Ebik 23

Paulo naayetonganirra omumaiso g'orukurato

1Paulo yagumyaho amaiso ab'orukurato, yatandika kwesoborra ati: “Bagenzi bange, obwomeezi bwange bwona naikaraga ninkora ebihikire omu maiso ga Ruhanga okuhika na hati, ntaina ekirukunjunanwa.” 2Obu yagambire ati, Ananiya omukuru w'abanyakatagara, yaragira abo abakaba bamwemeriire haihi kumuteera oruhi. 3#Mat 23:27,28.Nukwo Paulo kumugambira ati: “Iwe ekisiika ekisiigirwe inoni! Na iwe Ruhanga alikuteera! Oikaliire kuncwera omusango noosigikira omu Biragiro bya Musa, kandi wabicwa nooragira kunteera?” 4Abo abakaba bamwemeriire haihi baagamba bati: “Obu si noojuma nyakatagara omukuru owa Ruhanga?” 5#Kurug 22:28.Nandiki Paulo ati: “Bagenzi bange, mbaire ntamanyire nkooku ali nyakatagara omukuru; ningira kikahandiikwa kiti: ‘Otalijuma omukuru w'ihanga lyawe.’ ”

6 # Ebik 26:5; Baf 3:5. Hanyuma Paulo obu yayetegeriize omu bantu abeesoroize, ekicweka kimu nkooku kikaba kiri ky'Abasadukaayo kandi ekindi ky'Abafalisaayo, nubwo yagambiire Orukurato n'iraka likooto ati: “Bagenzi bange, nyowe ndi Mufalisaayo kandi mwana w'Abafalisaayo. Ninjunanwa hanu habw'okunihira oku twina ha kuhumbuuka kw'abafu.” 7Obu yamazire kugamba eki, empaka zaimuka hagati y'Abafalisaayo n'Abasadukaayo; orukurato rwayebaganizaamu habiri. 8#Mat 22:23; Mar 12:18; Luk 20:27.Abasadukaayo nubo abaagambire ngu, tiharoho kuhumbuuka kw'abafu, kandi tiharoho malaika, noobu gwakubaire omuzimu; baitu Abafalisaayo ebi byona babiikiriza. 9Aho haabaho etoko nyingi, abamu ha beegesa b'ebiragiro ab'omu kitebe ky'Abafalisaayo baayemerra, baahakana n'amaani nibagamba bati: “Titurukurora nsobi omuntu onu ei yakozire. Kiraaba kita kakuba aba agambiirwe malaika rundi omuzimu?” 10Empaka zaabo obu zayeyongiire, omukuru w'amahe yatiina, naateekereza ngu, Paulo basobora kumutaagataagura, nukwo kuragira ab'amahe bagende bamubaihemu n'amaani, bamutwale omu kigo.

11Kandi ha kiro eki omu itumbi, MUKAMA yamubonekera naagamba ati: “Guma omutima, nkooku wanjuliire Yerusaalemu, nukwo osemeriire kunjurra na Rooma.”

Abayudaaya nibeekoba kwita Paulo

12Nyenkya obu bwakiire, Abayudaaya baayesorooza hamu, baayekoba omu nsita nibarahira nkooku batarukwija kulya rundi kunywa okuhika obu barakamara kwita Paulo. 13Abaayekobere omu nsita egi, bakaba nibakira ha makumi ana. 14Baagenda hali bakuru b'abanyakatagara n'abakuru b'enganda baabagambira bati? “Turahiriire kimu okutaroza ha kookulya koona tutakaisire Paulo. 15Hati nu inywe n'ab'orukurato, ekyanyu eki muraakora nukwo kusaba mukuru w'amahe amubagarurre nk'abarukugonza kwongera kwetegereza kurungi omusango gwe. Itwe tweteekaniize kumwita atakabahikireho.”

16Baitu mwihwa wa Paulo yahurra ensita yabo ey'okumugwera; yagenda yataaha omu kigo, yagimanyisa Paulo. 17Paulo yayeta omu ha bakuru b'abaserikale, yamugambira ati: “Omusigazi onu mutwale hali mukuru w'amahe; aina eki arukwenda kumugambira.” 18Yamutwara, yamuhikya hali mukuru w'amahe nagamba ati: “Paulo omunyankomo anyesirege, yansaba kukuleetera omusigazi onu, aina eki arukwenda kukugambira.” 19Omukuru w'amahe yamukwata ha mukono, yamugarra ha rubaju, yamukaguza mpora ati: “Nooyenda kungambira ki?” 20Nandiki omusigazi ati: “Abayudaaya bacwire amagezi ag'okukusaba ngu, nyenkya ogarre Paulo omu rukurato, nibasisana nk'abarukwenda kwongera kwetegereza omusango gwe. 21Baitu ebyabo otabiikiriza, habwokuba haroho abasaija abarukukira ha makumi ana abeetekaniize kumugwerra, kandi barahiire nkooku batarukwija kulya n'okunywa batakamwisire. Hati baliyo beeteekaniize, balinzire eki oraabagarukamu.” 22Mukuru w'amahe nukwo kuraga omusigazi, yamuteererra ati: “Otagambiraho muntu n'omu nkooku wabimmanyisa.”

Paulo nibamucwisiza Kaisaariya

23Omukuru w'amahe akeeta babiri ha bakuru b'abaserikale yabagambira ati: “Hati muteekanize abaserikale bikumi bibiri, hamu n'ab'embaraasi nsanju n'ab'amacumu bikumi bibiri, mugende Kaisaariya ha saaha isatu z'ekiro. 24Kandi muteekanize embaraasi Paulo ezi aratemba, mumuhikye hali Feelikisi omulemi omukuru, atahikirweho kabi koona.”

25Yahandiika ebbaruha erukugamba eti: 26“Oweekitiinisa Omulemi Mukuru Feelikisi; nyowe Kilaudiyo Lisiya ninkuramukya. 27Omusaija onu akakwatwa Abayudaaya, kandi baakumwisire kakuba ntaragenzireyo n'ab'amahe bange, namujuna obu namazire kwetegereza nkooku ali Murooma. 28Obu nagondeze kumanya omusango barukumunyegerra, namutwara omu rukurato rwabo. 29Nubwo nayetegeriize nkooku anyegeriirwe habw'ebintu ebinyakuli omu biragiro by'ihanga lyabu, baitu gutali musango ogw'okumwisa rundi kumukwasa omu nkomo. 30Aho, obu namanyisiibwe nkooku beekobere kumwita, nikyo namukutwekerra bwango, kandi naragira abamunyegeriire basoborre omumaiso gaawe eki barukumutura. Orame!”

31Abaserikale baatwara Paulo nkooku baaragiirwe, baamuhikya omu rubuga Antipatri ekiro. 32Obwire obu bwakiire, abaingi baagaruka omu kigo, baitu baamusigira ab'embaraasi beeyongere kugenda nawe. 33Banu, obu baahikire Kaisaariya, ebbaruha bagiha omulemi omukuru, kandi baayemereza Paulo omu maiso ge. 34Omukuru obu yamazire kusoma ebbaruha, yamukaguza ihanga lye. Obu yamanyire nkooku yarugire Kilikiya, 35yagamba ati: “Omusango gwawe ndiguhurra abakunyegeriire obu balikamara kwija.” Yaragira bamulindire omu kikaali kya Herode.

Currently Selected:

Ebik 23: BRR2008

Highlight

Copy