Yohana 11

Imfwa ya Laasalo

1Wáali akwali umuunu yumonga ilitaawa lyakwe itambulwagwa Laasalo. Umuunu uyo wáali mutamu na akhandi iikhala ku lujinji lwa Betaniya lumo na vawulumbu vaakwe, uMaliya nu Malita. 2UMaliya uyo akhandi wulumbu waakwe uLaasalo, yumwene yuna wámususuutaga uMutwa uYeesu amafuta aga mununsi munofu na kimufyangula amagulu ni nyele saakwe.#11:2 Yimba mu litaafili lya Yohana 12:1-8. 3Baheene uMaliya nu Malita valajisa imola kwa Yeesu vaajova, “Wee Mutwa, tikikujovela kiija umugani waakho uLaasalo, mutamu.” 4UYeesu wáganaga kipulikha imola iso wáaja, “Uwutamu uwo wusili wa kimubuda, leelo wa kiwonensa uwutupikho wa Nguluvi, baheene avaanu vanitiile one Lusawo lwakwe uNguluvi, kishilila uwutamu uwo.”

5UYeesu wávaganaga mandu uMalita na valukholo lwakwe uMaliya nu Laasalo. 6Leelo uYeesu pina wápulikhaga kiija uLaasalo mutamu, wáyonjelesa nsiku sivili kikhala uluvala ulo. 7Lino saganaga kishila nsiku sivili, uYeesu wávajovela avamanyisiwa vaakwe wáaja, “Tilute khanji ku Yudeya.” 8Avamanyisiwa vaakwe vamugomosesa vaajova, “Wee Mumanyisaaji, gologolo baaha aVayahuudi vamonga vakhandi visakula kikuhuda na mangʼanga kiija ufwe. Lino kwashi wisakula kiluta khanji kuukho?”

9UYeesu wávagomosesa wáaja, “Wuli, ishiminsi shingaya masala ishumi na gavili? Umuunu nda ijenda paminsi, asikwiliile kikuvala iligulu lyakwe, kwa kiiva uwuvalafu wumulikha fyona. 10Leelo yuna ijenda paashilo ikuvala, kwa kiiva uwuvalafu uwa kimutanga, wukusiina.”

11UYeesu wáganaga kilogola ago, wáyitenekha kivajovela avamanyisiwa vaakwe wáaja, “Umumanyi weesu uLaasalo agonile utulo, leelo niiluta kimulamusa.” 12Lino avamanyisiwa vaakwe vamugomosesa vaajova, “Wee Mutwa, nda agonile utulo, asilamushe.” 13Leelo uYeesu apa akhandi ameenye kiija shiyooli uLaasalo afwile, leelo avamanyisiwa vaakwe vakhandi vihiiva kiija iijova agonile utulo. 14Ndeeno uYeesu wávajovela bahawuvalafu wáaja, “ULaasalo afwile. 15Leelo one nishendeeva kiija nisikhandi nikwali pina uLaasalo iifwa, baheene omwe munihuviilile mandu. Lino, yinsi tilute kunyaakwe.” 16Lino umumanyisiwa yumonga ilitaawa lyakwe Tomasi yuna vakhandi vikimutambula Lipasa, wávajovela avamanyisiwa vayine wáaja, “Na yuuse tilutaje, kiija tifwe lumo nu mwene.”

UYeesu ilogola nu Malita

17Lino uYeesu wáganaga kifikha ku Betaniya, wáawona uLaasalo amalile nsiku sina mu lijooja. 18Kihuma mu lujinji lwa Betaniya mbakha ku Yelusalemu kukhandi kuna wutali wa kilomiita sitatu ndeeni. 19Ndeeno, aVayahuudi vinshi kihuma ku Yelusalemu vakhandi viyinsa ku Betaniya kivahunjila uMalita nu Maliya, kwa kiiva ya shivembo sha wulumbu waanave uLaasalo.

20Lino uMalita wápulikha kiija uYeesu ali mu nsila, wáahuma kunja kiluta kimuposheela, leelo uMaliya wásigala mukhati mu nanda. 21UMalita wámujovela uYeesu wáaja, “Wee Mutwa, nda waali uveesaje baaha, uwulumbu wangu ndi asaafwa. 22Leelo hata lino nimeenye kiija, shoshoona shina usimulombe uNguluvi, asikupeele.”

23Baheene uYeesu wámugomosesa wáaja, “Uwulumbu waakho asifyushe na kiiva muumi khanji.” 24UMalita wáaja, “Wee Mutwa, nimeenye kiija uNguluvi pina akhavafyusa avaanu woona mu lisiku ilya kihigwa inyi, woope akhafyukha na kiiva muumi khanji.” 25UYeesu wámugomosesa wáaja, “One yuune uwo uwufyukho, khanji one nili wuumi. Umuunu yoyoona yuna ikinihuviilila one, hata nda afwe akhava muumi. 26Yoyoona yuna muumi, khanji ikinihuviilila one, asikhafwa kaa. Wuli, wihuviilila ago?” 27UMalita wámugomosesa wáaja, “Shiyooli Mutwa, nihuviilila kiija owe yuuwe Mukulusaaji,#11:27 Mukulusaaji: Kwa Shiyunaani yiyandiikhwe Kilisito. Yimba iliswi Kilisito mu Maswi aMahensa. Lusawo lwa Nguluvi, owe yuuwe yuna uNguluvi akufiliishe mu nyi.”

UYeesu ikhoola

28UMalita wáganaga kilogola ago, wáaluta kimushemeela umunangʼana waakwe uMaliya. Lino wámujovela palubali wáaja, “UMumanyisaaji ali baaha, ikikushemeela.” 29UMaliya pina wápulikha ago, wáyiima nyangu wáaluta kwa Yeesu. 30UYeesu akhandi asinayinjile mu lijumbi ilyo, leelo akhandi uluvala luna uMalita akhalutile kimuposheela. 31Avaanu vala vina vakhalutile kimushiviilisa uMaliya, vakhamwajile iyiima na kihuma kunja. Lino vamufwata kwa kiiva vakhandi vihiiva kiija, uMaliya iiluta kikhoola ku lijooja.#11:31 Ingʼoma ya Vayahuudi ya kisiila avaanu, vakhandi vikivaviikha vina vafwile mu lijooja lina likhandi lihimbe mu shidunda na kilibilusisa ilingʼanga pa mulyango. ULaasalo wásilwagwa mu lijooja ngaja ilyo.

32UMaliya wáganaga kifikha uluvala luna akhandi akwali uYeesu, wámwaga, wáfugama pamwene wámujovela wáaja, “Wee Mutwa, nda waali uveesaje baaha, uwulumbu wangu ndi asaafwa.” 33UYeesu wáagana kimwaga uMaliya ikhoola, na vaanu vina wáyinsa nawo woope vikhoola, wásugumilwa mandu mu numbula yaakwe. 34Baheene wávaposa wáaja, “Mwamuviikha kwi?” Vamugomosesa vaajova, “Wee Mutwa, yinsa uyibedele.” 35UYeesu wákhoola. 36Lino, avaanu vina vakhandi vayinsile pa shivembo vaajova, “Loleeli shina akhandi amugeene uLaasalo!” 37Leelo avaanu avanji vaajova, “Umuunu uyu yumwene yuna wámuponiaga nayu mupofu, lino kwashi asaagaha lyolyona kwa Laasalo, kiija asikhafwisaga?”

UYeesu ikimufyusa uLaasalo

38UYeesu pina apisugumiilwe mu numbula yaakwe, wáafikha pa lijooja lina vakhandi valigubiishe ni lingʼanga ilikhome pa mulyango. 39UYeesu wávajovela avaanu vina vakhandi pala wáaja, “Libiilusi ilingʼanga ilyo pa mulyango.” UMalita yuna akhandi wulumbu waakwe yula yuna afwile, wámugomosesa wáaja, “Wee Mutwa, lino ayansiise kinunkha, kwa kiiva sishilile nsiku sina, kihuma asiilwe.” 40Baaho uYeesu wámujovela wáaja, “Wuli, nisakujovela kiija nda wihuviilila, usiwaaje uwutupikho wa Nguluvi shina wushwali?”

41Baheene valibiilusa ilingʼanga lila. UYeesu wáloleela kushaanya, wáfuunya kwa Nguluvi wáaja, “Wee Daada, nihonjesa, kwa kiiva wipulikha amafuunyo gangu. 42Nimeenye kiija ukinipulikha uluhaavi loona, leelo nilogola aga kwa kiiva ya shipuga sha vaanu ava, baheene vahuviilile kiija yuuwe wanifilikha.”

43UYeesu wáganaga kilogola ago, wámushemeela kwa kikhoosa ishawuti wáaja, “Laasalo, huma kunja!” 44Baaho umuunu yula yuna akhandi afwile, wáahuma kunja. Amagulu na mawokho gaakwe gavilinjisiiwe amenda ga kimusiilila. Khanji akhandi ni shitambala shina vakhandi vamupinyile ku meeho. Baheene uYeesu wávajovela avaanu vala wáaja, “Muyaawuli amenda ago, mumuleshe ayilutilaje.”

Ulupulinkhano lwa kimubuda uYeesu

(Mataayo 26:1-5; Maluko 14:1-2; Luuka 22:1-2)

45Lino aVayahuudi vinshi vina vakhandi valutile kimuhunjila ishivembo uMaliya, vaganaga kigaaga gina uYeesu agahile, vamuhuviilila. 46Leelo aVayahuudi avanji vaaluta kwa Vafalisaayo na kivajovela gina uYeesu agahile. 47Baheene avatambule avakhome na Vafalisaayo vashemeela ilivansa lya Vayahuudi#11:47 Ilivansa lya Vayahuudi: Yimba iliswi Livansa lya Vayahuudi mu Maswi aMahensa. vaposania vaajova, “Tigahe shishi? Umuunu uyu, iigaha amabikha minshi. 48Nda tikimulekha agahaje hela amabikha ago, avaanu woona vasimuhuviilile. AValuumi vakhayinsa na kiyinanga inyi yeesu nayi nanda imbaagule iya kifuunyila.”

49Baheene umunyaayumo mu vakhome vala, ilitaawa lyakwe yu Kayafa, yuna akhandi mutambule mukhome#11:49 Mutambule mukhome: Yimba iliswi Vatambule mu Maswi aMahensa. uwa mwakha ugo, wávajovela wáaja, “Omwe musimeenye shoshoona!” 50Wuli, musimeenye kiija shiba kunyeenyu umuunu yumo afwe kwa kiiva ya vaanu woona, kulikho inyi yoona yinangwe? 51UKayafa asikhalogwele ago, ngaja shina ageene yumwene. Leelo kwa kiiva akhandi mutambule mukhome mu mwakha ugo, uNguluvi akhandi ikimugaha akuwe amalago kiija uYeesu akhafwa kwa kiiva ya shimyanja shoona sha Vayahuudi. 52Khanji uYeesu asikhafwa kwa kiiva ya shimyanja isho sheene duguli, leelo khanji avawungaanie avaana va Nguluvi vina vapalankheene, vave papaamo.

53Kihuma ilisiku ilyo, avakhome va Vayahuudi vayansa kisakula insila iya kimubuda uYeesu. 54Kwa kiiva ya ilyo, uYeesu wáalekha kijenda bahawuvalafu mu Yudeya. Leelo wáwuukha wáaluta nkholeela nu lunyikha, ku luvala lwa Efulahimu. Wáakhala ukho lumo na vamanyisiwa vaakwe.

55Ishiwungo sha Vayahuudi isha Pasaakha shikhandi nkholeela. Lino avaanu vinshi vawuukha mu majumbi gaanave, vaaluta kiyivalasa#11:55 Kiyivalasa: UNguluvi wávalajisaaga avaanu vaakwe kiyivalasa uluhaavi ulwa shiwungo sha Pasaakha pina shisinaafishe, baheene vave vayivaleese vina vangaya khadeeha khokhoona pamwene. Yimba mu litaafili lya 2 Njowo sa Luhaavi 30:17-19. ku Yelusalemu. 56Ino avakhome va Vayahuudi vayitenekha kimusakula uYeesu, vaposania pina vakungaanile lumo mu lukeeke lwa nanda imbaagule iya kifuunyila, vaajova, “Omwe mwihiiva shi? Wuli, umuunu uyo asiyinse ku shiwungo ishi awu asiyinsa?” 57Avatambule avakhome na Vafalisaayo valajisaaga kiija, umuunu yoyoona yuna ameenye kuna akwali uYeesu, alute avajovele baheene vamukhate.

Currently Selected:

Yohana 11: Shisangu

Highlight

Copy