Jan 15

Jeju to kakə binyə kə̂ tɔkɔrɔ

1«Əman, m-to kakə binyə kə̂ tɔkɔrɔ. A Bɔmje to nje-ndɔɔ binyə le. 2Barkəm-rɔje tɔyn kə̂ toje rɔm tə̂, a andəje ang, naw tuka kə ddang. A naw gangə dɔ barkəm-rɔje tɔyn kə̂ aw andəje karə dandəje uta ye kə̂ kete bbay. 3Nɛ̂nje kə̂ m-tɔjuse ddaje arə ə-ddeeje maji tɔyn mban. 4Maji karə ə-naynje rɔm tə̂ tokə əman m-nayn rɔse tə̂ le. Bbo barkəm binyə nayn dɔ kakɛ̂ tə̂ ang a, nâ kandə kə dɔ rɔɛ̂ njaa ang. Ddəw kâra baa, bbo ə-naynje rɔm tə̂ ang a, â kasəje ta kandə ang tɔ.

5«Əman, m-to kakə binyə, a sese ə-toje to barkəmɛ̂je. Dəw kə̂ nayn rɔm tə̂ ngaâ əman m-nayn rɔɛ̂ tə̂ a, a kandə nya. Mba bbo m-nayn rɔse tə̂ ang a, nɛ̂n kâra kə̂ â kasəje ta dda goto. 6Bbo dəw nayn rɔm tə̂ ang a, dâ kilɛ̂ ddaka tokə barkəm binyə karə n̂-tutu. Ngaâ, dâ koto kungu purô karə puru ɔn. 7Bbo ə-naynje rɔm tə̂ ngaâ tarje ləm naynje məse tə̂ a, ə-dujuje nɛ̂n tɔyn kə̂ ə-ndikije a, â kingaje nɛ̂n le. 8Nɛ̂n kə̂ a karə piti Bɔmje â nəənn: Maji karə andəje kandə nya ngaâ ə-tɔjuje to ə-toje to njê-njaje gom tə̂. 9M-ndikise tokə Bɔmje ndikim. Yeenn a, maji karə ə-naynje rɔm tə̂, a mâ nayn kaw ndikise. 10Bbo ə-ngəmje nduje ləm a, mâ nayn kaw ndikise. Ddəw kâra baa tokə m-ngəm nduje lə Bɔmje ngaâ nayn aw ndikim.

11«M-pa tar nəənn marəse karə rɔ-nəəl kə̂ minga le ingaje tɔ ngaâ ta karə rɔ-nəəl ləse asə loe. 12Ndu kə̂ marəse â nəənn: Maji karə ə-ndikije naan tokə m-ndikise. 13Bbo dəw unn təbbə laa arə mba dəwje kə̂ n̂-ndikide a, ndiki kə̂ uta yeenn goto. 14Bbo ə-ddaje nɛ̂n kə̂ munn ndu karə ə-ddaje a, yeenn tɔju to ə-toje to dəwje kə̂ m-ndikide. 15M-bbarse to njê-kulaje ang ngaa, mba nje-kula gərə nɛ̂n kə̂ əbbeeje aw dda ang. Maw bbarse to dəwje kə̂ m-ndikide, mba nɛ̂n tɔyn kə̂ Bɔmje pa arəm, m-pa marə ə-gərəje tɔ. 16Əman â m-mbərəse bbo sese â ə-mbərəmje ang ngaâ mulase karə awje, ta andəje kandə. Ngaâ karə kandə ləse le nayn kə ləw. Baann bba nɛ̂n tɔyn kə̂ ə-dujuje Bɔ kə rim a, nâ karəse. 17Nɛ̂n kə̂ m-dujuse, maji karə ə-ndikije naan.»

Dəwje mbətəje Jeju kə njê-njaje goe tə̂

18«Bbo dəwje kə̂ duninya tə̂ mbətəjese a, maji karə ə-gərəje to n̂-mbətəmje kete darəse. 19Bbo ə-toje to dəwje kə̂ duninya tə̂ a, dəwje kə̂ duninya tə̂ a ndikijese, mba ə-toje to ləde. A ə-toje to dəwje kə̂ duninya tə̂ ang ngaâ m-mbərəse horo dəwje tə̂ kə̂ duninya tə̂ nəənn. Mba yeenn bba, dəwje kə̂ duninya tə̂ mbətəjese. 20Oleje məse dɔ tar tə̂ kə̂ m-pa marəse: Nje-kula uta əbbeeje ang. Dəwje a kulaje kəmse ndoo tə̂ ddəw kâra baa tokə dula kəmʼm ndoo tə̂. Dəwje a ddaje nɛ̂n kə turu ndum ang, dâ ddaje nɛ̂n kə turu nduse ang tɔ.

21«Dâ ddaje nɛ̂njeenn tɔyn kə se mba rim, mba n̂-gərəje dəw kə̂ ulam ang. 22Bbo m-ddee ang ngaâ m-pa tar marəde ang a, tar majang a to dɔde tə̂ ang. A bbasinɛn, nɛ̂n kə̂ dâ kunn kɔru nɛ̂n naji ləde goto ngaa. 23Dəw kə̂ mbətəm a, mbətə Bɔmje tɔ. 24Bbo m-dda nɛ̂nje kə̂ dəw dda ndɔ kâra ang horode tə̂ ang a, tar majang a to dɔde tə̂ ang. A bbasinɛn, dooje nɛ̂nje kə̂ m-dda, a n̂-mbətəmje ddəm n̂-mbətəje Bɔmje ddəm. 25A nɛ̂ɛnn le to tokə baann bba karə tar kə̂ n̂-dda Makəturu-Ndu tə̂ ləde ddee to nɛ̂n kə̂ tɔkɔrɔ. Tar le nan: ‹N̂-mbətəmje baa njaa.›

26«Lubba a karə mula kə Nje-kumanse marəse. N̂-to Ndil tar kə̂ tɔkɔrɔ kə̂ in rɔ Bɔ tə̂ bba ddee. Nâ kɔru naji ləm. 27Ngaâ sese kara, â kɔruje naji ləm, mba eeje səm ləw baa kunn-kute tə̂.»

Currently Selected:

Jan 15: KabbaDkS

Highlight

Copy