Kulaje 2
2
Ndil-mə-nda ddee dɔ njê-mə-kunnje tə̂
1Kar kə̂ ndɔ Pantekotə asə a, njê-mə-kunnje isije dɔ naan tə̂ kâra baa. 2A ta koo a, marə kɔru nɛ̂n-bbar darâ tokə lə tɔkə ləl kə̂ aw ula ngaâ taa mə kəy kə̂ disije tə̂ le tɔyn. 3Dooje marə nɛ̂n tokə lə ndɔn-puru. Ndɔn-puru le sanrɛ kâra kâra ngaâ isi dɔde tə̂ kâra kâra tɔyn. 4Ndil-mə-nda ddusude tɔyn ngaâ dunnje kutu pa tar kə ndɔn-tarje dang dang kə̂ Ndil le unda tade tə̂.
5Marə Jiipije kə̂ aw ndikije tar lə Lubba eeje mə bbe tə̂ kə̂ Jerujalɛm le tɔ. Dinje nangəje tə̂ dang dang tɔyn kə̂ duninya tə̂ bba n̂-ddeeje. 6Dəwje le ooje kɔru nɛ̂n kə̂ bbar le a, n̂-mbɔnje naan tokə banya ngaâ məde unda dɔ binya, mba dede kâra kâra tɔyn daw dooje tar bbeje ləde ta njê-mə-kunnje tə̂ le. 7Dɔde ayn ddəm rɔde nəəlde ddəm ngaâ n̂-paje nan: «Dəwje tɔyn kə̂ aw paje tar nəənn toje to dəwje kə̂ Galile ang wa? 8A dda tokə baânn bba jeje kâra kâra tɔyn njaa jaw jooje ndɔn-tar bbe ləje tade tə̂ wa? 9Jeje kə̂ jinje nangə tə̂ kə̂ Partə, Mɛdə kə Elam, dəwje kə̂ Mejopotami, dəwje kə̂ Jude, kə̂ Kapados, kə̂ Pɔn, kə̂ Aji, 10dəwje kə̂ Piriji, kə̂ Pampili, kə̂ Ejipitə kə Libi kə̂ to ngɔsi kə Sirɛnn, dəwje kə̂ Rɔm kə̂ ddaje bbe Jerujalɛm, 11dede tɔyn, Jiipije wase dəwje kə̂ aw bbəəlje Lubba lə Mɔyijə, dəwje kə̂ Krɛtə kə dəwje kə̂ Arabi, jaw jooje tar nɛ̂nje kə̂ maji kə̂ Lubba dda kə̂ daw paje tarɛ̂ kə ndɔn-tar bbeje ləje.»
12Dəwjeenn tɔyn njaa dɔde ayn, n̂-gərəje nɛ̂n kə̂ dâ ddaje ang ngaâ n̂-paje tar horo naan tə̂ nan: «Nɛ̂n ddi bba tokə be wa?» 13A marɛ̂je aw kokoje njê-mə-kunnje le nan: «Dəwje nəənn ayje koto arə ddade.»
Piyɛr pa tar arə dəwje kə̂ banya
14Yeenn ngaâ Piyɛr in ar taar, ne kə njê-kaw-kulaje kə̂ dɔku gire kâra le ngaâ n̂-pa kə taar nan: «See dəwje kə̂ Jude kə sese tɔyn kə̂ isije Jerujalɛm, maji karə ooje nɛ̂nje nəənn kə majɛ̂ ta ə-tukaje mbise ooje nɛ̂n tar ləm. 15Koto â dda dəwje nəənn tokə aw əjəjeenn ang. Lo to kə əndɔɔ baa bbay, mba to gɔl kar jikara baa bbay. 16A nɛ̂n kə̂ aw ooje nəənn to tar kə̂ Jowɛl kə̂ to nje-kila mbər tar lə Lubba pa â ddee to nɛ̂n kə̂ tɔkɔrɔ. N̂-pa nan:
17‹Lubba pa nan: ddutu ndɔ a,
mâ sanrɛ Ndil ləm dɔ dəwje tə̂ tɔyn,
ngannse kə̂ dingaw kə ngannse kə̂ dɛnɛ̂n
a təlje to njê-kilaje mbər tar ləm,
ngann basanje ləse a kooje nɛ̂n tokə lə nin,
bbukaje ləse a ninje.
18Tɔkɔrɔ, dɔ ndɔɛ̂je tə̂ənn le,
mâ karə Ndil ləm njê-kulaje ləm kə̂ dingaw kə njê kə̂ dɛnɛ̂n
ngaâ dâ kilaje mbər tar ləm.
19Mâ dda nɛ̂n kə̂ dum dɔ koo taar mə dara tə̂ ddəm
mâ dda nɛ̂n-mɔrije bəər dɔ nangə tə̂ ddəm.
Məsə, puru kə tɔkə sa-puru.
20Kar a tuka ndul,
nɛyn a kasɛ tokə məsə,
kete bba karə ndɔ lə Əbbə-dəwje kə̂ to tɔkə ndɔ ddəm ndɔ kə̂ maji ddəm ddee.
21Yeenn a, dəw njaa kə̂ bbar Əbbə-dəwje a,
a kinga kaji#2:21 Jowɛl 3:1-5.›
22«Ngann Ijarayɛlje, maji karə ooje tar kə̂ mâ ta pa karəse nəənn. Jeju kə̂ Najarɛtə le to dəw kə̂ Lubba tɔjuse to ne â nulɛ̂ narəse. Yeenn bba Lubba arə n̂-dda nɛ̂n-mɔrije, nɛ̂nje kə̂ dum dɔ koo kə nɛ̂n-kɔbbuje dang dang horose tə̂. Ə-gərəje nɛ̂njeenn kə majɛ̂. 23Jeju le dunnɛ̂ dulɛ̂ jise tə̂ ddəw kâra baa kə ndu kə̂ Lubba njaa unn tokə kete ddəm nɛ̂n kə̂ Lubba gɔl ləw baa ddəm. Uwɛ̂je ilɛ̂je ji dəwje tə̂ kə̂ maji ang arəje n̂-tɔlɛ̂je kakə-dəsə tə̂. 24A Lubba ndole, nɔrɛ̂ ji yo tə̂ kə ddang, mba yo ubba singa ngaji ta kuwɛ̂ karə n̂-nayn rɔɛ̂ tə̂ ang. 25Dabbiti pa tar dɔ Jeju tə̂ le nan:
‹Maw moo Əbbə-dəwje nɔnʼm tə̂ kə kar tɔyn,
mba nee dɔ ji-kɔləm tə̂ bba karə nɛ̂n yəkəm ang.
26Mba yeenn bba, rɔm nəələm nya ngaâ
maw mɔsu pa rɔ-nəəl.
Nɛ̂n kə̂ maji uta, le moy kara, mâ kunda məm dɔ marə nɛ̂n tə̂,
27mba â tusum kinyam lo tə̂ lə dəwje kə̂ oyje ang.
Ngaâ â kinyam, əman kə̂ munn rɔm tɔyn mbai karə m-ndum mə buwa-yo tə̂ ang.
28Ə-tɔjum ddəw kinga təbbə, ar nɔnʼm tə̂, a mâ kinga rɔ-nəəl#2:28 Sɔm 16:8-11.›
29«Ngakɔnʼmje, ddəw ɔru arəm karə m-pa tar nəənn kə majɛ̂ marəse: kajeje Dabbiti oy, n̂-dubbe ngaâ dɔbarɛ̂ to horoje tə̂ baa bbay. 30N̂-to nje-kila mbər tar lə Lubba ngaâ n̂-gərə to Lubba unda yo bba unn nɛ̂n ndu karə dəw kə̂ gəle tə̂ isi ngende-mbay tə̂. 31Dabbiti le oo koy lə Kristə kə ndol laa tokə kete. Yeenn bba n̂-pa tar kə̂ dɔ Kristə tə̂ le nan: Lubba a kinyɛ̂ lo tə̂ lə dəwje kə̂ oyje ang ngaâ nâ kinya da-rɔɛ̂ karə ndum buwa-yo tə̂ ang. 32Jeju kə̂ maw pa tar laa nəənn le, noy, a Lubba ndole ngaâ jeje tɔyn n-toje to njê-tar-naji nɛ̂ɛnn le. 33Lubba unnɛ̂ undɛ̂ dɔ ji-kɔlɛ̂ tə̂ darâ. Ninga Ndil-mə-nda kə̂ Bɔ unn ndue ta karə le ngaâ n̂-sanrɛ Ndil le dɔje tə̂ ddəw kâra baa tokə aw ooje kə kəmse ddəm kə mbise ddəm nəənn. 34Dabbiti aw darâ ang njaa, a n̂-pa nan:
‹Əbbə-dəwje pa arə Əbbəmje nan:
Isi dɔ ji-kɔləm tə̂
35ndərəng ta mungu njê-baanje ləi
kɔ gɔli tə̂#2:35 Sɔm 110:1.›
36«Maji karə dəwje tɔyn kə̂ Ijarayɛl gərəje kə majɛ̂: Jeju kə̂ ə-tɔlɛ̂je kakə-dəsə tə̂ le, Lubba arə n̂-to Kristə ddəm Əbbə-dəwje ddəm.»
Dəwje doro mota ddeeje to njê-mə-kunnje
37Dəwje le ooje tar le a, gangə singade. N̂-dujuje Piyɛr kə kəsə njê-kaw-kulaje le nan: «Ngakɔnjeje, ddi â maji karə n-dda wa?» 38Piyɛr pa arəde nan: «Ə-turuje məse ta nân nân kara inga batɛm kə ri Jeju-Kristə. Baann bba Lubba a kɔru tar majangje ləse dɔse tə̂ ngaâ nâ karəse Ndil-mə-nda. 39Mba ndu-kunn nəənn le to mbase kə ngannse, to mba dəwje kə̂ isije ddəw əw kə dəwje kə̂ banya kə̂ Əbbə-dəwje Lubba ləje a bbarde.» 40Piyɛr pa tarje dang dang mba kɔru nɛ̂n naji ddəm mba karə dubbaje nɛ̂n singa ddəm. N̂-pa nan: «Ə-teeje horo njê-mə-majangje tə̂ kə̂ bbasinɛn nəənn kə ddang arəje Lubba ajise.» 41Dəwje kə̂ ndikije tar tə̂ laa le ingaje batɛm. Ndɔɛ̂ tə̂ənn kɔr dəwje asə nɛ̂n kə̂ doro mota ddeeje unguje dɔ kɔr njê-mə-kunnje tə̂ kə̂ kete.
Tar mə-kâra lə njê-mə-kunnje
42Njê-mə-kunnje le unnje rɔde tɔyn mba kaw koo nɛ̂n-tɔju lə njê-kaw-kulaje kə ndɔ tɔyn. Daw dulaje nuju naan tə̂, daw ddaje mə-kâra ddəw muru mə-kâra tə̂ ngaâ daw dujuje Lubba. 43Bbəəl uta dɔ dəwje tɔyn, mba Lubba dda nɛ̂nje kə̂ dum dɔ koo kə nɛ̂n-mɔrije nya nya ddəw tə̂ lə njê-kaw-kulaje. 44Njê-mə-kunnje, məde to kâra baa ngaâ nɛ̂nje ləde to kâra baa. 45N̂-labbəje ndɔɔje ləde kə nɛ̂n-kingaje ləde ngaâ n̂-kaynje naan narɛ̂ asə kəm nɛ̂n kə̂ du dəw kâra kâra. 46Dooje ta naan ngaâ kə ndɔ kâra kâra tɔyn daw dawje kəy-polo Lubba tə̂ naan tə̂. Daw dusaje nɛ̂n mə kəy tə̂ lə naan. Daw dusaje nɛ̂n ləde kə rɔ-nəəl kə mə ngonn-kasə. 47N̂-pitije Lubba ngaâ dəwje tɔyn oojede maji kəmde tə̂. Kə ndɔ kâra kâra tɔyn, Əbbə-dəwje aw ungu dəwje kə̂ naw najide dɔ marɛ̂ tə̂.
Currently Selected:
Kulaje 2: KabbaDkS
Highlight
Share
Copy
Want to have your highlights saved across all your devices? Sign up or sign in
© 2020, ACOTBA
