मत्ती 25
25
दोह कुवाऱ्युन किस्सो
1 #
लुका 12:35
तेवी हेरगान राज त्यु दोह कुवाऱ्युन गेत रेय, ज्यु दिवा लेन वोवड़ाह मिलनेन निकेलन्यु। 2त्युम रेन पाच फोग्यु एने पाच सोमेजदार एत्यु। 3त्यु फोग्यु त्युन दिवा ते लेद्यु, पुण आरही तेल नाह लेद्यु; 4पुण सोमेजदार त्युन दिवा हेऱ्यु सिसी माय तेल बी बोर लेद्यु। 5जेवी वोवड़ाह आवणेन वार लाग गियी, ते त्यु आख्यु जोपणे बाज गीयो, एने हुव गीयो।
6आदि राती ओहली पुकार पोड़नी, “वोवड़ो आवणे बाजरिनोह, ताह मिलणेन केरता चालो।” 7तेवी त्यु आख्यु कुवाऱ्यु उठेन त्युन दिवा हुदारने बाज गीयु। 8एने फोग्यु सोमेजदाऱ्युह केयु, “तुमरा तेला माय रेन थोड़ोक आमुह बी आपो, काहाकाय आमरा दिवा ओलाणे केरतेह।” 9पुण सोमेजदाऱ्यु जापाप आप्यो, “ज्य आमरी एने तुमरी केरता पुरो नाय एय; हाजो ते ज्यो हे काय तुमू वेचणारा फाय जाईन तुमरी केरता वेचातो लेन आवो। 10जेवी त्यु वेचातो तेल लेणेन जाणे बाजरियेल एत्युन वोवड़ो आव गीयो, एने ज्यु तियार एत्यु, त्यु ता हेऱ्यु वाराड़ान गेरा माय जात रेन्यु, एने बायणो बोंद एय गीयो।”
11 #
लुका 13:25
पासाण रेन त्यु कुवाऱ्यु बी आवीन केत्युह, “एय मालीक, एय मालीक, आमरे केरता बी बायणो उगाड़ दे।” 12पुण वुवड़ो जापाप आप्यो, “मी तुमूह खेरीच केथु, मी तुमूह उलखेत नाह।”#लुका 13:25
13तानकेरता जाकता रिवो, काहाकाय तुमू नाहते ता दिह्याह जाणते, नाहते तुलबूखेन टेमाह।#मरकुस 13:36
तीन पावरान किस्सो
(लुका 19:11-27)
14 #
लुका 19:11-27
काहाकाय ज्य ता माणहान गेत हे, जो दिहरा देसा माय जाणे बुखेत तान पावराह हादिन तान मालदेन ताह होप देणे। 15तो एकाह पाच एजार होनान सिक्का, दिहराह दुय एजार एने तिसराह एक एजार, मतलब एकेकाह तान ताकेतीन ईसाब माय आप्यो, एने तेवी तो दिहरा देसा माय जात रिनो। 16तेवी जाह पाच एजार होनान सिक्का जुड़ेल एता, तो तुलेचबूखे जाईन ता पोयशान लेन देन केऱ्यो, एने उंजु पाच एजार कामाव लेदो। 17तिहेच केरीन जाह दुय एजार होनान सिक्का जुड़ेल एता, तो बी उंजु दुय एजार कामाव लेदो। 18पुण जाह एक एजार होनान सिक्का जुड़ेल एता, तो जाईन खाडो खुद्यो, एने तान मालक्यान मालदेन लिकाड़ दिनो।
19मोकतास दिह्यान पासाण ता पावरान मालीक पुशो आवीन ता फाय ईसाब लिथे। 20जाह पाच एजार होनान सिक्का जुड़ेल एता, तो पाच एजार उंजु लावीन केयो, “एय मालीक, तु माहु पाच एजार होनान सिक्का हुपेल ईतो, देख, मी पाच एजार उंजु कामायेल हे।” 21तान मालीक ताह केयो, “जुलूम हाजो हे, हाजो एने ईमानदार पावोर तु थोड़ाच माय ईमानदार रिनो, मी तुवाह जुलूम मालदेनान आदिकारी बाणावुह। तु तारा मालक्यान खुसी माय मिलाय जा।” 22एने जाह दुय एजार होनान सिक्का जुड़ेल एता, तो बी आवीन केयो, “एय मालीक, तु माहु दुय एजार होनान सिक्का होपेल ईतो, देख, मी बी दुय एजार उंजु कामायेल हे।” 23तान मालीक ताह केयो, जुलूम हाजो हे, हाजो एने बोरहावालो पावोर, तु थोड़ाच माय बोरहावालो रिनो, मी तुवाह जुलूम मालदेनान आदिकारी बाणावुह, तारा मालक्यान खुसी माय मिलाय जा। 24तेवी जाह एक एजार होनान सिक्का जुड़ेल एता, तो आवीन केयो, एय मालीक, मी तुवाह जाणतालो काय तु वातड़ो माणुह हे, तु जा का नाह पेरने तास काटणे, एने जा पोसार ने नाह ता रेन टुलो केरने। 25तानकेरता मी बिय जायेल एने जाईन तारो मालदेन माटड्या माय लिकाड़ दियेल, “देख, जो तारो हे, तो ज्यो हे।” 26तान मालीक ताह जापाप आप्यो, “एय खाराब एने आलह्या पावोर, जेवी तु ज्य जाणतालो काय जा मी नाह पिऱ्यो ता रेन काटणे, एने जा मी पोसरायेल नाह ता रेन टुलो केरने। 27ते तु मार पोयशा होवकारा फाय मेल देणु एतो। तेवी मी आवीन वियाजतोज ता फाय रेन लेय लितो। 28तानकेरता ता एजार होनान सिक्का ता फाय रेन लेय लिवो, एने जा फाय दोह एजार होनान सिक्का हेते, ताह आप दिवो। 29#मत्ती 13:12; मरकुस 4:25; लुका 8:18काहाकाय जा कुणा फाय हे, ताह उंजु जुड़ी, एने ता फाय जुलूम एय जाय; पुण जा फाय नाह सोतो ता फाय रेन तो बी जो ता फाय हे, सांडाड़ाय जाय। 30#मत्ती 8:12; 22:13; लुका 13:28एने ज्या खाराब पावराह बाहेर आंदारा माय जुगार दिवो, ता रेड़णो एने दात केकड़ावणे हे।”
सेवल्यो नियाव
31 #
मत्ती 16:27;
मत्ती 19:28
जेवी माणहान बिटोख तान बोड़ाय माय आवी, एने आखा हेरोगदुत ता हेऱ्या आवती, ते तो तान बोड़ाय ने राजगादि पोर बोही, 32एने आखा देसान माणहे तान सोमोर टुलो एय जाती; एने जीहे गोवाल मेंड्राह बोकड्या माय रेन आंगे केर दिथे, तिहेस तो ताह एका दिहराह रेन आंगे केरी। 33तो मेंड्राह तान जीवड़े उगे एने बोकड्याह डाखरे उगे उबो केरी।#25:33 मेंड्रा एने बोकड्यान मतलब खेरला माणहे 34तेवी राजा तान जीवड़े उगे वालाह केय, “एय मार आबाख ने बोरकेतवाला माणहे, आवो, ता राज ने आदिकारी बोण जावो, जो देरतीह रेन पेल तुमरे केरता तियार किरेल हे। 35काहाकाय मी बुखल्यो ईतो, एने तुमू माहु खाणेन आपेल; मी तिहल्यो ईतो, एने तुमू माहु पाणी पिवाड़ेल; मी एंजाण्यो ईतो, एने तुमू माहु तुमरा गेरा माय हादिल; 36मी उगाल्लोस ईतो, एने तुमू माहु फाड़का पेरायेल; मी दुखाऱ्यो ईतो, एने तुमू मारी चाकरी किरेल, मी जेली माय ईतो, एने तुमू माहु मिलने आयेल।”
37तेवी खेरला माणहे ताह जापाप देती, “एय मालीक, आमु कुलबुखे तुवाह बुखल्यो दिखेल एने खावाड़ेल? एने तिहल्यो दिखेल एने पाणी पिवाड़ेल? 38आमु तुवाह कुलबुखे पारको दिखेल, एने आमरा गेरा माय हादिल नाहते उगड़ो दिखेल, एने फाड़का पेरायेल? 39आमु केदीह तुवाह दुखाऱ्यो नाहते जेली माय दिखेल, एने तुवाह मिलने आवाला? 40तेवी राजा ताह जापाप देय, मी तुमूह खेरीच केथु, काय तुमू जा मारा न्या आत्याम रेन आत्या बायाख माय रेन एका हेऱ्या किरेल, तो मार हेऱ्याच किरेल।”
41तेवी तो डाखरे उगे वालाह केय, “एय हारापेल माणहे, मार ओंगाण रेन पोला जेलेमक्या आक्ठा माय जात रिवो, जो सैतान एने तान दुतान केरता तियार किरेल हे। 42काहाकाय मी बुखल्यो ईतो, एने तुमू माहु खाणेन नाह आप्या, मी तिहल्यो ईतो, एने तुमू माहु पाणी नाह पिवाड़ेल; 43मी पारको ईतो, एने तुमू माहु गेरा माय नाह हादिल; मी उगड़ो ईतो, एने तुमू माहु फाड़का नाह पेरायेल; मी दुखाऱ्यो एने जेली माय ईतो, एने तुमू मारी चाकरी नाह केऱ्या।”
44तेवी ता जापाप देती, “एय मालीक, आमु केदीह तुवाह बुखल्यो, तिहल्यो, नाहते पारको, नाहते उगड़ो, दुखाऱ्यो, नाहते जेली माय दिखेल, एने तारी सेवा चाकरी नाह केऱ्या?” 45तेवी तो जापाप आपी, “मी तुमूह खेरीच केथु काय तुमू जा न्या आत्याम रेन आत्यान काल्लास ने मोदेक नाह केऱ्या, तो मार हेऱ्या बी नाह केऱ्या। 46एने ज्या जेलेमक्यास डेंड बोगती, पुण खेरला माणहे जेलेमक्यास जीवाय माय पोच जाती।”#दानिएल 12:2
Currently Selected:
मत्ती 25: NTNii2020
Highlight
Share
Copy
Want to have your highlights saved across all your devices? Sign up or sign in
The New Testament in Nahali Language © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2020
