1 Piyɛr 3

Kisi lə dingawje kə dɛnɛ̂nje ləde

1See dɛnɛ̂nje, sese kara maji karə ooje ta ngawsese. Yeenn bba karə, bbo marɛ̂je horode tə̂ mbətəje ta koo məde tə̂ kə Lubba kara, pa-nja ləse njaa a dda karə dooje məde tə̂ bbo â paje tar lə Lubba karəde ang ngaa, 2pa-nja ləse kə̂ nɛ̂n-yərəw ɔru ang ddəm bbəəl kə̂ aw bbəəljede ddəm le njaa dâ kooje. 3Maji karə ə-ddaje mandə rɔse tə̂ ddaka baa ang. Nɛ̂nje tokə dda dɔ karə kura, kungu nɛ̂n-mandəje kə̂ n̂-dda kə̂ andə, kula kubbu kə̂ kura kə̂ gatɛ̂ ngəng. 4A maji karə ə-ddaje mandə ləse məse tə̂. Yeenn to mandə kə̂ a tuju ndɔ kâra ang ngaâ ta arəje kəjə ləse wul pee ddəm to ddekeke ddəm. Yeenn bba to nɛ̂n kə̂ ngəng kəm Lubba tə̂. 5Baann â ləw, dɛnɛ̂nje kə̂ toje to njê-mə-kunnje ddəm undaje məde dɔ Lubba tə̂ ddəm aw ddaje nɛ̂n mandə ləde. Daw dooje ta ngawdede. 6Nɛ̂n-kɔju-marɛ̂ to Sara kə̂ oo ta Abaraham ngaâ bbarɛ̂ to əbbeeje. Bbo aw ddaje maji ngaâ arəje marə nɛ̂n kâra ddase bbəəl ang a, ə-ddeeje to ngannɛ̂ kə̂ dɛnɛ̂n.

7See dingawje, sese kara, maji karə kisi tə̂ ləse kə dɛnɛ̂nje ləse, ə-gərəje to dɛnɛ̂n to tokə ka kə̂ tɔ laa ɔn ang. Maji karə ə-waljede, mba dâ kingaje kə se təbbə kə̂ tɔkɔrɔ kə̂ Lubba a karəse kə mə-maji laa le tɔ. Baann bba karə bbo aw dujuje Lubba a, marə nɛ̂n ɔku ddəwe ang.

Maji ta koo ndoo mba nɛ̂n kə̂ gatə gatə

8Ta kutu nɛ̂n dɔ tar ləm a, maji karə kəjə ləse to kâra baa ddəm ooje kəm-to-ndoo lə naan ddəm. Maji karə ə-ndikije naan to ngakɔn-naan njaa, ə-ddaje maji kə naan, ə-ddaje rɔse ngaji. 9Dəw ddase maji ang a, ilaje barɛ̂ ang, dəw tajise a, ə-tajɛ̂je ang. Tar kə̂ Maji â ə-bbarje dɔ dəwje tə̂. Yeenn njaa â Lubba bbarse mbɛɛ̂. Baann bba Lubba a bbar tar kə̂ maji dɔse tə̂.

10Mba Makəturu lə Lubba pa nan:

«Bbo dəw ndiki kisi laa dɔ nangə tə̂ ddəm

ndiki ta kisi kə majɛ̂ ddəm a,

maji karə tar kə̂ maji ang tee tɛɛ̂ tə̂ ang ddəm

narə tar ngəm tee tɛɛ̂ tə̂ ang ddəm.

11Maji karə nayn majang ta n̂-dda maji,

Maji karə n̂-sangə mə-wul-lɔm ta n̂-nayn ddəwe tə̂.

12Mba Əbbə-dəwje aw unda kəmɛ̂ dɔ dəwje tə̂ kə̂ gatə gatə,

naw tuka mbia mba koo nɛ̂n ndu-nɔn ləde.

A Əbbə-dəwje aw turu gire arə njê kə̂ aw ddaje majang.»

13Bbo unnje rɔse tɔyn ta dda maji a, nân bba a ddase maji ang wa? 14Uta tɔyn bbo ooje ndoo mba nɛ̂n-dda kə̂ gatə gatə kə̂ ə-ddaje a, maji arəse. Maji karə nɛ̂n kə̂ dəwje aw bbəəlje a, ə-bbəəlje ang, arəje məse unda dɔ binya ang. 15A maji karə ə-gərəje məse tə̂ to Kristə kə̂ to Əbbəsese maji tɔyn. Dəwje kə̂ aw dujuse ta gərə nɛ̂n kə̂ aw undaje məse dɔɛ̂ tə̂ le, maji karə ə-toje ngɔsi ta kilade tar tə̂ ləde le. 16A maji karə ilaje tar tə̂ le kə ndu-gɔsu kə̂ wul pee ddəm ddəw bbəəl naan tə̂ ddəm ta arəje kəjə ləse to kə majɛ̂. Yeenn bba karə rɔ-kul dda dəwje kə̂ aw undaje tar dɔse tə̂ mba marə nɛ̂n ddəm aw nanɛn kə̂ se ddəm mba pa-nja ləse kə̂ maji ddəw tə̂ lə Kristə le. 17Bbo Lubba njaa ndiki tə̂ karə dəw oo ndoo mba maji kə̂ dəw le aw dda a, yeenn maji uta ndoo kə̂ ta koo mba nɛ̂n-dda kə̂ maji ang.

Kristə tətə ddɔ

18Mba Kristə le njaa oy gɔl kâra baa mba majangje lə dəwje. Ne kə̂ n̂-to gatə gatə, noy mba dəwje kə̂ toje gatə gatə ang, mba kaw kə se rɔ Lubba tə̂. Dəwje tɔl da-rɔɛ̂, a Lubba ndole arə n̂-təl nisi kəm baa ddəw tə̂ lə Ndil-mə-nda. 19Ddəw Ndil tə̂ le, naw nila mbər tar lə Lubba narə ndilje kə̂ dungude kəy-kula tə̂ tɔ. 20To ndil dəwje kə̂ ddaje dɔ-kətərə kə Lubba ləw, kar tə̂ kə̂ naw tɔ nɛ̂n wure naw nginan nɛ̂n de, dɔ ndɔje tə̂ kə̂ Nowe aw dda nɛ̂n tɔkə to le. Dəwje jijoo baa â andəje mə tɔkə to tə̂ le ngaâ Lubba ajide ddəw maann tə̂ le. 21Yeenn to nɛ̂n kə̂ tɔju batɛm kə̂ aw ajise bbasinɛn le. Batɛm to nɛ̂n kə̂ aw toko nɛ̂n-yərəw kə̂ da-rɔ tə̂ ang. To kunn rɔ ta dda kə Lubba kə kəjə kə̂ maji. Batɛm le ajise ddəw ndol tə̂ kə̂ Jeju-Kristə ndol buwa-yo tə̂. 22Jeju-Kristə le in aw darâ ngaâ isi dɔ ji-kɔl Lubba tə̂. Naw nɔn dɔ anjəje ddəm ndilje kə̂ aw ɔnje mbay ddəm singa-mɔnguje ddəm.

Currently Selected:

1 Piyɛr 3: KabbaDkS

Highlight

Copy