मरकुस 9
9
1एने यीशु ताह केयो, “मी तुमूह खेरीच केथु, जा न्याहरूह उब रेनाह ता माय रेन थोड़ाक माणहे ओहला हेते काय जाह वोर बोगवानान राजाह ताकेत हेऱ्यो आयेल नाय देख लेती, ताह वोर नाय मोरती।”
यीशुन वेह बोदेलने
(मत्ती 17:1-3; लुका 9:28-36)
2 #
2 पतरस 1:17,18 यीशु सोव दिह्यान पासाण पतरस, याकुब एने योहानाह तान आरही लेन, कुवालोच एक उचाच बोयड़ा पोर गीयो, ताहरी तान सामने यीशुन वेह बोदेल गीयो, 3एने यीशुन फाड़का ओहला चोमेकणे बाज गीया। ओहला चोमेकताला काय देरती पोर काल्लो बी दोबी दोवल्या नाय केर सेकी। 4तेवी चेलाह एलिया एने मुसा देखाना, एने ता दुयू यीशु हेऱ्या वातु केरताला। 5पतरस यीशुह केयो, “एय गुरू, आपुह न्या रेणे हाजो हे! ताहार आमु तीन तोम्बु बाणावहु, एक तार केरता, एक मुसान केरता, एने एक एलियान केरता।” 6पतरसाह मालुम नाह एतो काय तो काय केणे बाजरिनोह, काहाकाय ता जुलूम बिय जायेल एता।
7 #
मत्ती 3:17; मरकुस 1:11; लुका 3:22 तेवी एक वादेल ताह साव लेदो, एने वादलाम रेन ज्यो बोल होमलानो, “ज्यो मारो मोंगाल्लो बिटोख हे, ज्यान वातु हुमलो।” 8तेवी ता एकाणावणेच कावदेन नेजेर टाक्या; एने यीशुह सोड़ीन ता कुणीच नाह देख्या।
9बोयड़ा पोर रेन उतरने बुखेत यीशु चेलाह उकुम आप्यो, “जाह वोर मी माणहान बिटोख मोरीन जीव नाय उठु, ताह वोर जो काय तुमू दिखेल हेते तो कुणीह मा किहो।”
10ता यीशुन उकुम मान लेदा, पुण एका दिहरा हेऱ्या वातु केरने बाज गीया, “मुरेल माय रेन जीव उठणेन काय मतलब हे?” 11#मत्ती 11:14एने चेला यीशुह फुशा, “देरेमगुरू इही काहा केतेह काय एलियान पेल आवणो जोरवरी हे?”
12यीशु चेलाह जापाप आप्यो, “एलिया आखो हुदारनेन केरता पेल आवी। पुण माणहान बेटाख ने बाराम ज्य काहा लिखेल हे काय तो जुलूम दुख वेठी एने नेचो गेणाय जाय? 13पुण मी तुमूह केथु काय एलिया ते आव लागेल हे, जीह केरीन तान बाराम बोगवानान वचना माय लिखेल हे, तिहेस केरीन जो काय माणहे होदताला ता हेऱ्या केऱ्या।”
यीशु बुतड़ो लागेल सोराह हुदारने
(मत्ती 17:14-21; लुका 9:37-43)
14जेवी यीशु चेला फाय आवो, ते दिख्यो काय तान कावदेन जुलूम गेरदी टोलवाय रेनीह, एने देरेमगुरू चेला हेऱ्या बोलचाल केरने बाजरेनाह। 15जेवी माणहे यीशुह देख्या, तेवी आखा बोंगलाय गीया, एने नमस्कार केरनेन केरता तान उगे आखा दोवड़ना। 16यीशु तान चेलाह फुशो, “तुमू न्या हेऱ्या काहा बोलचाल केरतेह?”
17गेरदी माय रेन एक जाण यीशुह जापाप आप्यो, “एय गुरू, मी मार सोराह तुवा फाय लावोह, काहाकाय ता माय मुको बुत रिग रिनोह एने तो बोल नाह सिकेत। 18जेवी ज्यो बुतड़ो ता पोर हमलो किरेह, ताह बुई पोर आचटी दिथे, एने तान मुया माय रेन फेचे निकेलने बाज जाथे, एने दात केकड़ावेह, एने हुकते जाथे। मी तारा चेलाह कियेल काय तुमू ताह काड़ दिवो, पुण ता बुतड़ाह काड़ नाह सेक्या।”
19ज्यो होमलीन यीशु चेलाह केयो, “एय अविश्वासी माणहे! मी केवीह वोर तुमू हिऱ्यो रेह? एने तुमरी वेठुह? सोराह मार फाय लावो!” 20तेवी ता सोराह यीशु फाय लावा।
जेवी यीशुह ताह दिख्यो ते बुतड़ो चालोच मोंहदेलीन सोराह बुई पोर आचटी दिनो, एने तान मुया माय रेन फेचे वोयणे बाज गीया, एने तो लोलने बाज गीयो।
21यीशु तान आबाख फुशो, “ज्यान ज्यी देशा केवीह रेन हे?”
तो यीशुह जापाप आप्यो, “आत्योच रेन हे।” 22“एने ज्याह मारनेन केरता केदी आक्ठा माय ते केदी पाण्याम पाड़ीह। पुण केदी तु काह केर सिकेह ते आमु पोर गीण केरीन आमरी मोदेक केर!”
23यीशु ताह केयो, “तु केर सिकेह! ज्यी काय वात हे? बुरहो केरनारान केरता आखो एय सिकेह।”
24सोरान आबोख रेड़ीन केयो, “मी बुरहो केरथु, पुण पुरो नाह सुतो। मार बुरहो वोड़नेन केरता मार मोदेक किर!”
25जेवी यीशु दिख्यो काय गेरदी जुलूम एय गियीह, केरीन ता बुतड़ाह दोपकाड़ीन केयो, “मुका बुतड़ा, मी तुवाह उकुम आपथु, ज्या माय रेन निकेल जा, एने पुशो केदी मा रिगहे!”
26तेवी बुतड़ो आयड़ीन ताह जुलूम मोहदेलीन निकेल गीयो, एने तो सोरो मुरेल ने गेत एय गीयो, एने आखा माणहे केया, “सोरो मोर जायेल हे!” 27पुण यीशु ताह आथ देरीन उब रेणेन मोदेक किऱ्यो, एने तो उबरी गीयो।
28जेवी यीशु गेराम आवो, तेवी चेला कुवालाच जाईन ताह फुशा, “आमु बुतड़ाह बाहेर काहा नाह काड़ सेक्या?”
29यीशु चेलाह केयो, “ज्यी जात विन्ता केऱ्या बिगेर नाह निकेलने।”
यीशु तान मोतीन बाराम पुशो जाणाव केरने
(मत्ती 17:22,23; लुका 9:43-45)
30यीशु एने तान चेला ता रेन निकलीन गेलील माय लागतोस जाणे बाजरियेल ईतो। यीशु ज्य नाह होदतालो काय कुणीह बी ज्यी यात्रान बाराम मालुम पोड़ी, 31काहाकाय यीशु तान चेलाह हिकाड़तालो एने ताह केतालो, “माणहान बिटोख मी, माणहान आथाम देराय जाह, ता माहु मार टाकती। एने मी मोरीन तीन दिह्यान पासाण पुशो जीव जाह।”
32पुण ताह सोमेज माय नाह आवो काय ज्या हिकवोणान मतलब काय हे, एने ता यीशुह फुसणेन बिताला।
आखाम रेन मोठो कुण?
(मत्ती 18:1-5; लुका 9:46-48)
33ओवता ता कफरनहूम माय आवा, एने गेरान माय जाणेन बाद यीशु तान चेलाह फुशो, “वाटे तुमू काल्ली वाती पोर बोलचाल केरताला?”
34 #
लुका 22:24
पुण चेला ठावकाच रेना, काहाकाय वाटे ता ज्यो बोलचाल केरताला काय आपु माय रेन मोठो कुण हे। 35#मत्ती 20:26,27; 23:11; मरकुस 10:43,44; लुका 22:26तेवी यीशु बारा चेलाह हादिन केयो, “जो कुण मोठो बोणने हुदेह, तो पेल आत्यो एने आखान पावोर बोणी।” 36एने यीशु एक सोराह हादिन तान विची माय उबो किऱ्यो, एने तान खोलाम लेन ताह केयो, 37#मत्ती 10:40; लुका 10:16; योहान 13:20“जो कुण ओहला सोराह मार नावाम स्वीकार किरेह; तो माहु स्वीकार किरेह, एने जो कुण माहु स्वीकार किरेह, तो माहु मोकेलनाराह स्वीकार किरेह।”
जो विरोद माय नाह सोतो तो आपणे उगे हे
(लुका 9:49-50)
38योहान यीशुह केयो, “एय गुरू, आमु एक माणहाह तारो नाव लेन बुतड़ाह काड़तालो देखीन रोक्या, काहाकाय तो आपणो हाती नाह ईतो।”
39यीशु ताह केयो, “ताह मा रूको, काहाकाय जो कुण बी मार नावान चोमेत्कार ने काम नाय केरी, तो चालोच मार बाराम खाराब वातु केय सिकेह।” 40#मत्ती 12:30; लुका 11:23काहाकाय तो माणुह आपणे विरोद माय नाह सोतो, पुण आपणो हाती हे। 41#मत्ती 10:42जो कुण तुमूह मसी हेते केरीन एक कुलह्यो पाणी पिवाड़ी, ते मी तुमूह खेरीच केथु काय तान फोल केदी वाये नाय जाय।
ठोकर ने कारेण बोणने
(मत्ती 18:6-9; लुका 17:1-2)
42एने जो कुण न्या आत्याम रेन जा मार पोर बुरहो केरतेह, ता एगदाह ठोकरा खावाड़ी ते, तानकेरता हाजो ज्य हे काय एक मोटली गेरटीन पुड़ तान गेला माय बांदिन तो देरीयाम टाकाय जाय। 43#मत्ती 5:30केदी तारो आथ तुवाह पाप केरावतेय, ते ताह तोड़ दे। हाजो ज्य हे काय आथ पांगो एन हेरगाम जाणे तार केरता हाजो हे काय दुय आथ एन बी नेरगान आक्ठा माय टाकाय जाय, जाहरी आक्ठो केदी नाह ओलाणे। 44जाहरी किड़ा नाह मोरनु, एने आक्ठो केदी नाह ओलाणे।#9:44 थोड़ाक लेख माय ज्यो वचन नाह जुड़ेत। 45केदी तारो पाय तुवाह पाप केरावतेय, ते ताह तोड़ दे! लेंगड़ो एन हेरगाम जाणे तार केरता हाजो ज्य हे काय दुय पाय एन बी नेरगान आक्ठो माय टाकाय जाय। 46जा किड़ा नाह मोरनु, एने आक्ठो केदी नाह ओलाणे।#9:46 थोड़ाक लेख माय ज्यो वचन नाह जुड़ेत 47#मत्ती 5:29केदी तारा डोला तुवाह पाप केरावतेय, ते ताह काड़ दे! बाडालो एन बी बोगवानान राज माय जाणे हाजो हे काय दुय डोला लेन बी तु नेरगान आक्ठा माय टाकाय जाय। 48जाहरी तान किड़ा केदी नाह मोरनु, एने आक्ठो केदी नाह ओलाणे।
49काहाकाय आखा माणहे आक्ठा केरीन चोखा केराय जाती, जीह केरीन बोलीह मीठा केरीन खारलो केरनु।
50 #
मत्ती 5:13; लुका 14:34,35 “मीठ हाजो हे, पुण केदी मीठान खारलो होवाद जात रेय, ते ताह कायता केरीन पोशा खारलो किरहो? तुमरो जीवणो चोखो मीलो, एने एका दिहरा हेऱ्या सान्ती माय रिवो।”
Currently Selected:
मरकुस 9: NTNii2020
Highlight
Share
Copy
Want to have your highlights saved across all your devices? Sign up or sign in
The New Testament in Nahali Language © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2020
