ମାତିଉ 13
13
ୱିତୁ ୱିତ୍ନି କାତା
(ମାର୍କ ୪:୧-୯; ଲୁକ ୮:୪-୮)
1ଆୟାନାଣ୍ତିଙ୍ଗ୍ ଜିସୁ ଇଲ୍ତାନ୍ ସହସି ଗାଡା ପାଡ଼ି ସର୍ହାନ୍ । ଆବେ ୱାନ୍ ସିକିୟା ସିଦେଙ୍ଗ୍ ବାସ୍ତାନ୍ । 2#ଲୁକ ୫:୧-୩.ୱାନି ସାରିବେଡ଼୍ତି ନାଣ୍ତ ଲୋକୁ ଉଣ୍ତାତା ମାର୍ହାର୍ ଜେ ୱାନ୍ ଉନ୍ଡ୍ରି ଡଙ୍ଗାଁଦୁ ସଲ୍ସି ବାସ୍ତାନ୍ । ଲୋକୁ ୱିଜେରେ ସାମ୍ଦୁର୍ ପାଡ଼ି ତେବାତାର୍ ମାରି ୱାନି ମାଟା ୱେର୍ଆର୍ । 3ୱାନ୍ କାତାଦାନ୍ ୱାରିଙ୍ଗ୍ ନାଣ୍ତ ମାଟେଙ୍ଗ୍ ସିକିୟା ସିତାନ୍ । ୱାନ୍ ଇର୍ହାନ୍, “ଅର୍ଲେନ୍ ଅରେନ୍ ଲୋକୁ ୱିତୁ ୱିତ୍ତେଙ୍ଗ୍ ସତାନ୍ । 4ୱାନ୍ କିଡ଼ିଇଦୁ ୱିତୁ ୱିତ୍ନିୱାଲେ ଏସ ୱିତୁ ସାରି ପାଡ଼୍କାଦୁ ଆର୍ତେ ଆକା ପଟିଙ୍ଗ୍ ୱାଜି ଆୟାୱିଜୁ ୱିତୁ ତିର୍ଏ । 5ମାରି ଏସ ୱିତୁ ଉଣା ସିକାଲାମାନି ପିଡ଼ିପି ବୁମିଦୁ ଆର୍ତାତ୍ । ମାରି ନାଣ୍ତ ସିକାଲା ସିଲେତାତ୍ ଆକା ୱିତୁ ଦାପ୍ରେ ନେରିତାତ୍ । 6ମାତର୍ ତାନି ୱେଲା ଆଡ୍ଗି ସଲ୍ଏତ୍ ମାର୍ହାତ୍ଆକା ୱେଡ଼ା ତେର୍ୱେଲ୍ତାନ୍ ୱେତାତ୍ ମାରି ସାତା ସର୍ହାତ୍ । 7ଏସ ୱିତୁ ସାମ୍କା ଦୁପା ଲୋଇ ଆର୍ତାତ୍ । ଇୟା ସାମ୍ ମାରାକ୍ ୱିଜୁ ପିର୍ଜି ପାଡ଼ାୱିଜୁଦିଙ୍ଗ୍ ତିଗିତେ ପକ୍ତେ । 8ମାତର୍ ମାରି ଏସ ୱିତୁ ନେଗି ବୁମିଦୁ ଆର୍ଜି ମାରାକ୍ଆଜି ପଲ୍ ଆସ୍ତାତ୍ । ଏସ ସହେ ଗୁଣୁ, ଏସ ସାଟେ ଗୁଣୁ, ମାରି ଏସ ତିରିସ୍ ଗୁଣୁ ପଲ୍ ଆସ୍ତାତ୍ ।”
9ଜିସୁ କାତା ୱିସ୍ସି ଇର୍ହାନ୍, “ଆମାୱାନିଙ୍ଗ୍ ୱେନ୍ଡ୍ରେଙ୍ଗ୍ ଗିତଣିଙ୍ଗ୍ମାନେ, ୱାନ୍ ୱେନିନ୍ ।”
ଜିସୁ ଏନ୍ଦା କାତା ୱେର୍ତାନ୍
(ମାର୍କ ୪:୧୦-୧୨; ଲୁକ ୮:୯-୧୦)
10ୱେନ୍କା ସିସୁର୍ ଜିସୁଦି ଲାକ୍ତୁ ୱାଜି ୱେନ୍ବାତାର୍, “ଲୋକାଙ୍ଗ୍ ସିକିୟା ସିନିୱାଲେ ନିନ୍ ଏନ୍ଦା କାତାଦାନ୍ ୱେର୍ସିନି ?”
11ଜିସୁ ଇର୍ହାନ୍, ମୁସ୍କୁପୁର୍ତି ମାର୍ଗିତିମାନି ବିସୟ୍ ନେସ୍ତେଙ୍ଗ୍ ଇଜି ମିଙ୍ଗିଁ ବୁଦି ସିଆଇ ଆତାମାନାତ୍, ମାତର୍ ୱାରିଙ୍ଗ୍ ସିଆଇ ଆଏତ୍ । 12#ମାତିଉ ୨୫:୨୯; ମାର୍କ ୪:୨୫; ଲୁକ ୮:୧୮; ୧୯:୨୬.ଆମାୱାନିଙ୍ଗ୍ ମାନାତ୍, ୱାନିଙ୍ଗ୍ ନାଣ୍ତ ସିଆଇ ଆନାତ୍ ମାରି ଆବେଟ୍ ୱାନ୍ ନାଣ୍ତ ଲାବ୍ କିନାନ୍ । ମାତର୍ ଆମାୱାନିଙ୍ଗ୍ ସିଲେତ୍, ୱାନିଦି ଆମାକା ମାନାତ୍, ଆକାବା କୁତ୍ସି ଅଆୟ୍ଆନାତ୍ । 13ୱାରିଙ୍ଗ୍ ନାନ୍ କାତାଦାନ୍ ସିକିୟା ସିଜିନା, ଇରିଙ୍ଗ୍ ୱାର୍ ସୁଡ଼୍ବୁ ସୁଡ଼୍ବୁ ସୁଡ଼୍ଦେଙ୍ଗ୍ ଆଟ୍ଏର୍ ମାରି ୱେନ୍ବୁ ୱେନ୍ବୁ ବୁଜାଏର୍ । 14ବାବବାଦି ଜିସାୟ୍ଦି ବବିସତ୍ ମାଟା ୱାରି ଉଣ୍ତିଙ୍ଗ୍ ସତ୍ ଆଜିନାତ୍ ।
ଇୟା ଲୋକୁ ୱେନ୍ଜି ୱେନ୍ଜି ଇନିକା ବୁଜାଏର୍ ।
ସୁଡ଼୍ଜି ସୁଡ଼୍ଜି ଇନିକା ସୁଡ଼୍ଦେଙ୍ଗ୍ ଆଟ୍ଏର୍ ।
15ଇରିଙ୍ଗ୍ ୱାରି ମୋନ୍ ପିଲା ବୁଦି,
ୱାର୍ ଗିତଣିଙ୍ଗ୍ଁ କେର୍ପାତାମାନାର୍
ମାରି କାଣୁକୁ ମୁକ୍ତାମାନାର୍ ।
ଆକା ଆଏତିମାରିଙ୍ଗ୍ ୱାର୍
କାଣ୍କାଣୁକୁ ସୁଡ଼ୁଦେଙ୍ଗ୍ ଆଟ୍ତାର୍ମାନ୍ଦି
ମାରି ୱାର୍ ଗିତଣିଦାନ୍ ୱେନ୍ଡ୍ରେଙ୍ଗ୍ ଆଟ୍ତାର୍ମାନ୍ଦି
ମାରି ବୁଜାଜିୱାଜି ନା ଲାକ୍ତୁ ଡ଼େସିୱାତାର୍ମାନ୍ଦି
ମାରି ୱାରିଙ୍ଗ୍ ନାନ୍ ନେଗେନ୍କିତାମାନ୍ଦି ।
16 #
ଲୁକ ୧୦:୨୩,୨୪. “ମିର୍ ଏସା ବାଗ୍ୟଦି ଲୋକୁ ! ମିର୍ ସୁଡ଼୍ଦେଙ୍ଗ୍ ଆଟ୍ସିନିଦେର୍ ମାରି ୱେନ୍ଡ୍ରେଙ୍ଗ୍ ଆଟ୍ସିନିଦେର୍ । 17ଇୟା ମାଟା ନାନ୍ ମିଙ୍ଗିଁ ସତ୍ ଇଜିନା, ଏସ ବାବବାଦିର୍ ନି ଏସ ମାପୁରୁଦି ଲୋକୁ, ମିର୍ ଆମାକା ସୁଡ଼୍ଜିନିଦେର୍; ଆକା ସୁଡ଼୍ଦେଙ୍ଗ୍ ଇଜି ମାରି ୱେନ୍ଜିନିଦେର୍; ଆୟାୱିଜୁ ୱାର୍ ୱେନ୍ଡ୍ରେଙ୍ଗ୍ ବଦାକିତାର୍, ମାତର୍ ୱେନ୍ଏତାର୍ ।
ଜିସୁ ୱିତୁ ୱିତ୍ନି ଲୋକ୍ତି କାତା ବୁଜାକିତାନ୍
(ମାର୍କ ୪:୧୩-୨୦; ଲୁକ ୮:୧୧-୧୫)
18“ଆରିଙ୍ଗ୍ ୱେନ୍ଡ୍ରୁ, ୱିତୁ ୱିତ୍ନିକାନ୍ କାତାଦି ଅର୍ତ ଇଜିନାନ୍ । ବୁଜାଦେଙ୍ଗ୍ ତେରେପେତେ ଆଦୁ । 19ଏର୍ ମୁସ୍କୁପୁର୍ତି ନେଗି କାବୁର୍ ୱେନାର୍, ମାତର୍ ବୁଜାଏର୍ । ୱାନ୍ ୱିତାତିମାନି ସାରି ଲାକ୍ତୁରି ବୁମିଦି ୱାଜା । ସୟତାନ୍ ୱାନି ଜିବନ୍ତୁ ୱିତାତିମାନି ଆୟା ବାକ୍ୟ ଡ଼ିବିସ୍କିନାଅନାତ୍ । ସାରି ଲାକ୍ତୁ ଆର୍ତିମାନି ୱିତୁଦି ଅର୍ତ । 20ଏମେକାର୍ ବାକ୍ୟ ୱେର୍ଇଦାପ୍ରେ ୱେଡ଼ିକାଦାନ୍ ଆସ୍ନାନ୍, ୱାର୍ ପିଡ଼ିପି ବୁମିଦୁ ଆର୍ତିମାନି ୱିତୁଦି ସାମାନ୍ । 21ୱାରି ମନ୍ତି ଲୋଇ ଇକା ସଲ୍ଏତ୍ ଆକା ୱାର୍ ତାନିଙ୍ଗ୍ ନାଣ୍ତ ସମୟ୍ ଆସ୍ସି ଇଡ୍ଦେଙ୍ଗ୍ ଆଟ୍ଏର୍ । ଇୟା ମାଟା ଉଣ୍ତିଙ୍ଗ୍ ଏସ୍ତିୱାଲେ କାସ୍ଟୁ ନି କାସ୍ଟୁ ୱାନାତ୍, ୱାର୍ ଦାପ୍ରେ ତାନିଙ୍ଗ୍ ଡ଼ିସ୍ନାର୍ । 22ଏନ୍ ବାକ୍ୟ ୱେନାନ୍, ମାରି, ଦୁନିଆଦି ସିନ୍ତା ମାରି ଦନ୍ତି ଆସା ୱାନିଙ୍ଗ୍ ତିଗ୍ନା ପକ୍ନାତ୍, ମାରି ୱାର୍ ପସଲ୍ ଆସ୍ଏର୍, ଆୟା ଲୋକ୍ ସାମ୍କା ଦୁପାଦୁ ୱିତାତିମାନି ବୁମିଦି ୱାଜା । 23ମାତର୍ ଏନ୍ ବାକ୍ୟ ୱେନ୍ଜି ବୁଜାନାନ୍, ଆୟାକାର୍ ୱିତାତିମାନି ନେଗି ବୁମିଦି ୱାଜା । ୱାର୍ ନାଣ୍ତ ପସଲ୍ ଆସ୍ନାର୍, ଏନ୍ ସହେ ଗୁଣୁ, ଏନ୍ ସାଟେ ଗୁଣୁ ଏନ୍ ତିରିସ୍ ଗୁଣୁ ।”
ଗଲୁତକାଦିଲାଟା କାତା
24ଜିସୁ ମାରିଉଣ୍ତ୍ରି କାତା ଇଜି ଇର୍ହାନ୍ । ମୁସ୍କୁପୁର୍ ଇୟାୱାଜା ଅରେନ୍ ଲୋକୁ ୱାନି କିଡ଼ିଇଦୁ ନେଗି ଗଦ୍ମୁ ୱିତୁ ୱିତ୍ତାନ୍ । 25ଅର୍ଲେନ୍ ନାଡ଼ା ୱାର୍ ୱିଜେରେ ଡରିତିମାର୍ଇୱାଲେ ଅରେନ୍ ସାତ୍ରୁ ୱାଜି ଆୟା ଗଦ୍ମୁ ଲୋଇ ଏସ ଗଲୁତକା ଲାଟା ୱିତୁ ୱିତ୍ତାସର୍ହାତ୍ । 26ଏସ୍ତିୱାଲେ ମାରାକ୍ ୱିଜୁ ପିର୍ଜି ସେରେନ୍ ସତାତ୍, ନାଡ଼୍ମି ନାଡ଼୍ମି ଗଲୁତକା ଲାଟା ତରିତାତ୍ । 27ଆୟା ଲୋକ୍ତି ସାକର୍କୁ ୱାଜି ଇର୍ହାର୍, ଆଜ୍ଞା, ନିନ୍ତୋ କିଡ଼ିଇଦୁ ନେଗି ୱିତୁ ୱିତ୍ତିମାର୍ହି, ଗଲୁତକାଲାଟେଙ୍ଗ୍ ଏମେଣ୍କୁ ୱାତେ ? 28ୱାନ୍ ୱାରିଙ୍ଗ୍ ଇର୍ହାନ୍, ଅରେନ୍ ସାତ୍ରୁ ଇକା କିତାମାନାନ୍ । ମାରି, ସାକର୍କୁ ୱାନିଙ୍ଗ୍ ଇର୍ହାର୍, ଆରିଙ୍ଗ୍ ମାପ୍ ସଲ୍ସି ଆକେଙ୍ଗ୍ ରେଲ୍ଜି ଉଣ୍ତ୍ରେମାନୁ କିନାପ୍, ଇକା ଇନିକା ନିନ୍ ବଦାକିନି ? 29ମାତର୍ ୱାନ୍ ଇର୍ହାନ୍, “ସିଲେ, ଏସ୍ତିୱାଲେ ମିର୍ ଗଲୁତକା ଲାଟା ଉଣ୍ତା କିବୁ କିବୁ ଆୟାୱିଜୁଦି ୱାଲେ ଗଦ୍ମୁ ରେନି ପକ୍ନିଦେର୍ । 30ପାସି କୟ୍ଇ ସାନ୍ଦି ରୁଣ୍ତିୱାନିକାଙ୍ଗ୍ଁ ଅର୍ସେ ପିର୍ଦେଙ୍ଗ୍ ଡ଼ିସ୍ସୋ ସିଦୁ, ମାରି ପାସି କୟ୍ନିୱାଲେ ନାନ୍ କୟ୍ନି ୱାରିଙ୍ଗ୍ ଇନା, ଆଡ଼େକ୍ତେଙ୍ଗ୍ ଇଜି ଆଗ୍ଡ଼ି ଗଲୁତକା ଲାଟା ଉନ୍ଡ୍ରେମାନୁ କିଜି କାଟେଙ୍ଗ୍ ତର୍ଆ, ମାତର୍ ଗଦ୍ମୁ ନା କଲ୍କିଦୁ ଉଣ୍ତା କିଜିଇଡିଆ ।”
ସାର୍ସୁ ପାଡ଼ୁଦି କାତା
(ମାର୍କ ୪:୩୦-୩୨; ଲୁକ ୧୩:୧୮-୧୯)
31ଜିସୁ ୱାରିଙ୍ଗ୍ ମାରିଉନ୍ଡ୍ରି କାତା ୱେର୍ସି ଇର୍ହାନ୍, “ମୁସ୍କୁପୁର୍ ଇୟାୱାଜା ଉନ୍ଡ୍ରି ସାର୍ସୁ ପାଡ଼ୁଦି ୱାଜା, ଆମାକା ଅସି ଅରେନ୍ ଲୋକୁ ନିଜେଦି କିଡ଼ିଇଦୁ ୱିତ୍ତାନ୍ 32ଆକା ତୋ ୱିଜୁ ୱିତୁ ପାଡ଼୍କା ମାଣାନ୍ ଇସ୍ରିକାତ୍, ମାତର୍ ଆକା ପିରିତିଙ୍ଗ୍ ୱିଜୁ କୁସାଦି ମାଣ୍କୁ ପେରିକା ଆଜି ଇୟାୱାଜା ମାରାନ୍ ଆନାତ୍ ଜେ, ବାଦଡ଼୍ତି ପଟିଙ୍ଗ୍ ୱାଜି ତାନି କମେଆଙ୍ଗ୍ଁ ଜାଲୁ ତର୍ସି ବାସାନେ ।”
କମିର୍ଦି କାତା
(ଲୁକ ୧୩:୨୦-୨୧)
33ଜିସୁ ୱାରିଙ୍ଗ୍ ମାରିଉନ୍ଡ୍ରି କାତା ୱେର୍ସି ଇର୍ହାନ୍, “ମୁସ୍କୁପୁର୍ ଇୟାୱାଜା । ଅରେତ୍ ଆଇମା କାଣ୍ତେକ୍ କମିର୍ ଅସି ଆଡା ଅଟା ଗୁଣ୍ତାଦୁ ମିସାକିଜି ପିଡ଼ିକ୍ସି ଇଟ୍ତାତ୍ । ଟିକ୍ ସମୟ୍ତୁ ୱିଜୁ ଦୁର୍ ଗୁଣ୍ତା ଆବେ ମିସାଜି ଉଦ୍ଜି ନିଙ୍ଗିଁତାତ୍ ।”
ଜିସୁ କାତାଦାନ୍ ୱେର୍ତାନ୍
(ମାର୍କ ୪:୩୩-୩୪)
34ଜିସୁ ଇୟାୱିଜୁ ମାଟା କାତାଦାନ୍ ଲୋକାଙ୍ଗ୍ ୱେର୍ସିମାର୍ହାନ୍, ମାରି କାତା ୱେର୍ଏଣ୍ତା ୱାନ୍ ୱାରିଙ୍ଗ୍ ଇନିକା ଇନ୍ଏଜିମାର୍ହାନ୍, 35ଏଣ୍ତେସ୍ ବାବବାଦି ମାଣାନ୍ ରାସାତି ଇୟା ବାକ୍ୟ ସତ୍ ଆନାତ୍,
“ନାନ୍ କାତାଦାନ୍ ୱାରି ୱାଲେ ମାଟା ୱାର୍ଗିନା ।
ଦୁନିଆ ତିଆର୍ଆତି ଆଗ୍ଡ଼ିରି ନେସ୍ଇମାନି ୱିଜୁ ମାଟା ଇୟାୱାଜା ନାନ୍ ୱାରିଙ୍ଗ୍ ବୁଜାକିନା ।”
ଜିସୁ ଗଲୁତକାଲାଟାଦି ବିସୟ୍ତାନ୍ ବୁଜାକିତାନ୍
36ଲୋକା ଗଲିଦାନ୍ ସହସି ୱାଜି ଜିସୁ ଏସ୍ତିୱାଲେ ଇଲୁ ଲୋଇ ସର୍ହାନ୍, ୱାନି ସିସୁର୍ ୱାଜି ୱେନ୍ବାତାର୍, “କିଡ଼ିଇଦି ଗଲୁତକାଲାଟାଦି କାତାଦି ଅର୍ତ ମାଙ୍ଗିଁ ବୁଜାକିଆ ।”
37ଜିସୁ ଇର୍ହାନ୍, ଏମେ ଲୋକୁ ନେଗି ୱିତୁ ୱିତ୍ତାନ୍, ୱାନ୍ ମନୁସ୍ୟପୁତ୍ର । 38ଇୟା ଦୁନିଆ ଆଜିନାତ୍ କିଡ଼ିଇ । ଏମେକାର୍ ମୁସ୍କୁପୁର୍ତି ଅଦିକାରି, ୱାର୍ ନେଗି ୱିତୁ । ଗଲୁତକାଲାଟେଙ୍ଗ୍ ସୟତାନ୍ତି ୱାଲେ ବୁଲାନିକାର୍ । 39ଏମେ ସାତ୍ରୁ ଗଲୁତକା ଲାଟା ୱିତ୍ତାନ୍, ୱାନ୍ ସୟତାନ୍ । ପାସି ଉଣ୍ତାକିନି ସମୟ୍ ଆଜିନାତ୍ ୱିଜ୍ନି ଜୁଗ୍ । ପାସି କୟ୍ନିକାର୍ ଆଜିନାର୍ ମୁସ୍କୁପୁର୍ତି ଦୁତ୍କୁ । 40ଗଲୁତକା ଲାଟେଙ୍ଗ୍ ଏଣ୍ତେସ୍ ଉଡ୍ରେମାନୁ କିଜି ଆଡ଼୍କାଇଆତେ, ଜୁଗ୍ ୱିଜ୍ନିୱାଲେ ଆୟାୱାଜା ଆନାତ୍ । 41ମନୁସ୍ୟପୁତ୍ର ୱାନି ରାଜିଦାନ୍ ୱିଜୁ ତାଗ୍ଇ ପାଣିକିନିୱାରିଙ୍ଗ୍ ନି ଏମେକାର୍ ଆଇୱାରିଙ୍ଗ୍ ପାପ୍ କିବିସ୍ କିଦେଙ୍ଗ୍ ଉତ୍ନାର୍, ୱାରିଙ୍ଗ୍ ଉଣ୍ତାକିଦେଙ୍ଗ୍ ଇଜି ମୁସ୍କୁପୁର୍ତି ଦୁତ୍କାଙ୍ଗ୍ ପକ୍ନାନ୍ । 42ୱାର୍ ଇୟା ୱିଜେରିଙ୍ଗ୍ କାସ୍ନି ସିସୁଦୁ ପକ୍ନେ । ଆବେ ଇୟା ଲୋକୁ ଆଡ଼୍ବାନାର୍ ମାରି ପାଲ୍କୁ କାତ୍ରେ କିନାର୍ । 43ନାସ୍ତିୱାଲେ ମାପୁରୁଦି ଲୋକୁ ମୁସ୍କୁପୁର୍ତି ବୁବାମାନୁ ୱେଡ଼ାଦି ୱାଜା ଜାୟ୍ ଆନାର୍ । ଏମେୱାନିଙ୍ଗ୍ ୱେନ୍ଡ୍ରେଙ୍ଗ୍ ଗିତଣିଙ୍ଗ୍ମାନେ, ୱାନ୍ ୱେନିନ୍ ।
ମୁସ୍ତି ଦନ୍ତି କାତା
44ମୁସ୍କୁପୁର୍ କିଡ଼ିଇଦୁ ମାର୍ଗିତିମାନି ଦନ୍ତି ୱାଜା । ଅରେନ୍ ଲୋକୁ ଆକା ସୁଡ଼୍ଜି ମାର୍କ୍ସି ଇଟ୍ତାନ୍ ମାରି ୱେଡ଼ିକାଦାନ୍ ସଲ୍ସି ନିଜେଦି ୱିଜୁ ପର୍ଜି ଆୟା କିଡ଼ିଇଦିଙ୍ଗ୍ କଟାନ୍ ।
ନାଣ୍ତଦାରାଦି ମୁକ୍ତାଦି କାତା
45ମାରି, ମୁସ୍କୁପୁର୍ ଇୟାୱାଜା । ଅରେନ୍ ବେପାରି ନାଣ୍ତଦାରାଦି ମୁକ୍ତା ପୟ୍ଜିମାର୍ହାନ୍ । 46ଉଣ୍ତ୍ରି ନାଣ୍ତଦାରାଦି ମୁକ୍ତା ପୟ୍ଜି ୱାନ୍ ୱାନି ୱିଜୁ ଦନ୍ ପର୍ଜି ତାନିଙ୍ଗ୍ କଟାନ୍ ।
ମିନ୍କୁ ଆସ୍ନି ଜାଡ଼ିଦି କାତା
47ମାରି, ମୁସ୍କୁପୁର୍ ଉଣ୍ତ୍ରି ମିନ୍କୁ ଆସ୍ନି ଜାଡ଼ିଦି ୱାଜା । ମିନ୍କୁ ଆସ୍ନିକାର୍ ଗାଡାଦୁ ଜାଡ଼ି ପକ୍ସି ରକମ୍ ରକମ୍ ଜାତିଦି ମିନ୍କୁ ଆସ୍ନାର୍ । 48ଜାଡ଼ି ପୁରୁନ୍ଆତିଙ୍ଗ୍ ଲୋକୁ ଗାଡା ପାଡ଼ି ରେଲ୍ଜି ତାତାର, ମାରି ବାସ୍ସି ନେଗି ନେଗି ମିନ୍କୁ ଆସ୍କିଜି ସାଟ୍ନାଦୁ ଇଡ୍ନାର୍ ମାରି ତାଗ୍ଇ ମିନ୍କୁ ପକ୍ନାର୍ । 49ଜୁଗ୍ ୱିଜ୍ନି ୱାଲେ ଇୟାୱାଜା ଆନାତ୍ । ଦୁତ୍କୁ ସହସିୱାଜି ଦାର୍ମୁଦିଲୋକା ମାଣ୍କୁ ତାଗ୍ଇ ଲୋକାଙ୍ଗ୍ ୱେର୍ଏକିନେ । 50ମାରି ୱାରିଙ୍ଗ୍ ସିସୁ କାସ୍ନିମାନୁ ପକ୍ନାର୍; ଆବେ ଆଡ଼୍ବାନାର୍ ମାରି ପାଲ୍କୁ କାତ୍ରେକିନାର୍ ।
ପାଡ଼ିଇକା ନି ପୁନି ମାଟା
51ଜିସୁ ସିସୁରିଙ୍ଗ୍ ୱେନ୍ବାତାନ୍, “ଇୟାୱିଜୁ ବିସୟ୍ ବୁଜାଦେଙ୍ଗ୍ ଆଟ୍ସିନିଦେର୍ ?”
ୱାର୍ ଇର୍ହାର୍, “ହୁଁ ପ୍ରବୁ ।”
52ଜିସୁ ୱାରିଙ୍ଗ୍ ଇର୍ହାନ୍, “ଏମେ ଇଲୁଦି ମାଲିକ୍ ନିଜେଦି ଗୁଦାମ୍ତାନ୍ ପୁନିକା ନି ପାଡ଼ିଇ ଜିନିସ୍ ସପ୍ନାନ୍, ଦାର୍ମୁଗୁରୁ ଏନ୍ ମୁସ୍କୁପୁର୍ତୁ ସିସୁଆତାମାନାନ୍ ୱାନ୍ ଇୟାୱାଜା ।”
ଜିସୁଙ୍ଗୁଁ ନାଜରିତଦୁ ମାନାଏତାର୍
(ମାର୍କ ୬:୧-୬; ଲୁକ ୪:୧୬-୩୦)
53ଜିସୁ ଇୟାୱିଜୁ କାତା ୱିସ୍ତି ୱେନ୍କା ଆୟା ବାଡିଦାନ୍ ସର୍ହାନ୍ । 54ମାରି, ଜିସୁ ନିଜେଦି ବୁବାସି ଗାଡ଼୍ତୁ ୱାଜି ଲୋକାଙ୍ଗ୍ ୱାରି ପାର୍ତନା କିନି ଇଲୁଦୁ ଇୟାୱାଜା ସିକିୟା ସିତାନ୍ ଜେ, ୱାର୍ କାବାଆଜି ଇର୍ହାର୍, “ଇୟାୱାଜା ବୁଦି ମାରି ସାକ୍ତିଦି ପାଣି ଏମେଣ୍କୁ ପୟ୍ତାନ୍ ?” ୱାର୍ ୱେନ୍ବାତାର୍, “ଇୟା କାବାଆନିପାଣିଦି ବିସୟ୍ତାନ୍ ଇନିକା ?” 55ଇକାନ୍ ଇନିକା ଆୟା ବାଡ଼େଇତି ମାରିନ୍ ଆଏନ୍ ? ମରିୟମ୍ ଇନିକା ତାମେ ଆଇସି ଆଏତ୍ ? ଜାକୁବ, ଜସେପ୍, ସିମୋନ୍ ନି ଜିହୁଦା ଇନିକା ୱାନି ତଡ଼ାନ୍କୁ ଆଏର୍ ? 56ୱାନି ତାଙ୍ଗିଁକ୍ ଇନିକା ଇବେ ବାସାଉ ? ଇୟାୱିଜୁ ବୁଦି ନି ସାକ୍ତି ୱାନ୍ ପୟ୍ତାନ୍ ଏମେଣ୍କୁ ? 57#ଜୋହନ ୪:୪୪.ଇକା ଇଜି ୱାର୍ ଜିସୁଙ୍ଗୁଁ ମାନାଏତାର୍ ।
ଜିସୁ ୱାରିଙ୍ଗ୍ ଇର୍ହାନ୍, “ଅରେନ୍ ବାବବାଦି ନିଜେଦି ଇଲୁ ନି ନାର୍ତିଙ୍ଗ୍ ଡ଼ିସ୍ତିଙ୍ଗ୍ ଆଇ ୱିଜୁମାନୁ ସନ୍ମାନ୍ ପୟ୍ନାନ୍ ।” 58ୱାର୍ ୱାନିଙ୍ଗ୍ ବିସ୍ବାସ୍ କିଏତାର୍ଆକା ୱାନ୍ ଆବେ ୱାନି କାବାଆନି ପାଣି ମାରି ନାଣ୍ତ କିଏତାନ୍ ।
Currently Selected:
ମାତିଉ 13: NTKoo20
Highlight
Share
Copy
Want to have your highlights saved across all your devices? Sign up or sign in
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020
