ମାତିଉ 7
7
ବିନ୍ଣ୍ଡ୍ରେଇଂନେ ଦସ୍ ସାଃନେ
(ଲୁକ୍ ୬:୩୭-୩୮,୪୧-୪୨)
1ବିନ୍ଣ୍ଡ୍ରେଇଂନେ ଦସ୍ ତୁର୍ ଆଅଲେଙ୍ଗ୍ପା । ତେଲା ଇସ୍ପର୍ ଡିଗ୍ ପେନେ ଦସ୍ ଆସା ଣ୍ତୁ । 2#ମାର୍କ ୪:୨୪.ବିନ୍ଣ୍ଡ୍ରେଇଂନେ ଦସ୍ ବିସୟ୍ରେ ପେ ଡିରକମ୍ ବାବ୍ରେ ବିଚାର୍ ଡିଙ୍ଗ୍ ପେବଏ ଇସ୍ପର୍ ଦେତ୍ରକମ୍ ପେନେ ବିଚାର୍ ଡିଙ୍ଗ୍ଏ । ପେ ବିନ୍ଣ୍ଡ୍ରେଇଂନେ ଆଡ଼ାତ୍ରା ଆଣ୍ତିନେ ନିଅମ୍ ବେବଆର୍ ପେଡିଙ୍ଗ୍ଏ ଆତେନ୍ ନିୟମ୍ରେ ଇସ୍ପର୍ ପେନେ ଆଡ଼ାତ୍ରା ଡିଗ୍ ବେବଆର୍ ଡିଙ୍ଗ୍ଏ । 3ପେ ମୁଆଃନ୍ନିଆ କାଚ୍ରା ଲେଃକ୍ନେ ବେଲା ନାବୟାଁ ମୁଆଃନେ କାଚ୍ରା ଆଡ଼ାତ୍ରା ପେ ମେନ୍ସା ଦ୍ୟାନ୍ ବିପେଡିଙ୍ଗ୍ ? 4ନିଜର୍ ମୁଆଃନ୍ନିଆ କାଚ୍ରା ମୁଇଂ ଲେଃଲେ, ପେ ଆଣ୍ଡିନେ ସାଆସ୍ରେ ପେନେ ବୟାଁ ମୁଆଃବାନ୍ କାଚ୍ରା ଆଃତାର୍ ମ୍ୱିଏ ଡାଗ୍ଚେ ବାସଂପେଡିଙ୍ଗ୍ ? 5ରେ କୁଟ୍ଣ୍ଡ୍ରେ ସେନୁଗ୍ ନିଜର୍ ମୁଆଃବାନ୍ କାଚ୍ରା ଆନ୍ତାର୍ ଜଗ୍ତ୍ଲିଗ୍ପା ତେନ୍ ଇଡ଼ିଂ ନିଜର୍ ବୟାଁନେ ମୁଆଃବାନ୍ କାଚ୍ରା ଆନ୍ତାର୍ ବିନ୍ସା ନିମାଣ୍ତା ବାବ୍ରେ କିକେ ନାୟାଏ ।
6ଗୁସୁଃକେ ପବିତ୍ର ଜିନିସ୍ ଆବିଗ୍ପା । ଡାଗ୍ଲା ମେଁ ପ୍ଲେଗ୍ଚେ ଆପେକେ ଆଃଏ । ଗୁବୁଗ୍ ସେନୁଗ୍ ମୁକ୍ତା ଆଜଗ୍ତ୍ଲିଗ୍ପା । ମେଁନେ ମୁଲ୍ୟ ମାବୁଜେଚେ ଆମେକେ ମେଁ ଞ୍ଚଏତେ ଲେଃଚାର୍ ବିଏ ।
ସାଲ୍ୟାପା ତୁର୍ପା ଆରି କାପାଟ୍ନ୍ନିଆ ବଗ୍ପା
(ଲୁକ୍ ୧୧:୯-୧୩)
7“ସାଲ୍ୟାପା ତେଲା ଆପେକେ ବିଏ; ତୁର୍ପା ଡିଲାଡିଗ୍ ମିଲେଏ; କାପାଟ୍ନ୍ନିଆ ବଗ୍ପା କାପାଟ୍ ରଃ ଆର୍ଏ । 8ଜାଣ୍ଡେ କି ସାଲ୍ୟାଏ ଆମେକେ ବିଏ; ଜାଣ୍ଡେ ତୁର୍ଏ ମେଁ ଅବାଏ; ଜାଣ୍ଡେ କାପାଟ୍ନ୍ନିଆ ବଗ୍ଏ ମେନ୍ସା କାପାଟ୍ ରଃ ବିଆର୍ଏ । 9ନେନେ ମୁଡ଼ି ଆବା ଲେଃକେ ଜେ ମେଁନେ ଉଙ୍ଗ୍ଡେ ରୁଟି ସାଲ୍ୟାଲା ଆମେକେ ବ୍ରି ବିଏ ? 10ଣ୍ତୁଲା ମେଁ ଆଃଡ଼ ସାଲ୍ୟାଲା ଆମେକେ ମେଃନେ ବୁବଃ ବିଏ ? 11ଏନ୍ସା ପେଇଂ ଦୁଷ୍ଟ ଡିଙ୍ଗ୍ଲା ଡିଗ୍ ପେ ନିଜର୍ ନିଜର୍ ଗଡ଼େଇଂକେ ନିମାଣ୍ତା ଜିନିସ୍ ବିପେଡିଙ୍ଗ୍କେ । ତେଲା ପେଇଂନେ କିତଂନେ ଆବା ଡାଗ୍ରା ଜାଣ୍ଡେଇଂ ସାଲ୍ୟାଏ ମେଁ ଆମେଇଂକେ ଆରି ଉଡ଼ି ନିମାଣ୍ତା ଜିନିସ୍ ଜବର୍ ବାବ୍ରେ ଆବି ଣ୍ତୁ !”
12ପେନ୍ସା ବିନ୍ଣ୍ଡ୍ରେଇଂ ମେଁନେ ଡିଙ୍ଗ୍ଆର୍ଲେଃ ଡାଗ୍ଚେ ପେ ଇକ୍ଚା ଡିଙ୍ଗ୍ ପେଡିଙ୍ଗ୍ ପେ ବିନ୍ଣ୍ଡ୍ରେଇଂ ନ୍ସା ଆତେନ୍ ଡିଙ୍ଗ୍ପା । ମୋଶା ବିବକ୍ନେ ନିଅମ୍ ଆରି ବାବବାଦିଇଂନେ ଦର୍ମ ସାସ୍ତର୍ନ୍ନିଆ ସିକ୍ୟା ଗୁଆର୍ବକ୍ନେ ବ୍ନାଲିର୍ ।
ଚିପାକ୍ନେ ଗାଲି
(ଲୁକ୍ ୧୩:୨୪)
13ଚିପାକ୍ନେ ଗାଲି ବିଚେ ୱେଲାପା । ଡାଗ୍ଲା ସାପା ଦଂସ ଆଡିଙ୍ଗ୍ନେସା ଡୁଂୱେନେ ନର୍କନେ ଗାଲି ସିଦା ଆରି ଅସାର୍ । ଗୁଲେରୁଆ ଆତେନ୍ ଗାଲିପାକା ୱେଆର୍ ମ୍ୟାକେ । 14ଡାଗ୍ଲା ମାଡାନେ ପାରାନ୍କେ ଡୁଂୱେନେ ଗାଲି ସିଦା ଆରି ମେଁନେ ର୍ଣ୍ଣସାଙ୍ଗ୍ ଚିପା ବାରି ଗଣ୍ଡା ରେମୁଆଁ ଆକେନ୍ ଗାଲି ତୁର୍ ଅଲେଙ୍ଗ୍ ମ୍ୟାକେ ।
ସ୍ଲା ଆରି ମେଁନେ ଚୁଚୁ
(ଲୁକ୍ ୬:୪୩-୪୪)
15“ବଣ୍ତ ବାବବାଦି ବକ୍ତାଇଂନେ ବାନ୍ ତରକ୍ ଡିଙ୍ଗ୍ଚେ ଲାଲାପା; ମେଇଂ ମେଣ୍ଡା ରକମ୍ ଡିଙ୍ଗ୍ଚେ ପେ ଡାଗ୍ରା ପାଙ୍ଗ୍ଆର୍ଏ ମାତର୍ ଜିବନ୍ ବିତ୍ରେ ମେଇଂ ଗଦବାଗ୍ ! 16ମେଁଇଂନେ କାମ୍ ଆଣ୍ଡେଙ୍ଗ୍ନେ ବାନ୍ ପେ ଆମେଇଂକେ ସାମୁଆଁ ପେୟାଏ । ଗ୍ରେଃ ବୁଟାନ୍ନିଆ ଅଙ୍ଗୁର୍ ଆଚୁ ଣ୍ତୁ ଣ୍ଡୁଲା କାଟାକଲି ସ୍ଲାନ୍ନିଆ ଲିୱା ଚୁ ଆଚୁ ଣ୍ତୁ । 17ଦେତ୍ରକମ୍ ସାପା ନିମାଣ୍ତା ସ୍ଲାନ୍ନିଆ ନିମାଣ୍ତା ଚୁ ଚୁଏ ଦଦ୍ୟା ସ୍ଲାଃନ୍ନିଆ ଦଦ୍ୟା ଚୁ ଚୁଏ । 18ନିମାଣ୍ତା ସ୍ଲାଃନ୍ନିଆ ଦଦ୍ୟା ଚୁ ଆଚୁ ଣ୍ତୁ ଲେଃ ଦଦ୍ୟା ସ୍ଲାନ୍ନିଆ ନିମାଣ୍ତା ଚୁ ଆଚୁ ଣ୍ତୁ । 19#ମାତିଉ ୩:୧୦; ଲୁକ୍ ୩:୯.ଆଣ୍ଡିନେଡିଗ୍ ସ୍ଲାଃ ନିମାଣ୍ତା ଚୁ ଆସାଃଲା ଆତେନ୍ ସ୍ଲାକେ ସିତଗ୍ଚେ ସୁଆନ୍ନିଆ ତ୍ଲାଗ୍ଆର୍ଏ । 20ଦେତ୍ରକମ୍ ବଣ୍ତ ବବିଷ୍ୟତ୍ ବକ୍ତାଇଂନେ କାମ୍ ଆଣ୍ତେଙ୍ଗ୍ବାନ୍ ଆମେଇଂକେ ପେ ସାମୁଆଁ ପେୟାଏ ।”
ନେଙ୍ଗ୍ ଆପେକେ ନ୍ନାମ୍ୟାକେ ଣ୍ତୁ
(ଲୁକ୍ ୧୩:୨୫-୨୭)
21ଜାଣ୍ଡେଇଂ ଆନେଙ୍ଗ୍ ମାପ୍ରୁ, ମାପ୍ରୁ ଡାଗ୍ଚେ ୱାଆର୍ଡିଂକେ ମେଁଇଙ୍ଗ୍ନେ ବାନ୍ ସାପାରେ କିତଂଇନିନ୍ନିଆ ଗା ଆୟାଆର୍ ଣ୍ତୁ । ଜାଣ୍ଡେଇଂ ଆବା ଇସ୍ପର୍ନେ ଇକ୍ଚା ଅନୁସାରେ କାମ୍ ଡିଙ୍ଗ୍ଆର୍ଏ ମାତର୍ ମେଇଂ କିତଂଇନିନ୍ନିଆ ଗା ଆରେ । 22ଇସ୍ପର୍ନେ ବିଚାର୍ ଦିନା ପିଙ୍ଗ୍ଚାଲା ଗୁଲେରୁଆ ଆନେଙ୍ଗ୍ ବାସଙ୍ଗ୍ଆର୍ଏ “ଏ ମାପ୍ରୁ ନାନେ ମ୍ନିରେ ନେନେ ଇସ୍ପର୍ନେ ନିମାଣ୍ଡା ସାମୁଆଁ ବାସଙ୍ଗ୍ ନେବକେ ମାପ୍ରୁ ନାନେ ମ୍ନିରେ ଗଲିଆ ନୁଆଁ ନେବକେ ବାରି ଗୁଲୁଏ ବପୁନେ କାମ୍ ଡିଙ୍ଗ୍ନେବକେ । 23ଆତେନ୍ ବେଲା ନେଙ୍ଗ୍ ଆମେଇଂକେ ମ୍ବାସଙ୍ଗ୍ଏ, ଆପେକେ ନେଙ୍ଗ୍ ନାମ୍ୟାକେ ଣ୍ତୁ । ଦୁରାଚାରିଇଂ ନେଙ୍ଗ୍ ଡାଗ୍ରାବାନ୍ ସୁଲ ୱେଲାପା ।”
ମ୍ବାୟା ଡୁଆ ଆଃରେଣ୍ଡ୍ରେ
(ଲୁକ୍ ୬:୪୭-୪୯)
24“ଜାଣ୍ଡେ ନେଙ୍ଗ୍ ସାମୁଆଁ ଅଁଚେ ପାଲନ୍ ଡିଙ୍ଗ୍ଏ ମେଁ ମ୍ନା ତାଲେବିର୍ ଆଡ଼ାତ୍ରା ଡୁଆ ଆଃରେ ବକ୍ନେ ବୁଦିଲେକ୍ନେ ରେମୁଆଁ ରକମ୍ । 25ଜାବର୍ ଣ୍ତିଆ ଗୁର୍କେ ବୁରାଣ୍ଡିଆ ପାଙ୍ଗ୍କେ ବାରି ୱେଡ଼ିଆ ପାଙ୍ଗ୍କେ ଆରି ଆତେନ୍ ଡୁଆକେ ଜଟ୍କା ବଗ୍କେ ବାରି ଆତେନ୍ ଆଲଃକେ ଣ୍ତୁ ଡାଗ୍ଲା ଆତେନ୍ ବ୍ରି ଆଡ଼ାତ୍ରା ଆଃରେ ବଗେ ।”
26“ଡାଗ୍ଲା ଜାଣ୍ଡେଇଂ ନେଙ୍ଗ୍ ସାମୁଆଁ ଅଁଚେ ପାଲନ୍ ଆଡିଙ୍ଗ୍ଆର୍ ଣ୍ତୁ ମେଇଂ ବାଲିଲ ଆଡ଼ାତ୍ରା ଡୁଆ ଆଃରେ ବକ୍ନେ ନିର୍ବୁଦି ରକମ୍ । 27ଜାବର୍ ଣ୍ଡିଆ ଗୁର୍ଚେ ବୁରାଣ୍ଡିଆ ପାଙ୍ଗ୍କେ ବାରି ୱେଡ଼ିଆ ପାଙ୍ଗ୍କେ ଆରି ଆତେନ୍ ଡୁଆକେ ଜଟ୍କା ବଗ୍କେ ବାରି ଆତେନ୍ ପାକ୍ଚି ଲଃକେ ବାରି ଆତେନ୍ ଲଃନେ ମ୍ନା ବୟଙ୍କାର୍ ଡିଙ୍ଗ୍କେ ।”
ଜିସୁନେ ଅଦିକାର୍
28ଡାନେ ଜାକ ଜିସୁନେ ଆକେନ୍ ସାପା ସାମୁଆଁ ଅଁଚେ ରେମୁଆଁଇଂ ମେଁନେ ସିକ୍ୟା ଇରିଆତୁଗ୍ ୱେଆର୍କେ । 29ଜିସୁ ବିନ୍ବିନ୍ନେ ଦର୍ମ ଗୁରୁ ସୁଗୁଆ ଗ୍ୟାନ୍ ମାବିଚେ ଅଦିକାର୍ ବାଲେଃକ୍ନେ ରେମୁଆଁଇଂନେ ରକମ୍ ଆମେଇଂକେ ସିକ୍ୟା ବିଡିଙ୍ଗ୍ଗେ ।
Currently Selected:
ମାତିଉ 7: NTDaa20
Highlight
Share
Copy
Want to have your highlights saved across all your devices? Sign up or sign in
The Gata Didayi Testament in Language © The Word for the World International and Didayi Believers Assembly, Kudumulugumma, Malkangiri, Odisha. 2020
