IINDUMISO 2
2
UMthanjiswa kaThixo
1Ngani na izizwe zisenza imbudumbudu nje?
Ngani na abantu besenza amayelenqe azé nje?
2Ookumkani bemi bume,
neziphathamandla zenza amabhunga
okuvukela *uNdikhoyo nomthanjiswa wakhe, besithi:
3“Masiziqhawule ezo mbophelelo zabo,
sikhululeke kuloo makhamandela abo.”
4Lowo ungqendeve esihlalweni sakhe ezulwini uyabahleka;
uNdikhoyo usuka abagxwale.
5Uya kusuka akhalimele ngomsindo,
abankwantyise ngengqumbo yakhe, athi:
6“Ndim lo umisele lo kumkani wam phezu kweZiyon,
intaba yam ncakasana.”
7Ewe, ndivakalisa isibhengezo sikaNdikhoyo esithi:
“Ungunyana wam wena; ndikuzele namhlanje.
8Cela kum, ndikunike iintlanga zibe lilifa lakho,
namaphethelo ehlabathi abe ngawakho.
9Wòzilawula ngegqudu lentsimbi,
ùzintlekeze zibe ziingceba oku kwezitya zomdongwe. ”
10Ngoko ke, nina bokumkani, lumkani,
nina ziphathamandla zelizwe, yalekani.
11Mkhonzeni ngembeko uNdikhoyo,
nivuye ninokuzoyikela.
12Khahlelani kuye unyana ngentobeko,
hleze aniqumbele nitshabalale endleleni;
kaloku umsindo wakhe uyakhawuleza.
Hayi uyolo lwabo bonke abazimela ngoNdikhoyo!
Currently Selected:
IINDUMISO 2: XHO96
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1996. Used with permission. All rights reserved.
