ମାତିଉ 27
27
ପିଲାତ୍ତି ଆଗ୍ଡ଼ି ଜିସୁ
(ମାର୍କ ୧୫:୧; ଲୁକ ୨୩:୧-୨; ଜୋହନ ୧୮:୨୮-୩୨)
1ମାର୍ନାଣ୍ଡିଙ୍ଗ୍ ସାଲ୍ଦିନେ ଜିସୁଙ୍ଗୁଁ ଡାକ୍ତେଙ୍ଗ୍ଁ ୱିଜେରେ ପେରି ଜାଜକର୍ ମାରି ଦାର୍ମୁ ନେତାର୍ ରାଜି ଆତାର୍ । 2ୱାର୍ ୱାନିଙ୍ଗ୍ ସିକିଣିଦାନ୍ତର୍ସି ରୋମିୟ ସାସନ୍ତି ପେରିନେତା ପିଲାତ୍ଦି ଲାକ୍ତୁ ଅତାର୍ ।
ଜିହୁଦାଦି ସାନିକା
(ପ୍ରେରିତ ୧:୧୮-୧୯)
3 #
ପ୍ରେରିତ ୧:୧୮,୧୯. ଏସ୍ତିୱାଲେ ସାତ୍ରୁରି କିୟୁଦୁ ସର୍ପେକିତିସିତି ଜିହୁଦା ୱେର୍ଆନ୍ ଜେ, ଜିସୁଙ୍ଗୁଁ ସାନିଦଣ୍ତ୍ ଆତାମାନାନ୍, ୱାନ୍ ଏତ୍କିତାନ୍ ମାରି ପେରି ଜାଜକ ମାରି ଦାର୍ମୁ ନେତାରିଙ୍ଗ୍ ଆୟା ତିରିସ୍ଗୋଟା ୱେଣ୍ତିଅଦ୍ଲିଙ୍ଗ୍ ଡ଼େସି ସିତାନ୍ନୋ ଇର୍ହାନ୍, 4“ଅରେନ୍ ଦସ୍କିଇ ଲୋକ୍ତି ଉଣ୍ତିଙ୍ଗ୍ ମି କିୟୁଦୁଆସ୍ସି କିତାସିତାନୋ ନାନ୍ ପାପ୍ କିତାମାନା ।”
ଜିହୁଦି ନେତାର୍ ଇର୍ହାର୍, “ଆବେନୁ ମାଦି ଇନିକା ମାନାତ୍ ? ଆକା ନି ନିଜେଦି ମାଟା ।”
5ଜିହୁଦା ଅଦ୍ଲିଆଙ୍ଗାଁ ମନ୍ଦିର୍ ଲୋଇ ପୋକ୍ତାସିତା ସୋର୍ହାନ୍ । ୱେନ୍କା ୱାନ୍ କକ୍ଲାଦୁ ଉରି ଆସାତାନ୍ନୋ ସାତାନ୍ ।
6ପେରି ଜାଜକର୍ ଆୟା ୱେଣ୍ତିଅଦ୍ଲିଆଙ୍ଗାଁ ଉଣ୍ତା କିଜି ଇର୍ହାନ୍, “ଇକା ନେତେର୍ତି ଦାରା ଡାବୁଙ୍ଗୁଁ । ଇକା ମନ୍ଦିର୍ତି ପେଡ଼ାଦୁ ଇଡ୍ନି ନିୟମ୍ତି ବିରଦ୍ ପାଣି ।” 7ଆୟା ଡାବୁଆଙ୍ଗାଁ ଏଣ୍ତେସ୍ ସାଲା କିନାର୍, ଇୟା ବିସୟ୍ତାନ୍ ଉନ୍ଡ୍ରି ରାଜି ଆଜି କୁମାର୍ ବୁମି ଦର୍ତି କାଣ୍ତେକ୍ ବୁମି କଟାର୍ । ଇକା ଆଇଦେସ୍ତିୱାରି ମୁସ୍ନି ବାଡି ୱାଜା ଆତାତ୍ । 8ନେର୍ ସାନ୍ଦି ଆୟା ବୁମିଦିଙ୍ଗ୍ “ନେତେର୍ ବୁମି” ଇଜି ଆଜିନାର୍ ।
9ଇୟାୱାଜା ଜିରିମିୟ ବାବବାଦି ୱେର୍ତିମାନି, “ବାବବାଣି ପୁରା ଆତାତ୍ ଆକାବା ତିରିସ୍ ଟାକେଣାନ୍ ପର୍ନି ଉଣ୍ତିଙ୍ଗ୍ ଇସ୍ରାଏଲ୍ତି କଡ଼ର୍ ରାଜି ଆତା ମାର୍ହାର୍, ଆକା ଅତାର୍, 10ଆୟା ତିରିସ୍ ଗୋଟା ୱେଣ୍ତିଅଦ୍ଲିଙ୍ଗ୍ ୱାର୍ ତାସି, ମାରି ୱାର୍ କୁମାର୍ କିଡ଼ିଇ କଟାର୍ ଇକା କିନି ଉଣ୍ତିଙ୍ଗ୍ ନାଙ୍ଗିଁ ପ୍ରବୁ ଆଦେସ୍ ସିତାମାର୍ହାନ୍ ।”
ପିଲାତ୍ ଜିସୁଙ୍ଗୁଁ ୱେନ୍ବାତାନ୍
(ମାର୍କ ୧୫:୨-୫; ଲୁକ ୨୩:୩-୫; ଜୋହନ ୧୮:୩୩-୩୮)
11ଜିସୁଙ୍ଗୁଁ ଆଗ୍ଡ଼ି ସୁଡ଼ୁଜି ରୋମିୟ ଅଦିକାରି ପିଲାତ୍ ୱେନ୍ବାତାନ୍, “ନିନ୍ ଇନିକା ଜିହୁଦିରି ରାଜା ?”
ଜିସୁ ୱାନିଙ୍ଗ୍ ଇର୍ହାନ୍, “ନିନୁ ଆକା ଇଜିନି ।” 12ମାତର୍ ପେରି ଜାଜକର୍ ମାରି ଦାର୍ମୁ ନେତାରି ୱାନି ବିରଦ୍ତାନ୍ ଏମେ ଦସ୍ମାଟା ତାତାମାର୍ହାର୍, ଆବେଣି ପଦେକ୍ବା ମାଟା ଇନ୍ଏତାନ୍ ।
13ଆଦେଙ୍ଗ୍ ପିଲାତ୍ ୱାନିଙ୍ଗ୍ ଇର୍ହାନ୍, “ନି ବିରଦ୍ତାନ୍ ୱାରି ଦସ୍ମାଟା ୱିଜୁ ନିନୁ ଇନିକା ୱେନ୍ଡ୍ରେଙ୍ଗ୍ ଆଟ୍ଇଜିନି ?”
14ମାତର୍ ଜିସୁ ଉତରଦାନ୍ ପଦେକ୍ ବା ଇନ୍ଇତିଙ୍ଗ୍ ପିଲାତ୍ ନାଣ୍ତ କାବାତାନ୍ ।
ଜିସୁଙ୍ଗୁଁ ସାନି ଦଣ୍ଡ୍ ସିଆଇଆନାତ୍
(ମାର୍କ ୧୫:୬-୧୫; ଲୁକ ୨୩:୧୩-୨୫; ଜୋହନ ୧୮:୩୯; ୧୯:୧୬)
15ନିସ୍ତାର୍ ପଣ୍ତୟ୍ତି ବେଡ଼ାଦୁ ୱିଜୁଲୋକା ବଦାଦାନ୍ ରୋମିୟ ଅଦିକାରି ଜେ ଅରେନ୍ୱାନିଙ୍ଗ୍ ଜଇଲ୍ତାନ୍ ଡ଼ିସ୍ନିସିନି ନିତିନିୟମ୍ ମାର୍ହାତ୍ । 16ନାସ୍ତିୱାଲେ ବାରବ୍ବା ଜିସୁ ଦର୍ତି ଅରେନ୍ ୱେଙ୍ଗିଁତିକାନ୍ ଜଇଲ୍ତୁ ମାର୍ହାନ୍ । #୨୭:୧୬ ଏସ ପାଡ଼ିଇ ରାସାତିମାନୁ ଜିସୁ ବାରବ୍ବା ଇଜିମାନାତ୍ । 17ଉଣ୍ତାତିମାରିଇ ୱିଜୁ ଲୋକାଙ୍ଗ୍ ପିଲାତ୍ ୱେନ୍ବାତାନ୍, ନାନ୍ ଏଙ୍ଗ୍ ଡ଼ିସ୍ନା ସିନା ଇଜି ମି ବଦା ? “ବାରବ୍ବାଦିଙ୍ଗ୍ ନୋ ଜିସୁ ଆମାୱାନିଙ୍ଗ୍ କ୍ରିସ୍ତ ଇଜି ଇନାର୍ ?” 18ପିଲାତ୍ ନେଗେନ୍ତାନ୍ ନେସେତା ମାର୍ହାନ୍ ଜେ ଜିହୁଦି ନେତାର୍ ଗିଦ୍ରିଆଜି ଜିସୁଙ୍ଗୁଁ ୱାନି କିୟୁଦୁ ସର୍ପେ କିତାମାନାର୍ ।
19ପିଲାତ୍ ବିଚାର୍କିନି ବାଡିଦୁ ବାସ୍ତିମାରିଇ ୱାଲେ ୱାନି ଆଡ଼୍ସି ଉନ୍ଡ୍ରି କାବୁର୍ ପୋକ୍ତାତ୍ “ଆୟା ଦସ୍କିଇ ଲୋକ୍ତିଙ୍ଗ୍ ଇନିକା କିମାଟ୍ । ଇଏନ୍ ମିଲି ଉନ୍ଡ୍ରି ଲବେରୁ ୱାନି ଉଣ୍ତିଙ୍ଗ୍ ନାନ୍ ନାଣ୍ତ ଦୁଃକ୍ ଏତ୍କିତାମାନା ।”
20ପେରି ଜାଜକର୍ ମାରି ଦାର୍ମୁ ନେତାର୍ ବାରବ୍ବାଦିଙ୍ଗ୍ ଡ଼ିସ୍ସି କିଜସିଜି, ଜିସୁଙ୍ଗୁଁ ସାନିଦଣ୍ତ ସିନି ଉଣ୍ତିଙ୍ଗ୍ ପିଲାତ୍ ଲାକ୍ତୁ ଦାବି କିଦେଙ୍ଗ୍ ଲୋକାଙ୍ଗ୍ ଏଗ୍ରିସ୍କିତାର୍ । 21ପିଲାତ୍ ମାରି ଲୋକାଙ୍ଗ୍ ୱେନ୍ବାତାନ୍, “ଇୟା ରିଏରି ମାଣ୍କୁ ନାନ୍ ଏଙ୍ଗ୍ ଡ଼ିସ୍ନାସିନା ଇଜି ମି ବଦା ?”
ୱାର୍ ଇର୍ହାର୍, “ବାରବ୍ବାଦିଙ୍ଗ୍ !”
22ପିଲାତ୍ ୱାରିଙ୍ଗ୍ ୱେନ୍ବାତାନ୍, “ଆର୍ତିଙ୍ଗ୍ କ୍ରିସ୍ତ ଦର୍ତାନ୍ ୱେଙ୍ଗିଁତି ଜିସୁଙ୍ଗୁଁ ଇନିକା କିନା ?”
“ୱାନିଙ୍ଗ୍ କ୍ରୁସଦୁ ଏକିସ୍କିଦୁ” ଇଜି ୱାର୍ ୱିଜେରେ ଆଉଲି ଆତାର୍ ।
23ପିଲାତ୍ ୱେନ୍ବାତାନ୍, “ମାତର୍ ୱାନ୍ ଇନି ଦସ୍ କିତାମାନାନ୍ ?”
ୱାର୍ ମାରି ନାଣ୍ତ ଆଉଲି ଆଜି ଇନ୍ଡ୍ରେଙ୍ଗ୍ ଆସ୍ତାର୍, “ୱାନିଙ୍ଗ୍ କ୍ରୁସଦୁ ଏକିସ୍କିଦୁ ।”
24ପିଲାତ୍ ଏସ୍ତିୱାଲେ ସୁଡ଼ୁତାନ୍ ଜେ ୱାରିଙ୍ଗ୍ ମାରି ୱେର୍ସ ଇନି ଲାବ୍ ସିଲେ, ମାରି ଜାଟିଜଗଡ଼ା ଆଜିନାର୍, ନାସ୍ତିୱାଲେ ୱାନ୍ ଉବୁଡ଼ି ଏରୁ ତାତାନ୍ନୋ ଲୋକା ଆଗ୍ଡ଼ିନେ କିୟୁ ନର୍ବାତାନ୍ନୋ ଇର୍ହାନ୍, “ଇୟା ଲୋକ୍ତି ସାନି ଉଣ୍ତିଙ୍ଗ୍ ନାନ୍ ଦସ୍ ସିଲେ । ଇକା ମି ପାଣି ।”
25ୱିଜୁ ଲୋକୁ ଇର୍ହାର୍, “ଜିସୁଦି ସାନି ଦସ୍ ମାଙ୍ଗିଁ ନି ମା କଡ଼ରି ମୁସ୍କୁ ରାପିତ୍ ।”
26ସାରାସାରିୱେନ୍କା ପିଲାତ୍ ବାରବ୍ବାଦିଙ୍ଗ୍ ଡ଼ିସ୍ସି ସିଜି ଜିସୁଙ୍ଗୁଁ କର୍ଡାଦାନ୍ ଡାକ୍ତେଙ୍ଗ୍ଁ ଆଦେସ୍ ସିତାନ୍, ତାନେୱେନ୍କା କ୍ରୁସ୍ଦୁ ଏକିସ୍ତେଙ୍ଗ୍ ଇଜି ସନ୍ୟରି କିୟୁଦୁ ସର୍ପେ କିତାନ୍ ।
ସନ୍ୟର୍ ଜିସୁଙ୍ଗୁଁ ସେମାର୍କିତାର୍
(ମାର୍କ ୧୫:୧୬-୨୦; ଜୋହନ ୧୯:୨-୩)
27ପିଲାତ୍ତି ସନ୍ୟର୍ ଜିସୁଙ୍ଗୁଁ ରୋମିୟ ସାସକଦି ମେଡ଼୍ଇଲୁଦୁ ଅତାର୍ ମାରି ୱିଜେରେ ସନ୍ୟର୍ ୱାନିଙ୍ଗ୍ କେର୍ପିସି ନିର୍ଆର୍ । 28ୱାର୍ ୱାନି ଆଙ୍ଗିଁ କୁତ୍ତାଅତାର ୱାନିଙ୍ଗ୍ ଉନ୍ଡ୍ରି ଲାଲ୍ ରଙ୍ଗ୍ତି ଆଙ୍ଗିଁ ଆରିସ୍କିତାର୍ । 29ସାମ୍ ମାରାତି କମାଦାନ୍ ଉନ୍ଡ୍ରି ଟପି ତିଆର୍ କିଜି ୱାନି ତାଲା ମୁସ୍କୁ ଆରିସ୍କିତାର୍ ମାରି ୱାନି ଉଣିକିୟୁଦୁ ଉନ୍ଡ୍ରି ନାଡ଼ା ଆସ୍ପିସ୍କିତାର୍ । ତାନେୱେନ୍କା ୱାନି ଆଗ୍ଡ଼ି ମେଣ୍ଡେଙ୍ଗ୍ ଗଟ୍କିଜି, “ଏ ଜିହୁଦିରି ରାଜା, ମାଡ଼ିସ୍କିନିକା, ଇକା ଇନ୍ଞ୍ଜି ୱାନିଙ୍ଗ୍ ସେମାର୍ କିତାର୍ ।” 30ୱାର୍ ୱାନି ମୁସ୍କୁ ପୁସ୍ତାର୍, ଆୟା ନାଡ଼ା ଅସି ୱାନି ତାଲାଦୁ ଡାକ୍ତାର୍ । 31ମାରି, ୱାର୍ ୱାନିଙ୍ଗ୍ ସେମାର୍ କିତିୱେନ୍କା ଆୟା ରାଜାରି ଆଙ୍ଗିଁ କୁତ୍ସିଅସି ୱାନି ନିଜେଦି ଆଙ୍ଗିଁ ଆରିସ୍କିତାର୍ ମାରି ୱାନିଙ୍ଗ୍ କ୍ରୁସ୍କାଟ୍ତୁ ଏକିସ୍କିଦେଙ୍ଗ୍ ଅତାର୍ ।
ଜିସୁଙ୍ଗୁଁ କ୍ରୁସ୍କାଟ୍ତୁ ଡାକ୍ତାର୍
(ମାର୍କ ୧୫:୨୧-୩୨; ଲୁକ ୨୩:୨୬-୪୩; ଜୋହନ ୧୯:୧୭-୨୭)
32ୱାର୍ ଗାଡ଼୍ତାନ୍ ସନିୱାଲେ ସାରିଦୁ କୁରିଣି ଗାଡ଼୍ଦି ସିମୋନ ଦର୍ତି ଅରେନ୍ ଲୋକ୍ତିଙ୍ଗ୍ ବେଟ୍ଆତାର୍ ମାରି ସନ୍ୟର୍ ୱାନିଙ୍ଗ୍ ଜିସୁଦି କ୍ରୁସକାଟ୍ ପିଣ୍ଡ୍ଦେଙ୍ଗ୍ ଇଜି ଜାସାପେଲାକିତାର୍ । 33ୱାର୍ ଗଲ୍ଗଥା ଦର୍ତି ଉନ୍ଡ୍ରି ବାଡିଦୁ ଇତାର୍ । “ଗଲ୍ଗଥାଦି ଅର୍ତ କାପାଲ୍ ନାନି ବାଡି ।” 34ଆବେନୁ ୱାର୍ ଜିସୁଙ୍ଗୁଁ କେଇନିକା ମିସାତି ଅଙ୍ଗୁର୍ରସ୍ ଉନ୍ଣ୍ତେଙ୍ଗ୍ ସିତାର୍ । ଜିସୁ ତାନେଙ୍ଗ୍ କାଣ୍ତେକ୍ ୱେଡ଼୍ଜି ମାରି ଉଣୁଏତାନ୍ ।
35ୱାର୍ ଜିସୁଙ୍ଗୁଁ କ୍ରୁସ୍କାଟ୍ତୁ ଏକିସ୍କିଜି ମାରି ୱାନି ଆଙ୍ଗିଁୱିଜୁ କୁଡ଼ୁକୁଡ଼ିଦାନ୍ ନିଜେନିଜେଦି ଲୋଇ ବାଗ୍ କିଜି ଅତାର୍ । 36ତାନେୱେନ୍କା ୱାର୍ ଆବେନୁ ବାସ୍ସି କ୍ରୁସ୍କାଟ୍ତୁ ଏକିସ୍କିତି ଜିସୁଙ୍ଗୁଁ କାପ୍କିଜି ତେବାତାର୍ । 37ୱାନି ବିରଦ୍ତାନ୍ ଆତିମାନି ମାଟା ଉନ୍ଡ୍ରି ରାସାତିମାନି ପାଟା ୱାନି ତାଲାଦି କ୍ରୁସ ମୁସ୍କୁ ଡ଼ତା ଡ଼ିସ୍ତାମାର୍ହାର୍ “ଇୟାକାନ୍ ଜିସୁ, ଜିହୁଦିରି ରାଜା ।” 38ତାନେୱେନ୍କା ୱାର୍ ରିଏର୍ ଡଙ୍ଗାଁରିଙ୍ଗ୍ ଆବେନୁ କ୍ରୁସ୍କାଟ୍ତୁ ଏକିସ୍କିତାର୍, ଅରେନ୍ୱାନିଙ୍ଗ୍ ଉଣି ତରିନ୍ ମାରି ଆଇୱାନିଙ୍ଗ୍ ୱାନି ଡେବିରି ତରିନ୍ ।
39ଆୟା ସାରିଦାନ୍ ସୋଲ୍ସିମାନି ଲୋକୁ ତାଲା ଦୁକ୍ସି ଜିସୁଙ୍ଗୁଁ ନିନ୍ଦା କିଜି ଇର୍ହାର୍ । 40#ମାତିଉ ୨୬:୬୧; ଜୋହନ ୨:୧୯.“ନିନୁ ମନ୍ଦିର୍ତିଙ୍ଗ୍ ରୁକୁନିନୋ ମୁନେଟି ୱେନ୍କା ମାରି ତାନିଙ୍ଗ୍ ତିଆର୍କିଜିମାରିଇ । ନିନୁ ଜଦି ମାପୁରୁଦି ମାରିନ୍, ନିଜେଦିଙ୍ଗ୍ ରକିୟା କିଆ । କ୍ରୁସ୍କାଟ୍ତାନ୍ ରେତାଜ ରାଆ ।”
41ପେରି ଜାଜକର୍, ଦାର୍ମୁଗୁରୁ ମାରି ଦାର୍ମୁ ନେତାର୍ ବା ଜିସୁଙ୍ଗୁଁ ସେମାର୍କିଜି ଇର୍ହାର୍, 42“ୱାନ୍ ଆଇୱାରିଙ୍ଗ୍ ରକିୟାକିଜିମାର୍ହାନ୍, ମାତର୍ ନିଜେଦିଙ୍ଗ୍ ରକିୟା କିଦେଙ୍ଗ୍ ଆଟ୍ଏଜିନାନ୍ । ୱାନ୍ ପରା ଇସ୍ରାଏଲ୍ତି ରାଜା, ୱାନ୍ ଇୟାଦାପ୍ରେ କ୍ରୁସ୍ଦାନ୍ ରେତାଜରାପିନ୍, ମାପ୍ ୱାନିମାନୁ ବିସ୍ବାସ୍କିନାପ୍ । 43ୱାନ୍ ନିଜେଦିଙ୍ଗ୍ ମାପୁରୁଦି ମାରିନ୍ ଇନ୍ଞ୍ଜି ମାପୁରୁଦି ମୁସ୍କୁ ଆସାଇଟ୍ତାମାନାନ୍ । ଆର୍ତିଙ୍ଗ୍ ସୁଡ଼ୁନାଟ୍, ମାପୁରୁ ଇଲେଇ ୱାନିଙ୍ଗ୍ ଜିପିସ୍ କିଦେଙ୍ଗ୍ ବଦାକିଜିନାନ୍ ନୋ ସିଲେ ।”
44ୱାନି ୱାଲେ କ୍ରୁସ୍କାଟ୍ତୁ ଡାକାଇଆତିମାନି ଡଙ୍ଗାଁର୍ଉଁ ବା ୱାନିଙ୍ଗ୍ ଆୟାୱାଜା ସେମାର୍ କିତାର୍ ।
ଜିସୁଦି ସାନିକା
(ମାର୍କ ୧୫:୩୩-୪୧; ଲୁକ ୨୩:୪୪-୪୯; ଜୋହନ ୧୯:୨୮-୩୦)
45ଆୟା ନାଣ୍ତିଙ୍ଗ୍ ବାର ଗନ୍ଟା ସମୟ୍ତୁ ପୃତିବି ୱିଜୁ ସିକାଟି ଆତାତ୍ ମାରି ଆକା ମୁନ୍ଡ୍ରି ଗଟ୍ନା ସାନ୍ଦି ତେବାତାତ୍ । 46ୱେଡ଼ାରେସିମାର୍ଇ ତିନ୍ଟାବେଡ଼ାଦୁ ଜିସୁ ନାଣ୍ତଆଉଲିଆଜି ଇର୍ହାନ୍, “ଏଲି, ଏଲି, ଲାମା ସବକ୍ତାନି ?” ଅର୍ତାତ୍, “ଏ ନା ମାପୁରୁ, ଏ ନା ମାପୁରୁ, ନିନୁ ନାଙ୍ଗିଁ ଏନ୍ଦା ଡ଼ିସ୍ତି ?”
47ଲାକ୍ତୁ ନିର୍ଇମାରିଇ ଏସଲୋକ୍ ଇକା ୱେନ୍ଞ୍ଜି ଇର୍ହାର୍, “ୱାନ୍ ଏଲିୟଙ୍ଗ୍ କୁକ୍ସିନାନ୍ ।” 48ଅରେନ୍ ଲୋକୁ ଉରୁକ୍ସି ସୋଲ୍ସି କେଇନିକା ମିସାତି ଅଙ୍ଗୁର୍ରସତୁ ଉନ୍ଡ୍ରି ଲୁବ୍ଲୁବାପାଗା ମୁଡୁକ୍ସି ତାନିଙ୍ଗ୍ ନାଡ଼ାଦି ଟିପୁଦୁ ତର୍ସି ଜିସୁଙ୍ଗୁଁ ଉଣ୍ତେଙ୍ଗ୍ ପେର୍ତା ସିତାନ୍ ।
49ମାତର୍ ଆଇକାର୍ ଇର୍ହାର୍, “କାପ୍କିଦୁ, ସୁଡ଼ୁନାଟ୍, ୱାନିଙ୍ଗ୍ ରକିୟା କିଦେଙ୍ଗ୍ ଏଲିୟ ୱାଜିନାନ୍ ନୋ ସିଲେ ।”
50ଜିସୁ ମାରିଉନ୍ଡ୍ରି ଦେବେଙ୍ଗ୍ ପେରିୱେୟୁଦାନ୍ ଆଉଲି ଆଜି ସାରାସାରି ୱାନି ଜିବନ୍ ଡ଼ିସ୍ତାନ୍ ।
51ଆୟା ବେଡ଼ାଦୁ ମନ୍ଦିର୍ତୁ ଦୁଙ୍ଗୁଁଜିମାନି ପାର୍ଦା ମୁସ୍କୁରାନ୍ ଆଡ୍ଗି ସାନ୍ଦି ରୁଣ୍ତି ମକେଙ୍ଗ୍ ଆଜି କିଜିତାତ୍ । ବୁମିକମ୍ପ ଆତାତ୍, ପିଡ଼ିପିଙ୍ଗ୍ୱିଜୁ ପାଡିତେସର୍ଏ 52ମାରି ଏସ ମୁସ୍ତିଗୁଟେଙ୍ଗ୍ ରେଆୟ୍ଆତେ, ମାରି ଗାଦି ମାପୁରୁଦି ସାତି ଲୋକୁ ମେନ୍ଧଲ୍ତାନ୍ ମାରିଡ଼େସିଜିବନ୍ ଆତାର୍ । 53ଇୟାକାର୍ ମୁସ୍ତିଗୁଟେଣ୍କୁ ନିଙ୍ଗିଁଜି ୱାତାର୍ ମାରି ଜିସୁଦି ମାରିଡ଼େସିନିଙ୍ଗିଁନି ୱେନ୍କା ଇୟାୱାରିଙ୍ଗ୍ ପବିତ୍ର ଗାଡ଼୍ ଜିରୁସାଲମ୍ତୁ ସନିକା ଗାଦିଲୋକ୍ ସୁଡ଼ୁତାର୍ ।
54ଜିସୁଙ୍ଗୁଁ କାପ୍କିଦେଙ୍ଗ୍ ତେବାତିମାନି ସେନାପତି ମାରି ସନ୍ୟର୍ ବୁମିକମ୍ପ ନି ଆଇଆଇ ଗଟ୍ନେଙ୍ଗ୍ ସୁଡ଼ୁଜି ତିଲାତା ସର୍ର୍ହାର୍, ୱାର୍ ଇର୍ହାର୍, “ସତ୍ନେ, ଇୟାକାନ୍ ମାପୁରୁଦି ମାରିନ୍ ମାର୍ହାନ୍ ।”
55 #
ଲୁକ ୮:୨,୩. ଗାଲିଲିଦାନ୍ ଜିସୁଦି ୱେନ୍କାୱାଜି, ୱାନିଙ୍ଗ୍ ସେବା କିତିମାନି ଗାଦି ଆଇମେକ୍ ଆକରାନ୍ ମାନ୍ଞ୍ଜି ୱିଜୁ ସୁଡ଼ୁଜି ମାରେଏ । 56ଇୟାୱାନିକା ମାଣ୍କୁ ମାର୍ଏ ମଗ୍ଦଲିନି ମରିୟମ୍, ଜାକୁବ ନି ଜୋସେପ୍କା ଆଇସି ମରିୟମ୍ ମାରି ଜେବଦିଦି ଆଡ଼୍ସି ।
ଜିସୁଙ୍ଗୁଁ ମୁସ୍ତାର୍
(ମାର୍କ ୧୫:୪୨-୪୭; ଲୁକ ୨୩:୫୦-୫୬; ଜୋହନ ୧୯:୩୮-୪୨)
57ମିଲିମିଲିକା ବେଡ଼ାଦୁ ହାରାମାତିୟା ଗାଡ଼୍ତି ଜୋସେପ୍ ଦର୍ତି ଅରେନ୍ ମାଜନ୍ ଲୋକୁ ୱାତା ଇତାନ୍ । ୱାନ୍ ଜିସୁଦି ଅରେନ୍ ସିସୁ ମାର୍ହାନ୍ । 58ୱାନ୍ ପିଲାତ୍ତିଙ୍ଗ୍ ତରାଆୟ୍ଆତାନ୍ନୋ ଜିସୁଦି ମେନ୍ଦଲ୍ତିଙ୍ଗ୍ ଅତେଙ୍ଗ୍ ଇଜି ଅନୁମତି ଲସ୍ତାନ୍ । ଆର୍ତିଙ୍ଗ୍ ପିଲାତ୍ ଜିସୁଦି ମେନ୍ଦଲ୍ତିଙ୍ଗ୍ ଅତେଙ୍ଗ୍ ଆଦେସ୍ ସିତାନ୍ । 59ଜୋସେପ୍ ଜିସୁଦି ମେନ୍ଦଲ୍ତିଙ୍ଗ୍ ଅତାନ୍ନୋ ଉନ୍ଡ୍ରି ନେଗି ୱାତିଦୁ ତେରେପ୍ତାନ୍ ମାରି 60ୱାନି ନିଜେଦି ଉଣ୍ତିଙ୍ଗ୍ କାଲୁଦୁ କାରିତି ମାରିଇ ଉନ୍ଡ୍ରି ପୁନି ମୁସ୍ନିବାଡିଦୁ ୱାନିଙ୍ଗ୍ ଇଟ୍ତାନ୍ ମାରି ଗୁଟାଦିମକମ୍ତୁ ଉନ୍ଡ୍ରି ପେରି କାଲୁ କେରେପ୍ତା ସର୍ହାନ୍ । 61ମଗ୍ଦଲିନି ମରିୟମ୍ ନି ଆଇ ମରିୟମ୍ ଆୟାବାନୁ ଗୁଟାଦିଙ୍ଗ୍ ମକମ୍କିଜି ବାସ୍ତେ ମାର୍ଏ ।
ଗୁଟାଦିଙ୍ଗ୍ କାପ୍କିନିକାର୍
62ଆୟା ମାର୍ନାଣ୍ଡିଙ୍ଗ୍ ଅର୍ତାତ୍ ରମ୍ନିନାଣ୍ତିଙ୍ଗ୍ ପେରି ଜାଜକର୍ ନି ପାରୁସିର୍ ପିଲାତ୍ତିଙ୍ଗ୍ ବେଟ୍ଆତାର୍ନୋ ଇର୍ହାର୍, 63“ଆଜ୍ଞା, ମାଙ୍ଗିଁ ମନ୍ତୁମାନାତ୍, ଆୟା ମିଚ୍ୱେର୍ନିକାନ୍ ଜିବନ୍ମାର୍ଇ ୱାଲେ ଇର୍ଆ ମାର୍ହାନ୍, ‘ମୁନେଟି ୱେନ୍କା ନାନ୍ ନିଙ୍ଗିଁନା ।’ 64ଆଦେଙ୍ଗ୍ ମୁନେନ୍ ସାନ୍ଦି ଆୟା ମୁସ୍ତିଗୁଟାଦିଙ୍ଗ୍ କାପ୍କିଜ ମାନ୍ଡ଼୍ରେଙ୍ଗ୍ କାପ୍କିନିୱାରିଙ୍ଗ୍ ଆଦେସ୍ ସିପିନ୍, ଆର୍ତିଙ୍ଗ୍ ୱାନି ସିସୁର୍ ୱାନି ମେନ୍ଦଲ୍ତିଙ୍ଗ୍ ଡଙ୍ଗାଁକିଜ ଅସ, ୱାନ୍ ଜିବନ୍ଆଜି ନିଙ୍ଗିଁତାମାନାନ୍ ଇଜି ଇନ୍ଡ୍ରେଙ୍ଗ୍ ଆଟ୍ଏର୍ । ୱାରି ଇୟା ମିସ୍ ମାଟା ୱିଜୁମାଣ୍କୁ ନାଣ୍ତ ତାଗ୍ଇକା ଆନାତ୍ ।”
65ପିଲାତ୍ ୱାରିଙ୍ଗ୍ ଇର୍ହାନ୍, “ଦଲ୍ କାପ୍କିନିୱାରିଙ୍ଗ୍ ଅତୁ ମାରି ଆୟା ମୁସ୍ତିଗୁଟାଦିଙ୍ଗ୍ ବେଗି ସୁରକ୍ଷା କିଦୁ ।”
66ୱାର୍ ସର୍ହାର୍ନୋ ଗୁଟାଦିଙ୍ଗ୍ ସୁରକ୍ଷା କିନି ଉଣ୍ତିଙ୍ଗ୍ ତିଆର୍କିତାର୍ । ଆୟା ମକମ୍ତିଙ୍ଗ୍ କେରେପ୍ସି ଇଟ୍ତିମାନି କାଲୁ ମୁସ୍କୁ ଟାଆପ୍ ବାସାକିଜି କାପ୍କିନି ଉଣ୍ତିଙ୍ଗ୍ କାପ୍କିନିୱାରିଙ୍ଗ୍ ଇଟ୍ତାର୍ ।
Currently Selected:
ମାତିଉ 27: NTKoo20
Highlight
Share
Copy
Want to have your highlights saved across all your devices? Sign up or sign in
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020
