque. Jeoga yise uáguiji uacáyuguhebátigarique ome erámi jogosóningo cucha udore. 35Yiríringárique gajnua u trámpa uje chisa cuchisode enga suru ore gai uje que ore chunina. Adi a jé u ome ore jnese iji erámi údode jnese. A ca ore chunina yiríringai jne ujetiga yise ore. 36Jecute ajuso uaqueo ga dimane uágome yiríringárique yui. Enga ca oyo uacaja ujetiga acatecãchoi Dupade iji deréjnane jnese ujetiga apíchome cuchade udore jnese jne ujetiga chise uaque. Acatecãchópoi Dupade rĩ ujetiga ca agutúyo uágome Dupade utocaidi uyu jne ujetiga agúsoi yiquei.–

37Enga jé u uje Jesús cháji Dupade iguíjna cuchábi iji dirode jnese ujetiga chacate ayorébui ore iji. Mu chise dejade ga chicáji cucarani ójo ujetiga cháji uje cucarani uté i tu Olívos. 38Jecute ayorébui ore choberipísi Dupade iguíjna cuchábi yúode iji dúrasabídie. Uje uneripise Jesús acajnaquéode yui ome ore gu ujetiga ore tangaripísi.

Currently Selected:

Lúcas 21: Ayore

Highlight

Copy