San Mateo 18

Jesús rixxiꞌe gue gasná un ttu benni anca nu lo

(Mr. 9:33-37; Lc. 9:46-48)

1La laniatteguaba ubiga ca benni rudheti ca tisa ruleꞌe Jesús lo Benniha, lacabi nna unnaba tisacabi rácabi:

—Delo iyá ca benni rinnabia Tata Do Iyyabaaha, ¿nú nua anca nu ra xxeniru leni?

2Jesús uxttebe ttu unto bedúe salhe guecabi, 3nianna re:

—Gualíbatia rpea le, gansi bittuba otsiale elha run guele qui unle attiba ttu unto, tsa läga aca iselale ca benni rinnabia Tata Do Iyyabaaha. 4Larcala benni rechidagaa leni runna ancana attiba unto du-ni nna unnuha acana nu ra xxenru leni guee delo iyá ca benni rinnabia Tata Do Iyyabaaha. 5Anáguaba nuxaba benni de ria leni neti nna ulabina ttu benni anca elha run gueni attiba unto-ni, netiba nua rulabi nua.

6’Ttiaca gansi nuxa benni unna ixúyie ttu ca benni ria leni neti bittu chi seꞌe tsitsi lo neda gue Tata Do Iyyabaaha unna ttu nu lä anca tsee, tseerla salíana nua uxxicacana ttu iyya gue mulinu xeni yienni atti udelhacan na lheꞌe indattoo.

7’¡Gualichiaru le yies lo yu-ni! Satíaba tee nu runna un ca benni nu lä anca tsee, cumu anába te aca. ¡Ttiaca gualichiaru le benni unna ixúyie ca benni uncana nu lä anca tsee!

8’Larcala gansi niꞌalha o nálha runna ixúyielu unlu nu lä anca tsee, lu nna uchú na uruꞌuna na, cumu tseerla salíana lu esínlu atta gatta elha nabani guelu ttu dia lii bittu ttu lhaꞌa niꞌalu o ttu lhaꞌa nálu tee, attichula tsialu atta ttu dia liiba rite lo guiha leni irpa lhaꞌa niꞌa nálu. 9Gansi ttu iyya lolha runna ixúyielu unlu nu lä anca tsee, lu nna ulequi na uruꞌuna na, cumu tseerla salíana lu esínlu atta gatta elha nabani guelu ttu dia lii bittu ttu lhaꞌa iyya lolu tee, attichula tsialu lo gui re atta lexúaha leni irpa lhaꞌa ca iyya lolha.

10’Gualdo cuidadu, bittu cuꞌu niꞌale nuxa ttu ca benni bittu ra xxeni leni seꞌe-ni. Cumu neti rpea le, ca ingeli gue ca unní nna satíaba seꞌecabi lo Tata quia do iyyabaaha rinnabacabi aca len Benna ca unní. 11[Cumu neti Benni unbiyuu daa iyyabaaha delha eguila ca benni chi dia nitti qui odiláya cana.]

12’¿Birquinle uni ttu unbiyuu seꞌe ttu gayua (100) carneꞌe gueni, gansi iganna ttu nua? ¿Si läba ocaꞌanbana a tta yuꞌu chennia (99) ca nua lo lhilhiha, nianna tsiana satilana carneꞌe bigannaha? 13Gansi saxxína eselinna nua nna neti nna gualíbatia rpea le, edacarla leni gue nu beselaha attichula gue a tta yuꞌu chennia (99) ca carneꞌe ca nu bittu bigannaha. 14Anáguaba Tata gueri do iyyabaaha, bittuguaba raca lee tsia nitti ni ttu ca benni bittu ra xxeni leni seꞌe-ni.

Jesús rixxiꞌe gasná dhíri elha xen lasi gue attu benni ria lenie

(Lc. 17:3)

15’Gansi ttu benni ria leni neti udhacan lu ttu nu bittu anca tsee, güia guanne lenna ttubalu nna ttubana nna utixxiꞌenna gue nu bittu anca tsee benna. Gansi oquinnaba iquini gualíba benna nu bittu anca tsee, lania nna chiba událu beaca tseelu len lana. 16Ttiaca gansi bittuba udo nagani guelu, uchee attu benni o chupa benni. Anía nna tseꞌe chupa o tsunna ca benni una nagacani gue iyába nu inne lenlu nua. 17Gansi bittuba udá naga nua gue ca benni icheeluha nna utixxiꞌen adí ca benni ria le Tata Do Iyyabaaha. Gansi bittuguaba udá naga nua gue ca biꞌiniha nna lania nna oquinnaba iquile unnuha nna ancabana attiba ttu nu bittu ria leni Tata Do Iyyabaaha o attiba ttu nu rudaxxu sigá belhi ancana nu ruquixa belhi deyya Roma.

18’Gualíbatia rpea le, iyába nu innále bittu dica un ca benni yies lo yu-ni nna chiba boquinna iqui Tata Do Iyyabaaha bittu aca nua atta doe. Nu innále gua dicaba un ca benni yies lo yu-ni nna chiguaba boquinna iqui Tata Do Iyyabaaha aca nua atta doe.

19’Attu libe rpea le, gansi ni yies lo yu-ni, ttuba eseꞌe chupale oquinna iquile innábale ttu bixa len Tata quia do iyyabaaha, Benniha nna utebe nu innábale. 20Cumu atta riseꞌe chupa o tsunna benni de ria lecani neti, níaba dua lagüi guecani.

Ejemplu gue ttu nu bittu uxí elha xen lasi

21Laniala nna ubiga Pedro unnaba tisabi Jesús, rábi:

—Benni bananie neti, ¿balha libe dica dhia elha xen lasi gue ttu betsi loesia gansi unna nu bittu anca tsee len neti? ¿Si gasi (7) libeli dhia elha xen lasi gueni?

22Jesús becabie re:

—Läriga neti gasi libe, sinuqui gasi libe gayuna yuꞌu tsii (70) libe.

23’Larcala nna atti rinnabia Tata Do Iyyabaaha ca benni, raxxína leni nu uca len ttu nu rinnabia gue ttu yiesi. Unnuha nna beaxina ca benni riben sina gueniha qui otecana belhi uxí ganna canaha. 24Atti chi udulona rennabana ca unnuha belhiha nna bisíntteba lencana ttu nu daana xenlha xen tsitsiaba belhi. 25Ttiaca unnuha nna läga udána quixana nu daanaha, larcala nna nu rinnabiaha nna benttebana mandadu uttoꞌocana nua, ttupa sela nuila gueniha lhe ca xiꞌinniha lhe iyába nu te gueni lhe anía liba nna gaxa gue nu daanaha. 26Nu riben sina daa belhiaha nna bedútteba xibini bettoo loni lo yu lo nu rinnabiaha, lana nna unnabana lo nua rána: “Upachi pasensi quia, xa benni banani neti. Neti nna guaguixaba iyába nu daaya guelu.” 27Nu rinnabiaha nna guatúaba leni nu riben sina gueniha, uxíbana elha xen lasi gue belhi daa nua gueni, nianna bolhábana nua.

28’Ttiaca atti bería nua lisi nu rinnabiaha nna betiꞌattebana attu benni riben lenna sinaha. Unnuha nna saroꞌoru belhi daa nua gueni. Lana nna bedaxxuttebana lheꞌe yien nua, atti rána nua: “¡Utixa belhiu daalu quia!” 29Laniala nna bedú xibi nu daa belhiha bettoo loni lo yu, nianna unnabana lo nua rána: “Upachi pasensi quia, guaguixaba neti iyába nu daaya gueluha.” 30Ttiaca lana nna läga uca leni. Güialana guattixxana nua lisiyya axta qui biría lenna utixa nua iyába belhi nu daa nua gueniha. 31Atti bilen adí ca benni riben sina gue nu rinnabiaha gue nu ben nua nna tsitsiba bedú siꞌina lecani, atti güiattebacana guatixxiꞌaquinna nu rinnabiaha iyába nu ucaha. 32Laniala nna uxi nu rinnabiaha nua, nianna rána nua: “¡Nu lä du ta leni! Neti uxíba elha xen lasi guelu gue iyába belhi daalu quia, cumu benlu ruegu loa, 33lu nna ¿biacala bittu guatúa lelu nu daana belhi gueluha attiguaba guatúa lasia lu?” 34Nu rinnabiaha nna de bisaꞌaxxattabinna benttebana mandadu ca nu ugüecana nua axta liba quixana iyá belhi daanaha.

35—Aníaguaba udhaca Tata quia do iyyabaaha le, gansi bittuba dhíle elha xen lasi gue ttu betsi loesle itú iqui itú lele.

Currently Selected:

San Mateo 18: zaq

Highlight

Copy