Génesis 6
6
Erámi unirisórone que ore áyipieraque jnopóji cucha gajnarétique nanique rĩ
1Diga erámi unirisórone jiépisi ore iji erámi údode jnese enga udore urodie cuse to. 2Mu Dupade iro casodica uje ore tṍra ore ica aja gaté yui, uje ore chĩ́care Dupade abode aja ore nanique, udore uñane ore chajire erámi unirisórone ore urodie. Enga ueradépisei ore urodie ome ore ajéode. Enga jé u uje ore chisa dajegaidedie iji ore ujade. Enga gapudíe udire, udore ore chisa ñane enga ore chóji ñane gari nanique. 3Enga jé u nanique uje Pangarádejnai Dupade chojninga nanique: "Angoninguite pariguipise erámi unirisórone ore enga cho ujetiga ca ore áyipieraque cuse, enga cho ujetiga gusu ore aoi tiji ore. Yujopié Espíritu Sánto qué chaquĩ́ra ore ome ore ate gajnaréngone ujetiga ore chécãre dasocade. Mu a sequeredie 120 jne enga Yujopié Espíritu Sánto cha catecã́ri ore, enga jé u jne ujetiga yujuyaquei e di ome ore."
4Enga jé u uje Dupade iro casodica ore chisa dacotedie iji erámi unirisórone urodie nanique enga ore abode base enga umáño ore enga uje e jnacáño ore ga yorícojna ore nanique. Que gusu ore mu jé cho ore ape disi ejode to nanique rĩ. Enga ujnomerãque ore ome dojode jnani bajácho uje etoque ore nanique ome dajocaningane.
5Iji dirode udojo nanique enga Pangarádejnai Dupade chajire jnumi jnese nanique. Mu e chimo erámi unirisórone udore uje que ore áyipieraque jnopóji cucha gajnarétique nanique rĩ. Enga íjnoque puajatiguei ome Dupade nanique iji ore ipesudode cucha gajnarécho jmainie. 6Enga jé u uje Dupade chojninga: "¿Jé gotique gu a uje yipésu jnani nanique iji taningai nanique?" Enga gajnarenguipise Dupade iji ore jmainie, enga jnusiétaguipíse nanique ome ore ipesutique cucha gajnareque nanique enga áyuguhebátac iji jmainie. 7Enga Dupade chijáro daruode iji jnumi enga chojningápo rĩ: "¿Jé gotique gu a uje yipésu ore nanique? A yiji jnenga yĩro yipesudode ayoré ore jnese jne. Enga a yátaja cuchiso ponáyone jnese jne, jé aja cuchisode uñane rĩ uje quĩrique ore dique iji jnumi tudé, jé aja chugúperone ore jnese to jne rĩ."
8Dupade urúo udore mu qué jnani uñai déji nanique uje pésu Dupade ojningane cucha. Dupade chajire uté to nanique mu ajei tejnu ome nanique enga chimesẽre nanique enga chirógaja daroquéode jeta pésu.
Dupade chingome dáyipiedie ome Noé nanique uje a chiroque gue cuchátique jne aja jnumi ujetiga yodi chaco jnumi gai
9A qué yingome uaque jne Noé uté isocade.
Jnani uté ate ujñapetaguipise nanique enga jecucha pésu Dupade ojningane cucha nanique. Enga gusu uté nanique iji dojode jnanío ujade uje pésu Dupade ajegaidode nanique. 10Enga Noé abode gadioque nanique. Enga ore íode u udojo: Sem u uñai nanique. Jé basa ga uñai i tu Cam to nanique. Jé basa ga uñai i tu Jafet to nanique rĩ.
11Enga gusupúsu Noé ore nanique uje Dupade chimesẽre ore adode nanique ga Dupade irasique ore adode. Jé basa chajire erámi unirisórone uñane adode ga gajnarenguipíso ore adode gatuaque nanique. Enga erámi unirisórone udore ore cho dajosipié ome ñane enga ore chujé ñane gatuaque to ome dajocaningane. 12Enga Pangarádejnai Dupade chimo uje ore chécãre uruode quigode enga ore pésu dajegaidode cucha gatuácapo ome re rĩ. Enga Dupade que chise ate onique iji ore ujade, gusu ate gajnaréngone iji erámi údode jnese nanique. 13Enga jé u nanique uje Dupade catecã́ri Noé to nanique enga chojningame: "Noé á, a yĩro pisijnaringuéone ipesungórone ore jnese iji erámi údode jne. Máraque ore jnese gu ome dasijnaringuéone ome yu. Enga que ore isijnaringuéone doi jnutígome ñane ome dajocaningane. Que gusu ore mu a yátaja erámi jogonórone cucha uñane ore jnese to jne rĩ iji erámi údode jnese ujetiga yejna ore." 14Enga Dupade qué jno daruode údi ome Noé enga chojninga: "Be ga apésu cucórique jne iji poridie uñáringui uje udire irisode etoguipíso ome dojodie pore ore. Enga apésu ujetiga ajéode jiei jne mu ajéode cãra ome ñane jne. Enga be cucha otate utatai uje tṍraji jnumi enga apésopo gaté rĩ enga jé u ujeta ameso cucoi cutádode ujade ome jetiga catája ñane ome, jé iji ajei, guesi ore jnese. Yigaidi tu gu ujetiga ca yotique chacája ajei. 15Enga apésu bapesudi cuco aja eruéode jnese jne mu angara ajéningome ñane jne. Enga ósi tome jne: enga 135 métrodie iji umaningai iji jnumi jne. Jé basa ga a chise 22 métrodie mu nóna métro pébi to jne iji pajei jne. Jé basa ga a chise 13 métrodie mu nóna métro pébi to jne iji ójo yui iji gaté yui. 16Enga apésu cucoi ajei uñéngo jne ga ore chujé raja ñane gáyode jne jé aja gaté yui. Enga gadioque ajéningo to jne. Enga apésu cucoi ójo gatéraque rĩ jetiga chaco cucoi gai, mu guesája údi te jne enga chise métro petique jne. Yigaidi tu gu ujetiga emi chise cucoi ajei. Enga apésu piagórique jne rĩ iji jnumi yuminóri te rĩ iji cucoi uécha uñai. 17Enga a amate cucoi jne enga a yiroque gue cuchátique aja jnumi te jne jetiga yodi chaco jnumi gai. Enga a yejna cuchade jnese jne iji erámi údode jnese. Yojningai u cuchade udore uje qué ueca iji erámi tudé. Enga a jé ca ayorérique, cuchisórique chapídome yujuyaquédatéi tuté jnese jne mu a ore topísi jnese." 18Dupade qué jnopo daruode údi rĩ ome Noé enga chojningame: "Noé á, bajnecho yuruode udojo enga que toc eti yuruode ca tocade jne ome ua: a acája bapesudi cuco jne enga a aquecame yujuyaquédatéi uté jne. Jé aja bacoté, bacaridie, bajnacarode ore jnese to jne rĩ. 19Enga bé cuchisode enga ajnime chequé, choqui ore iji cuchiso chojmara, chojmarane ore jne enga ajnája cucoi ga ãrája cucoi ajei. Yigaidi tu gu ujetiga ore nóna uágaja cucoi ajei enga jé u ujetiga uacaquecáyo iji uté ajei jnese jne, enga cuchisode a jé cho uaque ujetiga ore eca to. 20Enga ajnime cuchiso chojmarai, chequéraque jé aja choqui, iji cuchiso ponáyone jnese iji erámi údode jnese, enga ore nóna uáguiji cucoi ajei. Que gusu cuchisode mu jé upome chugúperone ore jnese rĩ iji erámi, jé chopo rĩ cuchiso parágode ore jnese rĩ, jé upo ome cuchisode rĩ uje que igajñúraque cuse uje quĩrique ore dique. Yigaidi tu gu ujetiga yodi tuté íjnoque enga cuchisode dépoji erámi údode jnese iji quigáningo jne rĩ. 21Enga be cucha pibosode enga ãrája cucoi to ome uaque, jé upome cuchisode to rĩ ujetiga ore tagu dabosode iji ajei to."
22Enga jé u uje Noé dopísi Dupade uruode quigode nanique uje tangaripísi gu.
Currently Selected:
Génesis 6: Ayore
Highlight
Share
Copy
Want to have your highlights saved across all your devices? Sign up or sign in
© 2021 Ethnos360