San Mateo 17

Jesús botsía loe

(Mr. 9:2-13; Lc. 9:28-36)

1Dequide chi utee xxupa ubisa nna uchetteba Jesús Pedro lhe Jacobo lhe Juan betsi Jacobo lhe iqui ttu iꞌiya yadha atta suntteba laque useꞌe. 2Nía nua botsía lo Jesús aníba lo ca biꞌiniha. Loe nna uyuꞌu xieni guee attiba lo tatubisa-na, xoe nna beacana sitsi tuu attiba ttu xieni. 3Nianna biláquinbi ucaxxe Moisés lenbi Elías, rinnecabi len Jesús. 4Pedro nna ráttebabi Jesús:

—Benni bananie riꞌitu, ¡tsee galá guaxxína seꞌetu nii! Gansi cuinalu raca lelu nna guacaba untu tsunna yoꞌo lhaga: ttu guelu nna ttu gue Moisés nna attu gue Elías nna.

5Laca sna rinneba Pedro nna ucaxxetteba ttu bea ruꞌu xieni gueni, uyuꞌuna atta seꞌe ca benniha. Lheꞌe beaha nna bientteba tsiꞌi ttu Benni unnee re:

—Benni anque xiꞌinia, Benni racaxxattatia guee. Len lee do tseea. Gue Ben-ni gualdo nagale.

6Atti bienini ca biꞌini rudheti ca tisa gue Jesús ca tisa-ni nna usttebaquinbi, atti bedútteba xibicabi axta liba binna lo xeacabi lo yu. 7Laniala nna ubiga Jesús bennipe cabi, nianna re:

—Gualedulí. Bittu gasinle.

8Atti belhidha locabiha nna atturba Jesús biláquinbi due nía.

9Laca deyyacabi readicabi iqui iꞌiyaha nna bentteba Jesús ca biꞌiniha mandadu re cabi:

—Tsa nuttu nu quixxiꞌenle gue nu bilenle, axta liba dequide gansi chi beacatia eríaya lheꞌe baa atta yuꞌu ca nu yatti-na, neti Benni unbiyuu daa iyyabaaha.

10Ca benni rudheti ca tisa ruleꞌe Jesús unnaba tisacabi Benniha, rácabi:

—¿Biaca rá ca nu ruleꞌe nu rá lo ca ley bocaꞌana Moisés dequi primerla Elías esía, lenla nna isía benni anque Cristu?

11Jesús becabie re ca biꞌiniha:

—Gualíba, primerla Elías esía, labi oseꞌe tseebi iyáxea. 12Ttiaca neti nna rpea le, chila beta Elías, ca benni nna läga beonbiacana biꞌiniha, nu ucaba lecani bedhacacana biꞌiniha. Anáguaba satea lo ná ca unná neti Benni unbiyuu daa iyyabaaha.

13Laniala nna guadú le ca biꞌini rudheti ca tisa ruleꞌe, gue Juan biꞌini begadi indahaba nua rinne Benniha.

Jesús beonie ttu uncuiti yuꞌu be xxegüi lheꞌe cuerpu gueni

(Mr. 9:14-29; Lc. 9:37-43)

14Atti besin Jesús lenie iyunnaba ca benni rudheti ca tisa ruleꞌe atta seꞌe ixe tsitsiaba benni, ubigatteba ttu unbiyuu lo Jesús, nianna bedútteba xibini lo Benniha ráne:

15—Tata xisi, guatúachi lelu xiꞌinia-ni, cumu yuꞌu ttu be xxegüi lheꞌe cuerpu gueni. Lana nna ratelhabana lo unná. Guadú rinnana lo gui, a guadú nna rinnana lheꞌe inda. 16Chi ucheana bisía lania na lo ca benni rudheti ca tisa ruleꞌelha, ttiaca bittu udácabi eyoncabi na.

17Jesús becabie re:

—¡Lebiꞌi, ca benni bittu ria leni, nu lä du ta leni lhe! ¿Núcachiarga neti dhoa uchíana lole? ¿Núcachiarga neti lania le? Gualsaxxí uncuitiha ni.

18Laniala nna bedhaca disa Jesús be xegüiha. Unnuha nna beríattebana lheꞌe cuerpu gue uncuitiha. La uratteba nna beaca nua.

19Lenla nna suntteba ca benni rudheti ca tisa rulheꞌe Jesús ubigacabi unnaba tisacabi Benniha rácabi:

—¿Biaca bittu udátu ebeatu be xxegüi-na?

20Jesús becabie re:

—Cumu lebiꞌi nna läga chi ria tsitsi lele. Gualíbatia ria, ttirca ria lele ladiba saroꞌoto attiba ttu besi gue coana murtasa, lania nna tsa lägabi tee ttu bixa nu bittu aca guele unle. Guacaba guele gále iꞌiya do-na: “Bitúa-ni nna güia guadho attu ladu-na.” Iꞌiya-na nna tsia bunna sadhona nía. 21[Ca loes be xegüi-ni, läga eríacana gansi bittuba inneri len Tata Do Iyyabaaha lhe utte ubina lheꞌeri lhe.]

Ni rerupa libe rixxiꞌa Jesús utticane

(Mr. 9:30-32; Lc. 9:43-45)

22Atti requi Jesús daca Galilea lenie ca benni rudheti ca tisa ruleꞌe, lee nna re ca biꞌiniha:

—Neti, Benni unbiyuu daa iyyabaaha, labíaba utecana neti las ná ca benni. 23Ca unnuha nna utticana neti, ttiaca dequide eyonna ubisa nna eyacatia.

Ca benni rudheti ca tisa ruleꞌe nna siꞌirurba beseꞌecabi.

Ruquixacana Jesús belhiu gue yotuha

24Atti chi bisína Jesús lenie ca biꞌini rudheti ca tisa ruleꞌe lheꞌesi Capernaum. Ca benni ruquixa belhi gue yotuha nna guannaba tisacana Pedro, rácan bi:

—Maestro guele-na, ¿si biba rixa unná belhi ralhari uteri gue yotu-na?

25Pedro nna becabibi rábi:

—Gua rixaba Ben-na.

Atti utaꞌa Pedro lheꞌe yoꞌoha nna lola Jesús unnaba tise biꞌiniha re:

—Simóni, lu nna ¿bila rálu? Ca nu rinnabia seꞌe yies lo yu-ni, ¿nú benni ruquixacana? ¿Si ca benni lo yies guecani, aca? ¿Ca benni dittu, aca?

26Pedro becabibi rábi:

—Ca benni dittu-na.

Jesús rátteba biꞌiniha:

—Anla gansi anía anca, lägabi ralha ca benni lo yies guequinna quixacana. 27Ttiaca qui bittu unri isaꞌaquinna lu nna güia roꞌo indattoo-na, bedelha nu rudaxxu belha-na lheꞌe inda-na. Primerba belha nu udaxxuluha nna ixxálu roꞌoni. Nía sattiꞌalu ttu belhi roꞌo nua. Lu nna udaxxulu nua qui tsialu satixalu nu anca quia lhe nu anca guelu lhe.

Currently Selected:

San Mateo 17: zaq

Highlight

Copy