लुका 14
14
यीशु विहेवणेन दिह हुदारने
1ओवतो इहकेरीन एनो काय विहेवणेन दिह, जेवी यीशु फरिसीन एक आदिकारीन गेर रूटो खाणेन गीयो, एने ता यीशुह मारनेन ताकाव रियेल एता। 2ताहरी यीशुन ओंगाण एक माणुह एतो ताह पाय हुजणेन बेमारी माय दुखाऱ्यो एतो। 3यीशु देरेमगुरू एने फरिसीह केयो, “विहेवणेन दिह आपणा नेम ने गेत हुदारने हाजो हे काय नाह?”
4पुण ता ठावकाच रेना। तेवी यीशु ताह आथलीन हुदाऱ्यो एने जाणे दिनो, 5#मत्ती 12:11एने यीशु ताह केयो, “तुमरे माय रेन ओहलो कुण हे, जान गेदड़ो नाहते बुयेल वावड़ी माय पोड़ जाय, एने ताह विहेवणेन दिह चालोच बाहेर नाय काड़हो?”
6ता ज्यु वातुन कायच जापाप नाह आप सेक्या।
नम्रता एने पावणाय केरने
7तेवी यीशु दिख्यो काय हादेल माणहे किहीक मुखी मुखी जागो निवाड़ लेतेह, ज्य देखीन यीशु ताह एक किस्सो आपीन केयो, 8“जेवी एगदो तुवाह वाराड़ा माय हादि, ते मुखी जागा माय मा बुहहे, ओहलो नाय एय काय तो तुवाह रेन बी एगदा मोठलाह नेवतो आपेल एय, 9एने जो तुवाह एने ताह दुयाह बी नेवता आपेल हे, तो आवीन तुवाह केय, ‘ज्याह जागो आप,’ एने तेवी तुवाह लाजवायीन आखाम रेन नेची जागा माय जाईन बोहणे पोड़ी। 10पुण जेवी तुवाह हादावणी आवी ते आखाम रेन नेची जागा पोर जाईन बुहजे, काय जेवी तो जो तुवाह नेवतो आपेल हे, तो आवीन ते तुवाह केय, ‘एय जोड़ीदार, ओंगाण आवीन बोह,’ तेवी तुवा हेऱ्या बोहणारान सामने तारी बोड़ाय एय। 11#मत्ती 23:12; लुका 18:14काहाकाय जो कुण सोताह मोठो बाणावी, तो आत्यो बाणावाय जाय; एने जो कुण सोताह आत्यो बाणावी, तो मोटलो बाणावाय जाय।”
12तेवी ताह नेवता आपणाराह यीशु केयो, “जेवी तु दिह्या नाह ते राती रूटो खाहे, ते तारा जोड़ीदाराह एने बाहख नाह ते मालदार आहने रेणाराह मा हादहे, ओहलो नाय एणे जुवे काय ता बी तुवाह नेवता आपती एने तारो बुदलो पुरो केरती।” 13पुण जेवी तु खाणो खाणे बुहहे, ते गेरब्याह, लुला, लेंगड़ाह एने आंदलाह हादजे। 14तेवी तु बोरकेतवालो रिहे, काहाकाय तुवाह आपणेन केरता ता उगे रेन तुवाह कायच नाय जुड़ी, पुण तुवाह देरमीह पोशो जीव उठणेन पासाण बोगवानान उगे रेन फोल जुड़ी।
मोटला खाणान किस्सो
(मत्ती 22:1-10)
15ता हेऱ्या खाणो खाणारा माय रेन एक जाण ज्यु वातु होमलीन यीशुह केयो, “बोरकेतवालो हे, तो जो बोगवानान राज माय रूटो खाय।”
16यीशु ताह केयो, “काल्लो माणुह मोकतोस खाणो बाणायो, एने जुलूम माणहाह हाद्यो।” 17जेवी खाणो तियार एय गीयो, तेवी नेवताल्याह हादणे तान एक पावरा फाय खुबेर ली मुकल्यो, “चालो, खाणो तियार हे।” 18पुण ता आखाच माफी मांगणे बाज गीया। पेल्लो ताह केयो, “मी खेत वेचातो लियेल हे, एने जोरेवरी हे काय ताह देखु; मी तुवाह विन्ता केरथु, माहु माफ केर दे।” 19दिहरो केयो, “मी पाच जोड़ी बुयेल वेचातो लियेल हे, एने ताह पारेखणे जाथु; मी तुवाह विन्ता केरथु, माहु माफ केर दे।” 20एक जाण उंजु केयो, “मी वाराड़ किरेल हे, तान केरता नाह आव सिकेत।”
21तो पावोर आवीन तान मालक्याह ज्यु वातु केय होमलाड्यो। तेवी गेरान मालीक रागा माय आवीन तान पावराह केयो, हेयरान बाजाराम एने गेली माय चालोच जाईन गेरब्याह, लेंगड़ाह, एने आंदलाह न्या लीयाव। 22पावोर उंजु केयो, “एय मालीक जीह केरीन कियेल ईतो, तिहेच केरीन किरेल हे एने तीबी जागो हे।” 23मालीक पावराह केयो, “सेड़की पोर एने वाड़ी निही जा एने माणहाह पोटाड़ीन लीयाव काहाकाय मारो गेर बोराय जाय।” 24काहाकाय मी तुमूह केथु, “ता हादेल माणहा माय रेन कुण मार खाणाह नाय साक सेकती।”
चेला बोणनेन किमोत
(मत्ती 10:37,38)
25जेवी एक मोटली गेरदी यीशु हेरी जाताली, ते यीशु पासाण फिरीन माणहाह केयो, 26#मत्ती 10:37“केदी एगदो मार फाय आवी, एने तान आईख आबाख एने बायकु एने सोराह एने बायाख एने बोणह्युख न्या वोर काय तान जीवाह बी माहु रेन जादा मोंग केरी, तो मारो चेलो नाह एय सिकेत। 27#मत्ती 10:38; 16:24; मरकुस 8:34; लुका 9:23एने जो कुण मार केरता खुरूसखाम उखलीन दुख वेठीन मोरने नाह हुदेत, एने मार पासाण नाय आवी, तो बी मारो चेलो नाह एय सिकेत।
28“तुमरे माय रेन कुण हे जो किल्लो बाणावणे हुदेह, एने पेल बोहीन खीरचो नाय जोड़ी काय पुरो केरनेन ताकेत मार फाय हे काय नाह। 29एने इहकेरीन नाय एय काय जेवी तो पायो बांद लेय पुण तियार नाय केर सेकी, ते आखा देखणारे ज्य केयीन तान मोजाक उड़ावीन आहणे बाज गीया, 30‘ज्य माणुह बाणावणे ते बाजनोह पुण बाणाव नाह सीक्यो!’ 31एने काल्लो ओहलो राजा हे जो दिहरा राजा हिऱ्यो लेड़ाणेन जाथे, एने पेल बोहीन विचार नाय केरी काय जो विह एजार लेन मार पोर चेड़ाव केरीन आवीह, काय मी दोह एजार लेन तान सामनो केर सेकथु, काय नाह। 32नाह ते तान सेटाच रेती, तो खोबर्याह मोकलीन मेल केरने होदि। 33इहीचकेरीन तुमरे माय रेन जो कुण तान आखो सोड़ी नाय, ते मारो चेलो नाह बोण सिकेत।
होवादो मीठ
(मत्ती 5:13; मरकुस 9:50)
34“मीठ ते हाजो हे, पुण मीठान खारलो होवाद जात रेय, ते काल्ली चिजी केरीन खारलो केराय जाय। 35तो नाह ते बुईन केरता, एने नाह खोतान केरता कामाम आवीह: पुण ताह माणहे बाहेर टाक देतेह, जान होमेलनेन कान हेते ता होमली लेय!”
Currently Selected:
लुका 14: NTNii2020
Highlight
Share
Copy
Want to have your highlights saved across all your devices? Sign up or sign in
The New Testament in Nahali Language © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2020
