मरकुस 4
4
बींजा बोऊसावाळा अन्द उदाहरण
(मत्ती १३:१-९; लूका ८:४-८)
1 #
लूका ५:१-३
यीशु बाक झील इन किनारा मा उपदेश कोळली कुरतुन: अदिक हिंग धोळ्द भीळ आऊन हात्ती जमा आगेत कि आव झील इन ऊंद ड्वांगा मा येरकु कुरतोदुन अदिक सप्पा भीळ भूमी मा झील इन किनारा मा नीदुरकु ईत्त. 2अदिक यीशु आंदरी उदाहरणगोळ दा हापाळ सा मात कल्सली कुरतुन, अदिक तान उपदेश दा आंदुर से अंदुन.
3“केळी! ऊंद घन ऊंद मंळसा ईरोन जो बींजा बोऊसोर साठी होटीदुन. 4अदिक आव केई दा बींजा भिटुन आटोटी येनारा बींजा हादी मा बिद्दव, अदिक पक्षीगोळ बंदकु अवरी तिन कोंडोव. 5अदिक येनारा बींजा कल्ल इन जागा मा बिद्दव यल अदरी यक्कुल मुण्ण सकिदील. अदिक गहरा मुण्ण ईला सिकदुर देल अव राटनेरी अंकुर हुळदव. 6बाक याग सुर्य होळ्त; रा स्याणेव मार्रगोळी होताक बुळ्त; यतिकी जळीगोळ जादा गयरा ईला आगीदव, अदिक मार्रगोळ जल्दी अच वंळ्गेदव. 7अदिक थ्वाळासा बींजा मुळ्ल इन झुनकुळ दा बिद्दव, अदिक धोड्डेव आगकु बेळुकु बींजा अक वत्त बुट्टव अदिक आ बींजागोळी काय हत सकिदील. 8लेकीन थ्वाळासा बींजा वळ्लीद जागा मा बिद्दव, अदिक अव बेळदव अदिक बेळुकु अनाज पैदा माळदव; यातोवारा तीस गुणा, यातोवारा साठ गुणा अदिक यातोवारा सौ गुणा फसल तंदव.”
9आग यीशु अंदुन, “यार हात्ती केळोर साटी किव आव, आव केळ कोमुल.”
उदाहरणगोळ्द कारण
(मत्ती १३:१०-१७; लूका ८:९,१०)
10याग यीशु आबना ईरोन, रा याता लॉकुर आऊन उदाहरण केळीदुर, आंदुर दा टु येनारा लॉकुर हन्नेळ चेलागोळ सांगुळ आऊन हात्ती बंदुर अदिक आऊक उदाहरण इन मतलब येन आद. 11यीशु आंदुर से अंदुन, नीमी परमेश्वर उन राज्य अन्द भेदगोळ्द समझ कोटकु आग्याद, लेकीन व्हार्या नोर लॉकुर साटी, सप्पा मातगोळ उदाहरणगोळ दा अंदकु आग्याद:
12यतिकी आंदुर नोळुल अदिक
नोळतेला अच ईरूल, लेकीन आंदरी येनु सम्सबाळुल,
केळुल अदिक केळतेला अच ईरूल
लेकीन येनु सम्सबाळुल.
हिंग आगबाळुल कि आंदुर मन परमेश्वर उन दी तिर्गुल
अदिक आंदरी माफ माळकु आगुल.
बींजा बोऊसावाळा उदाहरण इन व्याख्या
(मत्ती १३:१८-२३; लूका ८:११-१५)
13बाक यीशु आंदुर से अंदुन, येन नीव ईद उदाहरण समसालीर? रा बाक दुसरा यातोदारा उदाहरणगोळी ह्यांग समसीर? 14केईवाळा जो बोऊसतान, अद परमेश्वर उन वचन हुन. 15येनारा लॉकुर हादी माकळोर बिदकु बींजा अन्द घाई आर जो परमेश्वर उन वचनगोळी केळतार. रा शैतान तुरन्त बंदकु वचन रूपी बींजा जो आंदुर्दा बोऊस्कु आग्याद नेगुकु वोयतान. 16दुसरा लॉकुर बींजागोळ घाई ईरतार जो कलवाळा जागा मा बीळताव. ह्यांग आंदुर बातणी केळतार, आंदुर इदरी खुशी देल ग्रहण माळ कोमतार. 17लेकीन तान बुळ्क जळ ईला ईटदुर कारण आंदुर थ्वाळासा अच दिनगोळ साटी ईरतार; इदुर्द बाद्दा याग वचन इन कारण आंदुर मा क्लेश या उपद्रव आगताव, रा आंदुर तुरन्त ठोकर तिनतार. 18दुसरा लॉकुर मुळ्लवाला झुनकुळ दा बोऊस्कु बींजा अन घाई आर. इंदुर वचन केळावाळेर उर. 19अदिक दुनिया अन चिन्ता, धन इन ध्वाका, अदिक च्याच वस्तुगोळ्द लोभ आंदुर्दा तुमकु वचनगोळी वत्त बुळतद. अदिक अद निष्फल ईतोगतार. 20लेकीन यारारा लॉकुर वळ्लीद जागा अन्द घाई आर, जो वचन केळकु ग्रहण माळतार अदिक वळ्लीद फसल तरतार, यारारा तीस गुणा, यारारा साठ गुणा, अदिक यारारा सौ गुणा.
दिंग्या अन्द उदाहरण
(लूका ८:१६-१८)
21 #
मत्ती ५:१५; लूका ११:३३ अदिक यीशु आंदुर से अंदुन; येन दिंग्या अक इदुर्दा साटी तरतार कि बर्तन या व्हर्स इन ल्यालमा ईटुल? येन अदरी दीवट#४:२१ दिंग्या ईटोद जागा मा ईट सकालुर? 22#मत्ती १०:२६; लूका १२:२जो येनारा भी होचकु आद अदरी व्हार्या तनकु आदीत, अदिक जो येनारा भी कवर माळकु आग्याद, अदरी उजागर माळकु आदीत. 23अगर यारोवारा केळव किव आव, रा आव केळ कोमुल.
24 #
मत्ती ७:२; लूका ६:३८ बाक यीशु आंदुर से अंदुन, “जो नीव केळतीर अदुर मा ध्यान कोळी. याता नाप देल नीव दुसरा अक आळुतीर अदा नियम देल नीमी भी आळुकु आदीत, अदिक नीम साटी अदुर्दा यक्कुल जोळ्सकु आदीत. 25#मत्ती १३:१२; २५:२९; लूका १९:२६यतिकी यार हात्ती आद, आऊक मात्त यक्कुल कोटकु आदीत; अदिक यार हात्ती हैलेच, आऊन से अद भी जो आऊन हात्ती आद, ताकोमकु आदीत.”
कोम होळोद बींजा अन्द उदाहरण
26बाक यीशु अंदुन, “परमेश्वर उन राज्य हिंग आद, जसा यावारा मंळसा तान केई इन भूमी दा बींजा भिळतान, 27अदिक आव इळ्लकी मिंगदुन अदिक व्हातर्या येद्दुन अदिक अद बींजा अंकुरीत आगकु हिंग बेळुत, कि आव अरू सकिदील कि ईद ह्यांग आत. 28पृथ्वी तान ताना अनाज तरतद. पयले अंकुर, बाक लॉम्बा, अदिक आग अदुर बाद्दा लॉम्बा दा तयार बींजा. 29लेकीन याग बींजा हण्ण आगेगतद, आग आव केईवाळा तुरन्त कुळगुल देल कडुली हततान, यतिकी फसल इन कटाई होट्ट बंदाद.”
राई इन दाना अन्द उदाहरण
(मत्ती १३:३१-३२,३४; लूका १३:१८-१९)
30बाक यीशु केळदुन, “नाव परमेश्वर उन राज्य ह्यांग आद इदुर उपमा यार देल कोट्टेव. अदिक याता उदाहरण देल आऊन वर्णन माळेव? 31आव राई इन दाना अन्द घाई आन याग पृथ्वी मा बोऊस्कु आगतद रा पृथ्वी इन सप्पा बींजागोळ से स्यांळ्द ईरतद. 32लेकीन याग बींजा बेळदोगतद, रा बेळुकु सप्पा मारगोळ से धोळ्द आगेगतद, अदिक अदुर्द हिंग धोळ्द डगालगोळ होळताव यल आकाश इन पक्षी अदुर्द सावली दा ग्वादा माळकु ईरताव.”
33यीशु आंदरी ईत्ता प्रकार ईनव हापाळ सा उदाहरण कोट-कोटकु आंदुर्द समझ इन अनुसार यक्कुल से यक्कुल समझ दा बरूल ई प्रकार देल वचन केळ्सतोगोन, 34अदिक बिना उदाहरण अंदकु यीशु लॉकुरी येनु ईला कल्सतोगोन. लेकीन आबना दा आव तान निजी चेलागोळी सप्पा मातगोळ्द मतलब हेळतोगोन.
यीशु आँधी इक शांत माळदुन
(मत्ती ८:२३-२७; लूका ८:२२-२५)
35अदा दिशी द्यावगा अक, यीशु तान चेलागोळ से अंदुन, “बरी, नाव झील इन आप्पाटी होगाता.” 36आंदुर भीळ इक बिट्टुर, याता ड्वांगा दा यीशु ईरोन अदा ड्वांगा मा चेलागोळ भी बंदुर अदिक यीशु उक तान सांगुळ झील इन आप्पाटी ओतुर; अदिक अल आऊन सांगुळ, मात हापाळ सा ड्वांगा भी ईरव. 37अचानक आग ऊंद भयानक आँधी बत्त, अदिक लयरगोळ ड्वांगा देल टकरूसली हत्त ईल ताका कि नीर ड्वांगा दा तुमली हत्त. 38अदिक यीशु ड्वांगा अन्द हिंदळोद भाग दा ऊसी मा ताल्ला ईटकु मिंगोन. अदिक आंदुर आऊक येब्सदुर अदिक अंदुर, “हे गुरु, येन नीनी चिन्ता हैलेच कि नाव मुळ्केतेव?”
39आग यीशु यदकु आँधी अक दनकुसदुन, अदिक लयरगोळ से अंदुन, “शांत आगेग, थाम्सेग!” अदिक आँधी थामसेत अदिक नाकु दी हापाळ सन्नाटा आगेत. 40अदिक यीशु तान चेलागोळ से अंदुन, “नीव येती अंजेतीर? येन नीमी ईगासताका विश्वास हैलेच?”
41अदिक चेलागोळ हापाळ अंजेदुर अदिक आपस दा अनली कुरतुर, “ईव मंळसा याव हुन ईल ताका कि आँधी अदिक लयरगोळ भी ईऊन आग्या मान्सताव?”
Currently Selected:
मरकुस 4: NTHaa20
Highlight
Share
Copy
Want to have your highlights saved across all your devices? Sign up or sign in
The New Testament in Holiya Language © The Word for the World International and Holiya Translation Samithi, Kudwa, Gondia, Maharashtra 2020
