ଜୋହନ 20
20
ୱାର୍ରି ଗୁଟା
(ମାତିଉ ୨୮:୧-୮; ମାର୍କ ୧୬:୧-୮; ଲୁକ ୨୪:୧-୧୨)
1ୱାରାଦି ଆଗ୍ଡ଼ିରି ନାଣ୍ତିଙ୍ଗ୍ ଉଟ୍ଲା ନାଡ଼ାକାଦେ ସିକାଟି ମାନାପ୍ ମାନ୍ବୁନେ ମଗ୍ଦଲିନି ମରିୟମ୍ ମୁସ୍ତିଗୁଟା ଲାକ୍ତୁ ୱାତାଦ ଆବେଣୁକୁ କାଲୁ ଗୁସାକିତିମାରିକା ସୁଡ଼ୁତାତ୍ । 2ଆଦେଙ୍ଗ୍ ମରିୟମ୍ ଉର୍କୁସି ସୋଲ୍ସି ସିମୋନ ପିତର୍ ମାରି ଜିସୁ ଆମାୱାନିଙ୍ଗ୍ ଜିବନ୍ନୋଜି ମାର୍ହାନ୍, ଆୟା ଆଇ ସିସୁରି ଲାକ୍ତୁ ୱାତାତ୍, ମାରି ୱାରିଙ୍ଗ୍ ଇର୍ହାର୍, “ୱାର୍ ମୁସ୍ତିଗୁଟାଦାନ୍ ପ୍ରବୁଙ୍ଗ୍ ଅତାମାନାର୍, ମାରି ୱାନିଙ୍ଗ୍ ଏମେମାନୁ ଇଟ୍ତାମାନାର୍, ଆକା ମାପ୍ ନେସ୍ଏଜିନାପ୍ ।”
3ଆବେଟ୍ ପିତର୍ ମାରି ଆୟା ଆଇ ସିସୁ ମୁସ୍ତିଗୁଟା ଲାକ୍ତୁ ସନ୍ଡ଼୍ରେଙ୍ଗ୍ ଇଜି ସୋତାର୍ । 4ୱାର୍ ରିଏର୍ ଅର୍ସେ ଉର୍କୁତେଙ୍ଗ୍ ଆସ୍ତାର୍, ମାରି ଆୟା ଆଇ ସିସୁ ପିତରତିଙ୍ଗ୍ ୱେନ୍କା ଡ଼ିସ୍ସି ଆଗ୍ଡ଼ି ମୁସ୍ତିବାଡି ଲାକ୍ତୁ ଇତାନ୍, 5ମାରି, ପାଡ଼୍ଗିତାନ୍ନୋ ଲୋଇ ବେସ୍ତାନ୍ ପାତଲ୍ତି ପାସିଏଙ୍ଗ୍ୱିଜୁ ଆର୍ତିମାରିକା ସୁଡ଼ୁତାନ୍, ଆତିଙ୍ଗ୍ବା ୱାନ୍ ଲୋଇ ଡ଼ୁଗୁଏତାନ୍ । 6ତାନେୱେନ୍କା ସିମୋନ ପିତର୍ ବା ୱାନି ୱେନ୍କା ୱେନ୍କା ୱାଜି ଇତାର୍ ମାରି ମୁସ୍ତିଗୁଟା ଲୋଇ ଡ଼ୁଗିତାନ୍ନୋ ସୁଡ଼ୁତାନ୍ ଜେ, ପାତଲ୍ତି ପାସ୍ଇଏଙ୍ଗ୍ୱିଜୁ ମାନେ, 7ମାରି ଜିସୁଦି ତାଲାଦୁ ଆମା ପାଗା ତର୍ତା ମାର୍ହାର୍, ଆୟା ପାତଲ୍ତି ୱାତିଙ୍ଗାଁ ୱାଲେ ମାନ୍ଏଣ୍ଗା ୱେର୍ଏ ଉନ୍ଡ୍ରି ବାଡିଦୁ ତେର୍ବିତା ମାନ୍ତା । 8ନାସ୍ତିୱାଲେ ଆମା ଆଇ ସିସୁ ଆଗ୍ଡ଼ି ମୁସ୍ତିବାଡି ଲାକ୍ତୁ ୱାତାମାର୍ହାନ୍, ୱାନ୍ ବା ଲୋଇ ଡ଼ୁଗିତାନ୍ନୋ ସୁଡ଼ୁତାନ୍ ମାରି ବିସ୍ବାସ୍ କିତାନ୍; 9ଇରିଙ୍ଗ୍ ସାତିୱାରି ମାଣ୍କୁ ଜିସୁଙ୍ଗୁଁ ଜେ ନିଙ୍ଗିଁନିକା ମାନାତ୍, ଦାର୍ମୁସାସ୍ତ୍ରଦି ଇୟା ବାକ୍ୟ ୱାର୍ ଆୟା ସାନ୍ଦି ବୁଜାଏତା ମାର୍ହାର୍ । 10ୱେନ୍କା ସିସୁର୍ ମାରିଡ଼େସି ୱାରି ଇଲ୍ତୁ ସୋର୍ହାର୍ ।
ମଗ୍ଦଲିନି ମରିୟମତିଙ୍ଗ୍ ଜିସୁ ତର୍ୟାଆତାନ୍
(ମାତିଉ ୨୮:୯-୧୦; ମାର୍କ ୧୬:୯-୧୧)
11ମରିୟମ୍ ଆଡ଼୍ବାଜି ଆଡ଼୍ବାଜି ଆତେରେ ମୁସ୍ତିବାଡି ଲାକ୍ତୁ ନିର୍ଆ ତେବାତାତ୍; ମାରି, ଆଡ଼୍ବାଜି ଆଡ଼୍ବାଜି ୱାଦ୍ ପାଡ଼୍ଗିଜି ମୁସ୍ତିଗୁଟା ଲୋଇ ବେସ୍ତାତ୍, 12ମାରି ଜିସୁଦି ମେନ୍ଧଲ୍ ଏମେ ବାଡିଦୁ ଇଟ୍ତାମାର୍ହାର୍, ଆବେଣି ତାଲା ଲାକ୍ତୁ ଅରେନ୍ ମାରି ପାଦାମ୍କା ଲାକ୍ତୁ ମାରି ଅରେନ୍, ଇୟାୱାଜା ରିଏରିଙ୍ଗ୍ ଅଡିନିଆଙ୍ଗିଁ ଆରାତି ଦୁତ୍କାଙ୍ଗ୍ ବାସ୍ତିମାରିକା ସୁଡ଼ୁତାତ୍ । 13ୱାର୍ ମରିୟମତିଙ୍ଗ୍ ଇର୍ହାର୍, “ଇୟା, ନିନୁ ଏନ୍ଦା ଆଡ଼୍ବାଜିନି ?”
ୱାଦ୍ ୱାରିଙ୍ଗ୍ ଇର୍ହାତ୍, “ଏର୍ ନା ପ୍ରବୁଙ୍ଗୁଁ ମେନ୍ଧଲ୍ ଅତାମାନାର୍, ମାରି ୱାନିଙ୍ଗ୍ ଏମେ ବାଡିଦୁ ଇଟ୍ତାମାନାର୍, ଆକା ନାନ୍ ନେସ୍ଏଜିନା ।”
14ୱାଦ୍ ଇକା ଇନ୍ଜି ୱେନ୍କା ମାର୍ଜିବେସ୍ସି ଜିସୁଙ୍ଗୁଁ ନିର୍ଇମାରିକା ସୁଡ଼ୁତାତ୍, ମାତର୍ ୱାନ୍ ଜେ ଜିସୁ, ଆକା ନେସ୍ଏତାତ୍ । 15ଜିସୁ ତାନିଙ୍ଗ୍ ଇର୍ହାନ୍, “ନିନୁ ଏନ୍ଦା ଆଡ଼୍ବାଜିନି ? ଏଙ୍ଗ୍ ପୟ୍ଜିନି ?” ୱାଦ୍ ୱାନିଙ୍ଗ୍ ଡଡିଦୁ ପାଣିକିନିକାନ୍ ଇଜି ଅଡ଼୍ବିଜି ଇର୍ହାତ୍, ଆଜ୍ଞା, “ନିନ୍ ଜଦି ୱାନିଙ୍ଗ୍ ଅତିମାନି, ଆର୍ତିଙ୍ଗ୍ ୱାନିଙ୍ଗ୍ ଏମେ ବାଡିଦୁ ଇଟ୍ତିମାନି, ନାଙ୍ଗିଁ ଇନ୍ଆଁ, ମାରି ନାନ୍ ୱାନିଙ୍ଗ୍ ଅନା ।”
16ଜିସୁ ତାନିଙ୍ଗ୍ ଇର୍ହାନ୍, “ମରିୟମ୍ ।”
ୱାଦ୍ ମାର୍ଜିବେସ୍ସି ଏବ୍ରି ବାସାଦାନ୍ ୱାନିଙ୍ଗ୍ ଇର୍ହାତ୍, “ରାବ୍ବୁନି,” ଅର୍ତାତ୍, “ଏ ଗୁରୁ ।”
17ଜିସୁ ତାନିଙ୍ଗ୍ ଇର୍ହାନ୍, “ନାଙ୍ଗିଁ ଆସ୍ସୋ ଇଡିମା, ଇରିଙ୍ଗ୍ ନାନ୍ ଇୟାସାନ୍ଦି ବୁବାଦି ଲାକ୍ତୁ ସୋଲ୍ଏନେ; ମାତର୍ ନା ତଡ଼ାନ୍କା ମାନୁ ସୋଲ୍ସ ଇନ୍ଆଁ, ନାନ୍ ନା ବୁବା ମାରି ୱାରି ବୁବା, ନା ମାପୁରୁ ମାରି ୱାରି ମାପୁରୁ ଲାକ୍ତୁ ସୋଲ୍ସିନା ।”
18ମଗ୍ଦଲିନି ମରିୟମ୍ ସଲ୍ସି, ନାନ୍ ପ୍ରବୁଙ୍ଗ୍ ସୁଡ଼ୁତାମାନା, ମାରି ୱାନ୍ ନାଙ୍ଗିଁ ଇୟାୱିଜୁ ୱେର୍ତାମାନାନ୍ ଇଜି ସିସୁରିଙ୍ଗ୍ କାବୁର୍ ସିତାତ୍ ।
ଜିସୁ ୱାନି ସିସୁରିଙ୍ଗ୍ ତର୍ୟାଆତାନ୍
(ମାତିଉ ୨୮:୧୬-୨୦; ମାର୍କ ୧୬:୧୪-୧୮; ଲୁକ ୨୪:୩୬-୪୯)
19ଆୟାନାଣ୍ତିଙ୍ଗ୍ ୱାରାଦି ଆଗ୍ଡ଼ିରି ନାଣ୍ତିଙ୍ଗ୍ ମିଲ୍ମିଲିକା ବେଡ଼ାଦୁ ଏସ୍ତିୱାଲେ ସିସୁର୍ ଏମେ ଇଲ୍ତୁ ମାର୍ହାର୍, ଆବେଣି ସେର୍ଲେଙ୍ଗ୍ୱିଜୁ ଜିହୁଦିରି ତିଏଲ୍ତିଙ୍ଗ୍ କେର୍ତା ମାର୍ହାର୍, ନାସ୍ତିୱାଲେ ଜିସୁ ୱାଜି ନେଗି ନାଡ଼୍ମି ନିର୍ଆନ୍ନୋ ୱାରିଙ୍ଗ୍ ଇର୍ହାନ୍, “ମିଙ୍ଗିଁ ସାନ୍ତି ଆପିତ୍ ।” 20ମାରି, ଇକା ଇନ୍ଜି ଜିସୁ ୱାରିଙ୍ଗ୍ ନିଜେଦି କିକୁ ମାରି ପାଡ଼୍କା ତର୍ତାନ୍ । ଆବେଟ୍ ସିସୁର୍ ପ୍ରବୁଙ୍ଗ୍ ସୁଡ଼ୁଜି ୱେଡ଼ିକା ଆତାର୍ । 21ଜିସୁ ୱାରିଙ୍ଗ୍ ମାରିଡ଼େସି ଇର୍ହାନ୍, “ମିଙ୍ଗିଁ ସାନ୍ତି ଆପିତ୍; ବୁବା ଏଣ୍ତେସ୍ୱାଜା ନାଙ୍ଗିଁ ପୋକ୍ତାତାମାନାନ୍, ନାନ୍ ବା ଆୟାୱାଜା ମିଙ୍ଗିଁ ପୋକ୍ତାତାମାନା ।” 22ୱାନ୍ ଇକା ଇନ୍ଜି ୱାରି ମୁସ୍କୁ ନେଜ୍ଦେଙ୍ଗ୍ ଡ଼ିସ୍ତାନ୍ନୋ ୱାରିଙ୍ଗ୍ ଇର୍ହାନ୍, “ପବିତ୍ରଆତ୍ମାଦିଙ୍ଗ୍ ମାନାଦୁ । 23#ମାତିଉ ୧୬:୧୯; ୧୮:୧୮.ମିର୍ ଜଦି ଏ ପାପ୍ କେମା କିନିଦେର୍, ୱାନି ପାପ୍ କେମା ଆନାତ୍, ମାରି, ଜଦି ଏ ପାପ୍ କେମା କିଇଦେର୍, ୱାନି ପାପ୍ କେମା ଆଏତ୍ ।”
ଜିସୁ ନି ତୋମା
24ମାତର୍ ଜିସୁ ଏସ୍ତିୱାଲେ ୱାତାମାର୍ହାନ୍, ନାସ୍ତିୱାଲେ ବାରଲୋକା ଲୋଇରାନ୍ ତୋମା ଦର୍ତି ଅରେନ୍, ଆମାୱାନିଙ୍ଗ୍ “ଦିଦୁମ” ଇନାର୍, ୱାନ୍ ୱାରି ୱାଲେ ସିଲେତାନ୍ । 25ମାରି, ଆଇ ସିସୁର୍ ୱାନିଙ୍ଗ୍ ଇର୍ହାର୍, “ମାପ୍ ପ୍ରବୁଙ୍ଗ୍ ସୁଡ଼ୁତାମାନାପ୍ ।”
ମାତର୍ ତୋମା ୱାରିଙ୍ଗ୍ ଇର୍ହାନ୍, “ୱାନି କିୟୁଦୁ କୁଟିଙ୍ଗ୍ଣି ସିନେଙ୍ଗ୍ ସୁଡ଼ୁଇତିଙ୍ଗ୍ ମାରି ଆୟାୱିଜୁ ବାଡିଦୁ ନା ଡ଼ାସ୍କେଙ୍ଗ୍ ସିଇତିଙ୍ଗ୍ ମାରି ୱାନି ପାଡ଼୍କାଦୁ ନା କିୟୁ ଇଡ୍ଇତିଙ୍ଗ୍ ନାନ୍ ମୁଡ଼ୁକେ ବିସ୍ବାସ୍ କିଏ ।”
26ଆଟ୍ଦିନ୍ ୱେନ୍କା ୱାନି ସିସୁର୍ ମାରିଡ଼େସି ଲୋଇ ମାର୍ହାର୍ ମାରି ତୋମା ୱାରି ୱାଲେ ମାର୍ହାନ୍ । ସେର୍ଲେଙ୍ଗ୍ ୱିଜୁ କେର୍ତିମାର୍ଇ ବେଡ଼ାଦୁ ଜିସୁ ୱାଜି ନେଗି ନାଡ଼୍ମି ନିର୍ଆନ୍ନୋ ଇର୍ହାନ୍, “ମିଙ୍ଗିଁ ସାନ୍ତି ଆପିତ୍ ।” 27ୱେନ୍କା ୱାନ୍ ତୋମାଦିଙ୍ଗ୍ ଇର୍ହାନ୍, “ଇବେନୁ ନି ଡ଼ାସ୍କେଙ୍ଗ୍ ମୁଟ୍ଆ ନା କିୟୁଦିଙ୍ଗ୍ ସୁଡ଼ୁଆ ମାରି ନା ପାଡ଼୍କାଦୁ ନି କିୟୁ ମୁଟ୍ଆ; ଅବିସ୍ବାସ୍ କିଏଣ୍ଗା ବିସ୍ବାସ୍ କିଆ ।”
28ତୋମା ୱାନିଙ୍ଗ୍ ଇର୍ହାନ୍, “ନା ପ୍ରବୁ, ନା ମାପୁରୁ ।”
29ଜିସୁ ୱାନିଙ୍ଗ୍ ଇର୍ହାନ୍, “ନିନ୍ ଇନିକା ନାଙ୍ଗିଁ ସୁଡ଼ୁତିଙ୍ଗ୍ ବିସ୍ବାସ୍ କିତିମାନି ? ମାତର୍ ଏର୍ ସୁଡ଼ୁଏଣ୍ଗା ବିସ୍ବାସ୍ କିତାମାନାର୍, ୱାର୍ ଦନ୍ୟ ।”
ଇୟା ବଇଦି ଉଦେସ୍
30ଜିସୁ ସିସୁରି ଆଗ୍ଡ଼ି ଇୟାୱାଜା ଏସ ମାରି ଇନିଇନି ଜାତିଦି କାବାଆନି ପାଣି କିତାନ୍, ଆୟାୱିଜୁ ଇୟା ବଇଦୁ ରାସାଏତ୍; 31ମାତର୍ ମିର୍ ଏଣ୍ତେସ୍ ବିସ୍ବାସ୍ କିଦୁ ଜେ, ଜିସୁ ମାପୁରୁଦି ମାରିନ୍ ମସିହ, ମାରି ବିସ୍ବାସ୍ କିଜ ଏଣ୍ତେସ୍ ମିର୍ ୱାନି ଦର୍ତାନ୍ ଜିବନ୍ ପୟ୍ଦୁ, ଇୟାଉଣ୍ତିଙ୍ଗ୍ ଇୟାୱିଜୁ ରସାତାମାନାତ୍ ।
Currently Selected:
ଜୋହନ 20: NTKoo20
Highlight
Share
Copy
Want to have your highlights saved across all your devices? Sign up or sign in
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020
