ପ୍ରେରିତ 16
16
ପାଉଲ୍ ନୁ ଶିଲାନ୍ ତଡ଼୍ ତୀମତି ଆତ୍ତଣ୍ଡ୍
1ପାଉଲ୍ ଦର୍ବୀ ନୁ ଲୁସ୍ତ୍ରାତାଗ୍ ଆତ୍ତଣ୍ଡ୍ । ଆଗେ ତୀମତି ପେଦେର୍ତଣ୍ଡ୍ ୱେରଣ୍ଡ୍ କ୍ରିଷ୍ଟିୟାନ୍ ବାସେ ମାଡ଼ମାତ୍ତଣ୍ଡ୍ । ଅଣ୍ଡ୍ ୱେରଣ୍ଡ୍ କ୍ରିଷ୍ଟ ବିଶ୍ୱାସୀ ଶିଷ୍ୟ ଇହୁଦୀ ନାଟାଡ଼୍ତେ ମାର୍ । ଇତ୍କେ ତାମ୍ ବାବାଲ୍ ୱେରଣ୍ଡ୍ ଗ୍ରୀକ୍ ନାରୁଣ୍ଡ୍ ମାତ୍ତଣ୍ଡ୍ । 2ଲୁସ୍ତ୍ରା ନୁ ଇକନିୟାତାଗ୍ ମାନ୍ଦାନ୍ ବିଶ୍ୱାସୀଡ଼୍ ଲୋପେଙ୍କ୍ ତୀମତିଙ୍କ୍ ଗାଟି ସାୟେତଣ୍ଡ୍ ଇଞ୍ଜ ପୁଞ୍ଜ୍ ମାତ୍ତଡ଼୍ । 3ପାଉଲ୍ ତାନ୍ ତଡ଼୍ ତୀମତିଙ୍କ୍ ଆଦାନଙ୍କ୍ ଇଚ୍ଛା ମାଡ଼୍ତଣ୍ଡ୍, ଆଦିଙ୍କ୍ ଅଂକିଙ୍କ୍ ସୁନ୍ନତ୍ ମାଡ଼୍ତଣ୍ଡ୍ । ଇଲା ମାଡ଼ାନାଦ୍ କାରନ୍ ଆତ୍ତେ, ତୀମତିନ୍ ବାବାଲ୍ ଗ୍ରୀକ୍ ନାରୁଣ୍ଡ୍ ମାତ୍ତଣ୍ଡ୍ ଇଞ୍ଜ ଆଗେ ମାନ୍ଦାନଡ଼୍ ଇହୁଦୀଡ଼୍ ପୁଞ୍ଜ୍ମାତ୍ତଡ଼୍ । 4ନାର୍ଗେ ଟାୱୁନ୍କିନ୍ ଲୋପେଙ୍କ୍ ଇସ୍ ଆଦାନ୍ ୱେଲେ ବିଶ୍ୱାସୀଡ଼୍କ୍ ଯିରୁଶାଲେମ୍ତେ ପ୍ରେରିତ ଶିଷ୍ୟ ନୁ ବାଡ଼୍ୟେ ନେତାଲଡ଼୍ ହିତ୍ତେ ନିତିନିୟମ୍ ସାରେ ବୁଜାମାଡ଼ି, ଆୱିଙ୍କ୍ ପାଲନ୍ ମାଡ଼ାନଙ୍କ୍ କେସମାତ୍ତଡ଼୍ । 5ଆଗାଙ୍କ୍ ମଣ୍ଡଲିକି ବିଶ୍ୱାସ୍ତେ ଶକ୍ତ ଆତ୍ତା ନୁ ନିତ୍ଦିନ୍ ଆୱିନ୍ ସଂଖ୍ୟା ନାର୍ଗେ ଆତ୍ତା ।
ତ୍ରୋୟାତାଗ୍ ପାଉଲ୍ତେ ଦର୍ଶନ୍
6ପବିତ୍ର ଆତ୍ମା ଅଡ଼୍କିଂଙ୍କ୍ ଏସିଆ ପ୍ରଦେଶ୍ତାଗ୍#୧୬:୬ ରୋମୀୟ ସାମ୍ରାଜ୍ୟର ସ୍ଥାନ ଗୁଡ଼ିକ ବୁଝାଏ । ପ୍ରଚାର୍ ମାଡ଼ାନଙ୍କ୍ ଗଟ୍ ହିୱାଙ୍କ୍ ଅଡ଼୍ ଫ୍ରୁଗିୟା ନୁ ଗାଲାତୀୟ ଜାଗେତାଗ୍ ଆତ୍ତଡ଼୍ । 7ମିଷୀଆତେ ସୀମାତାଗ୍ ହେୱୁସ୍ ବିଥିନିଆ ପ୍ରଦେଶ୍ତାଗ୍ ଆଦାଙ୍କ୍ ପେୟ୍ତେ ୱେଲେ ଜିସୁନାଦ୍ ଆତ୍ମା ଅଡ଼୍କିଂଙ୍କ୍ ଆନୁମତି ହିୱ । 8ଆଦିଙ୍କ୍ ଅଡ଼୍ ମିଷୀଆତେ ନାଡ଼୍ମେଙ୍କ୍ ଆଞ୍ଜ୍ ତ୍ରୋୟାତାଗ୍ ଆତ୍ତଡ଼୍ । 9ଆଦେନାଣ୍ଡ୍ ନାର୍କେ ପାଉଲ୍ ଅଣ୍ଡୟ୍ ଦର୍ଶନ୍ ଉଡ଼୍ତଣ୍ଡ୍ ଯେ, ମାସିଦୋନିଆତେ ୱେରଣ୍ଡ୍ ନାରୁଣ୍ଡ୍ ଅନୁରଦ୍ ମାଡ଼ି କେତୁତଣ୍ଡ୍, “ମାସିଦୋନିଆତାଗ୍ ୱାସ୍ ମାକିଂଙ୍କ୍ ସାହାଯ୍ୟ ମାଡ଼େ !” 10ପାଉଲ୍ ଇଦ୍ ଦର୍ଶନ୍ ଉଡ଼୍ତେ ସାଙ୍ଗେ ସାଙ୍ଗେ ମାସିଦୋନିଆତାଗ୍ ଆଦାନଙ୍କ୍ ମାମ୍ମେ ତିଆର୍ ଆତ୍ତମ୍, ବାତେଙ୍କ୍ଇତ୍କେ ମାମ୍ମେ ନିଜାମ୍ ପୁତ୍ତମ୍ ଯେ, ଇଶ୍ୱର୍ ଆଗେତ୍ ନାରୁଡ଼୍ ଲୋପେ ସୁସମାଚାର୍ ପ୍ରଚାର୍ ମାଡ଼ାନଙ୍କ୍ ମାକିଂଙ୍କ୍ କାର୍ଙ୍ଗ୍ତଣ୍ଡ୍ ।
ଫିଲିପ୍ପୀତାଗ୍ ଲୁଦିଆ ମନ୍ ବାଦ୍ଲା ମାଡ଼୍ତଣ୍ଡ୍
11ମାମ୍ମେ ଏର୍ଜାହାଜ୍ ତଡ଼୍ ତ୍ରୋୟାତିଙ୍କ୍ ୱିଡ଼୍ସି ସାମତ୍ରାକିତାଗ୍ ଆତ୍ତମ୍ ନୁ ମେଣ୍ଡେଅଣ୍ଡ୍ ଦିନ୍ ନିଆପଲ୍ଲିତାଗ୍ ହେୱୁତ୍ତମ୍ । 12ଆଗାଙ୍କ୍ ମାମ୍ମେ ମାସିଦୋନିଆ ଜିଲ୍ଲାତେ ମୁକ୍ୟ ନଗରୀ ଫିଲିପ୍ପୀତାଗ୍ ଆତ୍ତମ୍ । ଇଦ୍ ନଗରୀ ଅଣ୍ଡୟ୍ ରୋମୀୟ କଲ୍ନୀ ମାତ୍ତେ । ମାମ୍ମେ ନାର୍ଗେ ଦିନା ଆଗେ ମାତ୍ତମ୍ । 13ବିଶ୍ରାମ୍ଦିନେ ନଗର୍ତେ ବାୟିଦେ ମାନ୍ଦାନ୍ ବେଡ଼େମ୍ ହାଞ୍ଚିନାଗ୍ ଆତ୍ତମ୍ । ମାମ୍ମେ ହାଲ୍ସି ମାତ୍ତମ୍, ଆଗେ ଇହୁଦୀଡ଼୍ ପ୍ରାର୍ତନା ମାଡ଼ାନ୍ ସେଙ୍ଗେ ଅଣ୍ଡୟ୍ ପଡ଼୍ୟି ମାନ୍ତେ । ମାମ୍ମେ ମଦଲ୍ କୁଦ୍ତମ୍ ନୁ ଆଗେ ଗୁଡ଼ିମାନ୍ଦାନ୍ ନାଟାକିନ୍ ତଡ଼୍ ଗଟି ତ୍ରିୟ୍ତମ୍ । 14ଆୱିନ୍ ଲୋପେଙ୍କ୍ ତୁୟଟୀରା ଟାୱୁନ୍ତେ ଆପାକଲର୍ ତାୱ୍ ସିଲେ ୱାମ ମାନ୍ଦାନ୍ ଲୁଦିଆ ପେଦେର୍ତେ ଅଣ୍ଡୟ୍ ନାଟାଡ଼୍ ମାତ୍ତେ । ଆଦ୍ ଇଶ୍ୱର୍ତିଙ୍କ୍ ଉପାସନା ମାଡ଼ମାତ୍ତେ ନୁ ପାଉଲ୍ ବାତ୍ କେସମାତ୍ତନ୍, ଆଦ୍ ମନ୍ଇସ୍ କେଞ୍ଜି ଗ୍ରହନ୍ ମାଡ଼ାନ୍ ସେଙ୍ଗେ ପ୍ରବୁ ଆଦିଙ୍କ୍ ହୃଦୟ୍ତାଗ୍ ସୁଯୋଗ୍ ହିତ୍ତଣ୍ଡ୍ । 15ଆଦ୍ ନୁ ତାମ୍ ପରିବାର୍ତେ ସାରେତଡ଼୍ ଏର୍ଦିକ୍ଷା ଆତ୍ତେ ପେର୍କେ ମାକିଂଙ୍କ୍ ଅନୁରଦ୍ ମାଡ଼ି କେତ୍ତଡ଼୍, “ପ୍ରବୁନାଗ୍ ନିଜାମ୍ ବିଶ୍ୱାସ୍ ମିନ୍ଦେ ଇଞ୍ଜ ଯଦି ଆଲ୍ସୁତି, ଆଲେକେ ମା ଲୋନ୍ ୱାସ୍ ମାନୁଟ୍ ।” ଆଦ୍ ଇଦ୍ରକମ୍ ମାକିଂଙ୍କ୍ ତାମ୍ ଲୋନ୍ ଆଦାନଙ୍କ୍ କେତ୍ତେ ।
ଫିଲିପ୍ପୀ ଜଇଲ୍ତାଗ୍ ପାଉଲ୍ ନୁ ଶିଲା
16ଅଣ୍ଡ୍ଦିନ୍ ମାମ୍ମେ ପ୍ରାର୍ତନା ପଡ଼୍ୟେତାଗ୍ ଆଦାନ୍ ୱେଲେ ଅଣ୍ଡୟ୍ କ୍ରୀତଦାସୀ ପିକିଡ଼୍ତିଙ୍କ୍ କାଇଲ୍ତମ୍ । ତାନ୍ ଲୋପେ ମାନ୍ଦାନ୍ ଦେୟାମ୍ତଡ଼୍ ଆଦ୍ ମୁନେଙ୍କ୍ତାୱୁ ଗଟି କେସମାତ୍ତେ । ଆଦ୍ ନାରୁଡ଼ାୱ୍ ବାଗ୍ୟ କେସ୍, ପ୍ରବୁନ୍ ସେଙ୍ଗେ ନାର୍ଗେ ଡାବ୍କ୍ ଗାଡ଼୍ସ ମାତ୍ତେ । 17ଆଦ୍ ପାଉଲ୍ ନୁ ମା ପେର୍କେ ପେର୍କେ ୱାସ୍ କିଡ଼୍କି କେତ୍ତେ, “ଇ ନାରୁଡ଼୍ ସାରେତିଙ୍କ୍ ବାଡ଼୍ୟଣ୍ଡ୍ ଇଶ୍ୱର୍ତେ ଦାସକୀନଡ଼୍ । ମିଡ଼୍ ବେଲା ପରିତ୍ରାଣ୍ ପାଏମ୍ ଆଦ୍ତିଡ଼୍, ଆଦ୍ ଗଟ୍ ଅଡ଼୍ କେତୁତଡ଼୍ ।” 18ପିକିଡ଼୍ ନାର୍ଗେ ଦିନାଯାକ ଇଦ୍ରକମ୍ ମାଡ଼୍ତେ । ପେର୍କେ ପାଉଲ୍ କାଡ଼ାମ୍ହାସ୍ ପେର୍କେ ମାଲ୍ସ୍ ଦେୟାମ୍ତିଙ୍କ୍ ଦମକ୍ ଇସ୍ କେତ୍ତଣ୍ଡ୍, “ଜିସୁ କ୍ରିଷ୍ଟନ୍ ପେଦେର୍ତେ ନାନ୍ ଆଦେଶ୍ ଇଦୁତାନ୍, ତାନାଗାଙ୍କ୍ ପେଇସ୍ ଅନ୍,” ଆସୁଟେ ସାଙ୍ଗେ ସାଙ୍ଗେ ଦାୟାମ୍ ଆଦିନାଗାଙ୍କ୍ ପେଇସ୍ ଆତ୍ତେ । 19ବେସୁଟ୍ ତାନ୍ ପ୍ରବୁନ୍ ନିଜେତ୍ ଡାବ୍କ୍ ଗାଡ଼୍ସାନ୍ ଆଶେ ହରାମାଡ଼୍ତଡ଼୍ ଇଞ୍ଜ ପୁତ୍ତଡ଼୍, ପାଉଲ୍ ନୁ ଶୀଲାଙ୍କ୍ ପଇସ୍ ଟାୱୁନ୍ତେ ନାଡ଼୍ମେ ମାନ୍ଦାନ୍ ଶାସନ୍ କର୍ତ୍ତାନ୍ ମୁନ୍ନେ ତାତ୍ତଡ଼୍ । 20“ଅଡ଼୍ ରୋମୀୟ ଶାସନ୍ କର୍ତ୍ତାନ୍ ମୁନ୍ନେ ତାସ୍ କେତ୍ତଡ଼୍, ଇ ନାରୁଡ଼୍ ଇହୁଦୀ, ଅଡ଼୍ ମାନ୍ ଟାୱୁନ୍ତାଗ୍ ଗୋଲ୍କ୍ ମାଡ଼ୁତଡ଼୍ । 21ଅଡ଼୍ ମାନ୍ ନିୟମ୍ ବିରୁଦ୍ ରୀତିନୀତି ନାଡ଼୍ସ୍ପୁତଡ଼୍ । ମାମ୍ମେ ରୋମ୍ ନାଗରିକ, ଆଦିଙ୍କ୍ ଇଦ୍ ରୀତିନୀତି ଗ୍ରହନ୍ ମାଡ଼ାଙ୍କ୍ ପାର୍ୱମ୍ ଆୱିଙ୍କ୍ ମାମ୍ମେ ପାଲନ୍ ମାଡ଼ାଙ୍କ୍ ପାର୍ୱମ୍ । 22ମାଲିକିଡ଼୍ ଗଟ୍ତାଗ୍ କାଇଲି ଆଗେ ମାନ୍ଦାନ୍ ନାରୁଡ଼୍ ପାଉଲ୍ ନୁ ଶିଲାନ୍ ବିରୁଦ୍ତେ ତେଦ୍ତଡ଼୍ । ପାଉଲ୍ ନୁ ଶିଲାନ୍ ଚକା କୁସ୍ସ୍ପି ଅଡ଼୍କିଂଙ୍କ୍ ବେତଡୁଡ୍ ତଡ଼୍ ରେଏତାଙ୍କ୍ ଶାସନ୍ କର୍ତ୍ତାଲ୍ ଗଟ୍ ହିତ୍ତଣ୍ଡ୍ । 23ନାର୍ଗେ ଦେବ୍ ତିତ୍ତେ ପେର୍କେ ଅଡ଼୍କିଂଙ୍କ୍ ଜଇଲ୍ତାଗ୍ ୱାଟ୍ତଡ଼୍ ନୁ ଅଡ଼୍କିଂଙ୍କ୍ କୁସ୍ ୱାଟି ଉଡ଼ାନ୍ ସେଙ୍ଗେ ଜଇଲ୍ରକ୍ଷା ମାଡ଼ାନଙ୍କ୍ ନିର୍ଦ୍ଦେଶ୍ ହିତ୍ତଣ୍ଡ୍ । 24ଇଦ୍ ଗଟ୍ ପାଏମ୍ ଆସ୍ ଜଇଲ୍ରକ୍ଷକ୍ ଅଡ଼୍କିଂଙ୍କ୍ ଅଣ୍ଡୟ୍ ଲୋପେତ୍ ବାକ୍ଡ଼େତାଗ୍ ୱାଟ୍ତଣ୍ଡ୍, ପୁଃଉତେ ମଟଲ୍ତାଗ୍ ଅଡ଼ାୱୁ ଡେକାକିଙ୍କ୍ ତଅସିତ୍ତଡ଼୍ ।”
25ନାଟ୍ନାର୍କେ ପାଉଲ୍ ନୁ ଶୀଲା ପ୍ରାର୍ତନା ମାଡ଼ମାତ୍ତଡ଼୍, ଇଶ୍ୱର୍ ଉଦ୍ଦେଶ୍ୟତେ ପାଟା ପାରମାତ୍ତଡ଼୍ ନୁ ବାଗାତ୍ ବନ୍ଦିଡ଼୍ ଇଦ୍ କେଞ୍ଜ ମାତ୍ତଡ଼୍ । 26ହଟାତ୍ ବୁମିକମ୍ପ ଆତ୍ତେ ନୁ ଜଇଲ୍ତେ ମୂଲଦୁଆତିଙ୍କ୍ ଉଃହୁତେ । ସାଙ୍ଗେ ସାଙ୍ଗେ ସାରେ ମାର୍ କୁଲେମ୍ ଆତ୍ତେ ନୁ ସାରେ ବନ୍ଦି ଆଦ୍ତନ୍ ଅଡ଼ାଦ୍ ଇକ୍ଲେମ୍ କୁସି ରାୟ୍ତା । 27ତାନେରକ୍ଷା ମାଡ଼ାନଣ୍ଡ୍ ଉଞ୍ଜି ତେଏଦ୍ତଣ୍ଡ୍ ନୁ ଜଇଲ୍ତେ ମାର୍ କୁଲେମ୍ ମାନ୍ଦାନାଦ୍ ଉଡ଼ି ହାଲ୍ସ୍ତଣ୍ଡ୍ ଯେ ବନ୍ଦିଡ଼୍ ମିର୍ତ୍ତଡ଼୍; ଆଦିଙ୍କ୍ ଅଣ୍ଡ୍ ତାନ୍ ସାକୁ ପେସ୍ପିଇ ଆୱ୍କାନଙ୍କ୍ ତିଆର୍ ଆତ୍ତଣ୍ଡ୍ । 28ଇତ୍କେ ପାଉଲ୍ ଗାଟି ଲେଙ୍ଗ୍ଦେ କେତ୍ତଣ୍ଡ୍, “ନିଜେ ବାତ୍ କ୍ଷତି ମାଡ଼୍ମା । ମାମ୍ ସାରେତମ୍ ଇଗେ ମିନ୍ଦେମ୍ !”
29ତାନେରକ୍ଷା ମାଡ଼ାନଣ୍ଡ୍ ଡୁବିତାସ୍ ଉଡ଼୍ତଣ୍ଡ୍ ନୁ ଲୋପେ ମିରିୱାସ୍ ୱାଡ଼୍କି ୱାଡ଼୍କି ପାଉଲ୍ ନୁ ଶୀଲାନ୍ ଡେକେତ୍ ମଦଲ୍ ରାୟ୍ତଣ୍ଡ୍ । 30ତାନ୍ ପେର୍କେ ଅଡ଼୍କିଂଙ୍କ୍ ବାୟିଦେ ଆସ୍ ପାଚ୍ରା ମାଡ଼୍ତଣ୍ଡ୍, “ଆଜ୍ଞାଲଡ଼ି ! ପରିତ୍ରାଣ୍ ପାଏମ୍ ଆଦାନଙ୍କ୍ ନାକିଂଙ୍କ୍ ବାତ୍ ମାଡ଼େ ୱେୟ୍ତିତ୍ ?”
31ଅଡ଼୍ ଉତ୍ତର୍ ହିତ୍ତଡ଼୍, “ପ୍ରବୁ ଜିସୁନାଗ୍ ବିଶ୍ୱାସ୍ ମାଡ଼୍କେ ମିଇ ପରିବାର୍ତେ ସାରେ ତଡ଼୍କିଙ୍କ୍ ପରିତ୍ରାଣ୍ ଦର୍କିତ୍ ।” 32ତାନ୍ପେର୍କେ ଅଡ଼୍ ଅଂକିଙ୍କ୍ ନୁ ତାମ୍ ଲନ୍ ତେତାନଡ଼୍କିଙ୍କ୍ ସାରେତଡ଼୍କ୍ ପ୍ରବୁନ୍ ଗଟ୍ କେତ୍ତଡ଼୍ । 33ନାର୍କେତ୍ ଆଦେ ସାଙ୍ଗେ ସାଙ୍ଗେ ତାନେରକ୍ଷା ମାଡ଼ାନଣ୍ଡ୍ ଅଡ଼୍କିଂଙ୍କ୍ ଆସ୍ ଅଡ଼ାୱୁ ପୁଣ୍ଡ୍କ୍ ସାରେ ନର୍ସିତ୍ତଣ୍ଡ୍, ମେଣ୍ଡେ ପରିବାରତେ ସାରେତଡ଼୍ ସାଙ୍ଗେ ସାଙ୍ଗେ ଏର୍ଦିକ୍ଷା ଗ୍ରହନ୍ ମାଡ଼୍ତଡ଼୍ । 34ତାନ୍ପେର୍କେ ଅଣ୍ଡ୍ ପାଉଲ୍ ନୁ ଶିଲାଙ୍କ୍ ତାନ୍ ନିଜେତ୍ ଲୋନ୍ ଆସ୍ ତିନ୍ଦାନଙ୍କ୍ ହିତ୍ତଣ୍ଡ୍ । ଇଶ୍ୱର୍ତାଗ୍ ବିଶ୍ୱାସ୍ ମାଡ଼ିମାନ୍ଦାନ୍ ମାଇଦିଙ୍କ୍ ଅଣ୍ଡ୍ ନୁ ତାନ୍ ପରିବାର୍ତେ ସାରେତଡ଼୍ ୱେଡ଼୍କ୍ତଡ଼୍ ।
35ମେଣ୍ଡେଅନ୍ ଦିନ୍ ନାର୍କକ୍ ରୋମୀୟ ଶାସନ୍ କର୍ତ୍ତାଲ୍ ସିପାହିଡ଼୍କ୍ ଇଦ୍ ଗଟ୍ ଇସ୍ ରହତ୍ତଣ୍ଡ୍, “ଆ ନାରୁଡ଼୍କିଂଙ୍କ୍ ୱିଡ଼୍ସିମୁଟ୍ ।”
36ଆଦିଙ୍କ୍ ଜଇଲ୍ରକ୍ଷକ୍ ପାଉଲ୍ତିଙ୍କ୍ କେତ୍ତଣ୍ଡ୍, “ଶାସନ୍ କର୍ତ୍ତାଲ୍ ନିକିଂଙ୍କ୍ ନୁ ଶିଲାଙ୍କ୍ ମୁକ୍ତି ମାଡ଼ାନଙ୍କ୍ ଗଟ୍ ହିତ୍ତଣ୍ଡ୍ । ଇଞ୍ଜେ ମିଡ଼୍ ଇଗାଙ୍କ୍ ଶାନ୍ତିତେ ଆଦ୍ପାର୍ଦ୍ତିଡ଼୍ ।”
37ଇତ୍କେ ପାଉଲ୍ ସିପାହିଡ଼୍କ୍ କେତ୍ତଣ୍ଡ୍, “ବାତ୍ ଅପରାଦିତାଗ୍ ଦଷି ଆୟ୍ୱେ ମାତ୍କେ ଗାଲା ଅଡ଼୍ ମାକିଂଙ୍କ୍ ରେହେତ୍ତଡ଼୍ । ମାମ୍ମେ ରୋମୀୟ ନାଗରିକ, ଇତ୍କେବା ଅଡ଼୍ ମାକିଂଙ୍କ୍ ବନ୍ଦି ମାଡ଼୍ତଡ଼୍ । ଇଞ୍ଜେ ମାକିଂଙ୍କ୍ ମିଞ୍ଜ୍ସ୍ପି ୱିଡ଼୍ସିଦାଙ୍କ୍ ହାଲ୍ସୁତଡ଼୍ । ମାମ୍ମେ ଇଦ୍ ମାଡ଼ାନଙ୍କ୍ ଇୱମ୍ । ରୋମୀୟ ଶାସନ୍ କର୍ତ୍ତାଲ୍ ନିଜେ ଇଗେ ୱାସ୍ ମାକିଂଙ୍କ୍ ମୁକ୍ତ ମାଡ଼ିୱିଣ୍ଡ୍ ।”
38ସିପାହୀଡ଼୍ ରୋମୀୟ ଶାସନ୍ କର୍ତ୍ତାଙ୍କ୍ ଇଦ୍ ଗଟି କେତ୍ତଡ଼୍ । ପାଉଲ୍ ନୁ ଶିଲା ରୋମିୟ ନାଗରିକ ଇଞ୍ଜ କେଞ୍ଜି ଅଡ଼୍ ୱେର୍ତ୍ତଡ଼୍ । 39ତାନ୍ପେର୍କେ ଅଡ଼୍ ଗାର୍ରେ କ୍ଷମା ପ୍ରାର୍ତନା ମାଡ଼୍ତଡ଼୍ ନୁ ଅଡ଼୍କିଂଙ୍କ୍ ଜଇଲ୍ତାଗାଙ୍କ୍ ମୁକ୍ତି ମାଡ଼ି ଟାୱୁନ୍ ୱିଡ଼୍ସି ଆଦାନଙ୍କ୍ ଅନୁରଦ୍ ମାଡ଼ି କେତ୍ତଣ୍ଡ୍ । 40ପାଉଲ୍ ନୁ ଶିଲା କାରାଗାର ୱିଡ଼୍ସି ଲୁଦିଆନ୍ ଲୋନ୍ ଆତ୍ତଡ଼୍ । ଆଗେ ଅଡ଼୍ ବିଶ୍ୱାସୀଡ଼୍କ୍ କାଇଲ୍ତଡ଼୍ ନୁ ଅଡ଼୍କିଂଙ୍କ୍ ୱେଡ଼୍କା ମାଡ଼ି ଆଦ୍ ପଡ଼୍ୟେ ୱିଡ଼୍ସ୍ତଡ଼୍ ।
Currently Selected:
ପ୍ରେରିତ 16: NTKaa20
Highlight
Share
Copy
Want to have your highlights saved across all your devices? Sign up or sign in
The New Testament in Koya Language © The Word for the World International and Koya Translation Samithi, Malkangiri, Odisha 2020
