योहान 20
20
ठाल्लो माहेण
(मत्ती 28:1-8; मरकुस 16:1-8; लुका 24:1-12)
1एप्तान पेल्ले दिह वेगोच आंदार लेस, मरीयम मगदलीनी माहणा माय आवी, एने माहणान बायणा पोर रेन दिगोड़ हेरकायेल देखी। 2तेवी ती दोवड़तीन शिमोन पतरस एने ता चेला फाय गियी, जाह यीशु मोंग केरतालो, एने ताह केयी, “ता मालीकाह माहणा माय रेन निकाल ली जायेल हेते, एने ताह काहरी मीलेल हेते, ज्यो आमुह मालुम नाह!”
3तेवी पतरस एने तो दुसरो चेलो माहणा उगे गीया। 4एने ता दुयू एकठास दोवेड़ने बाजरियेल एता, पुण दुसरो चेलो पतरसाह रेन ओंगाण एन माहणा माय पेल पुचनो। 5एने तो माहणा माय निवड़ीन फाड़का ओलाच पोड़ रियेल दिख्यो, पुण तो माय नाह रिगनो। 6तेवी शिमोन पतरस बी तान पासाण आव पुचनो, एने माहणा माय रिगनो। एने फाड़का पुड़ रियेल दिख्यो 7एने जो रूमाल यीशुन मुंडे बांदिल ईतो तो फाड़का हिऱ्यो पुड़ेल नाह। पुण आंगेच एक जागे गुंडालीन मीलेल दिख्यो। 8तेवी दुसरो चेलो बी जो माहणा माय पेल पुचील ईतो, माय गीयो; एने देखीन बुरहो किऱ्यो। 9ता एवी वोर पुस्तेक ने ती वात सोमजेल नाह एता, काहाकाय यीशुह मुरेल माय रेन पुशो जीव उठणे जोरेवरी हे। 10तेवी चेला तान गेर पोशा जात रेना।
मरीयम मगदलीनीह यीशु देखाणे
(मत्ती 28:9-10; मरकुस 16:9-11)
11पुण मरीयम रेड़ती लेन माहणा हेऱ्यी बाहेर उबरियेल एती, एने ती रेड़ती जाईन माहणा माय निवड़ीन देखी। 12एने जाहरी यीशुन देड़ मीलेल एतो, ताहरी दोवल्या फाड़का पिरील दुय हेरोगदुत एक मुंडान उहत्ये, एने दिहरो पायता बोह रियेल तीह देखाना। 13हेरोगदुत तीह फुशा, “एय बाय, तु काहा रिड़ेह?”
ती ताह जापाप आपी, “ता मार मालीकाह उखलीन ली गीया, एने माहु ज्यो नाह मालुम काय ताह काहरी मीलेल हेते!”
14इहकेरीन केयीन ती पासाण फिरनी एने यीशुह उबरियेल देखी; पुण तो यीशु हे ज्यो ती ओलख्यी नाह। 15यीशु तीह फुशो, “एय बाय, तु काहा रिड़ेह? एने तु कुणीह हुदेह?”
ती माली सोमजीन यीशुह केयी, “दादा केदी तु ताह न्या रेन उखलीन ली गीयो एय, ताहार ताह काहरी मीलेल हे माहु कि, एने मी ताह ली जाह।”
16यीशु तीह केयो, “मरीयम!”
ती तान उगे फिरीन इब्रानी बाषाम ताह केयी, “रब्बुनी!” मतलब “एय गुरू।”
17यीशु तीह केयो, “माहु मा सापली, काहाकाय मी एवी वोर आबाख फाय उंजु गीयो नाह। पुण मार बायाख फाय जाईन किय दे काय जो मार आबोख एने तान आबोख हे ता फाय मी पुशो जाणे बाजरिनोह, तो मार बोगवान एने तान बोगवान हे।”
18केरीन मरीयम मगदलीनी जाईन चेलाह केयी, “मी मालीकाह दिखेल हे, एने तो माहु ज्यु वातु कियेल हे।”
यीशु चेलाह देखाणे
(मत्ती 28:16-20; मरकुस 16:14-18; लुका 24:36-49)
19एप्तान पेल्ले दिह हांज पोर जाहरी चेला एता, काहाकाय तावाला बायणा यहुदि आदिकारीन बिय ने वोजेसे बोंद एता, तेवी तान विची माय यीशु आवीन उबरीन ताह केयो, “तुमूह सान्ती जुड़ी।” 20इहकेरीन यीशु केयीन तान आथ एने तान खुकी चेलाह देखाड्यो। तेवी मालीकाह देखीन चेला खुस एना। 21यीशु पुशो ताह केयो, “तुमूह सान्ती जुड़ी, जिहकेरीन आबोख माहु मुकलेल हे। तिहेच केरीन मी बी तुमूह मोकेलथु।” 22इहकेरीन केयीन यीशु चेला पोर फुक्यो एने ताह केयो, “चोखालो जीव लिवो। 23#मत्ती 16:19; 18:18केदी तुमू माणहान पाप माफ किरहो, ते तान पाप माफ एय जातेह; केदी तुमू ताह माफ नाह केरती, ते तुमरा पाप माफ नाह एते।”
यीशु एने थोमा
24जेवी यीशु आयेल तेवी बारा चेला माय रेन एक मतलब दिदुमूस जुवल्यो केवाणार थोमा, ज्यो चेला हिऱ्यो नाह ईतो। 25केरीन दिहरा चेला ताह केया, “आमु मालीकाह दिखेल हेते!”
पुण थोमो ताह केयो, “जाह वोर मी यीशुन आथाम खीलान डोसा देख नाय लेव, एने खीलान डोसाम मारी आंगली रिगाड़ नाय लेव, एने तान खुकी माय मारो आथ नाय रिगाड़ लेव, ताह वोर मी बुरहो नाय केरू।”
26आठ दिह्यान बाद यीशुन चेला उंजु गेरा माय एता, एने थोमा ता हिऱ्यो ईतो, एने बायणो बोंद एतो। तेवी यीशु आवो एने तान विचीम उबरीन केयो, “तुमूह सान्ती जुड़ी।” 27ओवतो यीशु थोमाह केयो, “तु तारी आंगली ओरी केरीन मारा आथाह देख; एने तारो आथ ओंगाण केरीन मारा खुकी माय रिगाड़। अविश्वास केरने सोड़ दे, एने मार पोर बुरहो किर!”
28इहकेरीन होमलीन थोमा जापाप आप्यो, “एय मारा मालीक, एय मारा बोगवान!”
29यीशु थोमाह केयो, “काय तु माहु देखणेन पासाण मार पोर बुरहो किरेह, पुण जा माहु देख्या बिगेर बुरहो केरतेह, ता बोरकेतवाला हेते!”
ज्यी पुस्तेकीन उद्देश
30यीशु दिहरा उंजु बी जुलूम होवटा चोमेत्कार तान चेलान ओंगाण देखाड़ेल, जा ज्यी पुस्तेक माय लेखायेल ना सोता। 31#20:31 मी बुरहो मेलथु; थोड़ाक लेख माय मी बुरहो मेलती रेथु लिखेल हे।पुण ज्यो ज्यानकेरता लेखायेल हे, तुमू बुरहो केरी काय यीशुस बोगवानान बिटोख मसी हे, एने ता पोर बुरहो केरनेन द्वारा तुमू जीवाय सापड़ावहो।
Currently Selected:
योहान 20: NTNii2020
Highlight
Share
Copy
Want to have your highlights saved across all your devices? Sign up or sign in
The New Testament in Nahali Language © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2020
