प्रेरितगोळ 5

हनन्याह अदिक सफीरा

1हनन्याह हेसुर इन ऊंद मंळसा ईरोन, अदिक आव तान हिंग्स सफीरा अन सांगुळ तान थ्वाळासा जागा मारदुन. 2अदिक आव आ जागा अन दाम दा टु थ्वाळासा पैस्या ईट बुटुन; अदिक ईद मात आऊन हिंग्स भी जानसोर, अदिक अदुर मिग्द भाग तनकु प्रेरितगोळ्द कालगोळ मुंद ईट बुटुन. 3पतरस अंदुन, “हे हनन्याह! शैतान नीन मन दा ईद मात ह्यांग हाक्त कि नी पवित्र आत्मा से ख्वाटा माताळ्या, अदिक जागा अन दाम दा टु येनारा ईट्या? 4यागासताका अद नीन हात्‍ती ईत्‍त, येन अद जागा अपमान ईतीदील? अदिक याग अद मारेत रा येन अदुर किमत नीन अधिकार दा ईला ईरोद? अदिक नी ई मात इन तान मन दा येती बिचार माळ्द? नी मंळसागोळ से ईला, लेकीन परमेश्वर से ख्वाटा माताळ्द.” 5ई मातगोळ केळकु हनन्याह बिदोदुन अदिक जीव बिट बुटुन, अदिक सप्पा केळावाळेर मा धोळ्द अंज्क तुम्मेत. 6बाक हारोद मंळसागोळ यदकु आऊन सकोली तयार माळदुर अदिक आऊन लाश व्हार्या ओतकु नळ्स बुटुर.

7लगभग मुर तास इन बाद्दा आऊन हिंग्स, जो येनारा आगीत ईला जान्सकु, बुळ्क बंदुर.

8आग पतरस आकिन से अंदुन, “नानी हेळ येन नीव अद जागा इटुर दा अच मार बुटीदीर?” आक अंदुर, “हव, इटुर दा अच.”

9पतरस आकिन से अंदुन, “ईद येन मात हुन कि नीव येढ्ढु मुंदुर प्रभु अन्द आत्मा अन परीक्षा साटी ऊंद मन माळदीर? नोळ, नीन गांड्ड उक नळसावाळेर दरवाजा मा अच निदुरकु आर, अदिक नीनी भी व्हार्या ओतार.” 10आग आक तुरन्त आऊन कालगोळ मा बिद्दुर, अदिक सोतोदुर; अदिक हारोद मंळसागोळ बुळ्क बंदकु आकी सोतकु नोळदुर, अदिक व्हार्या वोतकु आकिन गांड्ड उन हात्‍ती नळ्स बुटुर. 11सप्पा मंडली मा अदिक ई मातगोळ्द सप्पा केळावाळेर मा धोळ्द अंज्क तुम्मेत.

चमत्कार अदिक अदभुत क्याल्सा

12प्रेरितगोळ्द कयगोळ देल हापाळ चमत्कार अदिक अदभुत क्याल्सा लॉकुर न्याड्या दा तोर्सकु आगतोगोव, अदिक आंदुर सप्पा ऊंद मन आगकु सुलैमान उन छपर्या दा जमा आगतोगोर. 13लेकीन हापाळ दा टु यारीकु ईद हिम्मत ईला आगतोगोद कि आंदुर दा होगकु मिलुसेव; तरी लॉकुर आंदुर्द बळाई माळतोगोर. 14विश्वास माळावाळेर हापाळ सा मंळसा अदिक आर्तेर मंडलीगोळ दा धोळ्द संख्या दा सिक्त ईत्‍तुर. 15ईल ताका कि लॉकुर बिमारगोळी सळकगोळ मा तन तनकु, व्हर्सगोळ मा मिंग्स बुळतोगोर कि याग पतरस बंदान, रा आऊन सावली अच आंदुर दा टु यारदारा मा बिदोगुल. 16यरूशलेम इन आसपास इन नगरगोळ से भी हापाळ लॉकुर बिमारगोळ अदिक अशुध्द आत्मागोळ्द सतुस्द लॉकुरी तन तनकु, जमा आगतोगोर, अदिक सप्पा वळ्लेर माळकु आगोर.

प्रेरितगोळ्द गिरफ्तारी

17आग महायाजक अदिक आऊन सप्पा संगी जो सदूकीगोळ्द पंथ नोर ईरोर, जलनखोरी देल तुम्मेदुर. 18अदिक प्रेरितगोळी हुडुकु बंदीगृह दा बंद माळ बुटुर. 19लेकीन ईळ्ल इक प्रभु उन ऊंद स्वर्गदूत बंदीगृह अन्द दरवाजा तेरूकु आंदरी व्हार्या तनकु अंदुन, 20“होगी, मंदिर दा निदुरकु ई व्हाशोद जीवन इन सप्पा मातगोळ लॉकुरी केळसी.” 21आंदुर ईद केळकु व्हातुर आगतेला अच मंदिर दा होगकु शिक्षा कोळली कुरतुर.

लेकीन महायाजक अदिक आऊन साथीगोळ बंदकु इस्त्राएलगोळ सप्पा स्याणा लॉकुर्द पुरा सभा अक जमा माळदुर, अदिक बंदीगृह दा बातणी कळुदुर कि आंदरी तरूल. 22लेकीन अधिकारीगोळ अल पोहचुस्कु आंदरी बंदीगृह दा नोळीदील, अदिक वापस बंदकु बातणी कोट्टुर, 23“नाव बंदीगृह अक हापाळ सावधानी देल बंद माळकु, अदिक पहरेदारगोळी व्हार्या दरवाजागोळ मा निदुरकु नोळदेव; लेकीन याग तेरदेव, रा बुळ्क याऊ सिक्‍कीदील.” 24याग मंदिर इन सरदार अदिक प्रधान याजक ई मातगोळी केळदुर, आंदरी समझ दा बंदीदिल कि प्रेरितगोळ्द येन आत अदिक ईग येन आदीत! 25ईटुर दा यावारा बंदकु आंदरी हेळदुन, “नोळी, यारी नीव बंदीगृह दा बंद ईटीदीर, आ मंळसागोळ मंदिर दा निदुरकु लॉकुरी शिक्षा कोळेत्यार.” 26आग सरदार, अधिकारीगोळ सांगुळ होगकु, आंदरी तंदुन, लेकीन ताकत देल ईला, यतिकी आंदुर लॉकुर से अंजतोगोर कि नाम मा पथराव माळबाळुल.

27आंदुर प्रेरितगोळी तनकु महासभा अन्द मुंद निदुरूस बुटुर; अदिक महायाजक आंदुर से पूछताछ माळदुन, 28#मत्ती २७:२५“येन नाव नीमी कठोर आग्या कोटीदील कि नीव ई हेसुर देल शिक्षा कोळ बाळेतीर? तरी भी नोळी, नीव सप्पा यरूशलेम इक तान शिक्षा देल तुम बुट्टीर अदिक आ मंळसा अन्द खुन नाम कुतक्या मा तरोद चाहासतीर.”

29आग पतरस अदिक दुसरा प्रेरितगोळ उत्‍तर कोट्टुर, “मंळसागोळ्द आग्या से वाळुसकु परमेश्वर उन आग्या अन्द पालन माळोद अच नाम्द कर्तव्य आद. 30नाम आप्प दादागोळ्द परमेश्वर यीशु उक सोत्‍तुर दा टु जित्‍ता माळदुन, यारी नीव क्रूस मा येर्सकु कोंद बुटीदीर. 31आऊक अच परमेश्वर शासक अदिक उद्धारकर्ता ठहरूस्कु, तान ऊमा कय मा नेग्द बुट्टुन, कि आव इस्त्राएलगोळी मन तिर्गुसोद ताकत अदिक पापगोळ्द माफ प्रदान माळुल. 32नाव ई मातगोळ गवाह आयेव अदिक हांगा पवित्र आत्मा भी, यारी परमेश्वर आंदरी कोटान जो आऊन आग्या मान्सतार.”

33ईद केळकु आंदुर सिट्टी होट बंदुर, अदिक प्रेरितगोळी कोंद बुळोद चाहासदुर. 34लेकीन गमलीएल हेसुर इन ऊंद फरीसी जो व्यवस्था अन शिक्षक अदिक सप्पा लॉकुर दा मानवाईक ईरोन, न्याय सभा दा निदुरकु प्रेरितगोळी थ्वाळासा समय इन साटी व्हार्या माळोद आग्या कोट्टुन. 35आग आव अंदुन, “हे इस्त्राएलगोळा, नीव जो येनारा ई मंळसागोळ सांगुळ माळोद चाहासतीर, सोच विचार माळकु माळेतीर. 36यतिकी ई दिनगोळ से पयले थियूदास ईद अनतेला अच विद्रोह अन्द झंडा नेगदीदुन, कि ना भी येनारा आईन; अदिक कम से कम नाक सौ मंळसा आऊन सांगुळ आगेदुर, लेकीन आव कोन्सुसकु आदुन अदिक यास लॉकुर आऊक मान्सतोगोर, सप्पा तितर बितर आदुर अदिक मिट्सेदुर. 37अदुर बाद्दा जनगणना अन्द दिनगोळ दा गलील दा ईरावाळा यहूदा विद्रोह दा ताल्ला नेगदुन, अदिक थ्वाळासा लॉकुरी तान दी माळ कोंडुन; अदिक आव भी नाश आगेदुन अदिक यास लॉकुर आऊक मान्सतोगोर, सप्पा तितर बितर आगेदुर. 38इदुरसाटी ईग ना नीम से अनतीन, ई मंळसागोळ से दुर अच ईरी अदिक इंदरी होगगोळी; यतिकी अगर ईद न्याय या क्याल्सा मंळसागोळ दी टु आद आग रा मिटुसेदीत; 39लेकीन अगर परमेश्वर उन दी टु आद, रा नीव आंदरी यागलु मिटुस सकतीदिल. ईलारा हिंग आगबाळुल कि नीव परमेश्वर से भी लळुसावाळेर ठहरूसी. आग सभा अन लॉकुर गमलीएल उन मात मान्स कोंडुर.” 40अदिक प्रेरितगोळी कार्सकु बळसुसदुर; अदिक ईद आदेश कोटकु बिट बुटुर कि यीशु उन हेसुर देल बाक यातोदु मात माळबाळेतीर. 41प्रेरितगोळ ई मात देल खुश आगकु महासभा अन्द मुंदु टु अनतेला होटोदुर, कि नाव यीशु उन हेसुर इन साटी अपमानीत आगोद लायक रा ठहरूसदेव. 42आंदुर रोज मंदिर दा अदिक मानोन मान्नी लगातार खुशखबरी इन प्रचार माळतोगोर अदिक कल्सतोगोर कि यीशु उच मसीह हुन.

Currently Selected:

प्रेरितगोळ 5: NTHaa20

Highlight

Copy