Matiye 17

Jeju turu to dang

1Ndɔ misan goe tə̂ a, Jeju jin Piyɛr, Jakə kə Jan kə̂ to ngokɔn Jakə ngaâ aw kə de dɔ ddingiri tə̂ ddəw əw. 2Jeju turu to dang kəmde tə̂, kəmɛ̂ unn kutu ndoko tokə lə kar ngaâ kubbuje laa turu nda ngaâ aw ndoko. 3A ta koo a, dooje Mɔyijə de kə Eli kə̂ dundaje lo n̂-teeje ngaâ daw paje saa tar. 4Piyɛr pa arə Jeju nan: «Əbbəjeje, maji laa boy â jee nəənn, bbo ə-ndiki a, mâ dda ngann kəy-kamje mota: kâra to ləi, kâra to lə Mɔyijə, a kâra to lə Eli.» 5N̂-nayn naw pa tar bbay a, marə mum kə̂ ndɔnrɛn ddee kiri dɔde. Marə ndu bbar mə mum tə̂ le nan: «Dəw nəənn to ngonn ndiki ləm kə̂ rɔm nəələm nya mbɛɛ̂. Maji karə ooje tɛɛ̂.» 6Njê-njaje go Jeju tə̂ le ooje ndu Lubba le a, bbəəl uta dɔde arə n̂-tee dosoje n̂-dəbbəje kəmde nangə̂. 7Jeju ddee rɔde tə̂ ɔrude kə jia, pa nan: «Ə-bbəəlje ang, inje taar.» 8Kar kə̂ dunnje kəmde kə taar a, Jeju kə karɛ̂ baa njaa â dooeje.

9Kar kə̂ dinje dɔ ddingiri tə̂ le daw ddisije a, Jeju unn ndu nəənn arəde nan: «Dang bba ə-paje tar nɛ̂n kə̂ ooje le arəje dəw ang, ndərəng ndɔ kə̂ Ngonn lə dəw a ndol go koy tə̂ laa.» 10Njê-njaje goe tə̂ dujeje nan: «Mba ddi bba njê-gərəje-Ndu paje nan Eli a ddee dɔngɔr bba wa?» 11Nilade tə̂ nan: «Tɔkɔrɔ, Eli a ddee dɔngɔr mba mɔsɛ nɛ̂nje tɔyn ture tə̂. 12A əman m-pa marəse, Eli le ddee mban. Dəwje gəreje ang ngaâ n̂-ddaje saa nɛ̂n kə̂ məde ndiki. Dâ kulaje kəm Ngonn lə dəw ndoo tə̂ tokə baann tɔ.» 13Njê-njaje goe tə̂ gərəje kə majɛ̂ to naw pa tar dɔ Jan-Batisi tə̂.

Jeju aji ngonn kə̂ ndil isi məɛ̂ tə̂

14Jeju kə njê-njaje goe tə̂ n̂-teeje ngɔsi kə dəwje kə̂ banya. Marə dəw ddee rɔɛ̂ tə̂ ngaâ ungu məkəjə-gɔlɛ̂ nangə̂ nɔɛ̂n tə̂. 15N̂-pa nan: «Əbbəmje, oo kəm-to-ndoo lə Ngonnəm kə̂ dingaw nəənn. Rɔ-to ndilje kə̂ maji ang ddɛɛ̂ arə noo ndoo nya. Naw noso kə ndɔ ndɔ kəm puru tə̂, ang a, mə maann tə̂. 16Maw saa rɔ njê-njaje goi tə̂, a dumanje ta kajɛ̂ pin.» 17Jeju pa nan: «See dəwje kə̂ mə-kunn ləse goto nəənn, mâ nayn kə se be mba ndɔ baânn wa? Mâ kumanse mba ndɔ baânn bbay wa? Ə-ddeeje kə ngonn le arəmje.» 18Jeju ndangə ndil kə̂ maji ang le arə n̂-tee kə ddang. Kar tə̂ənn njaa, ngonn le aji.

19Goe tə̂ a, njê-njaje go Jeju tə̂ le ddeeje rɔɛ̂ tə̂, dede kə karəde baa saa bba n̂-dujeje nan: «Mba ddi bba jeje juman kə tubba ndil le pin wa?» 20Jeju pa arəde nan: «Mba mə-kunn ləse tɛn baa. Tɔkɔrɔ m-pa marəse, bbo mə-kunn ləse tɛn baa tokə lə kandə-ko kə̂ ria nan mutardə bba ə-paje arəje ddingiri nəənn ə-paje nan: ‹Ə-ngəsə nəənn aw to yoonn› a, nâ ngəsə. Marə nɛ̂n kâra kə̂ a nyase goto. [21Ə-mbətəje nɛ̂n-kusa, ta ə-dujuje Lubba nya bba â tubbaje ndilje kə̂ baann.]»

Jeju təl pa tar koy laa kə tar ndol laa

22Marə ndɔ, njê-njaje go Jeju tə̂ mbɔnje naan Galile a, n̂-pa narəde nan: «Dâ kuwa Ngonn lə dəw kulɛ̂ ji dəwje tə̂. 23Dâ tɔlɛ̂je ngaâ ndɔ mota laa a nâ ndol.» Njê-njaje go Jeju tə̂ ooje tar le a, ndingaje ndoo nya.

Jeju de kə Piyɛr dukaje lambo kəy-polo Lubba

24Jeju kə njê-njaje goe tə̂ n̂-teeje Kapɛrnawum a, njê-taaje narɛ lambo kəy-polo Lubba#17:24 Lambo kəy-polo Lubba to narɛ kə̂ Jiipije kə̂ dingaw kə̂ eeje kə bbal dɔjoo wase uta yeenn aw ukaje kə bbal bbal ta mɔsɛ nɛ̂n kəy-polo Lubba. Oo Ɛkəjodə 30:13-16 ; 2 Koronikəje 24:8-14 ; Neemi 10:32-33. ddeeje rɔ Piyɛr tə̂ dujeje nan: «Nje-nɛ̂n-tɔju ləse uka lambo kəy-polo Lubba ang wa?» 25Piyɛr ilade tə̂ nan: «Naw nuka njaa!»

Piyɛr a ta kandə kəy be a, Jeju ɔru tɛɛ̂ dɔngɔr pa nan: «Simɔn, kəjə ləi dɔ tar tə̂ nəənn tokə baânn wa? Njê kə̂ dda bba aw ukaje lambo kə mbayje kə̂ nangə̂ nəənn wa? Ngann njê-bbeje wase njê-mbaje wa?» 26Piyɛr ilɛ̂ tə̂ nan: «Njê-mbaje.» Jeju ilɛ̂ tə̂ nan: «Yeenn a, to tar lə ngann njê-bbeje ta kuka lambo ang. 27A ta karə jula wungu məde tə̂ ang a, aw baâ aw ila kii. Dɔngɔr kanji kə̂ a kɔrɛ̂ njaa ə-təəyn tɛɛ̂ a, â kinga kandə narɛ. Unn kandə narɛ le aw nɛ̂n arəde to lambo ləm ddəm ləi ddəm.»

Currently Selected:

Matiye 17: KabbaDkS

Highlight

Copy