Jan 19

1Yeenn ngaâ Pilatə unn ndu karə daw kə Jeju, daw tundɛ̂ kə ndəy. 2Mbambaje peteje kula konn to əjɔkudɔ ngaâ dulaje dɔ Jeju tə̂. Dulɛ̂je tɔkə kubbu kə̂ ngal kə̂ kasɛ. 3N̂-ddeeje ngɔsi saa ngaâ n̂-paje darɛ̂je nan: «Lapiya ləi, tɔkə mbay lə Jiipije.» Ngaâ n̂-tundaje ka-mbɔrɛ̂.

4Pilatə le təl tee ddaka bbay ngaâ pa arə Jiipije le nan: «Ya! Maw tee saa kə ddaka ta karəse, karə ə-gərəje to minga marə nɛ̂n kâra ta gangə nɛ̂n sariya dɔɛ̂ tə̂ ang.» 5Yeenn ngaâ Jeju tee ddaka. Əjɔkudɔ konn le to dɔɛ̂ tə̂ kə tɔkə kubbu kə̂ kasɛ̂ rɔɛ̂ tə̂. Ngaâ Pilatə pa arəde nan: «Dəw le â nəənn.» 6A kakə mbayje lə njê-poloje Lubba kə njê-ngəmje ta-kəy-polo Lubba ooeje a, duruje əkii nan: «Ə-tɔlɛ̂ dɔ kakə-dəsə tə̂! Ə-tɔlɛ̂ kakə-dəsə tə̂.» Pilatə pa arəde nan: «Sese njaa uwɛ̂je, ə-tɔlɛ̂je dɔ kakə-dəsə tə̂. Mba minga marə nɛ̂n kâra ta gangə nɛ̂n sariya dɔɛ̂ tə̂ ang.» 7Jiipije ilɛ̂je tə̂ nan: «Marə ndu ləje to. Ddəw ndu tə̂ənn le nasə yo, mba n̂-pa nan n̂-to Ngonn lə Lubba.» 8Pilatə oo tarje le a, bbəəl uta dɔɛ̂ nya bbay. 9N̂-təl nandə kəy-mbay tə̂ le ngaâ n̂-duju Jeju nan: «Ə-to dəw kə̂ dda wa?» A Jeju ilɛ̂ tar tə̂ ang. 10Yeenn ngaâ Pilatə pa arɛ̂ nan: «Əman â ə-mbətə ta pa səm tar wa? Ə-gərə to mee kə singa ta kinyai ngaâ mee kə singa ta karə n̂-tɔli kakə-dəsə tə̂ tɔ ang wa?» 11Jeju ilɛ̂ tə̂ nan: «Bbo Lubba ari singa ang a, ee kə marə singa kâra dɔm tə̂ ang. Mba yeenn bba, dəw kə̂ ulam jii tə̂ â dda majang kə̂ bo nya.»

12Karɛ̂ tə̂ənn njaa Pilatə aw sangə ddəw ta kinya Jeju. A Jiipije uruje əkii nan: «Bbo inyɛ̂ a, ə-to nam tɔkə mbay kə̂ Rɔm ang. Mba dəw kə̂ dda rɔɛ̂ to mbay, to nje-baan le tɔkə mbay kə̂ Rɔm.» 13Pilatə oo tarje le a, narə n̂-tee kə Jeju. Ngaâ, nisi ngende-gangə sariya tə̂, lo tə̂ kə̂ daw bbar nan: «Lo kə̂ dɔsu kə ər» ngaâ daw bbar nan: «Gabata» kə tar lə ebərəje. 14To ndɔ kə̂ lo-karɛ̂ a, to kusu Pakə, a kar ar dannâ ngaa. Pilatə pa arə Jiipije nan: «Tɔkə mbay ləse le â nəənn.» 15A duruje əkii nan: «Ə-tɔlɛ̂, ə-tɔlɛ̂. Ə-tɔlɛ̂ kakə-dəsə tə̂.» Pilatə pa arəde nan: «Ta m-tɔl tɔkə mbay ləse le kakə-dəsə tə̂ wa?» Mbayje lə njê-poloje Lubba ilɛ̂je tə̂ nan: «Marə tɔkə mbay ləje dang to ang. Tɔkə mbay ləje kâra baa to tɔkə mbay kə̂ Rɔm.» 16Yeenn ngaâ Pilatə uwa Jeju ulɛ̂ jide tə̂ karə n̂-tɔlɛ̂ kakə-dəsə tə̂.

N̂-bbərə Jeju kakə-dəsə tə̂

17Jeju njaa oto kakə-dəsə laa in nɛ̂n mə tɔkə bbe tə̂ le aw nɛ̂n lo tə̂ kə̂ daw bbar nan: «Lo ka-dɔ-dəw», kə̂ daw bbar nan: «Gɔlogota» kə tar ebərə tɔ. 18Mbambaje bbərəje Jeju kakə-dəsə tə̂ lo tə̂ənn le. Kar tə̂ənn njaa, n̂-bbərə marə dingawje joo kakə-dəsə tə̂ tɔ#19:18 Kakə-dəsə: Kakə joo kə̂ n̂-dəsə naan tə̂ bba duru taar mba tɔ dəw tə̂ karə dəw le oy., marɛ̂ kâra dɔ ji-gəl Jeju tə̂, a marɛ̂ kâra dɔ ji-kɔlɛ̂ tə̂. 19Pilatə arə n̂-dda makəturu n̂-bbərə dɔ kakə-dəsə tə̂ le taar nan: «Jeju kə̂ Najarɛtə, tɔkə mbay lə Jiipije.» 20Jiipije nya njaa turaje makəturu le, mba lo kə̂ n̂-bbərəje Jeju kakə-dəsə tə̂ le to ngɔsi kə tɔkə bbe le. N̂-ddaje makəturu le kə tar ebərə ddəm tar latɛn ddəm tar gɛrɛkə ddəm. 21Mbayje lə njê-poloje Lubba le paje arəje Pilatə nan: «Makəturu kə̂ nan: ‹Tɔkə mbay lə Jiipije› le, maji ta kinya baann ang. Maji karə ə-dda nan: ‹Dingaw nəənn pa nan, n̂-to tɔkə mbay lə Jiipije.› » 22Pilatə ilade tə̂ nan: «Nɛ̂n kə̂ m-dda mban a, m-dda.»

23Mbambaje le bbərəje Jeju le kakə-dəsə tə̂ le mban a, n̂-jinje kubbuje laa, n̂-kaynje dannâ loe sɔ. Mbamba kâra kə laa laa. Dunnje kubbu laa kə̂ ngal tɔ. To bəl-kubbu kâra kə̂ in taar tee bəər. Duru kubbu le to kuru ang. 24Mbambaje le paje arə naan nan: «N-tirje kubbu nəənn ang. N-ddɔje mbari jooje se nân bba a bu wa?» Baann bba karə tar kə̂ Makəturu lə Lubba pa nəənn ddee to tar kə̂ tɔkɔrɔ. Tar le nan:

«N̂-kaynje naan kubbuje ləm,

ngaâ dunnje kubbu ləm kə̂ ngal n̂-ddɔje nɛ̂n mbari.»

Nɛ̂ɛnn le njaa mbambaje ddaje.

25Kɔn Jejuje kə ngokɔn kɔɛ̂nje kə̂ dɛnɛ̂n, Mari dɛnɛ̂n lə Kolopas kə Mari kə̂ Magədala, darje ngɔsi kə kakə-dəsə le. 26Jeju oo kɔɛ̂nje kə nje-nja goe tə̂ kə̂ n̂-ndike nya kə̂ ar mbɔr kɔɛ̂nje tə̂ le ngaâ pa arə kɔɛ̂nje le nan: «Dɛnɛ̂n, ngonni â toonn.» 27Goe tə̂ a, n̂-pa narə nje-nja goe tə̂ le nan: «Kɔinje â toonn.» Kar tə̂ənn njaa, nje-nja goe tə̂ le unn kɔn Jejuje le aw saa kəy laa.

Koy lə Jeju

28Goe tə̂ a, Jeju gərə to nɛ̂n tɔyn tunga mban. A karə tar kə̂ Makəturu pa le ddee to tar kə̂ tɔkɔrɔ a, n̂-pa nan: «Kunda ɔnʼm.» 29Marə jo kə̂ maann-binyə kə̂ masə ddusu ee lo tə̂ənn. Mbambaje le ulaje ta-kubbu mə maann-binyə tə̂ kə̂ masə le ngaâ n̂-tɔ ta kakə ijopə tə̂, dulaje kə ta Jeju tə̂. 30Jeju ay maann-binyə kə̂ masə le ngaâ pa nan: «Nɛ̂n tɔyn tunga ngaa.» Yeenn ngaâ nula dɔɛ̂ kə̂ nangə̂ a, noy.

Marə mbamba ɔsu kar Jeju kə ninga

31To ndɔ kə̂ lo-karɛ̂ a ta to ndɔ-kuwa-rɔ lə Jiipije, yeenn bba njê-kɔnje dɔ Jiipije ndikije karə niinn dəwje nayn dɔ kakə-dəsəje tə̂ ndɔ-kuwa-rɔ tə̂ le ang. A ndɔ-kuwa-rɔ kə̂ nəənn to ndɔ-kuwa-rɔ kə̂ ngəng nya. Yeenn bba n̂-dujuje Pilatə karə unn ndu arə n̂-guru gɔl dəwje kə̂ n̂-bbərəde dɔ kakə-dəsə tə̂ le ta n̂-tɔru niinnde kə ddang. 32Yeenn ngaâ mbambaje ddee guruje gɔl dəw kə̂ dɔngɔr, goe tə̂ a, n̂-guruje gɔl dəw kə̂ to joo laa kə̂ n̂-bbərəde dɔ kakə-dəsə tə̂ kə Jeju le. 33Kar kə̂ n̂-teeje dɔ Jeju tə̂ ngaâ dooeje a, noy mban. Mba yeenn bba, n̂-guruje gɔl Jeju le ang. 34A marə mbamba kâra ɔsu kar Jeju le kə ninga. Njangə baa njaa, məsə ddəm maann ddəm teeje kəm do tə̂ le. 35Dəw kə̂ oo nɛ̂nje nəənn le kə kəmɛ̂ â aw ɔru gəle nəənn. N̂-gərə to tar kə̂ tɔkɔrɔ â naw pa. N̂-pa baann karə sese kara ooje məse tə̂. 36Nɛ̂ɛnn to bba karə tar kə̂ Makəturu lə Lubba pa ddee to tar kə̂ tɔkɔrɔ. Tar le nan: «Dâ guru marə singa rɔɛ̂ kâra ang.» 37Makəturu lə Lubba pa bbay nan: «Dəwje a kooje dəw kə̂ dɔsu karɛ̂ le.»

Jojɛpə de kə Nikodɛm n̂-dubbuje Jeju

38Goe tə̂ a, Jojɛpə kə̂ to dəw kə̂ tɔkə kə̂ Arimate kə̂ aw nja go Jeju tə̂ lo-kiyɛ̂ tə̂, mba naw bbəəl njê-kɔnje dɔ Jiipije le, n̂-duju Pilatə karə arɛ̂ ddəw karə nɔru niinn le dɔ kakə-dəsə tə̂ kə ddang. Pilatə le arɛ̂ ddəw. Yeenn ngaâ Jojɛpə le aw ɔru niinn Jeju le. 39Nikodɛm aw tɔ. Ne â ləw naw rɔ Jeju tə̂ til tə̂ le. N̂-ddee kə dukann kə̂ n̂-mbɔn nɛ̂n kə̂ ria nan mir kə alowɛs bba n̂-dda nɛ̂n, dukann le ɔɔy asə kilo dɔmota. 40Jojɛpə de kə Nikodɛm le dunnje niinn Jeju, dunguje yambo le ta-kubbuje tə̂ kə̂ ngal ngaâ n̂-kəje nɛ̂n niinn Jeju le, tokə Jiipije a ta dubbuje niinn a, aw ddaje le. 41A marə ngonn ndɔɔ to ngɔsi kə lo kə̂ n̂-tɔl Jeju kakə-dəsə tə̂ kə tə̂ le. N̂-dda marə buwa-yo kə̂ siki mə ər tə̂ lo tə̂ənn tɔ. N̂-nayn dila niinn tə̂ ndɔ kâra ang bbay. 42Lo-karɛ̂ a, to ndɔ-kuwa-rɔ lə Jiipije. Mba yeenn bba Jojɛpə de kə Nikodɛm le dilaje niinn Jeju le mə buwa-yo tə̂ le mba to ngɔsi baa.

Currently Selected:

Jan 19: KabbaDkS

Highlight

Copy