Juan 5

Jesús chiqueta jnani ejnarétatique iji ore esãrapié uje i tu Betésda

1Udojo quigade ga judíode ore jnusinamáni dire u. Jecute Jesús jno to ga chicáji Jerusalén. 2Ga ore esãrapié déji ore idai uté uje déji ore ujuyaquéode piago uñai ejoi. Enga ore chĩ́care áyasadie gajnei aja piagoi uté. Enga ore esãrapié imeñenie chejna yijmanai uje chaparu gai. Enga judíode ore ĩcarai u Betésda aja ore esãrapié uaté. 3Ore esãrapié dosadode, jiei ejnaretade iji ejode uje ore terẽtáji jnumone iji ejode. Edoparigode déji, jé aja pérogode, noñángone ore. Enga ore chajire yodi aja quedéjnane ujetiga chijocase re. 4Uje Dupade irótique gaté unirísõre uñeque chise ore esãrapié iji ujade enga chijocase yodi aja quedéjnane. Gosi ujetiga chacája yodi bajaque enga ejnarei íjnoque ga chise dáringai ayoré ijõre iji quigade. 5Jnani déji uté to uje guejnanie sequeré 38 uje ejnarétaque nanique. 6Uje Jesús chimo jnani uté uje terẽtáji jnumi iji ore esãrapié ejoi enga chopise dáyugu. Chiraja gu uje jiei sequeredie iji úringai ejnarétaque yui. Enga catecã́ri enga chojningame:

–¿Apota báringárique ayoré ijõre a?–

7Ejnarétai uté chojninga:

–Yipota yúringárique piquetaque. Mu íjnoque yátajasónique gu ujetiga gosi na yu aja yodi ujetiga e chijocase re. Jecucha yáyipie déji ujetiga yṍra yu aja yodi mu jecucha bajaque uñane aja.–

8Jesús chojningame jnani:

–Ayague. Asa bataranone enga bo ga arique.–

9Iji deréjnai uté uje catecã́ri jnani enga jĩraque ejnarei íjnoque. Jnani chisa dataranone enga jĩraque dique. Mu dire puyaque nanique uje Jesús chiqueta jnani. 10Enga jé u uje judíode ore catecã́ri Jesús iquetai jnani. Enga ore chojningame:

–Deréjnai udé u uje que pisaque pejóriguiji. Bamo uje que pujuegate ome ua ujetiga ajna bataranone.–

11Jnani uté uje piquetaque chojningame judíode ore:

–Yipésu yiquetangóri uté uruode quigode uje chojningame yu: "Asa bataranone ga arique."–

12Jecute ore chojningame uté:

–¿Jé gosi te a? ujetiga urúo udore ome ua uje chojninga: "Asa bataranone enga arique."–

13Mu jnani que chiraja daquetangóri írique. Enga que chiraja ajesúrique rĩ. Uje uásejna ayoréode ore gu enga Jesús e chacája ore ujade enga que chimópo quitique rĩ. 14Mu udojo quigade uje Jesús chicáji Dupade iguíjna cuchábi enga chise daqueta casé jnani iji ajei. Enga chojningame:

–E bamo báringai piquetaque enga be ga ca apésapo cucha gajnarétique jne rĩ ujetiga ca cucha uñeque chijocásapo ua rĩ ujetiga ca sué bejnareque bajai gai.–

15Enga jé u uje jnani uté jno uje Jesús chiqueta. Enga chingome judíode ore uje Jesús u iquetangóri. 16Jecute judíode ore jmongarája Jesús enga ore pota chutígome. Chamáña gu uje chiqueta ayoré ejnaretade iji dire puyade gu. 17Mu Jesús chajnai ore uruode enga chojninga:

–Yapade adi jé u uje pésu cucha arégode iji dirode jnese. Yadi jé u uje yipésu cucha arégode to iji dirode jnese.–

18Uje judíode ore chudute Jesús uruode udore enga ore jmongarája gaté. Ore guetei u gu uje que timíninga Moisés urusarane uje pésu cuchade iji dire puyade. Mu que gusu udore go. Ore chetaque to uje jé cho Dupade iji re uje chojninga: "Dupade u Yai."

Dupade Abi gajnei u ujetiga pésu erámone unirisórone ore quigode

19Enga Jesús chojningame ore:

–Jé ũré yu uje yojninga: que togome Dupade Ujnacari uyu ujetiga yiji yajénique quitique. Mu yedu Yai ajéode. Enga cuchade jnese uje Yapade pésu, adi jé upo ome Ujnacari uyu rĩ ujetiga yipésu cuchade to. 20Chamáñaje Yai chijnorapise dabi uyu gu. Jecute chingome yu dapesudode jnese. Enga Yai a chingome yu dapesudode cucha pitijabátedatéo uñéngo jne. Diga ujetiga amóño udore enga jogadi a u jne ujetiga chajuguipise uacagutedie. 21Uacarajáyo uje yai Dupade chiringare togode enga ore ecápo rĩ. Adi jé u ome Ujnacari uyu. Ujetiga yipota enga yiringare togode ore to enga ore ecápo to rĩ. 22Yai Dupade que chajire ayorérique atique aja quedéjnarique ujetiga pésu quitique mu edugádi u dajnacari uyu ujetiga yajire ayoréode jnese ore atígo aja quedéjnane. 23Yai Dupade áyipiedie u ome erámi unirisórone jnese ujetiga ore cho dangaráni iji dajnacari uyu. Adi jé u to uje ore cho dangaráni iji yai Dupade. Ujetiga gosi ca cho dangaráni iji Dupade Ujnacari uyu, enga que cho dangaráni iji yirósõri Dupade to.

24Jé ũrepise yu ome yuruode udojo: uje gosi tangári yuruode enga doi quigode enga changuretápo yirósõri rĩ enga pucuecaringué eyúgojmai gajnesṍri u uté gosi. Enga a ca pujuya gosi jne. Mu cho ujetiga pitoringai juseque gosi enga e chicáji pucuecaringué eyúgojmai iji gaté. 25Jé ũrepise yu ome yuruode udojo: uje Dupade ojningai dire e di ujetiga pitoringai gajnesórone chudute Abi uyu yuruode. Ujetiga ore tangaripísi yuruode quigode enga a ore eca jne. 26Uacamóño uje yai Dupade ujopiédaté cuse ujetiga chisi ome pucuecaringuei ome uñane. Uté chisíome dajopiédaté uaté ome dajnacari uyu to ujetiga yisi ome pucuecaringuei ome uñéngo to. 27Dupade utocaite yu jecute yajnei tu ujetiga yajire erámi unirisórone ore adode aja quigode ujetiga yipésu ore quitígo. 28Ujetiga yuruode udojo chajuque uacagutedie mu cucha uñai qué déji uje a chise deréjnai jne ujetiga togode ore chudute yibijnane jnese. 29Enga jogadi jé u ujetiga ore doi guesode iji dódedie. Udore ore uje ore ipesudode u cucha arégode nanique ga a ore niji jne enga a ore qui u gaté enga a ore eca iji deréjnane jnese. Jé basa udore ore uje ore ipesudode u cucha gajnaréngone nanique, enga a ore niji to jne mu a pujuya ore jne iji dãrijíningárique quigade.

Jesús chingo dáringai Dupade utocaite aja ore

30Que togome yu ujetiga jé yiji yajéningo quitique. Mu jé yigaidedie u yai Dupade áyipiedie ome yu uje yajire ore adode aja quigode enga uje yipésu ore quigode. Enga yáyipiedie jogadípise yirósõri Dupade ojningane cucha, jecute que togome yu ujetiga yécãre uruode quigode uje yajire erámi unirisórone adode aja quigode. 31Yiraja ujetiga yĩrarare yibai enga que urénga pangurete yu. 32Mu yiraja uje uñai déji enga uté u uje narare yibai. Enga jogadi quene u ujetiga ore cho ũrepíso iji yojningane cucha. 33Uacarócho uacarógode aja Juan ica ujetiga acatecãchoi ome Crísto gosi. Enga Juan chingome uaque Crísto gosi enga jé ũrepise Juan ome uruode. 34Ujetiga ayorérique doi enga narare yibai, mu que yangurenone u ayoréode go. Mu yingo cuchade udore ome uaque gu ujetiga anguretáyo yu enga eso uacáringane piquetaque. 35Uje Juan gajnui u papósi ica uje e tagu enga chijñate dejode gáyode. Mu catadé deréjnai uje díreca uaquejode ome uté acajnaquéode. Mu uje déji uacajade ica enga uacanínaño uaque ome acajnaquéode. 36Mu yipijogúsorone uñane ore déji uje ore narare yibai. Enga ore sué yipijogúsõri Juan gai. Yipijogúsorone udore u yipesudode cucha. Chamáñaje yipesudode u Yai iroquéode uje noñome iji yari nanique. Jecute que potigayaquérique déji yúringai Dupade utocaite. 37Mu cuchiyi tupúsu yirósõri yai Dupade uje narare yibai. Mu que ayorérique déji uacajade ujetiga chimópise Dupade ome dedodie enga chududipise urúpisode. 38Enga que togome uaque ujetiga Dupade uruode chacája uaque. Uacotigáso gu yúringai yai Dupade utocaite. Jecute uacotigáso to yatatagode Dupade urúo. 39Jecute jecucha uacajichopise ore urusarane Dupade urúo. Uacacuei u pucuecaringué eyúgojmai ome uaque. Mu uacajirigode Dupade urúo chingopísa uaque uje uyu u uje yisi ome pucuecaringuei ome ore. 40Mu que apótayo ujetiga abáchoi yu jetiga yisi ome pucuecaringuei ome uaque.

41Mu que cucha ome yu ujetiga jnanione uhuaque ca eso yunétique. 42Yiraja uaque gu uje que pijnoraquei déji uaque ome Dupade. 43Yai Dupade utocaidi uyu nanique ujetiga yacate erámone unirisórone uágome uruode. Mu que amesecho yu gotique. Jé basa ujetiga uñeque dirásiji uaque bisideque uje que Dupade utocaite, mu a amesechórase acajnaquéode. 44Yiraja uje que togome uaque ujetiga anguretáyo yu. Uje que cucha ome uaque Dupa ugurui icotaquéode ome uaque. Chamáñaje uacacuegode u uacojode ayoréo icotaquéode ome uaque gu. 45Ca ajoso ati yaguhéta uacabáyode iji yai Dupade iquei. Mu uacangureni Moisés a u jne ujetiga chatata uacate gajnaréngone ome Dupade. 46Ujetiga jé ũré uaque ome uacanguretarétigade ome Moisés urusarane ojningane cucha enga a anguretáyorase yu to. Moisés uté urusarane ojningai jé u yu gu. 47Jecute ujetiga jé ca anguretáyo Moisés urusarane quigode, móitapũré yu uje que anguretáyo yacajnaquéode quigode.–

Currently Selected:

Juan 5: Ayore

Highlight

Copy