Luuka 12

Ilipavilo ilya wumyansi

(Mataayo 10:26-27)

1Uluhaavi ulo, ililugu likhome lya vaanu pina vakhandi vakungaanile mbakha vikhanyana, uYeesu wálogola tangusiina na vamanyisiwa vaakwe wáaja, “Muyivavalaje nu wumyansi wa Vafalisaayo, kwa kiiva wiikhola ngaja lihelu.#12:1 Lihelu: Shiinu sha kiwumulila amakhaate. Mu lukhalala ulu, iliswi ilyo uluganulo lwakwe nsengo imbi sa Vafalisaayo sina vikivayambuhisa avanji. 2Shoshoona shina shifihiilwe shikhafumbulwa, khanji imbuusa yoyoona yikhamanyikha na kiwonekha, shiyooli fikhava bahawuvalafu. 3Lino, goona gina mwilogola mu nshiisi, gakhapuliisikha bahawuvalafu. Khanji, goona gina mupwepa mukhati mu litembe, gakhayalalisiwa bahawuvalafu.”

UNguluvi mwene duguli isakulwa kitiilwa

(Mataayo 10:28-31)

4UYeesu wáava apilogola kiija, “Omwe vamanyi vangu, nikivajovela kiija, musikhavatiilaji vina viibuda umuvili gwene. Nda vavabude, kusiina ishinji shina vakwiliile kishisenga. 5Leelo, nikivajovela kiija mumutiilaje uNguluvi! Kwa kiiva uyo yumwene umunya ngufu sa kimubuda umuunu na kimutaaga mu malafyo ga mooto gwa shiluta. Shiyooli nikivajovela kiija, uyo yumwene mumutiilaje!

6“Mwimanya kiija inyanyamba sisaanu sigusiwa kwa hela ndoodo mandu. Leelo uNguluvi asikiyisaamwa hata yimo. 7Lino omwe, uNguluvi ikivatuna mandu, kishila inyanyamba nyinshi! Hata inyele soona isa mu matwe geenyu, uNguluvi asimeenye. Lino, musikhatiilaji!

Kitaviilila ilihuuvi pa vaanu

(Mataayo 10:32-33; 12:32; 10:19-20)

8“Nikivajovela kiija, umuunu yoyoona yuna ikivajovela avaanu kiija ikiniyinatila one, na yuune Lusawo lwa Muunu nikhamujovela uNguluvi na vamalayikha vaakwe kiija, uyo muvanda wangu. 9Leelo yoyoona yuna ikinikhaana pa vaanu, na yuune nikhamukhaana pa vamalayikha va Nguluvi. 10UNguluvi akhamusaajila umuunu yoyoona yuna ikimutofola uLusawo lwa Muunu. Leelo asikhamusaajila umuunu yuna ikimutofola uNumbula uMunofu.#12:10 Ikimutofola uNumbula uMunofu: Amaswi aga uluganulo lwakwe lwiva uwunansi wuna wungakubuda wuna witambulwa mu litaafili lya 1 Yohana 5:16, Mataayo 12:22-32 nu Maluko 3:22-30. Uwunansi uwu, uluganulo lwakwe kiija, avaanu viija, insengo sa Numbula uMunofu shiyooli nsengo sa Shetaani.

11“Pina vakhavatwala mu nanda sa kifuunyila, pa vatwa na pa vanya wutawulilwa, musikhatungumalaji kiija musilogole shishi awu musiyanshe wuli. 12Kwa kiiva uluhaavi luulo uNumbula uMunofu, akhavamanyisa gina musakulwa kilogola.”

Ishihwano sha munya wusi umuyasu

13Umuunu yumonga mu shipuga shila wámujovela uYeesu wáaja, “Mumanyisaaji, mujovela umuvaha wangu kiija tihaasanie ifiinu ifya wuhaasi, fina wátuleshelaga uwiheesu.” 14UYeesu wámugomosesa wáaja, “Miyaa, yu naani yuna aniviishile one kiiva mulamulaaji weenyu, awu kiiva mugavaaji wa wuhaasi weenyu?” 15Baheene wávajovela avaanu woona wáaja, “Yivavalaji! Muleshe kiiva vanya shooyo sha fiinu finshi, kwa kiiva uwuumi wa muunu wusiihuma mu winshi wa fiinu fyakwe fina anafyo.”

16Baheene wávajovela ishihwano ishi wáaja, “Akhandi akwali umunya wusi yumonga, yuna mu mugunda gwakwe ifimelo fyamoteeshe mandu. 17Wáyiposiise mu numbula yaakwe wáaja, ‘Inkungulo yangu iyi, kusiina uluvala lwa kiviikha! Nisiigahe shi?’ 18Baheene wáhiiva, ‘Nisiigahe ndeeni, nisifibojole ifihenje fyangu, na kishisenga ishihenje ishinji ishikhome mandu. Umo mumwene nisiviishe inkungulo yangu yoona ni fiinu fyangu ifinji. 19Apo baheene nikhajova, owe numbula yangu, una fiinu finshi finofu ifya kikutanga maakha minshi. Lino singamala, ulye na kiingʼwa, ushendeeve.’ 20Leelo uNguluvi wámujovela wáaja, ‘Uli muyasu! Ishilo sha minsiyaano usiifwe! Ifiinu fyona fina ufiviishile, fisiive fya naani?’ ”

21Baheene uYeesu wáamala kwa kiija, “Ilyo lilyene lina likhasa kiiva kwa muunu yoyoona yuna iilava kiyilundishila ifiinu mu shooyo sha mu nyi muno, leelo mugaya wusi kwa Nguluvi.”

Amamanyiso ulwa kiiva nu muninu muninu

(Mataayo 6:25-34)

22Baheene uYeesu wávajovela avamanyisiwa vaakwe wáaja, “Lino, musikhalavilaji uwuumi weenyu kiija musiilye shishi, awu musifwale shishi. 23Aasi! Uwuumi wusili wuweene wuna wiitunwa kishila ishakiilya? Goope umuvili shiisho ndeeno, gwitunwa kishila amenda! 24Loleeli inkhahoove! Sisivyala wala sisikungula, sigaya shihenje wala uluvala lumonga ulwa kiviikha inkungulo, leelo uNguluvi ikisiliisa. Lino omwe mwitunwa mandu nu Nguluvi kishila inyuni!

25“Yu naani mu omwe yuna akwiliile kiyonjelesa padoodo uwutali wa wuumi waakwe, kwa nsila ya kiiva nu muninu muninu mandu? 26Lino, nda mwigombola kigaha shiinu shidoodo ngaja isho, kwashi mukiyilafya kwa njowo isinji?

27“Loleela uwuluva, shina wipongola. Wusisenga nsengo wala kihona amenda gaanave ga kifwala. Leelo nikivajovela kiija, hata uSelemaani mu lutogo lwakwe loona, asikhafwasiiwe amenda na kinojela ngaja uwuluva uwo! 28UNguluvi ikiwufwasa uwuluva uwa mu mahakha ngaja ndeeni, hata nda wuve wunojela kwa luhaavi lufupi hela, leelo wiyuuma na kinyaanywa. Lino, asikhavasenjela na kishila, omwe muna muli vanya lihuuvi lidoodo?

29“Lino, musikhalavaji kiija musiilye shishi, awu musiingʼwe shishi, khanji musikhaveesaji nu muninu muninu. 30Avaanu vina vasikimuhuviilila uNguluvi vikigalavila mandu ago. Leelo uWiheesu yuna ali kushaanya ameenye kiija mukigasakula! 31Lino, sakulaji uWutwa wa Nguluvi,#12:31 Sakulaji uWutwa wa Nguluvi: Uluganulo lwakwe kiija, tisakulwa kimufuunya uNguluvi uluhaavi loona mu wiikhasi weesu. baheene na ganji goona ago musipeelwe.

Uwusi uwa kushaanya

(Mataayo 6:19-21)

32“Musikhatiilaji omwe vina muli shipuga shinangʼana, kwa kiiva uWiheenyu uwa kushaanya aganile kivapeela uWutwa waakwe. 33Gusaaji ifiinu fyenyu, ihela iso muvapeele avapiina. Ukho kukwene kiviikha ifiinu mu shihenje isha kushaanya kuna fisisheepukha, kuna ifiinu fyakwe ifya kiviishila fisisakhala. Khanji kusiina umuhiiji yuna ivejeela kihiija, wala umumehe kinanganga. 34Kiiva kuna uviishile uwusi waakho, kukwene kuna inumbula yaakho yikhava.

Avaanu vayipinyaje pina iyinsa uMutwa uYeesu

35“Wiila muveesaje muyipinyile kisenga insengo, imuli seenyu siveesaje siveekha. 36Muveesaje ngaja avavanda vina vikimuhepelesa umukhome waanave atine kihuma ku shiwungo sha noolana, baheene uluhaavi luna akhayinsa na kihoodesa pa mulyango, vamudindulile nyangu. 37Shiba avavanda vala pina umukhome waanave akhayinsa, akhavaaga vali meeho. Shiyooli nikivajovela, asiyipinyanje avashemeele kiilya na kivasunga. 38Yikhava limwemwe kwa vavanda awo, pina umukhome waanave nda ayinse paakhati naakhati ya shilo awu pina kuhenga kunena, avaaje vali meeho.

39“Mumanyaje wunofu kiija, umunya nanda nda wáali amanye uluhaavi luna umuhiiji iyinsa, wáali iikhala meeho kiija, amusigame umuhiiji asikhabomolaga inanda yaakwe. 40Lino na yuumwe, yipinyangaji uluhaavi loona! Kwa kiiva one Lusawo lwa Muunu, nikhayinsa uluhaavi luna musihiviliile.”

Ishihwano sha vavanda vavili

(Mataayo 24:45-51)

41Baheene uPetulo wáaposa wáaja, “Mutwa, ishihwano ishi, ukitujovela ose hela awu ukivajovela avaanu woona?” 42UMutwa wámugomosesa wáaja, “Lino, yu naani muvanda muyinatifu khanji munya luhala? Yumwene yuna umukhome waakwe ikimuviikha ave muyimililaaji wa vayine, baheene ave ikivapeela ishakiilya uluhaavi luna lufwaya. 43Shiba umuvanda uyo, pina umukhome waakwe iitina, ikimwaga iigaha gina wámulajisaaga. 44Shiyooli nikivajovela kiija, umukhome waakwe akhamuviikha umuvanda yula, ave muyimililaaji wa fiinu fyakwe fyona. 45Leelo umuvanda uyo, nda ahiive kiija, ‘Umukhome wangu idiila kitina,’ baheene iyansa kivatova avavanda vayine, iilya na kiingʼwa, mbakha igaala. 46Umukhome waakwe, nda atine ilisiku nu luhaavi luna umuvanda yula asihuviilila, na ikimwaga iigaha aganji, akhamupeela ululawo lukhome na kimuviikha lumo na vina vasili vayinatilaaji.

47“Umuvanda uyo yuna iimanya ulugano lwa mukhome waakwe, leelo asikiyipinyanga kimuposheela, hata kigaha gina gisakulwa nu mukhome waakwe, uyo akhatowa mandu. 48Nu muvanda yuna asimeenye ulugano lwa mukhome waakwe, nda agahe fivi, uyo akhatowa padoodo. Umuunu yoyoona yuna apeliilwe finshi, uyo ana mukhole mukhome, yuna apeliilwe insengo nkhome, ana mukhole ugwa kihumya imola ya nsengo nkhome.

Uwukhamu uwa kimufwata uYeesu

(Mataayo 10:34-36)

49“Nayinsaga kiveesa umooto pa nyi apa. Shiba nda guve guyansiise kiveekha! 50Leelo na yuune nina malava gina nisakulwa kiposheela, na nisiive nipiilava mu numbula yangu, mbakha gasenjeshe. 51Aasi, mwijova nayinsa kileeta uwulindamafu mu nyi? Ndaali! Nikivajovela kiija, nayinsa kivabagulania. 52Kihuma lino yikhava ndeeni, mu litembe muna vakwali avaanu vasaanu vasiive vibagunkhana, vatatu vakhayibaagula ku vavili. Woope vavili awo vakhayibaagula ku vatatu. 53Udaada asiive inangana nu muswamuve, nayu muswamuve akhanangana nu wiihe. Umaayi asikhapulinkhana nu mwali waakwe, nayu mwali waakwe asikhapulinkhana nu maayi waakwe. Umaayi asikhapulinkhana nu mukhamwanaakwe, woope umukhamwanaakwe asikhapulinkhana nu mukhamwana.”

Kimanya ishimanyilo sha luhaavi

(Mataayo 16:2-3)

54UYeesu wávajovela khanji avaanu va shipuga shila, wáaja, “Pina mukigaaga amafunde gikungaana mwijova, ‘Inoonya yisakula kitoonya,’ shiyooli yitoonya. 55Khanji pina mukilyaga ilipepo liihuma kunyagamo mwijova, ‘Kusiive ni lifushe,’ shiyooli liiva.#12:55 Mu nyi ya Isilaheli, ilipepo kihuma kunyagamo lipinsa ilifushe. 56Omwe muli vamyansi, mufimeenye ifimanyilo ifya mu nyi na mu wulanga! Lino, kwashi mwikunya kimanya uluganulo lwa gina gisenjekha insiku isi?

Kipulinkhana nu munya mukhole

(Mataayo 5:25-26)

57“Kwashi musilamula yuumwe iliswi ilinofu ilya kigaha? 58Umunya mukhole waakho nda ikikutwala pa livansa, pina muli mu nsila jimbaga kimulambiisila kiija mupulinkhane. Nda usigahile ndeeno, asikutwale pa livansa, ukho usiihigwe na kitwalwa kwa ngufu mu shifungo. 59Nikikujovela kiija, usikhapoola mukhati umo mbakha uhombe umukhole goona!”

Currently Selected:

Luuka 12: Shisangu

Highlight

Copy