प्रेरितगोळ 8

1शाऊल आऊक कोन्नोर दा सहमत ईरोन.

मंडली मा अत्याचार

अदा दिशी टु यरूशलेम इन मंडली मा धोळ्द दुख इन सुरूवात आत अदिक प्रेरितगोळी बिटकु सप्पा अन्द सप्पा मुंदुर यहूदिया अदिक सामरीया द्याशगोळ दा तितर बितर आगेदुर. 2येनारा भक्तगोळ स्तिफनुस उक कब्र दा ईटदुर अदिक आऊन साटी जोर जोर देल वर्लदुर.

3 # प्रेरितगोळ २२:४,५; २६:९-११ शाऊल मंडली अक बरबाद माळोन; अदिक मानोन मान्नी होक्‍कु मंळसागोळी अदिक आर्तेर इक जेडु जेडुकु बंदीगृह दा हाक्‍क तोगोन.

सामरीया दा फिलिप्पुस उन प्रचार

4जो विश्वासी लॉकुर तितर बितर आगीदुर, आंदुर खुशखबरी केळ्सतेला टेटाळोर; 5अदिक फिलिप्पुस ल्यालमा सामरीया नगर दा होगकु लॉकुर दा मसीह अन्द प्रचार माळली कुरतुन. 6जो मातगोळी फिलिप्पुस अंदुन अवरी लॉकुर केळकु अदिक जो चमत्कार आव तोर्सतोगोन अवरी नोळ नोळकु, ऊंद चित्त आगकु मन हचदुर. 7यतिकी हापाळ दा टु अशुध्द आत्मागोळ धोळ्द शब्द दा चिल्ळासतेला होट्ट बुटव, अदिक हापाळ सा लकवा अन्द रोगी अदिक लंगळागोळ भी वळ्लेर माळकु आदुर; 8अदिक आ नगर दा धोळ्द खुशी छासेत.

9इदुर से पयले आ नगर दा शमौन हेसुर ईनव ऊंद मंळसा ईरोन, जो जादू टोना माळकु सामरीया अन्द लॉकुरी चकित माळतोगोन अदिक तान तान इक ऊंद धोळ्द मंळसा हेळतोगोन. 10स्याणेर से धोड्डेर ताका सप्पा आऊंद सम्मान माळकु अनतोगोर, “ईव मंळसा परमेश्वर उन अद ताकत हुन, जो महान कहलुसतद.” 11आव हापाळ दिनगोळ टु आंदरी तान जादू अन्द क्याल्सागोळ देल चकित माळकु ईटीदुन, इदुरसाटी आंदुर आऊक हापाळ मानसोर. 12लेकीन याग आंदुर फिलिप्पुस उन बातणी इन विश्वास माळदुर जो परमेश्वर उन राज्य अदिक यीशु मसीह अन्द हेसुर इन खुशखबरी केळ्सतोगोन, रा लॉकुर, येन मंळसा, येन आर्तेर, बपतिस्मा ताकोमली कुरतुर. 13आग शमौन खुद भी विश्वास माळदुन अदिक बपतिस्मा ताकोमकु फिलिप्पुस उन सांगुळ ईरली कुरतुन. आव धोड्डेव-धोड्डेव चमत्कार अदिक चमत्कार इन क्याल्सा आग्त नोळकु चकित आगतोगोन.

14याग प्रेरितगोळ जो यरूशलेम दा ईरोर, केळदुर कि सामरीयागोळ परमेश्वर उन वचन मान्स कोंडार रा पतरस अदिक यूहन्ना अक आंदुर हाती कळुदुर. 15आंदुर होगकु विश्वासीगोळ साटी प्रार्थना माळदुर कि पवित्र आत्मा सिक्‍कुल. 16यतिकी ईगासताका आंदुर दा टु यारदु मा पवित्र आत्मा ईळदीदिल; आंदुर रा सिर्फ प्रभु यीशु अन्द हेसुर देल बपतिस्मा ताकोंडीदुर. 17आग पतरस अदिक यूहन्ना आंदुर मा कय ईटदुर अदिक आंदरी पवित्र आत्मा सिक्त.

18याग शमौन नोळदुन कि प्रेरितगोळ कय ईटदुर देल पवित्र आत्मा कोटकु आगतद, रा आंदुर हात्‍ती पैस्या तनकु अंदुन, 19“ईद अधिकार नानी भी कोळी, कि जो यावारा मंळसा मा कय ईटाईन आऊक पवित्र आत्मा सिक्‍कुल.”

20पतरस आऊन से अंदुन, “नीन पैस्या नीन सांगुळ नाश आगुल, यतिकी नी परमेश्वर उन दान पैस्यागोळ देल कोंड कोमोद विचार माळ्द. 21ई मात दा ना नान हिस्सा आद, ना भाग; यतिकी नीन मन परमेश्वर उन मुंद वळ्लीद हैलेच. 22इदुरसाटी तान ई बुराई देल मन तिर्गुस प्रभु से प्रार्थना माळ, आग सकतद कि अपमान मन इन विचार माफ माळकु आगुल. 23यतिकी ना नोळतीन कि नी पित्त घाई केयजोर अदिक अन्याय अन्द बंधन दा बिदकु आय.”

24शमौन, पतरस अदिक यूहन्ना से अंदुन, “नीव नान साटी प्रभु से प्रार्थना माळी कि जो मातगोळी नीव अंदीर, अऊर दा टु यातोदारा नान मा बंदकु बिळबाळुल.”

25इदुरसाटी आंदुर गवाही कोटकु अदिक प्रभु उन वचन केळ्सकु यरूशलेम इक होटोदुर, अदिक सामरीगोळ्द हापाळ सा ऊरगोळ दा खुशखबरी केळ्सत होदुर.

फिलिप्पुस अदिक कूश द्याश इन अधिकारी

26बाक प्रभु अन्द ऊंद स्वर्गदूत फिलिप्पुस से अंदुन, “येळ, अदिक दक्षिण दी आ हादी मा होग, जो यरूशलेम टु गाज़ा अक होगतद.” ईद धुळा अन्द हादी हुन. 27आव यदकु होटोदुन, अदिक नोळी, कूश द्याश इन ऊंद मंळसा बरोन जो खोजा जाती अदिक कूश इन रानी कन्दाके अन्द मंत्री अदिक पैस्या अन्द हिसाब ईटावाळा खजांची ईरोन. आव आराधना माळली यरूशलेम बंदीदुन. 28आव तान रथ मा कुर्तकु ईरोन, अदिक यशायाह भविष्यवक्ता अन्द किताब वाचुसतेला वापस होगोन. 29आग पवित्र आत्मा फिलिप्पुस से अन्त, “हात्‍ती होगकु ई रथ इन सांगुळ आगेग.” 30फिलिप्पुस आऊन दी हरदुन अदिक आऊक यशायाह भविष्यवक्ता अन्द किताब वाचुसतेला केळदुन, अदिक आऊन से केळदुन, “नी जो वाचुसित्या येन अदरी नी सम्सत्या भी?”

31आव अंदुन, “यागासताका यावारा नानी समझुसतीदील रा ना ह्यांग समसाईन?” अदिक आव फिलिप्पुस से विनती माळदुन कि आव येरकु आऊन हात्‍ती कुरूल. 32पवित्रशास्त्र अन्द जो अध्याय आव वाचुसोन,

अद ईद ईरोद: “आव म्यांडा अन घाई बली आगली पोहचुस्कु आदुन,

अदिक ह्यांग म्यांडा अन पाड्डा तान चुट्टी कातरूसावार्ळेद मुंद चुपचाप ईरतद,

हांगा आव भी तान बाय खोलसीदील.

33आऊन दीनता दा आऊंद न्याय ईला आग पायजे

आऊंद समय इन लॉकुर्द वर्णन याव माळ्यान?

यतिकी पृथ्वी टु आऊंद जीव तेगुकु आगेत.”

34इदुर मा खोजा जाती इन ऊंद अधिकारी मंळसा फिलिप्पुस से केळदुन, “ना नीन से विनती माळतीन, ईद हेळ कि भविष्यवक्ता ईद यार बारा दा अनतान, तांद या यावारा दुसरा अन्द बारा दा?” 35आग फिलिप्पुस तान बाय खोल्सदुन, अदिक ईद शास्त्र भाग से सुरूवात माळकु आऊक यीशु उन खुशखबरी केळ्सदुन. 36हादी मा नळुत नळुत आंदुर यातोदारा नीर इन जागा मा पोहचुसदुर. आग खोजा जाती इन अधिकारी मंळसा अंदुन, “नोळ ईल नीर आद, ईग नानी बपतिस्मा ताकोंडुर दा येन रोक आद.” 37फिलिप्पुस अंदुन, “अगर नी पुरा मन देल विश्वास माळत्या रा ताकोम सकत्या.” आव उत्‍तर कोट्टुन, “ना विश्वास माळतीन कि यीशु मसीह परमेश्वर उन पार हुन.”

38आग आव रथ निदरूसोद आग्या कोट्टुन, अदिक फिलिप्पुस अदिक खोजा नीर दा ईळदुर, अदिक आव खोजा अक बपतिस्मा कोट्टुन. 39याग आंदुर नीर दा टु होटकु म्याकुच बंदुर, रा प्रभु अन्द आत्मा फिलिप्पुस उक नेगुकु ओईत, अदिक खोजा जाती इन अधिकारी आऊक बाक नोळीदील, अदिक आव खुशी माळतेला तान हादी मा होटोदुन. 40फिलिप्पुस उक हिंग हत्‍त कि आव अशदोद नगर दा आन, अदिक यागासताका कैसरिया दा पोहचुसीदील, आगासताका नगर नगर खुशखबरी केळ्सतेला होदुन.

Currently Selected:

प्रेरितगोळ 8: NTHaa20

Highlight

Copy