ଜହନ୍ 13
13
ଜିସୁ ସିସ୍ଇଂନେ ଞ୍ଚକେ ଗଃଡ଼ିଆ ବିକେ
1ଆତେନ୍ ବେଲା ଜିଉଦିଇଂନେ ଉଦାର୍ ପାଣ୍ଡୁଏନେ ବେଲା ଡିଙ୍ଗ୍ୱେଲେଃଗେ ଜିସୁ ମ୍ୟାଲେଃଗେ ଜେ ମେଁନେ ମଞ୍ଚ୍ପୁର୍ବାନ୍ ଆନ୍ତାର୍ଚେ ୱେନେ ବେଲା ପିଙ୍ଗ୍ଚା ଡିଙ୍ଗ୍କେ । ଏବେ ମେଁ ମେଁନେ ମ୍ନାଃ ଆବା ଡାଗ୍ରା ଆଣ୍ଡେ ୱେଏ । ମେଁ ସାପାବେଲା ଏନ୍ ମଞ୍ଚ୍ପୁର୍ନ୍ନିଆ ଲେଃଡିଙ୍ଗ୍କ୍ନେ ମେଁନେ ନିଜର୍ ରେମୁଆଁଇଂକେ ବଲ୍ ବାଡିଙ୍ଗ୍ଗେ । ମେଁ ମେଁଇଙ୍ଗ୍ନେ ଆଡ଼ାତ୍ରା ଗୁଲେ ଆଲାଦ୍ ଆଃସୁଏ ବଗେ ।
2ଆତେନ୍ ଦିନା ଜିସୁ ଆରି ମେଁନେ ସିସ୍ଇଂ ମିଡିଗ୍ବ ଚଙ୍ଗ୍ ଉଗ୍ ନ୍ନିଆ କ ଲେଃଗେ । ଜିସୁ ଆଡ଼ାତ୍ରା ବିସ୍ବାସ୍ ଗାତକ୍ ଡିଙ୍ଗ୍ନ୍ସା ଶିମୋନ ଉଙ୍ଗ୍ଡେ ଇଷ୍କରିୟଥ୍ ଜିଉଦାକେ ସଏତାନ୍ ବାସଙ୍ଗ୍ ବଗେ । 3ଜିସୁ ମ୍ୟାଲେଃଗେ ଆବା ଇସ୍ପର୍ ମେଁନେ ନ୍ତିନ୍ନିଆ ସାପା ଅଦିକାର୍ ବିଃ ବକେ ଆରି ମେଁ ଇସ୍ପର୍ ବାନ୍ ପାଙ୍ଗ୍ଲେକେ ବାରି ମେଁ ଇସ୍ପର୍ ଡାଗ୍ରା ଆଣ୍ଡେ ୱେଏ । 4ତେସା ଜିସୁ କଲେଃକ୍ନେ ବାନ୍ ତଡ଼ିଆଚେ ମେଁ ନିଜେନେ ସକା ତ ବିଚେ ମୁଇଙ୍ଗ୍ ତୁଆଲ୍ ଡୁଙ୍ଗ୍ପାଙ୍ଗ୍ଚେ ନ୍ସାନ୍ନିଆ ଗାଗ୍କେ । 5ତେନ୍ ଇଡ଼ିଂ ମେଁ ମୁତାନ୍ନିଆ ଣ୍ଡିଆ କିଗ୍କେ ଆରି ସିସ୍ଇଂନେ ଞ୍ଚ ଗଡ଼ିଆ ବିକେ । ଆରି ମେଁ ନ୍ସାଃନ୍ନିଆ ଗାଗ୍ବକ୍ନେ ତୁଆଲ୍ ଏତେ ମେଇଙ୍ଗ୍ନେ ଞ୍ଚ ଚୁ ବିକେ । 6ଉଡ଼ିବେଲା ଜିସୁ ଶିମୋନ୍ ପିତର୍ନ୍ନିଆ ପାଙ୍ଗ୍କେ; ପିତର୍ ସାଲ୍ୟାକୁକେ “ମାପ୍ରୁ ନା ମେଃନେ ନେଙ୍ଗ୍ନେ ଞ୍ଚ ଗଃଡ଼ିଆ ନାବିଏ ?”
7ଜିସୁ ବାସଙ୍ଗ୍କେ “ନେଙ୍ଗ୍ ମେଁନେ ଡିଙ୍ଗ୍ ଣ୍ଡିଙ୍ଗ୍କେ ଏବେ ପେ ବୁଜେ ପେୟା ଣ୍ଡୁ ଇଡ଼ିଙ୍ଗ୍ ପେବୁଜେଏ ।”
8ପିତର୍ ଆମେକେ ବାସଙ୍ଗ୍କେ “ନାଁ ଅଃନାଡିଗ୍ ନେଙ୍ଗ୍ନେ ଞ୍ଚ ଗଡ଼ିଆ ନେବି ଣ୍ଡୁ ।” ମାତର୍ ଜିସୁ ବାସଙ୍ଗ୍କେ “ଜଦି ନେଙ୍ଗ୍ ପେନେ ଞ୍ଚ ଗଡ଼୍ୟାଃ ନ୍ନାବିଃ, ତେଲା ପେ ଆରି ନେଙ୍ଗ୍ନେ ସିସ୍ ଡିଙ୍ଗ୍ଚେ ଲେଃ ପେୟା ଣ୍ଡୁ ।”
9ସିମୋନ୍ ପିତର୍ ଉତର୍ ବିକେ “ମାପ୍ରୁ ତେଲା ନେଙ୍ଗ୍ନେ ଞ୍ଚ ମେଁନ୍ସା ନେଙ୍ଗ୍ନେ ନ୍ତି ଆରି ବାଆ ଡିଗ୍ ଗଡ଼୍ୟାଃ ବିଃ ।”
10ଜିସୁ ବାସଙ୍ଗ୍କେ “ଜାଣ୍ଡେଇଂ ଣ୍ଡିଆ କୁମା ଲେଃଆର୍କେ ମେଁଇଙ୍ଗ୍ନେ ଞ୍ଚ ଆନ୍ତାର୍ଚେ ବିନେ ସାପା ଗଡ଼୍ୟାଃନେ ଦର୍କାର୍ ଣ୍ଡୁ । ମେଁଇଙ୍ଗ୍ନେ ସାପା ଗାଗ୍ଡ଼େ ପର୍ଚଲ୍ । ମୁଇଂଜା ନ୍ସା ପେ ସାପାରେ ପବିତ୍ର ।” 11ଜିସୁ ମ୍ୟା ଲେଃଗେ ଜାଣ୍ଡେ ମେଁ ଆଡ଼ାତ୍ରା ବିସ୍ବାସ୍ଗାତ୍ ଡିଙ୍ଗ୍ଏ । ତେସା ମେଁ ବାସଙ୍ଗ୍ ବଗେ “ମୁଇଂଜାକେ ଆନ୍ତାର୍ଚେ ପେ ସାପାରେ ପବିତ୍ର ।”
12ସିସ୍ଇଂନେ ଞ୍ଚ ଗଡ଼ିଆ ଆଡାଚେ ଜିସୁ ମେଁନେ ସକା ସଚେ ନିଜେନେ ସିଟ୍ନ୍ନିଆ ଆଣ୍ଡେୱେକେ । ମେଁ ସାଲ୍ୟାକୁକେ “ନେଙ୍ଗ୍ ପେନେ ମେଃନେ ଡିଙ୍ଗ୍ ମ୍ୱକେ ବୁଜେ ପେୟାକେ କି ?” 13ପେ ଆନେଙ୍ଗ୍କେ ଗୁରୁ ଆରି ମାପ୍ରୁ ଡାଗ୍ଚେ ୱା ପେଡିଙ୍ଗ୍କେ ଆତେନ୍ ସତ୍ ଡାଗ୍ଲା ସତେଆ ନେଙ୍ଗ୍ ଆତେନ୍ । 14ପେନେ ଗୁରୁ ଆରି ମାପ୍ରୁ ଡିଙ୍ଗ୍ଚେ ନେଙ୍ଗ୍ ଜଦି ପେନେ ଞ୍ଚ ଗଡ଼୍ୟାଃ ମ୍ୱିକେ, ତେଲା ପେଇଂ ଡିଗ୍ ପେନେ ଞ୍ଚ ଗଃଡ଼ିଆନେ ଦର୍କାର୍ । 15ଡାଗ୍ଲା ପେ ଆଡ଼ାତ୍ରା ନେଙ୍ଗ୍ ଡିରକମ୍ ଡିଙ୍ଗ୍ମ୍ୱକେ ପେଡିଗ୍ ଦେତ୍ ସୁଗୁଆ ଡିଙ୍ଗ୍ପା ଆତେନ୍ସା ନେଙ୍ଗ୍ ଆପେକେ ମୁଇଙ୍ଗ୍ ଗାଲି ଆକେ ମ୍ୱକେ । 16ନେଙ୍ଗ୍ ସତ୍ ବାସଙ୍ଗ୍ଣ୍ଡିଙ୍ଗ୍କେ ମୁଡ଼ି ଗତିରେ ଡିଗ୍ ମେଁନେ ମାଲିକ୍ ବାନ୍ ମ୍ନା ଣ୍ଡୁ ବା ଜା ପାଙ୍ଗ୍ଲେକେ ମେଁ ଆମେକେ ବେବକ୍ନେ ଆବା ବାନ୍ ମ୍ନା ଣ୍ଡୁ । 17ଜଦି ପେଇଂ ଆକେନ୍ ସାପା ମ୍ୟାପେଲେକେ ତେଲା ଦେତ୍ସୁଗୁଆ ପେଡିଙ୍ଗ୍ଲା ପେଇଂ ଦନ୍ୟ ।
18“ପେ ସାପାରେନେ ସାମୁଆଁରେ ନେଙ୍ଗ୍ ଏନ୍ ବ୍ନାଲିର୍ ବାସଙ୍ଗ୍ ନେଡିଙ୍ଗ୍କେ । ନେଙ୍ଗ୍ ଜାଣ୍ଡେଇଂକେ ସ୍ରି ମ୍ବକେ ଆମେଇଂକେ ନେଙ୍ଗ୍ ମ୍ୟାନ୍ଲେକେ । ମାତର୍ ସାସ୍ତର୍ନେ ଏନ୍ ସାମୁଆଁ ସତେଆ ଗଟେଏ ସାମୁଆଁ ଜା ନେଙ୍ଗ୍ନେ ବଲେ ଚଙ୍ଗ୍ଚେ ମ୍ନା ଲେଃଗେ ମେଁ ନେଙ୍ଗ୍ନେ ବିରଦ୍ରେ ଲାତ୍ ଆତଡ଼ିଆକେ । 19ଆକେନ୍ ଗଟେନେ ସେନୁଗ୍ ନେଙ୍ଗ୍ ଆପେକେ ଆଃମ୍ୟା ବିଣ୍ଡିଂକେ । ଉଡ଼ିବେଲା ଆତେନ୍ ଗଟେଏ ପେ ବିସ୍ବାସ୍ ପେଡିଙ୍ଗ୍ଏ ଜେ ସାମୁଆଁ ନେଙ୍ଗ୍ ଡିଙ୍ଗ୍ଣ୍ଡିଙ୍ଗ୍କେ ଆତେନ୍ । 20#ମାତିଉ ୧୦:୪୦; ମାର୍କ ୯:୩୭; ଲୁକ୍ ୯:୪୮; ୧୦:୧୬.ନେଙ୍ଗ୍ ଆପେକେ ସତ୍ ବାସଙ୍ଗ୍ଣ୍ଡିଂକେ, ଜା ନେଙ୍ଗ୍ବାନ୍ ପାଙ୍ଗ୍ଲେକ୍ନେ ରେମୁଆଁକେ ଗ୍ରଅନ୍ ଡିଙ୍ଗ୍ଏ, ମେଁ ଆନେଙ୍ଗ୍ ଗ୍ରଅନ୍ ଡିଙ୍ଗ୍ଏ ବାରି ଜା ଆନେଙ୍ଗ୍ ଗ୍ରଅନ୍ ଡିଙ୍ଗ୍ଏ ମେଁ ନେଙ୍ଗ୍ନେ ବେବକ୍ନେ ମାଲିକ୍କେ ଗ୍ରଅନ୍ ଡିଙ୍ଗ୍ଏ ।”
ବିସ୍ବାସ୍ଗାତ୍ ସାମୁଆଁରେ ଜିସୁ ମ୍ୟାକେ
(ମାତିଉ ୨୬:୨୦-୨୫; ମାର୍କ ୧୪:୧୭-୨୧; ଲୁକ୍ ୨୨:୨୧-୨୩)
21ଏନ୍ ଇଡ଼ିଙ୍ଗ୍ ଆତ୍ମାନ୍ନିଆ ଲିବିସଃଚେ ଜିସୁ ଦୁକ୍ରେ ସମ୍ୱାଲେ ମାୟାଚେ କୁଲାକୁଲି ବାବ୍ରେ ବାସଙ୍ଗ୍କେ “ନେଙ୍ଗ୍ ସତ୍ ବାସଙ୍ଗ୍ଣ୍ଡିଙ୍ଗ୍କେ ପେ ବିତ୍ରେ ବାନ୍ ମୁଇଂଜା ନେଙ୍ଗ୍ ଆଡ଼ାତ୍ରା ବିସ୍ବାସ୍ଗାତ୍ ଡିଙ୍ଗ୍ନ୍ସା ୱେଡିଙ୍ଗ୍କେ ।”
22ଆଜାକେ କେଚେ ଜିସୁ ଏନ୍ ସାମୁଆଁ ବାସଙ୍ଗ୍କେ ଆତେନ୍ ବୁଜେ ମାୟାଚେ ସିସ୍ଇଂ ମେଇଂମେଇଂ ବିତ୍ରେ କିକେ ଆର୍କେ । 23ମେଇଂ ବିତ୍ରେ ମୁଡ଼ି ସିସ୍କେ ଜିସୁ ଜାବର୍ ବଲ୍ ବାଡିଙ୍ଗ୍ଗେ ମେଁ ଜିସୁନେ ଞ୍ଚଙ୍ଗ୍ତି ପାକା କଚେ ଚଙ୍ଗ୍ଡିଙ୍ଗ୍ଗେ । 24ଶିମୋନ୍ ପିତର୍ ଆମେକେ ନ୍ତି ମାୱେଚେ ବାସଙ୍ଗ୍କେ “ଜା ସାମୁଆଁ ବାସଙ୍ଗ୍ ନାଡିଙ୍ଗ୍କେ ଆମେକେ ସାଲ୍ୟାକୁ ।”
25ଆତେନ୍ ସିସ୍ ଜିସୁ ଡାଗ୍ରା ଡେରେଚେ ସାଲିଆକୁକେ “ମେଁ ଜା ମାପ୍ରୁ ?”
26ଜିସୁ ଉତର୍ ବିକେ, “ରୁଟିକେ ମୁତାନ୍ନିଆ ଜଣ୍ଡିଆଚେ ଆଜାକେ ମ୍ୱିଏ ମେଁ ଆତେନ୍ ।” ଆକେନ୍ ବାସଙ୍ଗ୍ଚେ ଜିସୁ ରୁଟିକେ ମୁତାନ୍ନିଆ ଜଣ୍ଡିଆଚେ ସିମୋନ୍ନେ ଉଙ୍ଗ୍ଡେ ଇଷ୍କରିୟଥ୍ ଜିଉଦାକେ ବିକେ । 27ଜିହୁଦା ରୁଟିକେ ସାଃନେ ବେଲା ମେଁନେ ବିତ୍ରେ ସଏତାନ୍ ଗାକେ ଆରି ଜିସୁ ଆମେକେ ବାସଙ୍ଗ୍କେ “ମେଁ ଡିଙ୍ଗ୍ନେ ଚାଏଁନାଡିଙ୍ଗ୍କେ ଜିଆଃ ଡିଙ୍ଗ୍ ।” 28ଜିସୁ ଆମେକେ ଏନ୍ ସାମୁଆଁ ମେଁନ୍ସା ବାସଙ୍ଗ୍କେ ଚଙ୍ଗ୍ କଲେଃକ୍ନେ ରେମୁଆଁ ବିତ୍ରେବାନ୍ ଜା ଡିଗ୍ ବୁଜେ ଆୟାଆର୍କେ ଣ୍ଡୁ । 29ଜିଉଦାନେ ନ୍ତିନ୍ନିଆ ଡାବୁ ପିଡ଼ି ଲେଃଗେସା ଉଡ଼ି ସିସ୍ ସାଲ୍ୟାକୁ ଆର୍କେ ପାଣ୍ଡୁଏନ୍ସା ମେଁନେ ଦର୍କାର୍ ଆତେନ୍ ଜିନିସ୍ ବିଆର୍ ନ୍ସା ଣ୍ଡୁଲା ଗରିବ୍ ରେମୁଆଁଇଂକେ ଦାନ୍ ଦକିନା ବିଃନ୍ସା ଜିସୁ ଆମେକେ ଆଦେସ୍ ବିବକେ ।
30ରୁଟିକେ ସାଚେ ଜିହୁଦା ଆତେନ୍ ଦାପ୍ରେ ପାଦା ତାର୍ୱେକେ । ଆତେନ୍ ବେଲା ମିଡିଗ୍ବ ।
ତ୍ମିନେ ନିଅମ୍
31ଜିହୁଦା ତାର୍ୱେକ୍ନେ ଇଡ଼ିଙ୍ଗ୍ ଜିସୁ ବାସଙ୍ଗ୍କେ “ଏବେ ରେମୁଆଁ ଉଙ୍ଗ୍ଡେ ମ୍ନାଃ ଡିଙ୍ଗ୍ନେ ବେଲା ପିଙ୍ଗ୍ଚାଲେକେ । ଆରି ମେଁ ଆତ୍ଲା ଇସ୍ପର୍ ଡିଗ୍ ମ୍ନାଃ ଡିଙ୍ଗ୍ଏ । 32ଜଦି ଇସ୍ପର୍ ରେମୁଆଁ ଉଙ୍ଗ୍ଡେବାନ୍ ମ୍ନାଃ ଡିଙ୍ଗ୍ଏ ଇସ୍ପର୍ ନିଜେନେ ମଇମାରେ ରେମୁଆଁ ଉଙ୍ଗ୍ଡେକେ ମ୍ନାଃ ଆଡିଙ୍ଗ୍ଏ । ଜିଆଃ ମେଁ ଆକେନ୍ ଡିଙ୍ଗ୍ନେ ୱେଡିଙ୍ଗ୍କେ । 33ଏ ଗଡ଼େଇଂ ! ନେଙ୍ଗ୍ ପେ ଏତେ ଆରି ଜାବର୍ ଗଣ୍ଟା ନ୍ନାଲେଃ ଣ୍ଡୁ । ପେ ଆନେଙ୍ଗ୍ ପେତୁର୍ଏ ମାତର୍ ନେଙ୍ଗ୍ ଆଣ୍ଡିନ୍ନିଆ ୱେଣ୍ଡିଙ୍ଗ୍କେ ପେ ଆତ୍ଅରିଆ ୱେପେୟା ଣ୍ଡୁ ଏନ୍ ସାମୁଆଁ ନେଙ୍ଗ୍ ଡିରକମ୍ ଇହୁଦୀ କର୍ତ୍ତୁପକ୍ଷଇଂକେ ମ୍ୱାସଙ୍ଗ୍କେ ଦେତ୍ରକମ୍ ଏବେ ଆପେକେ ଡିଗ୍ ବାସଙ୍ଗ୍ଣ୍ଡିଂ । 34ଏବେ ଆପେକେ ନେଙ୍ଗ୍ ମୁଇଙ୍ଗ୍ ତ୍ମିନେ ନିଅମ୍ ବିଣ୍ଡିଂକେ: ପେପେ ବିତ୍ରେ ଆଲାଦ୍ ଡିଂପା । ନେଙ୍ଗ୍ ଆପେକେ ଡିରକମ୍ ବଲ୍ ବାଣ୍ଡିଂକେ ପେଡିଗ୍ ଦେତ୍ରକମ୍ ପେପେ ବିତ୍ରେ ଆଲାଦ୍ ଡିଂନେ ଦର୍କାର୍ । 35ଜଦି ପେପେ ଡାଗ୍ରା ପେନେ ଆଲାଦ୍ ଲେଃଏ, ତେଲା ସାପାରେ ମ୍ୟାଃଆର୍ଏ ଜେ ପେ ନେଙ୍ଗ୍ନେ ସିସ୍ ।”
ପିତର୍ ଜିସୁକେ ନ୍ନାମ୍ୟାକେ ଡାଗ୍ଚେ ବାସଙ୍ଗ୍କେ
(ମାତିଉ ୨୬:୩୧-୩୫; ମାର୍କ ୧୪:୨୭-୩୧; ଲୁକ୍ ୨୨:୩୧-୩୪)
36ଶିମୋନ୍ ପିତର୍ ସାଲ୍ୟାକୁକେ: “ନାଁ ଆଣ୍ଡିନ୍ନିଆ ନାୱେଏ ମାପ୍ରୁ ?” ଜିସୁ ଉତର୍ ବିକେ “ନେଙ୍ଗ୍ ଆଣ୍ଡିନ୍ନିଆ ଙ୍ଗୁଏଃଏ ଆତ୍ଅରିଆ ପେ ଏବେ ୱେପେୟା ଣ୍ଡୁ ମାତର୍ ଇଡ଼ିଙ୍ଗ୍ ନେଙ୍ଗ୍ନେ ପ୍ଲା ପେପାଙ୍ଗ୍ଏ ।”
37ମାତର୍ ପିତର୍ ବାସଙ୍ଗ୍କେ, “ମେନ୍ସା ଏବେ ନାନେ ପ୍ଲା ପାଙ୍ଗ୍ନାୟା ମାପ୍ରୁ ? ନାନେ ଆତ୍ଲା ନେଙ୍ଗ୍ ନିଜର୍ ପାରାନ୍ ମ୍ବିଏ ।”
38ଜିସୁ ବାସଙ୍ଗ୍କେ “ନାଁ ମେଃନେ ସତେଆ ନେଙ୍ଗ୍ସା ନିଜର୍ ପାରାନ୍ ନାବିଏ ? ନେଙ୍ଗ୍ ସତ୍ ବାସଙ୍ଗ୍ଣ୍ଡିଂ ଏ ମିଡିଗ୍ ଗିସେଙ୍ଗ୍ ସନେ ସେନୁଗ୍ ନାଁ ଆନେଙ୍ଗ୍ ନ୍ନାମ୍ୟାଃକେ ଡାଗ୍ଚେ ଞ୍ଜିତର୍ ନାବାସଙ୍ଗ୍ଏ ।”
Currently Selected:
ଜହନ୍ 13: NTDaa20
Highlight
Share
Copy
Want to have your highlights saved across all your devices? Sign up or sign in
The Gata Didayi Testament in Language © The Word for the World International and Didayi Believers Assembly, Kudumulugumma, Malkangiri, Odisha. 2020
