1 Piyɛr 5

Ndəjə mba tɔkəje kə̂ dɔ Egilisi tə̂

1Bbasinɛn, m-ndiki ta ndəjə dəwje kə̂ dɔ Egilisi tə̂ kə̂ toje horose tə̂. Əman kə̂ m-to dəw kə̂ dɔ Egilisi tə̂ marde tɔ le, m-to nje-tar-naji ndooje kə̂ Kristə oo. Mâ kinga piti kə̂ Lubba a tee nɛ̂n kə̂ ddaka le tɔ. 2Ddəw kâra baa tokə njê-ngəmje nɛ̂n-kuulje, maji karə ə-ngəmje dəwje kə̂ banya kə̂ Lubba inyade mə jise tə̂ le kə majɛ̂. Lubba ndiki karə ə-ngəmjede kə mə-ndiki ləse njaa bbo tokə nɛ̂n kə̂ duwase kə singa bba karə ə-ddaje nɛ̂ɛnn le ang. Ə-ddaje nɛ̂ɛnn le mba kinga nɛ̂n narɛ ang. Maji karə ə-ddaje kə mə-kâra. 3Maji karə ə-sirije dəwje kə̂ banya kə̂ Lubba inyade jise tə̂ le ang. Ə-ddeeje to nɛ̂n-kɔju-marɛ̂ kəmde tə̂. 4A bbo ndɔ kə̂ Mbay kə̂ dɔ njê-ngəmje dəwje tə̂ lə Lubba tɔyn unda lo tee a, â kingaje əjɔkudɔ kə̂ a tuju ndɔ kâra ang kə̂ to nɛ̂n-piti.

Ndəjə mba njê-mə-kunnje tɔyn

5Ddəw kâra baa, basanje, maji karə ooje ta dəwje kə̂ dɔ Egilisi tə̂. Sese tɔyn, ə-ddaje rɔse ngaji arəje naan, mba Makəturu lə Lubba pa nan:

Lubba mbətə tar lə dəwje kə̂ ooje rɔde bo,

a n̂-dda mə-maji kə dəwje kə̂ dda rɔde ngaji.

6Mba yeenn bba, maji karə ə-ddaje rɔse ngaji kɔ Lubba tə̂ kə̂ nje-singa-mɔngu. Baann bba bbo karɛ̂ asə a, nâ kuwase kə taar. 7Maji karə inyaje nɛ̂nje tɔyn kə̂ aw jɔku kəjə ləse mə jia tə̂, mba naw naa lo kə dɔse tə̂.

8Maji karə ə-gərəje dɔ jise. Arəje kəmse kətərə. Əsu kə̂ to Nje-baan ləse aw gukuse tokə lə ənam kə̂ aw nɔn. Naw sangə dəw ta kusɛ̂. 9Maji karə ə-ddaje saa singa, ddəw kuwa kə̂ ta kuwa mə-kunn ləse karə ngəng tə̂. A maji karə ə-gərəje to gar ndooje kə̂ aw ooje nəənn le, ngakɔnse kə̂ duninya tə̂ tɔyn aw ooje tɔ.

10A kooje ndoo mba gɔju kar bbay. A Lubba kə̂ to nje-dda mə-maji nya kə̂ bbarse ddəw tə̂ lə Jeju-Kristə karə ingaje piti kə̂ to kə ndɔ kə ndɔ le, a dda karə ə-təlje ə-ddeeje maji uta, nâ karə gɔlse uwa nangə, nâ karə ubbaje singa ngaâ nâ karə marə nɛ̂n yəkəse ang. 11Maji karə singa-mɔngu to laa kə ndɔ kə ndɔ Amɛnn!

Dɔbɔyn tar kə dɔbɔyn Lapiya

12Silas kə̂ mooe to ngokɔnje kə̂ asə karə munda məm dɔɛ̂ tə̂ â marə dda marə tarje nəənn makəturu tə̂ karə mula nɛ̂n marəse, mba ndəjə nɛ̂n se ddəm mba pa nɛ̂n karəse to mə-maji lə Lubba kə̂ tɔkɔrɔ njaa â ə-naynje ddəwe tə̂ənn ddəm.

13Egilisi kə̂ to Babilɔnn nəənn kə̂ Lubba mbəre tokə sese le ddase lapiya. Ngonnəm Markə kara ddase lapiya tɔ. 14Maji karə ə-ddaje naan lapiya, ə-toje nɛ̂n mbi naan tokə dəwje kə̂ ndikije naan njaa.

Mə-wul-lɔm nayn kə se, sese tɔyn kə̂ ə-toje to dəwje lə Kristə.

Currently Selected:

1 Piyɛr 5: KabbaDkS

Highlight

Copy