Lúcas 18

Jesús pota jeta yajógo yógaja yoquicatecãraitigade ome Dupade, ga pésu ejémplo ome chequé ecáraque uje chutṍri ore eduguéjna cuchátique juez gatuaque

1Jesús qué jno dacajnaquéode údi ga chósi tome ore:

–Acatecãchoi Dupade gatuaque enga ajóyo uágaja uacacatecãraitigade. 2-3Ga a yacãrape yacajnaquéode aja chequé ecáraque uje chayója ore eduguéjnarique gatuaque iji dirode jnese ujetiga uté chaquĩ́ra umajosórone ome ore ate gajnaréngone ome. Mu ore eduguéjnai tuté que ajéngopísome Dupade gotique. Que ajengopome dojórique ayoré rĩ iji darasade ore. 4-5Iji taningai ga que juez uté tangaripísi chequé eca. Mu e chachopise chequé tuaté uje ijója. Enga chojninga: "Que yangári cuchárique. Mu a yangarami chequé eca tuaté jne uje qué chutṍri yu. Enga chabu chisape yu iji de jne. Yiji ga yirotape jne."–

6Mu yocangaráni Jesús cho quique daruode ome ore, ga chojninga:

–Udé isocai u ome ore eduguéjna sijnátique. 7Mu Dupade suépise eduguéjna sijnai uté adode gai. Uje chirota dajnéone, dangarásorone ore ujetiga ore catecã́ri gatuaque iji dirode, dejade ore. Ga que cho daja ome ore ujetiga cháta cuchárigaja ore. 8Yojningame uaque: uje Dupade a jĩrique chirota ore to jne. Mu yáyipie déji Dupade utocaidi uyu yiríringai ujetiga yĩriápo iji ore iji jnumi rĩ ujetiga ca yise uñéngo iji jnumi ujetiga changureta yu.–

Jnani gárerigo ore chicáji Dupade iguíjna cuchábi ujetiga ore catecã́ri Dupade iji

9Enga Jesús qué chacate ore mu chacãra dacajnaquéode aja cucha uñeque. Uje chimo ore gu uje ore chicotapise raque ome dáringane ayoré caniracho. Mu ore dojnóngapísaja dojode ayoréo. 10Ga jé u uje chósi tome ore:

–Jnani gárerigo ore chicáji Dupade iguíjna cuchábi ujetiga ore catecã́ri Dupade iji. Enga fariséo u uñai. Jé basa ga ore eduguéjna cuchábi iroque uñai uje utaidé ore iplátadie iji ore idai údode ome impuéstos. 11Mu fariséo u uje chisi dabai ome dacatecãraitigade uje catecã́ri Dupade ga chósi te: "Dupade, yacaranguipis ome ua uje que yo yujórigo ayoréo. Uje oriechoquipise ore. Ga jecucha ore chécãre dacotedie rĩ uje que ore cho daja ome date gajnaréngone. Ga ore gajnui u jnani tudé uje déji yari iji de uje yoqueduguéjna cuchábi utocaite uje utaidé ore iplátadie. 12Uje a araja yu uje yo yuyáguiji yu ga gare iji semánanie jnese ome ua. Barajápo rĩ uje jecucha ga yẽrame ua ome yiplátadie péode."

13Jé basa ujoi jnani uje ore eduguéjnai iroque ujeta chutai ore ipláta ome impuéstos, uté chopise dáyugu re. Idájapísiji ore uje chajengopísome erámi gu. Ga tajia re iji dayaridi. Mu chujé darobé uje imoi tu gu uje jnusiétaque uje cho dáyugu re. Ga jé u uje chojninga: "¡Dupade, osõrape yu jne! Bamo yu uje ayoré sijnanguipísi uyu gu."

14Jecute yo yuruode quigome uaque. Uje jnani tuté ore eduguéjnai iroi uté uje utaidé ore iplátadie, a chajni aja daguíjnai ga Dupade imeserãi tu. Mu que Dupade chise fariséogosi catecãraitigade unétique. Mu a Dupade sosi uté gosi iji jnumi ujetiga gosi chicotapise re. Jé basa sosi uté gosi iji gaté ujetiga ca gosi cho ayorédatéi iji re.–

Jesús icotaquei u ome disi parátagabode

(Matéo 19:13-15; Márcos 10:13-16)

15Uje Jesús qué chacate ore mu ayoréode ore chise Jesús to ujetiga ore chijnásia dababode aja ujetiga qué Jesús chisasiape ore ababode to. Mu Jesús acadigode ore chetaguipise ore ga ore chijócãre ore aja quedéjnane rĩ. 16Mu Jesús tibidi ore enga chojninga:

–Jé dóji ga disabode ore chisósi yu. Ga ca ãrácho yejode ome ore go. Uje a Dupade chopise darása iji uaque jnese jne ujetiga oyósi disi parátagabode sudore ore.–

17Mu Jesús chojninga:

Jé ũrepise yu ome yuruode uje disírique que chotigase cuchárique gu. Jecute a uacajnane urásu ore ujetiga apótayo acáyoja Dupade idai to. Uje uté chãraque dedai yui ome dotigayasórone ore jnese jne.–

Jnacari atátique catecã́ri Jesús

(Matéo 19:16-30; Márcos 10:17-31)

18Mu judíode ore eduguéjna cuchábi uñeque catecã́ri Jesús to. Enga chojninga:

–Yocacadisõre paraguipísi á, ¿jé yisocárique erase ujetiga yacája Dupade idai ga yo yuniri iji, iji deréjnane a?–

19Enga Jesús chajnai uté uruode ga chósi tome:

–¿Jé gotique gu a uje bacota yu ome yúringárique ayoré paraque? Uje gusu Dupade gu uje paraque.–

20Mu Jesús chajnai uru bajade ga chojningame:

–Ise mu e baraja Moisés urusarane cucha puyácho quigode jõ. Uje quigode u udojo: "Ca bo ga apota bojórique ayoré acotéraque. Ca bo ga ajé bojórique ayoré. Ca bo ga ori. Ca o barupatáringa ome bojórique ayoré. Mu angaripísi bayé, baté ore acajnaquérigo ome ua."–

21Mu jnacari chojningame Jesús:

–Cachi que yiyó Moisés urusarane cucha puyaque uñeque gánique arĩ́e iji yúringai disi jé aja yúringai tudé jnacare.–

22Uje Jesús chudute jnacari tuté uruode ome re ga chósi tome:

–Qué cucha amiri déji ome ua ujetiga ese báringárique Dupade urása. Be ga ẽra bagúchade jnese ga asi ome ayoré jmatágode iji bagúchade oredie. Ga a Dupade tẽrája ua ome bacaniratiguérique jne iji gaté. Ujetiga ejna badode udojo guesi ga be ga ajna yu to.–

23Mu uje jnacari tuté chudute Jesús uruode udojo ga jec u uje chopise dáyugu re. Uje chiraja gu uje ataguipise. 24Mu Jesús chimo jnacari uté úringai jnusiétaque ga jé u uje chojningame:

–Jé ũré uje uajádipísome ayoré atátique ujetiga chise Dupade idai to jne ujetiga cho darása iji Dupade to. 25Uacarajáyo uje que toc ome cuchiso cuchátique ujetiga chacája ojnatique edóraque. Ga jé adi tu ome ayoré atátique to ujetiga chacája Dupade idai. Jé ore cho ñane ome dáringane cucha ibiracho gu.–

26Mu udore ore uje ore chudute acajnaquéode quigode que, ga ore cho dáyugu re enga ore chojninga:

–¿Chimo jóroque re daquetade gosoderase?–

27Jecute Jesús catecã́ri ore ga chósi tome ore:

–Jec ũré uaque uje cucha ibirade cuse ujetiga ca togome jnanírique ujetiga pésu, mu que cucha ibiratique cus ome Dupade.–

28Mu Pédro chojningame Jesús:

–Yocangaráni á, uyoque u uje yijíñongome cuchade jnese diríca ujetiga yijínangopísa ua.–

29Jecute Jesús chajnai uruode ga chósi tome:

–Yirajapise arĩ́e. Uje a uacuñeque noñome daguíjnarique iji te, jeoga gosi dai, jeoga gosi daté, jeoga gosi jõra, jeoga gosi acoté, jeoga gosi abío, ujetiga gosi doi Dupade iroquérigo ujetiga jno ujnomei údi ome úringai eduguéjna cuchape, 30mu a Dupade uté u jne ujetiga tẽrája uté gosi, ga jiépisi jne, jé iji ucuecaringuei uté jnese. Mu que gusu udore mu Dupade a tẽrája uté gosi to jne ome ucuecaringué eyúgojmárique iji gaté.–

Jesús e chopo quique dagachodi ome dacadigode ore rĩ

(Matéo 20:17-19; Márcos 10:32-34)

31Iji udojo quigade ga Jesús chamáta dacadigode ore uje gare ore iji yirídai. Ga chojningame ore:

–Yico ga ajínañoma yu to aja Jerusalén. Ujeta yico Jerusalén dirome ga a Dupade uruode atatasórone, jnani bajácho, ore urusarane quigode a tocade jnese dirome. Yuruode qui tu ore urusarane ome Dupade utocaidi uyu ujetiga ore chimate yu aja jnumi dirome. 32Uje a ore tẽra yu ome rómagosode ore dirome. Ga jé jogadi tu ujetiga ca ore ajéngome yu rĩ dirome. Ga a ore chujñieta yu enga a ore dojnóngapója yu dirome rĩ. Ga a ore chutĩ́raja yibai jne. 33Mu a ore chujé yúdode dirome rĩ. Mu quigade ga a ore chimate yu aja jnumi ujetiga ore chujé yu. Mu a gadioque díningo jne iji yitoringárique yui ga jé u ujetiga yĩrijíapo iji togode gari rĩ.–

34Mu a ca irógode ore chijnime uru quigode ãrírique uje que togome ore ujetiga ore chiraja quitígo.

Jesús chiqueta jnani edopari iji ore idai Jericó

(Matéo 20:29-34; Márcos 10:46-52)

35Enga ore jnopo rĩ ome Jerusalén yui. Mu uje ore chirõre ore idai uje i tu Jericó ga ore chise ayoré edoparitique iji uté uje chácariji dajei ejoi. Ga edopari uté utaicho dojode ayoré ore. 36Mu jnani edopari tuté chudute ayorébui ore ichorai ga chojninga:

–¿Jé gotique ore ichorájnai tuté a?–

37Enga ore chojningame:

–Cachi ore ichorájnai gajnengóri tu Jesús uje nazarétgose. E chirõre yoquidai.–

38Jecute jnani edopari uté jĩrique tibite Jesús gai ga chojningame:

–¡Jesús á, David ape disi ejo ua ya, be ga osõrape yu iji de!

39Mu Jesús jorane uje ore déji iquei ore chetágome darai. Ga ore chaquĩ́ra ujetiga cho parac. Mu uté tibite gaté. Ga chojninga:

–¡Jesús, David ape gaté á, be ga osõrape yu iji de á!–

40Uje Jesús chudute uté pijnane ga Jesús jĩrique chácare. Ga chiroque ore aja ga chojninga:

–Beyoi ga ajnáño aja de.–

Uje jnani tuté chirõre ga Jesús chojningame uté:

41–¿Bajegaitique a ujetiga yipésu ome ua?–

Enga edopari chojninga:

–Yangaráni á, qué yutṍri ua ujetiga amánape yedodie é.–

42Enga jé u uje Jesús chojninga:

–A amópo bajiritígo jne rĩ uje yiqueta ua gu uje yirajapise gu uje banguretapise yu gu.–

43Enga jĩrique jnani tuté chimo dajirigode. Jecute nóna Jesús to ga tijapísa Dupade. Ga jé cho ayorébui to uje ore chimo Jesús ipesudode ome edopari uté ga ore tijapísa Dupade to.

Currently Selected:

Lúcas 18: Ayore

Highlight

Copy