LUCAS 18

Jesosaa huohuipea-aicapoa esohui ebameesahuajji eahuemano'yohua dejja etii poani huohuiajjamajamajacanajejo

1Jesosaa esohui ebameesahuajjijo huohuipea-aicapoa cuana ojaya queaja'a epojji mimimajamajacapoquijji Eyacuiñajjinijje. Mique mimi jayojja mi-acuajicajo jamatii majo mimipajeaca'yoajja. 2Jamajjeya Jesosaa huohuicapoa cuana jama ba'a: —Oe meshijo dejja etii poani peacuana a'a queapame, a'a queamimishi poani huohuijji nequinaje. Oya Eyacuiñajji shahuaba-ajjatii nequipoquinaje, ojjaña dejjacuanajo meteama nequipoquinaje pea-ai. 3Ma meshijo oe epona eahuemano'yo anipea-ainaje. Oya ma dejja etii poani nequiyasijje poemajamajanequinaje o huohuiajjaa jama ba'a: “E botiama ajji poani dejjaa ecue meshi jjesheca'yonaje. Jamajjeya miyaya oya sosequiamee'yocue ecue meshi jjesheca'yonaje sosejje.” 4-5Jamatii queacahuihuisonee ma dejja etii poani epona eahuemano'yoja esohui shajja-ajjasapo-ajjatii poanaje. Majoya quijjenei epona eahuemano'yo oque poemajamajanequinajejojoya dejja etii poani jama jjashahuabaquime poanaje ojo ba'a: “Eya Eyacuiñajji shahuaba-ajja, ojjaña dejjacuanajo eya meteama nequipoquiani, jamatii jiquio epona eahuemano'yohua oya esohuiya huohuiajjamajamajacanijo eyaya ma dejja oja meshi jjeshe'yojji poanaje sosequiameeje'yo peacuaa eya queapame pojjeama ebaca poanijje. Majoya epona eahuemano'yo eque poepajeaje'yo.”—

6Jesosaa huohuitiicapoa cuana jama ba'a: —Dejja etii poaniya epona queapame acanaje jamatii oya Eyacuiñajji shahuaba-ajja nequiya. 7Oya jayojja pea-aiya oja babacacuana epojjajo mecajje pea-ai onijje mimitiipoquiani bamajje Eyacuiñajjiya queapame acaje, jaahuanacapoquije. ¿A'a acuae Eyacuiñajjiya oja babacacuana nahuecuajijjima acaje? Chojja. 8Eyaya quiana huohuiaña, Eyacuiñajjiya oya nahuecuajicaje shonoshonojjimaneiya. Quijje eya, Dejjapojji epo, poeo'oyamajje, ¿a'a eyaya dejja, eponacuana pea-ai jiquio meshijo ba'e ejo jjashahuabaqui'yanitii bañaje? ¿A'a ejo jjashahuabaquipajea'yonaje bañaje pojja'a?—

Jesosaa pea esohui ebameesahuajji huohuipea-aicapoa fariseo dejjajo, emeshimeseja yajji bejjo chichapoquiajji poani dejjajo pea-ai

9Jesosaa pea esohui ebameesahuajjijo huohuipea-aicapoa joya dejjacuana oyaneitii queapamenee poso jjabaquianicuana niñesheajjijo. Coma dejjacuaa peacuana botiama acani oyatii mimishiama poso jjabaquianiyajjejojo. Jamajjeya Jesosaa huohuicapoa cuana jama ba'a: 10—Beca dejja Eyacuiñajjija equi-aiquiquibohuasijje poquinaje onijje mimiya. Oe dejja fariseo poani. Pea ca bejjo chichapoquiajji Roma emeshimeseja yajji poani. 11Fariseo dejja epi nequi Eyacuiñajjinijje miminaje jama ba'a: “Eyacuiñajji, eyaya miya bihuiaña pea dejjacuana jama pojjeama nequiya. Peacuana ca siipojji poani, queamimishica'a, peacojjojji poani pea-ai. Joya ecua dejja jomajo ani bejjo chichapoquiajji poani Roma emeshimeseja yajji jama pojjeama ca eya poani. 12Eya beca cahuime huiso bobi ijjiapojjima' ani minijje emimijji ojjaña semanacuanajo. Ojjaña bejjo, aquiana pea-ai cua eya jjeshepoquiaña huisotii, huanapoquiaña oepojji miquea yajji. Diez huisome jjeshemajje, eyaya oe huanapoquiaña miquea yajji, jamaya eyaya queapame apoquiaña” jama mimime poanaje fariseo dejja Eyacuiñajjinijje. 13Pea dejja Roma emeshimeseja bejjo chichapoquiajji poanaje ca fariseo dejjajo queahueshapishana nequinaje Eyacuiñajjinijje emimijji. Queayenonee pomajje jjabajeasohuaquiajja poanaje eyahuasijje, jjase'ocuiaqueyaquipoquinaje pea-ai oja mimishijo queayenojje. Jama mimime poa Eyacuiñajjinijje ba'a: “Eyacuiñajji, eya queamimishihuiso jjabaquiani. A'a eya che queanee pomeejji jamatii ecuea mimishi queahuiso nequijo.”—

14Jamajjeya Jesosaa huohuicapoa cuana jama ba'a: —Eyaya miquiana huohuiaña, jiquio dejja Roma emeshimeseja yajji bejjo chichapoquiajji poani oja equiyasijje poqui'yo oja mimishima'yo bacanaje Eyacuiñajjiya. Fariseo dejja ca cho, oja mimishijjitii bacanaje. Jamaya poanaje ma beca dejja. Ojjaña joya oyaneitii queapamenee queaca'anee poso jjabaquijjicuana Eyacuiñajjiya oya pameama, ca'a-ama jjabameequicaje ojjañacuanajo. Joya oyanei queapame pojjeama, ca'a-ama jjabaquianicuana ca Eyacuiñajjiya oya queapame, queaca'a jjabameequicaje ojjañacuanajo.—

Jesosaa esho'iquiana esohui o queapame pomeejjijo acapoa

(Mt 19.13-15; Mc 10.13-16)

15Majoya aje esho'iquiana yecapoa cuaa Jesosa aniyasijje esho'iquianaja sapabiajje oja eme ehuanajji Eyacuiñajjinijje emimijji o queapame ajjijo. Jamatii Jesosa shajja-ajjajji poanicuaa ma esho'iquiana yejji poanajecuana tecueacapoa oja esho'iquiana yejjima yajji. 16O jama tecueame acaje shajja-ajjacapoa Jesosaa. Jamajjeya o shajja-ajjajji poanicuana iyaamajje oya jama acapoa ba'a: —¡Chojja! ¡A'a esho'iquiana yejji poanicuana tecueajji! Ohuaya cayecahua eque. Bacue ojjaña jiquio ejo ani esho'iquiana jjashahuabaqui'yani jayojja comaya nobiquije'yo Eyacuiñajjiya ojjañacuana huoojeacapoquianitii meshi Eyahuasijje. 17E'ejojonei ojjaña joya esho'iquiana jjashahuabaqui'yani jayojja mipomajje Eyacuiñajjiya ojjañacuana huoojeacapoquianitii meshi Eyahuasijje enobiqui'yojjitii pojjeama poaje.—

Oe dejja quea-aquianahuisonee miminequiapoa Jesosanijje

(Mt 19.16-30; Mc 10.17-31)

18Majoya aje oe dejja etii poaniya Jesosa huohuiajjacapoa jama ba'a: —Esohuihuohuijji queapamenee, ¿ae ecuea acajji eba'etiitiipoqui'yojji Eyahuasijje?—

19Jesosaa oya saja-acapoa jama ba'a: —¿Yajjajje eya queapamenee poani huohuiaña? Che oeneinei enequi queapameneetii nequipoquiani, oya ca Eyacuiñajji. 20Miquea ojjaña Eyacuiñajjija esohui Moisesja tehuecuana eba jama poani ba'a: A'a pea eponanijje jaajji miquea huanase pojjeamanijje. A'a pea dejja quecua'yojji. A'a siipojji. A'a peacuanajo siajje pojji oya queamimishi poani. Mique chii, mique nae pea-ai queapamenee apoquiacue, oja esohuijo oe jjashajja-ajjaquicue.—

21Majoya aje ma dejjaa Jesosa huohuicapoa jama ba'a: —E'e, ojjaña jiquio miya huohuinaje huisotii esohui jayojjaya eya ba'epoquiani, esho'yahuatii.—

22Jesosaa oya jama mimime poaje onijje shajja-ajjamajje oya jama apea-aicapoa ba'a: —Jiquio jjeya eya mi huohuije miquea acajji mi Eyahuasijje eba'etiitiipoqui'yojji. Jamaya acue ba'a: Poqui'yosocue miquea equiyasijje ojjaña miquea aquianacuana peacuana quia'yohua bejjo sosejje. Majoya aema'cuana mique bejjo quiajeyo'yocue o asahuajji. Jama poajoya Eyacuiñajjiya mi queabihui ponequi'yojji queahuiso quiacaje quijje Eyahuasijje nequi'yajo. Jamajjeya ojjaña mique bejjocuana quiajeyo'yomajje poecue eque enijje po'yohua.—

23Jesosaa jama huohuime acajje ma dejja queacojjayenonee ponanapoa quea-aquianahuisonee poanijjejojo. 24Jesosaa oya queayenonee poquije'yo bamajje huohuicapoa cuana jama ba'a: —¡De, queacamajanee poani dejjacuana quea-aquianahuisonee poanija epoqui'yojji Eyacuiñajjiya ojjañacuana huoojeacapoquianitii meshi Eyahuasijje! 25Bacue, camello ehuone queaquemonee. Queacamajanee agujaquii huejjajje camelloja ejjayejjequijji. Jama pea-aiya queacamajaneenee poaje dejja quea-aquianahuisoja epoqui'yojji Eyacuiñajjiya ojjaña huoojeacapoquianitii meshi Eyahuasijje.—

26Ma Jesosaja esohui shajja-ajjajji poanajecuaa oya huohuiajjacapoa jama ba'a: —¡De! Jamajojjemo, ¿ache dejja shai Eyahuasijje poqui'yome?—

27Jesosaa saja-acapoa jama ba'a: —Dejjacuana oyaneitii nequi ejjanahuequi'yojji pojjeamatii poaje Eyahuasijje epoqui'yojji. Eyacuiñajjija caca oe oya nahueca'yojji; chama'neinei ojaya queacamaja eajji.—

28Majotii nequiya Pedrohua Jesosa huohuicapoa jama ba'a: —Ecuaaya ca ojjañatii ecuanaja huapa pojjeamacuana, aquianacuana pea-ai jeana'yonaje minijje epo'yojji.—

29Jesosaa oya saja-acapoa jama ba'a: —E'ejojonei quiana eyaya esohui huohuiaña. Ojjaña joya oja equi, oja huanase, oja dohuecuana, oja jjo'icuana, oja chii, oja nae, oja bacuacuana pea-ai jiñajji poani Eyacuiñajji ojjañacuana huoojeapoquianitii poanijo echacochacojji. 30Comaaya jjeya jiquio meshijotii nequiya jjeshecaje queahuisoneenee ma ecua ohuaya jeacana'yonaje huisoajja jama pojjeama. Eyacuiñajjiya queahuisoneenee quiacaje. Quijje pea-ai oya ba'etiitiimeecaje'yo onijje Eyahuasijje.—

Jesosaa huohuicao'oyapoa cuana quijje o mano'yojjijo

(Mt 20.17-19; Mc 10.32-34)

31Jesosaa oja babaca ona sohuihuohuiquinequijji poani 12 huisome dejjacuana iyaacapoa oopana ehuohuijji jama ba'a: —Jjeya se Jerusalén meshiyasijje poquije. Ma meshijo ma ecua yahuajonei esohuihuohuijji poacuaa tehuecapoa yajja eya Dejjapojji epo acaje'yo cuaa, oya jayojjaya eya acaje'yo cuaa. 32Ma meshijo nequica dejjacuaa peajaajji judío pojjeama etii poanicuana eya quiacaje ojaya enapameejji. Majo nequi eya soadojocaje cuaa, eya mata-acaje cuaa, cojja cuichojeapea-aicaje. 33Eya daasa cuiasejjajeacaje jjono ejeapashajjajjaa. Majoya eya manomeecaje'yo. Jamatii eya tres cahuime huiso emano'yo jaa shequije'yo— jama huohuimeya acapoa Jesosaa oja babaca dejjacuana.

34Jamatii oja babaca dejjacuanaja queaquehuatii poa Jesosaja esohui, ajeo oya mimiani poso jjashahuabaquiapoa cuana, ojaya queaja'a pojjeama poa.

Jesosaa dejja cojjama' jjacojjaja'ameequica'yapoa

(Mt 20.29-34; Mc 10.46-52)

35-36Majoya Jesosa Jericó meshiyasijje poechipiajo oe dejja cojjama' ani ejeojjisahuajo memeaniya shajja-ajjacapoa queahuisocuana ejeojjijje jjayejjequije. Jamajjeya huohuiajjacapoa cuana ajeo queahuisocuana jjayejjequiani. 37Oya saja-acapoa cuaa jama ba'a: —Oya Jesosa Nazaretcuiñajji jjeyanei jiquiojje jjayejjequije.— 38Jamajjeya dejja cojjama' ani taaapoa jama ba'a: —Jesosa, Davidja osecua, ¡che ejo queayeno jjashahuabaquicue e queapame pomee'yojji!—

39Queahuisocuaa ma Jesosanijje poquijeya cojjama' dejja tecueacapoa oya mimima' ejeca-ani'yojji nisho. Jamatii oya taaamajamaja-aniapoa jama ba'a: —Davidja osecua, ¡che ejo queayeno jjashahuabaquicue e queapame pomee'yojji!—

40Jamajjeya Jesosaa nequiñaquimajje cojjama' dejja oque yemeecapoa. O nequichipineiyasijje yecajo Jesosaa oya huohuiajjacapoa jama ba'a: 41—¿Yajja ecue asa acuae mi poani?—

Dejja cojjamaa oya saja-acapoa jama ba'a: —Emeshimesenei, eya che jjacojjaja'ameequi'yocue.—

42Jesosaa oya huohuicapoa jama ba'a: —¡Jjeya queacojjaja'anee po'yocue! Miya e'ejojonei ejo jjashahuabaqui'yonajejojoya queacojjaja'anee po'yonaje.—

43Jesosaa jama huohuime acajeahuajotii, dejja cojjama' queacojjaja'a ponana'yapoa. Majoya ohuaya Jesosa equijje acapoa Eyacuiñajji bihuiacaniya. Ma dejja cojjama' ani queacojjaja'a po'yonaje bajji epocuaaya Eyacuiñajji bihuiapea-aicapoa.

Currently Selected:

LUCAS 18: ESE

Highlight

Copy