UHABHAKUKI 3
3
Umthandazo womshumayeli uHabhakuki
1Nanku umthandazo *womshumayeli uHabhakuki; uvunywa okwesililo.
2*Ndikhoyo, ndiluvile udaba olungawe;
ewe, ndithe khamnqa zizenzo zakho.
Nakule mihla yethu khawuhlaziye loo misebenzi yakho yamandulo;
ewe, ukusebenza kwakho
makubonakale nakule yethu iminyaka.
Nokuba unomsindo, mus' ukuyilibala inceba yakho.
3UThixo uyeza ephuma eTeman;
uYedwa uvela kwintaba iParan.
Ubuqaqawuli bakhe bambathisa amazulu;
ihlabathi lizele ludumo lwakhe.
4Ukuqaqamba kwakhe kunjengokukhanya;
isandla sakhe siphanjwa yimitha;
azimel' apho amandla akhe.
5Yaba sisibetho phambi kwakhe;
emkhondweni wakhe wee chu ubhubhani.
6Uthi angema lishukum' ihlabathi,
azijonge zitsho zinkwantye izizwe.
Iintaba zamandulo ziyaqhaqhamba;
iinduli zakudala zona ziyatshona.
Ewe, le yindlela yakhe yasephakadeni.
7Ndibona iintente zakwaKushan zisenkathazweni,
izikhuselo zelizwe lakwaMidiyan zingcangcazela.
8Ucatshukiswa yimilambo na, Ndikhoyo?
Ngaba uqunjiswa ziintlambo na?
Ngaba wenziwa umsindo lulwandle na,
le nto uqhuba amahashe akho nje,
ukhwele kwiinqwelo zakho zoloyiso?
9Wena utyhila isaphetha sakho,
uziqinise ngeziqalekiso iintolo zakho,
ihlabathi uliphambe ngemilambo.
10Iintaba zithi zingakubona zibhinyalaze,
imisinga yamanzi iqukuqele.
Ke zona iinzonzobila ziyagquma;
amaza ayalatyuza okwezandla eziphakanyisiweyo.
11Zithi zakumenyez' iintolo zakho ezikhawulezayo,
wakuba umkhonto wakho umenye-menyeza,
suka lingabonakali ilanga nenyanga esibhakabhakeni.
12Ihlabathi ulicanda unengqumbo,
nezizwe uzinyhasha unomsindo.
13Uphuma uye kubahlangula abantu bakho,
ukuze usindise umthanjiswa wakho.
Uyaludiliza uphahla lomzi wabakhohlakeleyo,
kutyhileke iindonga kuye kutsho kwilitye lesiseko.
14Uyigwaza ngomkhonto wayo inkokheli,
bakuba abomkhosi wayo bephume okoqhwithela beze kusisarhaza,
bezidla ngathi bobaqwenga ngasese abahlelelekileyo.
15Ugxampuza elwandle ngamahashe akho,
aze ayaluzele amanzi amaninzi.
16Ndithe ndakuva satsho saxuxuzela isisu sam,
imilebe yatsho yabebezela;
amathambo atsho angenelwa yimpehla,
nemilenze yam yasuka yagevezela.
Kambe ke ndowulinda ngomonde umhla wenkxwaleko;
nditsho umhla oya kufikela olu hlanga lusihlaselayo.
17Noba ungade ungadubuli umkhiwane,
umdiliya ungabi nazo neziqhamo,
nokuba awungevelisi nto umnquma,
namasimi ngokwawo angabi nasivuno,
zingade zingabikho iigusha esibayeni,
nobuhlanti bungabi nazo nazinkomo,
18ewe, khona kungade kube njalo,
kodwa mna ndochwayita kuNdikhoyo,
ndibe nemihlali kuThixo ondisindisayo.
19Amandla am nguMhlekazi uNdikhoyo;
uzenza iinyawo zam zibe njengezenxala;
ngaye ndihamba kweziphezulu iindawo.
Kumbhexeshi-kwayala; ngezikhalisi ezineentambo.
Currently Selected:
UHABHAKUKI 3: XHO96
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1996. Used with permission. All rights reserved.
