लूका 24
24
यीशु उन पुनरूत्थान
(मत्ती २८:१-१०; मरकुस १६:१-८; यूहन्ना २०:१-१०)
1लेकीन हप्ता अन्द पयला दिशी हापाळ व्हातर्या का आंदुर आ सुगन्धित सामानगोळी जो आंदुर तयार माळीदुर, हुळकु कब्र मा बंदुर. 2आंदुर जो कल्ल कब्र अन्द दरवाजा मा झाक्सकु ईरोद अदरी सरकुसकु नोळदुर, 3पर याग आंदुर बुळ्क होदुर रा आंदरी प्रभु यीशु उन लाश कांळ्सीदील. 4याग आंदुर ई मात देल चकित आगोर रा नोळी, येढ्ढ मंळसा बरफ इन घाई बिळेव चमकदार झलकुस्त कपळा हाक्कु आंदुर हात्ती बंदकु निदुरदुर. 5याग आंदुर अंजेदुर अदिक पृथ्वी इन दी बाय बांग्सोर रा आ स्वर्गदूतगोळ आंदुर से अंदुर, “नीव जित्ता मंळसा अक सोत्तकु मंळसा दा येती ढुंढ़सेतीर? 6#मत्ती १६:२१; १७:२२,२३; २०:१८,१९; मरकुस ८:३१; ९:३१; १०:३३,३४; लूका ९:२२; १८:३१-३३आव ईल हैलेच, लेकीन जित्ता आग्यान. याद माळी कि आव गलील दा ईतकु नीम से येन अंदिदुन, 7‘जरूरी आद कि ना मंळसा अन पार पापीगोळ्द कय दा हुळसुस्कु आगाईन, अदिक क्रूस मा येर्सकु आगाईन, अदिक तिसरा दिशी मात्त जित्ता आगाईन.’”
8आग यीशु जो मातगोळ आंदरी अंदिदुन अव मातगोळ आंदरी याद बंदव, 9अदिक कब्र टु बंदकु आंदुर आ हनुन मुंदरी, अदिक अन्य सप्पा मुंदरी, इव मातगोळी अनकु केळ्सदुर. 10आंदुर प्रेरितगोळ से ईव मातगोळी अंदुर आंदुर मरियम मगदलीनी अदिक योअन्ना अदिक याकूब उन मोय मरियम अदिक आंदुर सांगुळ इन दुसरा आर्तेर भी ईरोर. 11लेकीन आंदुर मातगोळ आंदरी फालतु हतदव, अदिक आंदुर आंदुर्द विश्वास माळीदील. 12आग पतरस यदकु कब्र दी ओळतेला होदुन, अदिक बांगकु सिर्फ कफन इन कपळा बिदकु नोळदुन, अदिक जो आगीत अदुर देल अचम्भा माळतेला तान मान्नी होटोदुन.
इम्माऊस ऊर इन हादी मा यीशु तान चेलागोळ सांगुळ
(मरकुस १६:१२-१३)
13अदा दिशी आंदुर दा टु येढ्ढ मुंदुर इम्माऊस हेसुर इन ऊंद ऊर इक होगोर, जो यरूशलेम टु येनारा येळ कोस इन दुरी मा ईरोद. 14आंदुर इव सप्पा मातगोळ मा जो आगीदव, आपस दा मातचीत माळतेला होगोर, 15अदिक याग आंदुर आपस दा मातचीत अदिक जाँच माळोर, रा यीशु खुद हात्ती बंदकु आंदुर सांगुळ आगेदुन. 16आंदुर आऊक नोळदुर लेकीन अरू सकिदील. 17यीशु आंदुर से केळदुन, “ईव येन मातगोळ आव, जो नीव नळुत नळुत आपस दा माळतीर?”
आंदुर उदास सा निदुरकु ईतोदुर. 18ईद केळकु आंदुर दा टु क्लियोपास हेसुर ईनव ऊंद मंळसा अंदुन, “येन नी यरूशलेम दा आबना परदेशी आय, जो जान्सालुन कि ई दिनगोळ दा अदुर्दा येन येन आग्याद?”
19आव आंदुर से केळदुन, “यातव मातगोळ?”
आंदुर आऊन से अंदुर, “यीशु नासरी इन बारा दा जो परमेश्वर अदिक सप्पा लॉकुर हात्ती क्याल्सा अदिक वचन दा सामर्थी भविष्यवक्ता ईरोन, 20अदिक प्रधान याजकगोळ अदिक नाम सरदारगोळ आऊक हुळसुस बुटुर कि आऊन मा मृत्यु ऊंद आग्या कोटकु आगुल; अदिक आऊक क्रूस मा येर्सुसदुर. 21लेकीन नामी आशा ईरोद कि ईवा इस्त्राएल द्याश इक छुटकारा कोट्टान. इव सब मातगोळ्द अलावा ईद घटना अक आत तिसरा दिन हुन, 22अदिक नाम दा टु हापाळ आर्तेर भी नामी आश्चर्य दा हाक बुटार, जो हुंजकुका अच कब्र मा होगीदुर; 23अदिक याग यीशु उन लाश नोळीदील रा ईद अनतेला बंदुर कि नाव स्वर्गदूतगोळ्द दर्शन माळदेव, यार अंदुर कि आव जित्ता आन. 24आग नाम साथीगोळ दा टु हापाळ मुंदुर कब्र मा होदुर, अदिक ह्यांग आर्तेर अंदीदुर हांग अच नोळदुर; लेकीन आऊक नोळीदील.”
25आग यीशु आंदुर से अंदुन, “हे निर्बुद्धीगोळा, अदिक भविष्यवक्तागोळ्द सब मातगोळ मा विश्वास माळदुर दा याट धीर आईर! 26येन जरूरी ईला ईरोद कि मसीह ईद दुख नेगुकु तान महिमा दा प्रवेश माळुल?” 27आग आव मूसा से अदिक सप्पा भविष्यवक्तागोळ से सुरूवात माळकु सप्पा पवित्रशास्त्र दा टु तान बारा दा लिख्सदव मातगोळ्द अर्थ, आंदरी समझुस बुट्टुन.
28इटुर दा आंदुर आ ऊर इन हात्ती पोहचुसदुर यल आंदुर होगोर, अदिक आऊन ढंग देल हिंग समझ दा बरोद कि आव मुंद आगोद चाहासतान. 29लेकीन आंदुर ईद अनकु आऊक विनती माळकु रोक्सदुर, “नाम सांगुळ ईर, यतिकी द्याव मुळ्कत बरेत्याद अदिक हागुल हापाळ ढलुसीग्याद.” आग आव आंदुर सांगुळ ईरोर साठी बुळ्क होदुन. 30याग आव आंदुर सांगुळ ऊमली कुरतुन, रा आव रोट्टी हुळकु परमेश्वर उन धन्यवाद माळदुन अदिक अदरी मुरूकु आंदरी कोळली कुरतुन. 31आग आंदुर्द कण्णगोळ तेर्दोदव; अदिक आंदुर आऊक अर्त कोंडुर, अदिक आव आंदुर कण्णगोळ देल पच्चेदुन. 32आंदुर आपस दा अंदुर, “याग आव हादी मा नाम से मातगोळी माळतोगोन अदिक पवित्रशास्त्र अन्द अर्थ नामी समझुस तोगोन, रा येन नाम मन दा उत्तेजना पैदा आगीदील?”
33आंदुर अदा समय यदकु मात्त यरूशलेम इक होटोदुर, अदिक आ हनुन चेलागोळी अदिक आंदुर संगीगोळी जमा नोळदुर. 34आंदुर अनतोगोर, “प्रभु खराखुरा जित्ता आग्यान, अदिक शमौन उक कांळस्यान.”
35आग आंदुर हादी इन मातगोळी आंदरी हेळ बुटुर अदिक ईद भी कि येढ्ढु मुंदुर यीशु उक रोट्टी मुरा होती ह्यांग अरतुर.
यीशु चेलागोळी कांळ्सदुन
(मत्ती २८:१६-२०; मरकुस १६:१४-१८; यूहन्ना २०:१९-२३; प्रेरितगोळ १:६-८)
36आंदुर ई मातगोळी अनतेला अच ईरोर कि आव खुद अच आंदुर न्याड्या दा निदुरदुन, अदिक आंदुर से अंदुन, “नीमी शांती सिकुल.”
37लेकीन आंदुर घबरूसेदुर अदिक अंजेदुर, अदिक समसेदुर कि नाव यातोदारा भूत इक नोळीतेव. 38आव आंदुर से अंदुन, “येती घबरूसेतीर? अदिक नीम मन दा येती संदेह येळताव? 39नान कय अदिक नान कालगोळी नोळी कि ना आवा हुईन. नानी मुटकु नोळी, यतिकी भूत इन येलु दा मास ईराल ह्यांग नान दा नोळतीर.”
40ईद अंदकु यीशु आंदरी तान कय काल तोर्सदुन. 41आंदरी खुशी इन मारा देल विश्वास ईला आगोद, अदिक आंदुर आश्चर्य माळतोगोर, रा आव आंदुर से केळदुन, “येन ईल नीम हात्ती येनारा ऊम्मोद आद?” 42आंदुर आऊक सुळ्द मेन इन तुकळा कोट्टुर. 43आव हुडुकु आंदुर मुंद तिंदुन.
44बाक आव आंदुर से अंदुन, “ईव नानव अव मातगोळ हु, जो ना नीम सांगुळ ईरतेला नीम से अंदिदीन कि जरूरी आद कि यास मातगोळ मूसा अन व्यवस्था अदिक भविष्यवक्तागोळ अदिक भजनगोळ किताबगोळ दा नान बारा दा लिख्सकु आव, सप्पा पुरा आगुल.”
45आग यीशु पवित्रशास्त्र जानसोर साटी आंदुर समझ खोल्सदुन, 46अदिक यीशु अंदुन, “ईद लिख्सकु आद कि मसीह दुख नेगदान, अदिक तिसरा दिशी सोत्तुर दा टु जित्ता आदान, 47अदिक यरूशलेम टु हुळकु सप्पा जातीगोळ्द लॉकुर दा आंदुर हिंग प्रचार माळली कुरतुर कि आंदुर तान पाप माळोद बंद माळुल अदिक परमेश्वर आंदरी माफ माळुल. 48नीव ई सप्पा मातगोळ्द गवाह आईर. 49#प्रेरितगोळ १:४अदिक नोळी, जो ईनाम नान आप्प नानी कोळोद वादा माळीदुन, ना अदरी नीम मा ईळसाईन अदिक यागासताका म्याकुच स्वर्ग टु सामर्थ्य सिकाल, आगासताका नीव ईदा नगर दा रूक्सकु ईरी.”
यीशु उन स्वर्गारोहण
(मरकुस १६:१९,२०; प्रेरितगोळ १:९-११)
50 #
प्रेरितगोळ १:९-११
आग यीशु आंदरी बैतनिय्याह ताका नगर इन व्हार्या ओतुन, अदिक तान कय नेगुकु आंदरी आशीष कोट्टुन; 51अदिक आंदरी आशीष कोळतेला आव आंदुर से अलग आगेदुन अदिक स्वर्ग मा नेगुकु आदुन. 52आग आंदुर आऊक दण्डवत माळकु बळा खुशी देल यरूशलेम इक मात्त वापस बंदुर; 53अदिक आंदुर लगातार मंदिर दा उपस्थित आगकु परमेश्वर उन धन्यवाद माळतोगोर.
Currently Selected:
लूका 24: NTHaa20
Highlight
Share
Copy
Want to have your highlights saved across all your devices? Sign up or sign in
The New Testament in Holiya Language © The Word for the World International and Holiya Translation Samithi, Kudwa, Gondia, Maharashtra 2020
