यूहन्ना 9
9
जनम इन कुढ्ढ उक कण्ण कोळोद
1होगाहोती यीशु ऊंद मंळसा अक नोळदुन जो जनम टु कुढ्ढ ईरोन. 2आऊन चेलागोळ आऊन से केळदुर, “हे गुरु, याव पाप माळीदुन कि ईव कुढ्ढ पैदा आदुन, ई मंळसा या ईऊन मोय या ईऊन आप्प?” 3यीशु उत्तर कोट्टुन, “ना रा ईव पाप माळीदुन, ना ईऊन मोय ना आप्प; लेकीन ईद इदुरसाटी आत कि परमेश्वर उन क्याल्सा आऊन मा प्रगट आगुल. 4याव नानी कळ्यान, नामी आऊन क्याल्सा हागुल ईरतेला अच माळोद जरूरी आद; अद ईळ्लक बरोद आद यदुर्दा याऊ क्याल्सा माळ सकतीदिल. 5#मत्ती ५:१४; यूहन्ना ८:१२यागासताका ना दुनिया दा आईन, आगासताका दुनिया अन ज्योति आईन.” 6ईद अनकु आव जागा मा ऊगुळदुन, अदिक आ ऊगळा देल मुण्ण इक काल्सदुन, अदिक अद मुण्ण आ कुढ्ढ उन कण्णगोळ मा हचकु 7#९:७ शीलोह अन मतलब “कळुकु आगोद” हुन.आऊन से अंदुन, “होग, शीलोह अन कुण्ड दा तोळकोम” आव होगकु तोळदुन, अदिक नोळतेला वापस बंदुन. 8आग आऊन बाजुवाळेर अदिक यार पयले आऊक भीख बेळतेला नोळीदुर, अनली कुरतुर, “येन ईव आवा आल्लच, जो कुर्तकु भीख बेळतोगोन?” 9येनारा लॉकुर अंदुर, “ईव आवा हुन,” दुसरागोळ अंदुर, “ईला, लेकीन आऊन घाई आन.” आव अंदुन, “ना आवा हुईन.” 10आग आंदुर आऊन से केळली कुरतुर, “नीन कण्णगोळ ह्यांग खुलसेदव?” 11आव उत्तर कोट्टुन, “यीशु हेसुर इन ऊंद मंळसा मुण्ण काल्सदुन, अदिक नान कण्णगोळ मा हचकु नान से अंदुन, ‘शीलोह दा होगकु तोळकोम,’ इदुरसाटी ना होदीन अदिक तोळदिन अदिक नोळली कुरतीन.” 12आंदुर आऊन से केळदुर, “आव यल आन?” आव अंदुन, “ना जान्सालीन.”
फरीसीगोळ द्वारा चंगाई इन जाँच पळताल
13लॉकुर आऊक जो पयले कुढ्ढ ईरोन फरीसीगोळ हात्ती ओतुर. 14याता दिशी यीशु मुण्ण काल्सकु आऊन कण्णगोळी तेरदीदुन, अद आराम इन दिन ईरोद. 15बाक फरीसीगोळ भी आऊन से केळदुर कि आऊन कण्णगोळ याता रीति देल खुलसेदव. आव आंदुर से अंदुन, “आव नान कण्णगोळ मा मुण्ण हचदुन, बाक ना तोळु कोंडीन, अदिक ईग ना नोळ सकतीन.” 16इदुर मा येनारा फरीसी अनली कुरतुर, “ई मंळसा परमेश्वर उन दी टु आल्लच, यतिकी आव आराम इन दिन मानसालुन.” दुसरागोळ अंदुर, “पापी मंळसा हिंग चमत्कार ह्यांग तोर्स सकतान?” इदुरसाटी आंदुर दा फूट बिदोत. 17आंदुर आ कुढ्ढ मंळसा से मात्त अंदुर, “आव नीन कण्णगोळी खोलस्यान. नी आऊन बारा दा येन अनत्या?” आव अंदुन, “आव भविष्यवक्ता आन.”
18लेकीन यहूदीगोळी विश्वास आगीदील कि आव कुढ्ढ ईरोन अदिक ईग नोळतान, यागासताका आंदुर आऊन, यार्द कण्णगोळ खुलसेगीदव, आऊन मोय-आप्प उक कारूकु 19आंदुर से केळीदील, “येन ईव नीम पार हुन, यारी नीव अनतीर कि कुढ्ढ पैदा आगीदुन? बाक ईग ह्यांग नोळतान?” 20आऊन मोय-आप्प उत्तर कोट्टुर, “नाव रा जान्सतेव कि ईव नाम पार हुन, अदिक कुढ्ढ पैदा आगीदुन: 21लेकीन नाव ईद जानसालेव कि ईग ह्यांग नोळतान, अदिक ना ईद जान्सतेव कि याव आऊन कण्णगोळी तेरदुन. आव स्याणा आन, आऊन से अच केळ कोमी: आव तान बारा दा खुद अंद बुटान.” 22ई मातगोळी आऊन मोय आप्प इदुरसाटी अंदुर यतिकी आंदुर यहूदीगोळ से अंजोर, यतिकी यहूदी ऊंद मत आगेगीदुर कि अगर यावारा अंदान कि आव मसीह हुन, रा आव सभागृह टु तेगुकु आदान. 23ईदा कारण आऊन मोय आप्प अंदुर, “आव स्याणा आन, आऊन से अच केळ कोमी.”
24आग आंदुर आ मंळसा अक जो कुढ्ढ ईरोन, दुसरा घन कारूकु आऊन से अंदुर, “परमेश्वर उन स्तुती माळ. नाव रा जान्सतेव कि आ मंळसा पापी आन.” 25आव उत्तर कोट्टुन, “ना जानसालीन कि आव पापी आन या हैलेच; ना ऊंद मात जान्सतीन कि ना पयले कुढ्ढ ईरीन अदिक ईग नोळतीन.” 26आंदुर आऊन से मात्त अंदुर, “आव नीन सांगुळ येन माळदुन? अदिक याता प्रकार देल नीन कण्णगोळी खोल्सदुन?” 27आव आंदुर से अंदुन, “ना रा नीम से अंद कोंडीन, अदिक नीव केळीदील; ईग दुसरा घन येती केळोद चाहासतीर? येन नीव भी आऊन चेला बनसोद चाहासतीर?” 28आग आंदुर आऊक बुरा भला अनली कुरतुर, “नी अच आऊन चेला आय, नाव रा मूसा अन चेला हुयेव. 29नाव जान्सतेव कि परमेश्वर मूसा से मातगोळी हेळदुन; लेकीन ई मंळसा अक जानसालेव कि येलेव हुन.” 30आव आंदरी उत्तर कोट्टुन, “ईद रा आश्चर्य अन मात आद कि नीव जानसालीर कि आव येलेव हुन, लेकीन आव नान कण्णगोळी खोल्स बुटुन. 31नाव जान्सतेव कि परमेश्वर पापीगोळ्द केळालुन, लेकीन अगर यावारा परमेश्वर उन भक्त आन अदिक आऊन इच्छा मा नळुतान, रा आव आऊन केळतान. 32दुनिया अन सुरूवात देल ईद यागलु केळदुर दा बंदिदील कि यावारा जनम इन कुढ्ढ उन कण्णगोळी खोल्सदुन. 33अगर ईव मंळसा परमेश्वर उन दी टु ईला ईरायदुन, रा येनु भी ईला माळ सकायदुन.” 34आंदुर आऊक उत्तर कोट्टुर, “नी रा बिलकुल पापगोळ दा पैदा आग्या, नी नामी येन कल्सत्या?” अदिक आंदुर आऊक व्हार्या तेग्द बुटुर.
आत्मिक कुढ्ढपन
35यीशु केळदुन कि आंदुर आऊक व्हार्या तेग्द बुटुर, अदिक याग आऊन से भेंट आत रा अंदुन, “येन नी परमेश्वर उन पार उन मा विश्वास माळत्या?” 36आव उत्तर कोट्टुन, “हे प्रभु, आव याव हुन, कि ना आऊन मा विश्वास माळाईन?” 37यीशु आऊन से अंदुन, “नी आऊक नोळ्या, अदिक जो नीन सांगुळ मातगोळी हेळेत्यान आव आवा हुन.” 38आव अंदुन, “हे प्रभु, ना नीन मा विश्वास माळतीन.” अदिक आऊक बांगकु प्रणाम माळदुन. 39आग यीशु अंदुन, “ना ई दुनिया दा न्याय इन साटी बंदीन, ताकी जो नोळालुर आंदुर नोळुल, अदिक जो नोळतार आंदुर कुढ्ढ आगेगुल.” 40जो फरीसी आऊन सांगुळ ईरोर आंदुर आऊन ई मातगोळी केळकु आऊन से अंदुर, “येन नाव भी कुढ्ढ आयेव?” 41यीशु आंदुर से अंदुन, “अगर नीव कुढ्ढ ईरायदीर रा पापी ईला ठहरूसायदीर; लेकीन ईग अनतीर कि नाव नोळतेव, इदुरसाटी नीम दा पाप बन्सकु ईरतद.
Currently Selected:
यूहन्ना 9: NTHaa20
Highlight
Share
Copy
Want to have your highlights saved across all your devices? Sign up or sign in
The New Testament in Holiya Language © The Word for the World International and Holiya Translation Samithi, Kudwa, Gondia, Maharashtra 2020
