Mahtae 25

Leukahˊ leupongˊ lawng konˊhk'ihˊ plotˊlon kulˊ peue

1Yam awnˊ na, kuingˊ pang maoˊ naˊ seunˊ a konˊhk'ihˊ plotˊlon kulˊ peue ce sawngˊ pinˊ kawkˊ ngawl ri kaw heulˊ rap seula penˊ naˊ eun koˊ. 2Kuˊ hpawnˊ peue naˊ ce ngaˊ suisa. Kuˊ hpawnˊ peue naˊ ce kueˊ cuˊyi. 3Kuˊ ngaˊ suisa naˊ ce sawngˊ pinˊ kawkˊ ngawl ri naˊ heulˊ, daecti ce hkuinˊ pinˊ lamawn ka heulˊ. 4Kuˊ kueˊ cuˊyi naˊ ce pinˊ kawkˊ ngawl ri naˊ heulˊ, ce ku pinˊ ri pu lamawn nang kongˊ heulˊ. 5Seula penˊ naˊ kopti unˊ pao ingˊ rot eun naˊ, ce itˊ jingˊ heulˊ pun ri itˊ.

6Yam rot a peunnuikˊ naˊ, peue klawng ri lahˊ, ‘Seula penˊ naˊ ingˊ rot eun hawcˊ. Pucti lih heulˊ rap ri ti eun reuˊ.’

7Hawcˊ koˊ, konˊhk'ihˊ plotˊlon naˊ ce sawngˊ kuhˊ rangraen kawkˊ ngawl ri naˊ. 8Kuˊ ngaˊ suisa naˊ ce lahˊ a ri kuˊ kueˊ cuˊyi naˊ ce, ‘Hk'oˊ peˊ gvah ri tuilˊ ye isˊ lamawn ri naˊ ngonˊ, kawkˊ ngawl ye naˊ kaw a hk'awsˊ laic hawcˊ.’

9Kuˊ kueˊ cuˊyi naˊ ce topˊ a, ‘Caˊ kaw a cang, lhatˊ ye lamawn ri naˊ unˊ kum ka ye ri maeeˊ peˊ ri. Naˊ peˊ heulˊ leuvaee lamawn pun ti ri cawoˊ paingˊ lamawn naˊ ce, a naˊ chakˊ.’

10Yam buih heulˊ leuvaee ce naˊ, seula penˊ naˊ eun ingˊ rot. Konˊhk'ihˊ plotˊlon kuˊ rangraen ri hawcˊ naˊ ce heulˊ tiduihˊ maeeˊ seula penˊ naˊ eun hk'aˊnaee vang hk'a checˊ naˊ. Hawcˊ koˊ, leuvaˊ naˊ a sawngˊ ri.

11Hawcˊ ka naˊ, konˊhk'ihˊ plotˊlon hpawnˊ peue kuˊ heulˊ leuvaee lamawn naˊ ce ingˊ klawng ri lahˊ, ‘Cawoˊ, cawoˊ, hk'oˊ mi tahˊ leuvaˊ naˊ ri ye.’

12Daecti eun lahˊ a ri ce, ‘Uiˊ lahˊ a ri peˊ neumneum, hpaw uiˊ caˊ yawng peˊ.’

13Kop awnˊ na, kopti unˊ yawng peˊ seunyi meuyam awnˊ kaw a rot yamnhawˊ naˊ, saecˊ meuh yamnhawˊ, koˊ a reuˊ.

Leukahˊ leupongˊ lawng mhaiˊ loeˊ peue

14Kuingˊ pang maoˊ naˊ seunˊ a peue ti peue kaw eun pucti heulˊ, eun klawng mhaiˊ ri naˊ ce, eun tawmˊ ap ce roksaˊ vahtuˊ hk'ilˊ leumuil ri naˊ ce. 15Eun tuilˊ leumuil ri kuˊ ti peue naˊ eun hpawnˊ talan#25:15 Leumuil ti talan naˊ meuh a ngos reng naˊ 20 neum., kuˊ ti peue naˊ eun lalˊ talan, kuˊ ti peue naˊ eun ti talan hotˊ seunˊ kuˊ yawng kuˊ cang ce naˊ. Hawcˊ koˊ, eun pucti heulˊ. 16Kuˊ pun hpawnˊ talan naˊ eun keulawnˊ heulˊ yeuh ka. Eun tang pun nammaet ka naˊ hpawnˊ talan. 17Seunˊ awnˊ na, kuˊ pun lalˊ talan naˊ eun ku pun nammaet ka lalˊ talan. 18Daecti kuˊ pun yawo ti talan naˊ eun kungˊ ri puingˊ ri moˊ leumuil eun cawoˊ ri naˊ nang keuteˊ naˊ.

19Hawcˊ ka naˊ lingˊ, cawoˊ naˊ eun tang ingˊ. Eun sawnˊ caˊlangˊ leumuil naˊ ri mhaiˊ ri naˊ ce. 20Kuˊ pun leumuil hpawnˊ talan naˊ eun pinˊ leumuil ri naˊ ingˊ maeeˊ nammaet pun eun hpawnˊ talan naˊ. Eun lahˊ, ‘Cawoˊ, tuilˊ mi leumuil ri uiˊ hpawnˊ talan. Keueˊ, tang pun uiˊ nammaet ka naˊ hpawnˊ talan.’

21Cawoˊ eun naˊ eun topˊ a ri heun, ‘Chakˊ ka, meuh mi mhaiˊ chakˊ mhaiˊ kati keutawnˊ. Kopti kati keutawnˊ mi ri kuˊ aetˊ naˊ, uiˊ kaw tangˊ ri uinˊ mi meuh nang roksaˊ hk'eung keuting naˊ. Kah mi renˊkawn tiduihˊ maeeˊ cawoˊ ri naˊ eun reuˊ.’

22Kuˊ pun leumuil lalˊ talan naˊ eun ku ingˊ lahˊ, ‘Cawoˊ, tuilˊ mi leumuil ri uiˊ lalˊ talan. Keueˊ, tang pun uiˊ nammaet ka naˊ lalˊ talan.’

23Cawoˊ eun naˊ eun topˊ a ri heun, ‘Chakˊ ka, meuh mi mhaiˊ chakˊ mhaiˊ kati keutawnˊ. Kopti kati keutawnˊ mi ri kuˊ aetˊ naˊ, uiˊ kaw tangˊ ri uinˊ mi meuh nang roksaˊ hk'eung keuting naˊ. Kah mi renˊkawn tiduihˊ maeeˊ cawoˊ ri naˊ eun reuˊ.’

24Hawcˊ koˊ kuˊ pun leumuil ti talan naˊ eun ku ingˊ lahˊ, ‘Cawoˊ, yawng uiˊ meuh mi peue hkanˊ reng. Mi vuic ri ti vang unˊ jheumˊ. Mi hk'onˊro ri ti vang unˊ puinˊ. 25Uiˊ lhatˊ yeuh ri leumuil mi naˊ raiˊ, uiˊ heulˊ puingˊ leumuil ti talan mi naˊ nang keuteˊ. Keueˊ, aenˊ meuh a leumuil mi naˊ.’

26Cawoˊ naˊ eun topˊ a, ‘Mhaiˊ rai keunah naˊ mi, yawng mi vuic uiˊ ri ti vang unˊ jheumˊ. Uiˊ hk'onˊro ri ti vang unˊ puinˊ naˊ. 27Yeuh keutitˊ koˊ, mi naˊ htukˊ ri heulˊ seueˊ leumuil uiˊ naˊ hk'aˊnaee nya leumuil naˊ. Yam tang ingˊ uiˊ naˊ, uiˊ ku naˊ pun leumuil ri naˊ maeeˊ nammaet ka.’

28Kop awnˊ na, ti leumuil ti talan eun naˊ hk'aiˊ heun, tuilˊ a ri kuˊ kueˊ kulˊ talan naˊ eun reuˊ. 29Kopti, kuˊ kueˊ naˊ ce koˊ, kaw tang tuilˊ ce baee. Ce naˊ kueˊ lheuˊ buba ri. Daecti kuˊ unˊ kueˊ naˊ ce koˊ, kaw tang hueˊ kuˊ kawnˊ kueˊ ce naˊ lih hk'aiˊ ce. 30Nyon ri tec mhaiˊ unˊ kueˊ peuehotˊ aenˊ eun vang duimˊlawng hk'aˊnok vang kaw kueˊ hk'aˊ taˊulˊ ri yam cet rangˊ ri naˊ reuˊ.

Tawsˊ aˊmu ri peue ceu gawmˊeucˊ

31Yam Konˊ aiˊ peue lih Eun hk'aˊnaee munhpungˊ ri naˊ maeeˊ inˊhpom naˊ ce tiduihˊ gawmˊeucˊ naˊ, Eun kaw mokˊ pang tenceoˊ ri naˊ hk'aˊnaee munhpungˊ ka kuingˊ pang maoˊ naˊ. 32Peue ceu gawmˊeucˊ naˊ peue kaw ingˊ cuhk'onˊ ri nanggalˊ Eun naˊ. Hawcˊ koˊ, Eun kaw gvah peue hk'aiˊ puri seunˊ peue goˊ konˊyungˊ naˊ gvah eun konˊyungˊ naˊ maeeˊ aˊpe naˊ koˊ. 33Konˊyungˊ naˊ Eun kaw uinˊ a hk'aˊ aˊtawmˊ ri. Aˊpe naˊ Eun kaw uinˊ a hk'aˊ aˊveˊ ri.

34Hawcˊ koˊ, Hkunˊhawˊhkamˊ naˊ Eun kaw lahˊ a ri peue utˊ hk'aˊ aˊtawmˊ ri naˊ ce, ‘Peue pun munˊ ri Kuiingˊ Uiˊ Eun naˊ peˊ, ingˊ ti sinˊ peˊ naˊ reuˊ. Sinˊ awnˊ meuh a kuingˊ kuˊ rangraen ri uinˊ ri pun peˊ tangˊ neum yam bhenˊ keuteˊ naˊ pun a ri hpanplengˊ ri naˊ. 35Kopti yam sumˊ somˊ Uiˊ naˊ, peˊ tuilˊ Uiˊ somˊ. Yam sumˊ nyui Uiˊ leuumˊ naˊ, peˊ tuilˊ Uiˊ nyui. Yam meuh Uiˊ peue leuvok unˊ duing nyu naˊ, peˊ rap ri ti Uiˊ. 36Yam utˊ gungˊgangˊ uiˊ naˊ, peˊ tuilˊ Uiˊ isˊ hk'ohk'eung. Yam peuyhat Uiˊ naˊ, peˊ nomˊnawk Uiˊ. Yam utˊ Uiˊ nang htawngˊ naˊ, peˊ heulˊ glue ri Uiˊ.’

37Yam awnˊ na, peue leupaws seumeuˊ naˊ ce kaw mhaingˊ Eun, ‘Cawoˊ, yam nyu ye sumˊ somˊ Mi ye tuilˊ Mi somˊ naˊ, aˊkoˊ yam nyu ye sumˊ nyui Mi leuumˊ ye tuilˊ Mi nyui naˊ, a ciˊ meuh yamnhawˊ? 38Yam nyu ye meuh Mi peue leuvok ye rap ri ti Mi naˊ, aˊkoˊ yam nyu ye utˊ gungˊgangˊ mi ye tuilˊ Mi isˊ hk'ohk'eung naˊ, a ciˊ meuh yamnhawˊ? 39Yam nyu ye peuyhat Mi, aˊkoˊ yam utˊ Mi nang htawngˊ ye heulˊ glue ri Mi naˊ, a ciˊ meuh yamnhawˊ?’

40Hkunˊhawˊhkamˊ naˊ Eun kaw topˊ a, ‘Uiˊ lahˊ a ri peˊ neumneum. Kuˊ yeuh peˊ a ri peue aetˊ hk'aiˊ peue hk'aˊnaee ecˊawngˊ Uiˊ ti peue naˊ eun naˊ, peˊ ku yeuh a ri Uiˊ yeut.’

41Hawcˊ koˊ, Eun kaw lahˊ a ri peue utˊ hk'aˊ aˊveˊ ri naˊ ce, ‘Peue pun ri hkamˊ hk'aˊ jhaˊ naˊ peˊ, puc peˊ heulˊ hk'aiˊ Uiˊ reuˊ. Heulˊ lec hk'aˊnaee ngawl haˊ cotˊcu vang pun ri rangraen ri uinˊ ri pun seucaˊ rai naˊ maeeˊ tapaeˊ ka naˊ ce naˊ. 42Kopti yam sumˊ somˊ Uiˊ naˊ, peˊ hkuinˊ tuilˊ Uiˊ somˊ. Yam sumˊ nyui Uiˊ leuumˊ naˊ, peˊ hkuinˊ tuilˊ Uiˊ nyui. 43Yam meuh Uiˊ peue leuvok naˊ, peˊ hkuinˊ rap ri ti Uiˊ. Yam utˊ gungˊgangˊ uiˊ naˊ, peˊ hkuinˊ tuilˊ Uiˊ isˊ hk'ohk'eung. Yam peuyhat Uiˊ naˊ maeeˊ yam utˊ Uiˊ nang htawngˊ naˊ, peˊ hkuinˊ heulˊ glue ri Uiˊ.’

44Hawcˊ koˊ, ce kaw mhaingˊ Eun, ‘Cawoˊ, yam nyu ye sumˊ somˊ Mi, aˊkoˊ sumˊ nyui Mi leuumˊ, aˊkoˊ meuh Mi peue leuvok, aˊkoˊ utˊ gungˊgangˊ Mi, aˊkoˊ peuyhat Mi, aˊkoˊ utˊ Mi nang htawngˊ ye unˊ heulˊ yeuh mhaiˊ ri Mi naˊ, a ciˊ meuh yamnhawˊ?’

45Eun kaw topˊ, ‘Uiˊ lahˊ a ri peˊ neumneum. Kuˊ unˊ yeuh peˊ a ri peue aetˊ hk'aiˊ peue hk'aˊnaee peue aenˊ ce ti ri peue naˊ eun naˊ, peˊ ku hkuinˊ yeuh a ri Uiˊ yeut.’

46Hawcˊ koˊ, peue aenˊ ce kaw kah ri pucti heulˊ rap ri ti hk'aˊ ciyang cotˊcu naˊ. Daecti peue leupaws seumeuˊ naˊ ce kaw pun ri lec vang aˊyu imˊ cotˊcu naˊ.”

Currently Selected:

Mahtae 25: blrPL

Highlight

Copy