Ebik 21

Orugendo rwa Paulo naagaruka Yerusaalemu

1Obu twamazire kubaraga, twagwerra omu meeri, twagenda tutarukukubutuka twahika ekizinga Koosi. Ekiro ekyakurasireho twahika Roodo. Obu twarugire Roodo, twahika Paatara, 2nambere twasangire meeri erukugenda Foinike, twagitaahamu, twagenda. 3Obu twalengiire ekizinga Kipuro, twagisiga ha bumoso, twagenda Siriya. Twahika ha bwerre omu rubuga Tiiro, habwokuba nuho bakaba nibagya kwihiramu ebintu omu meeri. 4Obu twasangireyo abaikiriza, twamarayo ebiro musanju. Habw'okuhaburwa Mwoyo Ahikiriire, abantu baayo baagambire Paulo eleke kugenda Yerusaalemu. 5Baitu obwire bwaitu obu bwahikire, twarugayo, twayongera orugendo rwaitu. Abo boona, hamu n'abakazi n'abaana baabo baatusendekereza okuhika obu baatuturukize orubuga. Obu twahikire ha musa gw'enyanja twateeza amaju, twasaba. Hanyuma, obu twamazire kuragangana, 6twagwerra omu meeri, nabo bakagaruka owaabu.

7Orugendo rwaitu orw'okuruga Tiiro obu rwahoire, twahika Putolemai nambere twaramukiize ab'oruganda, kandi twamara nabo ekiro kimu. 8#Ebik 6:5; 8:5.Obu bwakiire twarugayo, twahika Kaisaariya; twataaha omunju ya Filipo omurangirizi w'Amakuru Amarungi, ow'akaba ali omu ha baheereza bali omusanju, twaikara owe. 9Filipo akaba aina bahara be bbana abataswirwe, kandi abakaba baina ekisembo ky'okuranga ebya Ruhanga. 10#Ebik 11:28.Obu twamazireyo ebiro, hakaijayo omurangi ayarugire Buyudaaya, ibara lye Agabo. 11Obu yatuhikireho, yakwata omweko gwa Paulo, yagwebohesa amaguru n'emikono naagamba ati: “Kinu nikyo Mwoyo Ahikiriire arukugamba ngu: ‘Abayudaaya ba Yerusaalemu nukwo baliboha bati mukama w'omweko gunu, bamuheyo omu mikono y'Abanyamahanga.’ ” 12Obu twahuliire eki, itwe n'abandi boona abakaba baliyo, twayesengereza Paulo aleke kugenda Yerusaalemu. 13Baitu uwe yagarukamu ati: “Kiki eki murukukora kwija hamu nimurra kandi nimunsununura? Nyowe tinyeteekaniize kukwatwa kwonka baitu n'okufeera Yerusaalemu habw'ibara lya MUKAMA Yesu.” 14Obu yayangire kutuhuliriza, twamuleka, nitugamba tuti: “MUKAMA eki araagonza, nikyo kikorwe.”

Obu yataahire Yerusaalemu, Paulo yagenda kurora Yakobbo

15Ebiro byaitu Kaisaariya obu byahoireho, twaboha ebintu, twaimukya orugendo, twagenda Yerusaalemu. 16Abamu ha baikiriza ba Kaisaariya baagenda na itwe, baatuhikya ha nju ya Minasooni, Omunyakipuro, omu ha baikiriza abaabandize kuhindukira MUKAMA. Nuho tukaba tuli b'okuraara.

17Obu tukaba nitukyataaha Yerusaalemu, ab'oruganda batutangirra n'okusemererwa. 18Kandi nyenkya, obwire obu bwakiire, Paulo yagenda na itwe kurora Yakobbo. Abakuru b'ekitebe boona bakaba baliyo. 19Obu yamazire kubaramukya, Paulo yabasoborra naaherraniza ebintu byona Ruhanga ebi yamukoleze omu Banyamahanga. 20Obu baahuliire ebi baatandika kukugiza Ruhanga. Kandi Paulo baamugarukamu nibasoborra bati: “Mugenzi waitu, na iwe orozire omu Buyudaaya nkooku harumu abantu enkumi n'enkumi abaikiriize; boona nibeekambira Ebiragiro bya Musa. 21Na hati baahurra nkooku orukwegesa Abayudaaya boona abarukwikara omu Banyamahanga kuleka Ebiragiro bya Musa, kandi noobeegesa kutasara abaana baabo n'okutakwata engeso ez'ihanga lyaitu. 22Hati tukole ki? Mazima nibaija kuhurra nkooku oizire kunu. 23#Kubar 6:13-21.Nahabweki kora eki turukukuhabura. Hanu twinaho abasaija bbana abaarahiire; 24obatwale, oyeyeze hamu nabo, osasule byona eby'okubamwa isoke, emikoro nkooku eri. Aho boona nuho baraamanyira ebyakugambirweho nkooku bitali by'amazima, kandi iwe wenka nkooku oyerinda kandi okwata Ebiragiro bya Musa. 25#Ebik 15:29.Baitu Abanyamahanga abo abaikiriize, tukabahandiikira ebbaruha nitubasoborra eki twacwiremu, nkooku basemeriire kwetantara ebihongiirwe abacwezi, n'enyama enyakurumu esagama, n'ebisoro ebimyoirwe, hamu n'obusiihani.” 26Ha kiro ekyakurasireho, Paulo yatwara abasaija abo, yayeyeza hamu nabo, yataaha omunju ya Ruhanga kumanyisa abakuru baayo ebiro eby'okwezebwa kwabu nambere birihweraho, nukwo ekihongwa ekya buli omu kiheebwayo.

Paulo nibamukwatira omunju ya Ruhanga

27Ebiro ebi musanju obu bikaba biri haihi kuhwa, Abayudaaya abamu abaarugire Asiya, baamurora omunju ya Ruhanga, baatandika kujagaraza abantu, baagenda baamukwata, 28nibatoka bati: “Inywe basaija ba Isirairi, mutukoonyere! Omusaija onu nuwe arukugenda buli hantu naayegesa abantu kuhakaniza ihanga lyaitu, naagaya Ebiragiro ebi twahairwe Musa n'ekiikaro kinu ekirukwera. Kandi ihangamura ataahize Abagiriiki omunju ya Ruhanga, asiisire n'ekiikaro kinu ekirukwera.” 29#Ebik 20:4.Eki bakakigamba habw'okumurora juba omu rubuga ali na Trofimo owa Efeeso. Baateekereza ngu, Paulo amutaahize omunju ya Ruhanga. 30Nubwo orubuga rwona rwaimukiriire, abantu baayesorooza, baakwata Paulo, baamucunda, baamuturukya omunju ya Ruhanga; ahonaaho enyigi zaakingwa. 31Kandi obu bakaba nibeetekaniza kumwita, amakuru gahika mukuru w'amahe ngu, Yerusaalemu yoona egwirwemu akambayaya. 32Ahonaaho yatwara ab'amahe hamu n'abakuru baabo bagwera ekitebe ky'abantu. Nabo obu baarozire ab'amahe hamu n'omukuru wabu, baalekeraho kuteera Paulo. 33Kandi mukuru w'amahe obu yahikire Paulo, yamukwata, yaragira bamubohese enjegere ibiri, yamukaguza ibara lye n'eki akozire. 34Abamu ab'omu kitebe baatoka kundi n'abandi kundi. Obu yayetegeriize nkooku atarukusobora kumanya amazima habw'etoko yabu, yaragira kumutwara omu kigo ky'ab'amahe. 35Obu baamuhikize ha matembero g'ekigo, ab'amahe baamuhimba habw'empaka z'abantu; 36habwokuba ekitebe ky'abantu kikamukuratira nikitoka muno kiti: “Mumwite!”

37Paulo obu akaba ali haihi kutaahibwa omu kigo, yakaguza mukuru w'amahe ati: “Nonyikiriza kukugambira ekigambo?” Nawe yamukaguza ati: “Mara iwe noomanya Orugiriiki? 38Tiniiwe Omunyamisiri oli ayayemeseze abantu omu biro ebyahingwire, watwara omu irungu abasaija enkumi ina abaisi b'abantu?” 39Nandiki Paulo ati: “Nyowe ndi Muyudaaya, nzaarwa ya Taruso orwa Kilikiya, orubuga orumanyirwe muno. Nkwesengeriize, nyikiriza mbalize abantu.” 40Obu yamwikiriize, Paulo yayemerra ha matembero, yaculeeza abantu n'omukono gwe. Obu baamazire kuculeera, yabagambira omu Ruhebburaayo ati:

Currently Selected:

Ebik 21: BRR2008

Highlight

Copy