Matiye 9
9
Jeju aji dəw kə̂ dəbbə rɔɛ̂ oy
1Jeju aal tɔkə to ngaâ aal dɔ dangə maann le təl aw tɔkə bbe tə̂ laa.#9:1 Bbe kə̂ Jeju isi tə̂ kar tə̂ənn le to Kapɛrnawum. Oo 4:13 ; Markə 2:1. 2Dəwje ddeeje kə marə dingaw kə̂ dəbbə rɔɛ̂ oy kə̂ to tuwa tə̂ rɔɛ̂ tə̂. Jeju oo mə-kunn ləde le a, pa arə dəw kə̂ rɔɛ̂ oy le nan: «Ngonnəm, uwa arə ngəng, tar majangje ləi ɔru dɔi tə̂ ngaa.»
3Marə njê-gərəje-Ndu paje məde tə̂ nan: «Dəw nəənn aw tuju ri Lubba.» 4A Jeju gərə kəjə ləde ngaâ dujude nan: «Mba ddi bba arəje kəjə kə̂ maji ang baann to məse tə̂ wa? 5Ta pa nan: ‹Tar majang ləi ɔru dɔi tə̂›, wase ta pa nan: ‹In taar bbo ə-nja.› Ye kə̂ dda bba ngəng ang ta pa wa? 6M-ndiki karə ə-gərəje, Ngonn lə dəw ee kə singa ta kɔru tar majang dɔ dəwje tə̂ kə̂ nangə̂ nəənn.» Yeenn ngaâ n̂-pa narə dəw kə̂ rɔɛ̂ oy le nan: «In tar, unn tuwa ləi bbo aw bbeê.»
7Dingaw le in taar ngaâ aw bbeê laa. 8Dəwje kə̂ banya le ooje baann a, bbəəl uta dɔde ngaâ dɔsuje gaji Lubba mba singa kə̂ baann kə̂ narə dəwje le.
Jeju bbar Matiye karə unn goe
9 Jeju in lo tə̂ənn le aw ɔtu a, noo marə dingaw kə̂ daw bbarɛ̂ nan Matiye kə̂ isi lo taa narɛ lambo tə̂. Jeju pa arɛ̂ nan: «Unn gom.» Matiye le in taar ngaâ unn goe.
10Goe tə̂ a, Jeju aw usa nɛ̂n kə̂y lə Matiye le. Njê-taaje narɛ lambo kə njê-nɛ̂n-ddaje kə̂ maji ang tokə banya ddeeje usaje nɛ̂n le kə Jeju ddəm njê-njaje goe tə̂ ddəm. 11Parijinyɛje ooje nɛ̂ɛnn le a, n̂-paje darəje njê-njaje go Jeju tə̂ le nan: «Mba ddi bba nje-nɛ̂n-tɔju ləse aw usa nɛ̂n kə njê-taaje narɛ lambo ddəm njê-nɛ̂n-ddaje kə̂ maji ang ddəm wa?»
12Jeju oo tar le ngaâ pa nan: «Dəwje kə̂ rɔde to kə majɛ̂ aw ndikije ta koo nje-karə-kuman ang. Dəwje kə̂ rɔde tode bba.» 13Yeenn a, maji karə awje aw sangəje ta gərə kandə tar kə̂ Lubba pa nəənn. Tar le nan: «Koo kəm-to-ndoo lə naan â m-ndiki bbo nɛ̂n-polo â m-ndiki ang. Mba dəwje kə̂ gatə gatə â m-ddee ta bbarde ang. M-ddee mba njê-nɛ̂n-ddaje kə̂ maji ang.»
Tar kɔku rɔ nɛ̂n-kusa mba duju Lubba
14Goe tə̂ a, njê-njaje go Jan-Batisi tə̂ ddeeje ngɔsi kə Jeju ngaâ dujeje nan: «Mba ddi bba jeje kə Parijinyɛje jaw jɔku rɔje nɛ̂n-kusa kə ndɔ ndɔ mba duju Lubba, a njê-njaje goi tə̂ ɔkuje rɔde nɛ̂n-kusa ang wa?» 15Jeju ilade tə̂ nan: «Əjəje to dəwje kə̂ n̂-bbarde kusu taa-naan tə̂ a kɔkuje rɔde nɛ̂n-kusa kar tə̂ kə̂ nje-dɛnɛ̂n le isi kə de wa? Baann ang. Marə ndɔje aw ddee kə̂ dâ kunn nje-dɛnɛ̂n le kə ddang. Yeenn a, dâ kɔkuje rɔde nɛ̂n-kusa bbay.»
16«Dəw a kunn ta-kubbu kə̂ siki kila nɛ̂n kəm bar kubbu ang. Mba ta-kubbu kə̂ siki le a dda karə kəm bar kubbu le təl tiir kə kete bbay ngaâ kəm bar kubbu le a təl bo kuta ye kə̂ kə tə̂. 17Dəw a kungu bɛn kə̂ n̂-dda siki bbay mə ku-əndaarje tə̂ kə̂ to konnɛ̂#9:17 Ku-əndaarje to ku kə̂ Jiipije aw unguje koto kə̂ daw bbar nan bɛn kə tə̂. Əndaar daje a n̂-ddaje nɛ̂n ku le. ang. Baann ang a, kuje le a kujaje ta bɛn le a kula kɔrɔ̂ ngaâ kuje le kara a tujuje nyɔm tɔ. Kuje kə̂ siki â daw dungu bɛn kə̂ n̂-dda tokə siki məɛ tə̂. Baann bba bɛn le ddəm kuje le ddəm a naynje kə majɛ̂.»
Jeju aji marə dɛnɛ̂n ngaâ ndol marə ngonn kə̂ dɛnɛ̂n kə̂ oy
18Kar tə̂ kə̂ Jeju aw pa tar arəde tokə baann a, marə tɔkə dəw lə Jiipije ddee tee. Nɔsu məkəjə-gɔlɛ̂ nɔn Jeju tə̂ le ngaâ n̂-pa nan: «Ngonnəm kə̂ dɛnɛ̂n oy bbasinɛn bbay nəənn. Aw ila jii dɔɛ̂ tə̂ arə n̂-ndol.» 19Jeju in taar, ne kə njê-njaje goe tə̂ dunnje go dingaw le.
20A marə dɛnɛ̂n kə̂ məsə aw ddee rɔɛ̂ tə̂ asə bbal dɔku gire joo ddee giri Jeju tə̂ ngɔsi ngaâ nɔru kubbu laa kə jia. 21Mba n̂-pa məɛ̂ tə̂ nan: «Bbo le kubbu laa njaa bba minga ddəw mɔru kə jim a, mâ kaji.» 22Jeju turu rɔɛ̂ ooe ngaâ pa nan: «Uwa arə ngəng, Ngonnəm kə̂ dɛnɛ̂n, mə-kunn ləi ajii mban.» A kar tə̂ənn njaa rɔ-to laa le goto.
23 Jeju aw kə̂y le tɔkə dəw lə Jiipije le ngaâ oo dəwje kə̂ aw kɔlje mbula ddəm dəwje kə̂ banya kə̂ aw nɔnje aw uruje nɛ̂n əkii ddəm a, 24n̂-pa nan: «Ə-teeje kə ddaka. Ngonn kə̂ dɛnɛ̂n le oy ang, bbi â naw tibbi.» A dəwje le kokoje. 25N̂-tubbaje dəwje kə̂ banya le darə teeje ddaka ngaâ Jeju andə kə̂y le, nuwa ji ngonn kə̂ dɛnɛ̂n le ngaâ in taar. 26Tarɛ̂ nja dɔ nangə tə̂ le tɔyn.
Jeju dda arə kəm njê-kəm-tɔje joo ddee maji
27 Jeju in lo tə̂ənn le aw aw a, njê-kəm-tɔje joo unnje goe aw uruje əkii nan: «Ngonn lə Dabbiti, oo kəm-to-ndoo ləje bbo!»
28 Jeju andə kə̂y a, njê-kəm-tɔje le ddeeje ngɔsi saa ngaâ Jeju le dujude nan: «Ooje məse tə̂ to masə ta dda nɛ̂ɛnn wa?» Dilɛ̂je tə̂ nan: «Əbbə-dəwje, asə ta dda.» 29Yeenn ngaâ Jeju ɔru kəmde kə jia pa nan: «Maji karə nɛ̂n kə̂ ə-dujuje le ddee tɔkɔrɔ asə mə-kunn ləse.» 30Kəmde le uja ngaâ Jeju ndɔru mbide nya nan: «Ooje kə majɛ̂, maji karə dəw kâra gərə tarɛ̂ ang.» 31A tee njaa kə̂ njê-kəm-tɔje le teeje ddaka a, paje tar lə Jeju dɔ nangə tə̂ le tɔyn arə dəwje.
Jeju dda arə dəw kə̂ pa tar ang təl pa tar
32Jeju kə njê-njaje goe tə̂ n̂-teeje ta kɔtu a, dəwje ddeeje rɔɛ̂ tə̂ kə marə dingaw kə̂ ndil kə̂ maji ang ddɛɛ̂ arə n̂-pa tar ang. 33Jeju tubba ndil kə̂ maji ang le ngaâ dingaw le unn kutu pa tar. Nɛ̂n le dum dɔ dəwje kə̂ banya kə̂ eeje tə̂ənn ngaâ n̂-paje nan: «Joo nɛ̂n kə̂ be nangə Ijarayɛl tə̂ ndɔ kâra ang.» 34A Parijinyɛje paje nan: «Mbay lə ndilje kə̂ maji ang â arə Jeju singa tubba nɛ̂n ndilje.»
Jeju oo kəm-to-ndoo lə dəwje kə̂ banya
35 Jeju nja mə tɔkə bbeje tə̂ kə mə ngann bbeje tə̂ tɔyn. N̂-tɔju nɛ̂n kəy mbɔn-naanje tə̂ lə Jiipije, nila mbər Tar kə̂ Maji dɔ kɔn-mbay tə̂ lə Lubba. Naji njê-rɔ-toje tɔyn ngaâ naji dəwje kə̂ dəbbə rɔde tuju narə rɔde ddee maji. 36Jeju oo dəwje kə̂ banya le a, n̂-toje to ndoo laa. Mba dəwje le, singade ɔru ddəm rɔde oy njururu ddəm tokə batəje kə̂ nje-ngəmde goto. 37Yeenn ngaâ Jeju pa arə njê-njaje goe tə̂ nan: «Kula kuja ko-ndɔɔ le bo nya, a njê-kujaje ko le banyaje ang. 38Maji karə ə-dujuje nje-ndɔɔ le arə nula marə njê-kulaje bbay ta kula tə̂ le.»
Currently Selected:
Matiye 9: KabbaDkS
Highlight
Share
Copy
Want to have your highlights saved across all your devices? Sign up or sign in
© 2020, ACOTBA
