Luuka 14

UYeesu iiponia umutamu mu lijuva ilya Sabaato

1Ilijuva limonga ilya Sabaato, uYeesu wálutile kiilya ishakiilya kukhaaya kwa mukhome yumonga uwa Vafalisaayo. Uluhaavi pina ali mula, aVafalisaayo na vanji vakhandi vikimusigama vamwaje shina hambi iigaha mu lijuva lya Sabaato.

2Pamwandi pa Yeesu, akhandi akwali umuunu yumonga, yuna akhandi nu wutamu wa kifimba umuvili. 3Baheene uYeesu wávaposa aVafalisaayo na vamanyisaaji va ndaji sa Musa wáaja, “Aasi, indaji seesu sikitutawula kiponia avaanu mu lijuva lya Sabaato?” 4Leelo aveene vasisima tototo. UYeesu wámupyasa umutamu yula, wámuponia, wámutawula alutaje.

5Baheene uYeesu wávajovela wáaja, “Wuli, akwali umuunu kunyeenyu yuna ana mwana nda adubujile mu lisima ilijuva lya Sabaato, asikimujabula mu lijuva ilyo awu ingʼombe yaakwe, asikiyijabula?” 6Avaanu vala, vaava vagaya ilya kilogola.

Kiyiyiisa nu wusajisaaji

7UYeesu akhandi iloleela avahensa vina vakhandi vayaniilwe ku shiwungo shila, shina vakhandi vihaagula ifitengo ifya kumwandi ifya vatiilwa. Baheene wávajovela ishihwano, wáaja, 8“Umuunu pina akuyaanile ku shiwungo, usikhafishilaga mu fitengo ifya kumwandi ifya vatiilwa. Usikhagahaga ndeeno, pamonga ayaniilwe umutiilwa uyunji kikushila owe. 9Nda ayinse yuna avayaanile omwe woona, ikikujovela kiija, ‘Muleshela uyu pina ukheele.’ Apo, usiiwone nsoni mandu, pina wiwuukha kiluta ku fitengo ifya kunyuma.

10“Leelo, nda uyaniilwe, ufishilaje mu fitengo ifya kunyuma, baheene nda ayinse yuna akuyaanile, akujovele kiija, ‘Miyaa mumanyi wangu, uyinse ukhale uluvala ulwa pamwandi panu.’ Apo baheene pina hambi wiwonekha uwukhome waakho, pamwandi ya vayaanwa woona. 11Kwa kiiva, umuunu yoyoona yuna ikiyitufya, uNguluvi akhamuyiisa. Umuunu yoyoona yuna ikiyiyiisa, uNguluvi akhamutufya.”

12Baaho, uYeesu wámujovela yuna amuyaanile wáaja, “Pina ukivanosesa avaanu ishiwungo isha paminsi awu isha pashaamihe, usikhaveesaga ni ngʼoma iya kivashemeela avamanyi vaakho hela, awu avalukholo lwakho, awu avaanu va shikholo shaakho, awu avashegamane vaakho avanya wusi. Nda ugahe ndeeno, woope vasikuyaane kunyaanave, ndeeno vasiive vigomosa gala gina wavasenjelaga. 13Leelo, pina wiinosa ishiwungo, uveesaje ukivashemeela avapiina, avalema, na vapofu. 14Apo baheene usiive uyimiliilwe, kwa kiiva awo vagaya shiinu isha kikuhomba. Leelo, uNguluvi yumwene yuna akhakuhomba, pina akhavafyusa avagolofu.”

Ishihwano isha vahensa va shiwungo

(Mataayo 22:1-10)

15Avaanu pina vali mu shiwungo, umuyaanwa yumonga wápulikha amaswi ga Yeesu, wámujovela wáaja, “Ayimiliilwe, umuunu yuna asiilye ishiwungo mu Wutwa wa Nguluvi!” 16UYeesu wámugomosesa kwa shihwano wáaja, “Akhandi akwali umuunu yumonga, yuna wánosiise ishiwungo ishikhome, wávashemeela avaanu vinshi. 17Uluhaavi lwa shiwungo pina lwafikha, wámufilikha umuvanda waakwe kwa vina avayaanile, kiija avajovele ndeeni, ‘Lino yinsaji! Ifiinu fyona finosiiwe!’

18“Leelo, woona vina vayaniilwe vaajova vasiyinsa. Uwa wutasi wáajova, ‘Naagula umugunda, nisakula nilute kiguloleela. Lino unisaajile nisiyinsa.’ 19Uwa wuvili wáaja, ‘Naagula ingʼombe ishumi sa kilimila, niiluta kisijela. Unisaajile nisiyinsa.’ 20Woope uwa wutatu wáaja, ‘Natoola umudala lilino ndeeni, lino, nisikwiliile kiyinsa.’

21“Umuvanda yula wáawuya, wámutaviilila goona umutwa waakwe. Baheene umutwa yula wákhalala, wámujovela umuvanda waakwe wáaja, ‘Lutaga nyangu ku nsila imbaha na ku nsila isinji inangʼana mu lijumbi ili, uvaleete apa avapiina, avalema na vapofu.’

22“Paanyuma, umuvanda yula wáawuya, wámujovela wáaja, ‘Mutwa, gina ukhandi undajiise nagasenga. Lino, yishaanali imwenshe yipisigeele.’

23“Umutwa wámujovela wáaja, ‘Lino! Ulute kunja ya lijumbi, ku nsila imbaha na ku nsila inangʼana sina siiluta ku njinji ndoodo, na ku magunda, uvalombe mandu avaanu vayinse vayinjile mu litembe lyangu, mbakha vameme. 24Nikivajovela omwe kiija, mu awo vina nikhavayaanile ulwamwandi, hata yumo asikhalya ishiwungo shina nishinosiise one!’ ”

Amahombo ga kiiva mwanandeje wa Yeesu

(Mataayo 10:37-38)

25UYeesu, akhandi ijenda lumo ni shipuga shikhome sha vaanu. Wáseetukha, wávajovela wáaja, 26“Umuunu yoyoona yuna isakula kinifwata one, isakulwa kinigana one mandu kishila kimugana uwiihe, umaayi waakwe, umudala waakwe, avaana vaakwe, avalukholo lwakwe, na vawulumbu vaakwe. Khanji isakulwa kinigana one kishila shina ayiganile umwene. 27Umuunu yoyoona yuna asikiyihumya kinifwata one na kilava, hata nda yive kiifwa, asikwiliile kiiva mwanandeje wangu.#14:27 Kwa Shiyunaani yiyandiikhwe, Umuunu yoyoona yuna asisumula umusalaaba gwakwe na kinifwata one, asikwiliile kiiva mumanyisiwa wangu.

28“Niganule wunofu, nda umunyaayumo weenyu isakula kisenga, asiigahe shishi tangusiina? Tangusiina asiyanse kihiiva ifiinu fyona fina fisakulwa kisenjela. Baheene asiyipose nda anaso ihela isa kikwila kimaliisa kisenga. 29Nda asigahile ndeeno, akwiliile kisenga uluutu lwene hela, leelo ipootwa kimaliisa kisenga. Apo avashila nsila woona vasiive vikimusala, 30viija, ‘Umuunu uyu akhayansiise kisenga, leelo wápootwa kimaliisa!’

31“Nijove ishihwano ishinji, kiija avatwa vavili visakula kiilwa. Uwa wutasi ana vasulukhali magana mashumi ishumi (10,000) hela, uyunji magana mashumi gavili (2,000). Uwa wutasi asikwiliile kiluta kiilwa nda asikheele pansi na kihiiva kiija, ‘Nikwiliile kiilwa na yuna ana vasulukhali magana mashumi gavili (2,000) na kimumena?’ 32Nda awone kiija asipootwe, pina ashaanali ali kutali asifilishe nyangu avanjaajila, valute kwa mutwa yula, kiija alombe vapulinkhane.

33“Shilushwali na kunyeenyu, kusiina hata umunyaayumo weenyu yuna akwiliile kiiva mumanyisiwa wangu, nda asikifilekha fyona fina anafyo.

Avamanyisiwa va Yeesu vave ngaja muunyo umunofu

(Mataayo 5:13; Maluko 9:50)

34“Umuunyo shiinu shinofu sha kilunga mu shakiilya. Leelo nda gunanjishe, gusikwiliile kiiva nu wunofu wowoona khanji. 35Umuunyo ngaja ugo, gwiva gugaya nsengo hata kiiva ligombelo mu lilongo, leelo gwiva gwa kitaaga hela. Umuunu yoyoona umunya makutu, apulishe!”

Currently Selected:

Luuka 14: Shisangu

Highlight

Copy