Kulaje 14

Pɔl de kə Barnabas dawje bbe tə̂ kə̂ Ikoniyɔm

1Pɔl de kə Barnabas n̂-ddee n̂-teeje mə bbe tə̂ kə̂ Ikoniyɔm a, dandəje kəy mbɔn-naan tə̂ lə Jiipije. N̂-tɔjuje tar lə Lubba darə Jiipije kə Gɛrɛkəje nya ooje məde tə̂. 2A Jiipije kə̂ mbətəje ta koo məde tə̂ le aw tulaje dəwje kə̂ toje to Jiipije ang karə dəjəje kəjə kə̂ maji ang dɔ Pɔl de kə Barnabas tə̂. 3Dɔ nɛ̂nje tə̂ənn tɔyn, Pɔl de kə Barnabas n̂-naynje bbe tə̂ kə̂ Ikoniyɔm le gode əw. Daw paje tar lə Əbbə-dəwje kə bbəəl ang. Əbbə-dəwje le tɔju to tar mə-maji laa le to nɛ̂n kə̂ tɔkɔrɔ ddəw nɛ̂n-mɔrije tə̂ kə nɛ̂nje kə̂ dum dɔ koo kə̂ narə singa ansinyɛje narə ddaje. 4Dəwje kə̂ bbe tə̂ le horode tin joo: Marɛ̂je unnje go Jiipije, a marɛ̂je unnje go njê-kaw-kulaje le.

5 Jiipije kə mbayje ləde ddəm dəwje kə̂ toje to Jiipije ang ddəm n̂-ndikije ta dda Pɔl de kə Barnabas maji ang, ta tilade kə ər tɔlde. 6Pɔl de kə Barnabas dooje tarɛ̂ a, daw diyaje rɔde mə bbeje tə̂ kə̂ Likawoni, Listərə, Dɛrbə kə loje tə̂ kə̂ mbɔr bbeje tə̂ənn. 7Loje tə̂ənn, n̂-tɔjuje Tar kə̂ Maji dəwje tɔ.

Pɔl de kə Barnabas dawje bbe tə̂ kə̂ Listərə

8Mə bbe tə̂ kə̂ Listərə, marə dingaw kə̂ duje to nje-gɔl-goto arə asə kar taar ang ddəm asə nja ang ddəm isi nangə̂. 9Marə ndɔ naw noo tar kə̂ Pɔl aw pa. Pɔl le ɛɛ̂ a, gərə to mə-kunn laa asə dda karə naji. 10Pɔl le pa kə singa nan: «In taar ar njarara dɔ gɔli tə̂!» Dəw le in taar bbatə ngaâ unn kutu nja. 11Dəwje ooje nɛ̂n kə̂ Pɔl dda le a, duruje əkii kə ndɔn-tar Likawoni nan: «Ooje, lubbaje ddaje rɔde to dəwje ngaâ teeje horoje tə̂.»

12N̂-bbarje Barnabas to Jəs ngaâ n̂-bbarje Pɔl to Ɛrmɛs#14:12 Jəs de kə Ɛrmɛs toje to ri lubbaje lə dəwje kə̂ Gɛrɛkə., mba ne â naw pa tar. 13Kəy-polo Jəs le to ta bbe tə̂ le njaa. A nje-polo Jəs le ddee kə ngann mangəje kə̂ n̂-dda nɛ̂nje kə̂ kura rɔde tə̂ ta bbe tə̂ le. Ne kə dəwje kə̂ banya le n̂-ndikije ta kunn nɛ̂njeenn le to nɛ̂n-polo karə Pɔl de kə Barnabas le. 14Pɔl de kə Barnabas kə̂ n̂-toje to njê-kaw-kulaje le dooje tarɛ̂ a, n̂-tirje kubbuje kə̂ rɔde tə̂, dɔtuje kə ngɔru dawje rɔ dəwje tə̂ kə̂ banya le duruje əkii nan: 15«Mba ddi bba ə-ddaje nɛ̂n tokə be wa? Jeje kara n-to dəwje tokə sese tɔ. Jaw pa Tar kə̂ Maji jarəse karə ta ə-mbətəje nɛ̂n kə̂ ture goto, ta aaje lo kə rɔ Lubba tə̂ kə̂ isi kəm baa. Lubba le â dda dara kə nangə, ba-katə kə nɛ̂nje tɔyn kə̂ toje tə̂. 16Dɔ ndɔje tə̂ kə̂ ndayje, Lubba inya ddəw arə gəl-dəwje tɔyn ddaje nɛ̂n kə̂ məde ndiki. 17A n̂-tɔju mə-maji laa kə ndɔ tɔyn ddəw ndi tə̂ kə kandə-ko tə̂ kə̂ narə andə kə majɛ̂ arə ujaje. Narəse nɛ̂n-kusa asəse ngaâ narə isije kə rɔ-nəəl.»

18Dɔ tarje tə̂ nəənn tɔyn, bbo karə nɛ̂n-polo Pɔl de kə Barnabas aw ddade bbay.

19 Jiipije kə̂ inje Antiyos kə Ikoniyɔm ddaje arə dəwje kə̂ banya le unnje gode. N̂-tilaje Pɔl kə ər ta tɔlɛ̂ ngaâ n̂-ndɔrɛ̂je n̂-teeje saa mə bbe tə̂ kə ddang, mba dɔjuje to noy mban. 20A kar kə̂ njê-njaje go Əbbə-dəwje tə̂ ddeeje gukuje dɔɛ̂ a, nin taar n̂-təl nandə mə bbe tə̂ le. Lo arɛ a, ne de kə Barnabas dawje Dɛrbə.

Pɔl de kə Barnabas n̂-təlje bbe tə̂ kə̂ Antiyos

21Pɔl de kə Barnabas n̂-tɔjuje Tar kə̂ Maji bbe tə̂ kə̂ Dɛrbə. Dəwje nya ddeeje to njê-njaje go Əbbə-dəwje tə̂. Goe tə̂ a, n̂-təlje kə ddəw kə̂ Listərə, Ikoniyɔm kə Antiyos. 22Mə bbeje tə̂ənn, n̂-ndəjəje njê-mə-kunnje karə duwaje mə-kunn ləde darə ngəng. N̂-paje nan: «Maji karə joo ndoo nya mba kandə nɛ̂n mə Bbe-kɔn tə̂ lə Lubba.»

23Mə Egilisije tə̂ tɔyn kə̂ n̂-teeje tə̂, n̂-dda marə njê-mə-kunnje to dəwje kə̂ dɔ Egilisi tə̂ le, dɔkuje rɔde nɛ̂n-kusa, n̂-dujuje Lubba dɔde tə̂ ngaâ dinyajede ji Əbbə-dəwje tə̂ kə̂ dunda mə-kunn ləde dɔɛ̂ tə̂ le. 24Pɔl de kə Barnabas le n̂-ndayje dɔ nangə tə̂ kə̂ Pisidi dosoje dɔ nangə tə̂ kə̂ Pampili. 25N̂-tɔjuje tar lə Lubba bbe tə̂ kə̂ Pɛrjə ngaâ dawje Atali. 26Lo tə̂ənn, dunnje tɔkə to mba təl Antiyos nangə tə̂ kə̂ Siri. Antiyos le â njê-mə-kunnje inyajede kə tə̂ ji Lubba tə̂ kete mba karə Lubba dda kə de mə-maji arə n̂-ddaje kula kə̂ n̂-ddaje n̂-tungaje nəənn le.

27Pɔl de kə Barnabas n̂-teeje Antiyos nangə tə̂ kə̂ Siri a, n̂-mbɔnje njê-mə-kunnje. Dɔruje gəl nɛ̂nje tɔyn kə̂ Lubba dda ddəw tə̂ ləde kə gusu kə̂ Lubba ɔru nɛ̂n ddəw arə dəwje kə̂ toje to Jiipije ang ooje məde tə̂ tɔ le. 28Pɔl de kə Barnabas n̂-naynje kə njê-mə-kunnje kə̂ Antiyos le gode əw ngaji.

Currently Selected:

Kulaje 14: KabbaDkS

Highlight

Copy