Génesis 16

Saraí Abramnö wejina jawa, jömöayuju Agarnö ö̧jobö

1Sarai, Abram ilekwoma, tjemu debijotö. Ja̧danö, jobujuma jömöayujunö, Egipto jojosujunö juna̧lijotö, Agar mikwujunö.

2Ja̧danö, Sarai tjemu dejobetjö̧ Abramnö jö̧ba̧lijotö:

—Abram, Isabenö Jo̧ Diosma tjemunö iyokokosa. Jo̧kwaobetjö̧ ötjö chömöayujukwö ja̧wi, jobujutjö kwi̧tji̧munö, ötjö chi̧tji̧mudanö baibanö chöbötjatocha— jö̧ja̧liökwe jejenö, Sarai weji̧danö a̧ja̧kwijetö Abramma.

3Jejenö baledijetö, Abram, Sarai domulataja o̧biya Canaánnö tjö̧ji̧ baledibajena. Ja̧ mölema Saraima iyijotö jömöayujunö Abramnö, jo̧ba ilekwo baibanö. 4Ja̧danö, Abramma ilekwo baibanö emijetö Agarnöma. Jemi tupakwöma Agarma metu'wo ji̧jotö. Ja̧danö, metu'wo chö̧ja, jö̧ba̧lö, jöwaisachibena Agarma Sarainö, mikwawököju, jö̧ba̧lö, sulabenö obijotö, tjemu dejobetjö̧.

5Ja̧danö, Agar jejenö jedioko Saraima jö̧ba̧lijotö Abramnöma:

—Chilekwe, Agar ötjönö sulabenö jeda̧li̧ma ökwöda jawa. Ötjöma ökwökwö jö̧jobö wetijayonö babema metu'wo jö̧jobetjö̧ sulabenö jedokosa ötjönöma. Chilekwe, jobujuma kwilekwojobetjö̧ ja̧ sulabenö jedi̧ma ökwöda jawa. Isabenö Jo̧ Diosnö atebobe edö yöawobö ökwö sulabenö ja̧köbinojobö, ötjö sulabenö ja̧tinojobö— jö̧ba̧lijotö Saraima.

6Jejenö jö̧ja̧lökwe Abramma atadijetö:

—Chilekwo ötjö jawamaökö, ökwöda jawa. Jobujuma ökwöda kwömöayujujobetjö̧ ökwöda weköboko— jö̧ba̧lijetö Abramma.

Agar döjibajina jawa, Saraí usula emawö jö̧jobö weinoko

Ikenama Saraima Agarnö usula emawöda jö̧jobö ja̧bijotö. Jejenö usula emawö jö̧jinö ja̧joko jelobe döbibajijotö Agarma, Sarai jö̧jelöma. 7Döbibajaju jojodö deena, ojwese'do jobekwö 'yi̧jotö, Shur comunidadbe 'ya̧kwawa mana ö'öbö je'donö. Ja̧danö, jobe jö̧jobe, Isabenö Jo̧ Dios ángeldanö ichejekwö öwawachajo̧ma ichö badekwajijetö jobujunö. 8Jo̧ba ángeldanö ichejekwö öwawachajo̧, Isabenö Jo̧ Diosma abebö a̧ja̧kwijetö Agarnöma:

—Agar, Sarai jömöayujuma ¿detjö kwichaja̧da? Ja̧danö ¿dai kwi̧'ya?— abebö a̧ja̧kwijetö jobujunöma. Jejenö abebö a̧ja̧kwoko atadijotö:

—Chuluwuju jö̧jelö dötibaja— atadijotö Agarma.

9Ikenama Isabenö Jo̧ Diosma, ángeldanö ichejekwö öwawachajo̧ma Agarnö webijetö:

—Kwuluwuju jö̧jobekwö tjebachaji, Agar. Okobe jwiinö weji̧ma kwa̧ja̧kwo— webijetö. 10Ja̧danö, ju'wibi yöbawijetö jobujunöma:

—Hagar a̧ja̧kwitjö. Ökwötjö tupadanö jojodönöma tjöba̧jekwachinö pjatatakwo̧sa, ba̧jadöbi tjö̧ba̧jadökenanö. 11Yötawakwö. Ökwöma metu'wo jujuja. Ja̧danö, kwitji̧nö kwemakwujuja, Ismael#16:11 Ismael jö̧ba̧löma, Isabenö Jo̧ Diosma a̧ja̧kwo̧, jö̧ba̧lö wanekwachobe , jö̧ba̧lö kwimidakwo̧nöma. Agar, Isabenö Jo̧ Diosma usula emawö kwubudekwi̧ a̧ja̧kwobetjö̧ jejenö kwimidakobe kwitji̧nö, Ismael jö̧ba̧lö. 12Ja̧danö, kwitji̧ma uu 'diakwo̧ ja̧danö iteda ösödi̧da ja̧bö ö̧jakwo̧. Ja̧danö, okobe deinö tjöpöjojo öjakwo̧, kwitji̧ma. Ju'wedöbi jo̧ba öpöjojodö tjöja̧kwo̧. Jo̧bama ömöledö tjö̧jelöma ödö wainö ö̧jakwo̧— yöbawijetö angelso̧ma Agarnöma.

13Ja̧danö, Isabenö Jo̧ Dios jejenö yöawoko Agarma Diosnö öbabijotö, ötjönö edö te'ada̧lo̧ Dios, jö̧ba̧lö. Ja̧danö yöba̧lijotö, ¡Ayö! Ötjöma Diosnö chedajayonö ina 'yaba̧lujusa, jö̧ba̧lö. 14Ja̧danö, jejenö baledinobetjö̧ je'do ojwese'doma, Ber Lajay Roí, jö̧ba̧lö, ötjabine'do. Je'do, Cadés niji Bered niji 'da̧detjö döe'doma ina babe mölebi döobe nijitjöma.

Agar Sarai jö̧jobekwö tjebachajinuju jitji̧nö jemina jawa

15Ikenama Agarma Sarai jö̧jobekwö tjebachajijotö. Ju'wi möle emijotö jitji̧nö, Abram itji̧nö. Ja̧danö, Abramma midijetö itji̧nöma Ismael jö̧ba̧lö. 16Agar jitji̧nö jemajena Abramma ochenta y seis a̧yo bo̧ ji̧jetö.

Currently Selected:

Génesis 16: WPC

Highlight

Copy