Kulaje 5

Tar lə Ananiyas de kə Sapira

1Marə dingaw kə̂ ria nan Ananiyas de kə dɛnɛ̂n laa Sapira n̂-labbəje ndɔɔ ləde tɔ. 2A Sapira ndiki tə̂ kə ngawɛ̂je Ananiyas le arə ɔru dəbbə narɛ le ngəm ngaâ aw kə kəse aw ungu nɔn njê-kaw-kulaje tə̂. 3A Piyɛr pa nan: «Ananiyas, mba ddi bba inya arə Satan andə məi tə̂ wa? Ɔru dəbbə narɛ ndɔɔ ləi le ə-ngəm to ləi, a ə-pa tar ngəm arə Ndil-mə-nda. 4Kete njaa kara ndɔɔ le to ləi. Kə̂ ə-labbə le njaa kara narɛ̂ to ləi tɔ. A baânn bba kəjə dda nɛ̂n kə̂ be ddee dɔi tə̂ wa? Yeenn to Lubba â əre bbo dəwje ang.» 5Ananiyas oo tarjeenn le a, tee oso nangə̂ oy. Dəwje tɔyn kə̂ ooje tar yo lə Ananiyas le bbəəl uta dɔde. 6Ngann basanje ddee kəje niinn Ananiyas le kə kubbu awje nɛ̂n aw dubbuje.

7Asə nɛ̂n kə̂ kar mota goe tə̂ a, dɛnɛ̂n laa ddee andə dɔde tə̂, a gərə nɛ̂n kâra dɔ nɛ̂n tə̂ kə̂ to le ang. 8Piyɛr duje nan: «Tɔkɔrɔ njaa kɔr narɛ ndɔɔ ləse kə̂ ə-labbəje le â nəənn wa? Ə-pa arə moo.» N̂-pa narə Piyɛr nan: «Tɔkɔrɔ, kɔr narɛ̂ njaa â nəənn.» 9Yeenn a, Piyɛr pa arɛ̂ nan: «Baânn bba əi kə ngawije unguje tar mə naan tə̂ mba nan Ndil lə Əbbə-dəwje wa? Oo: Dəwje kə̂ dubbuje ngawije â arje ta-kəy tə̂ nəənn. Əi kara dâ kunnije kɔtu nɛ̂n tɔ.»

10Karɛ̂ tə̂ənn njaa, n̂-tee noso kɔ gɔl Piyɛr tə̂ noy. Ngann basanje le andəje kəy a, dooje niinn dɛnɛ̂n le ngaâ dunnje daw dubbuje mbɔr ngawɛ̂je tə̂. 11Bbəəl uta dɔ Egilisi ddəm dəwje tɔyn kə̂ ooje tar nɛ̂n kə̂ to le ddəm.

Njê-kaw-kulaje ddaje nɛ̂n-mɔrije dang dang

12 Njê-kaw-kulaje ddaje nɛ̂n-mɔrije kə nɛ̂nje kə̂ dum dɔ koo nya nya horo dəwje tə̂. Dəwje tɔyn kə̂ ooje məde tə̂ mbɔnje naan kɔ baranda tə̂ lə Salomɔn. 13Dəwje aw paje tar ləde maji njaa, a dəw kâra tay mba kandə horode tə̂ ang. 14Dəwje aw unnje məde arə Əbbə-dəwje kə kete kete, dingawje ddəm dɛnɛ̂nje ddəm aw unguje dɔ njê-mə-kunnje tə̂. 15Dəwje ddeeje kə njê-rɔ-toje ddəw-boô. Dungu marɛ̂je tuwa tə̂, a marɛ̂je rakəje tə̂, ta bbo Piyɛr aw nday a, ndile uru dɔ marɛ̂je tə̂. 16Dəwje tokə banya inje ngann bbeje tə̂ kə̂ toje ngɔsi kə tɔkə bbe kə̂ Jerujalɛm ddeeje tɔ. Dotoje njê-rɔ-toje kə dəwje kə̂ ndilje kə̂ maji ang aw ulaje kəmde ndoo tə̂ n̂-ddeeje kə de ngaâ dede tɔyn dajije.

Duwa njê-kaw-kulaje dungude kəy-kula tə̂

17Lo tə̂ənn, mə dda tɔkə nje-polo Lubba kə njê kə̂ mbɔrɛ̂ tə̂ kə̂ eeje mə kuwa-dɔ-naan tə̂ lə Sadusinyɛje ngaâ dinje 18duwaje njê-kaw-kulaje le dungujede kəy-kula tə̂ kə̂ to mba dəwje tɔyn. 19A marə anjə lə Əbbə-dəwje ddee til tə̂ tɔru ta kəy-kula arə n̂-teeje ngaâ pa arəde nan: 20«Awje kəy-polo Lubba tə̂ ta ə-paje tar təbbə nəənn tɔyn arəje dəwje.»

21Njê-kaw-kulaje le ooje tɛɛ̂ ngaâ lo a ta karɛ a, dawje kəy-polo Lubba tə̂ daw tɔjuje nɛ̂n.

Tɔkə nje-polo Lubba kə njê kə̂ mbɔrɛ̂ tə̂ n̂-bbarje tɔkəje lə dəwje kə Ijarayɛl karə duwa dɔ naan lo gangə sariya tə̂ lə Jiipije. Dulaje kəy-kula tə̂ karə n̂-ddee kə njê-kaw-kulaje le. 22A mbambaje kə̂ dulade le aw teeje kəy-kula tə̂ a, dingaje njê-kaw-kulaje le mə sururu tə̂ le ang. N̂-təlje rɔ njê kə̂ ulajede tə̂ le daw paje darəjede nan: 23«Joo ta-kəy le a, to kə lo kute kə majɛ̂. Njê-ngəmje ta kəy-kula le kara arje lo kula tə̂ ləde. A jɔru ta-kəy le a, joo dəw kâra məɛ tə̂ ang.»

24Nje-kɔn dɔ dəwje kə̂ aw ngəmje ta-kəy-polo Lubba kə mbayje lə njê-poloje Lubba ooje tarjeenn le a, dɔde ayn mba njê-kaw-kulaje le ngaâ n̂-paje nan: «Ddi bba dda nɛ̂n wa?» 25A marə dəw ddee pa arəde nan: «Dəwje kə̂ ungujede kəy-kula tə̂ le arje mə kəy-polo Lubba tə̂ aw tɔjuje nɛ̂n dəwje.» 26Yeenn ngaâ nje-kɔn dɔ dəwje kə̂ aw ngəmje ta-kəy-polo lubba le aw kə njê-kulaje laa ngaâ daw ddeeje kə njê-kaw-kulaje le, a n̂-ddaje kə de nɛ̂n-singa ang. N̂-bbəəlje mba dəwje a kin tilajede kə ər.

27Go ddee tə̂ kə̂ n̂-ddee kə de a, dawje kə de lo gangə sariya tə̂ lə Jiipije ngaâ tɔkə nje-polo Lubba dujude nan: 28«Junn ndu ngəng nya jarəse karə ə-tɔjuje nɛ̂n kə̂ ri dingaw nəənn ang. A dda tokə baânn bba nɛ̂n-tɔju ləse taa mə bbe kə̂ Jerujalɛm tɔyn nəənn wa? Aw ddaje karə tar yo laa uwa dɔje wa?» 29Piyɛr de kə njê-kaw-kulaje le ilaje tə̂ nan: «Koo ta Lubba maji uta koo ta dəwje. 30Lubba lə kajeje arə Jeju kə̂ ə-bbəreje dɔ kakə-dəsə tə̂ ə-tɔlɛ̂je le ndol. 31Lubba le unnɛ̂ undɛ̂ dɔ ji-kɔlɛ̂ tə̂ to mbay ddəm Nje-kaji-dəwje ddəm. Baann bba karə ngann Ijarayɛlje ingaje ddəw ta turu məde ddəm karə tar majang ləde ɔru dɔde tə̂ ddəm. 32Jeje kə Ndil-mə-nda kə̂ Lubba arə dəwje kə̂ ooje tɛɛ̂ n-to njê-tar-naji nɛ̂nje kə̂ toje le.»

33Njê kə̂ lo gangə sariya tə̂ lə Jiipije le ooje tar kə̂ njê-kaw-kulaje paje le a, wungu ɔnde ngaâ n̂-ndikije karə dəwje tɔljede kə ddang. 34A marə Parijinyɛ kə̂ ria nan Gamaleyɛl kə̂ to nje-gərə-Ndu kə̂ dəwje ndikije tar laa nya isi lo gangə sariya tə̂ənn le. Nin taar nunn ndu karə n̂-tee kə njê-kaw-kulaje le ddaka ngaji. 35Goe tə̂ a, n̂-pa narə njê-gangəje sariya le nan: «Ngann Ijarayɛlje, ooje kə majɛ̂ bba ta ə-ddaje marə nɛ̂n kə dəwje nəənn. 36Mba mə ndɔje tə̂ nəənn, joo Tədas kə̂ oo rɔɛ̂ to dəw kə̂ ngəng nya unda lo tee. Dəwje asə nɛ̂n kə̂ kɔr sɔ unnje goe. A dəwje tɔlɛ̂ ngaâ njê kə̂ unnje goe le sanrɛje naan arə dəw kâra nayn ang. 37Goe tə̂ a, Judas kə̂ to dəw kə̂ Galile unda lo tee bbal tə̂ kə̂ daw dunda nɛ̂n ri dəwje makəturu tə̂ mba gərə nɛ̂n kɔrde. N̂-dda narə dəwje unnje goe. A dəwje tɔlɛ̂je ngaâ njê kə̂ unnje goe sanrɛje naan. 38Bbasinɛn m-pa marəse, undaje kəmse dɔde tə̂ ang, inyajede arəje dawje. Bbo nɛ̂n kə̂ n̂-ndikije ta dda wase nɛ̂n kə̂ daw ddaje nəənn in ddəw tə̂ lə dəwje baa a, a kunda ngangɛ̂. 39Bbo nɛ̂n kə̂ n̂-ndikije ta dda wase nɛ̂n kə̂ daw ddaje nəənn in ddəw tə̂ lə Lubba a, a kɔkuje ddəwe pin. Arəje Lubba oose to dəwje kə̂ aw ddaje saa ddɔ ang.» Njê-gangəje sariya le ndikije tar tə̂ laa le ngaâ 40n̂-bbarje njê-kaw-kulaje le dundajede kə ndəy ngaâ dunnje ndu darəde karə n̂-paje tar kə ri Jeju ang, a dinyade. 41Njê-kaw-kulaje le inje lo gangə sariya tə̂ lə Jiipije le teeje ddaka kə rɔ-nəəl, mba Lubba oode to dəwje kə̂ asə karə dula kəmde ndoo tə̂ mba ri Jeju. 42Kə ndɔ tɔyn, mə kəy-polo Lubba tə̂ wase mə kəyje tə̂ kara, dinyaje ddəw tɔju nɛ̂n ang ddəm dinyaje kila mbər Tar kə̂ Maji lə Jeju kə̂ to Kristə le ang ddəm.

Currently Selected:

Kulaje 5: KabbaDkS

Highlight

Copy