Mk 8

Yesũ Aivũnĩthya Ĩkomano yĩngĩ ya Andũ

(Mat 15.32-39)

1Ĩvindanĩ o yĩu, ĩkomano yĩngĩ ĩnene nĩyoombanĩie vala ve Yesũ. Mayaĩ na kĩndũ maya na kwoou Yesũ eeta amanyĩw'a make na amea atĩĩ, 2“Nĩngwĩw'ĩa andũ aa tei, nũndũ methĩĩtwe nakwa vandũ va mĩthenya ĩtatũ yu, na mai na kĩndũ maya. 3Ethĩwa nĩngũmalekya menũke na nzaa, nĩmatonya kũvalũkĩla nzĩanĩ nũndũ amwe maumĩte kũndũ kũasa.”

4Amanyĩw'a make mamũkũlya atĩĩ, “Mũndũ atonya ata kũvũnĩthya andũ aa onthe na lĩu kũũ weũnĩ?”

5Nake Yesũ amakũlya atĩĩ, “Inyw'ĩ mwĩ na mĩkate yĩana ata?” Namo mamũsũngĩa mamwĩa, “Twĩ na mĩkate mũonza.”

6Nĩvo ĩndĩ Yesũ weeaĩie andũ onthe mekale nthĩ, na oosa ĩla mĩkate mũonza. Nĩwatũngĩie Ngai mũvea na atilanga mĩkate ĩsu, na amanenga amanyĩw'a make maaĩe andũ, namo meeka ũu. 7O ta ũu maĩ na tũmakũyũ tũvũthũ na ĩtina wa Yesũ kũtũathima, amanenga amanyĩw'a make maaĩe andũ. 8Andũ asu nĩmaĩe mavũna na amanyĩw'a moombany'a ilungu ila syatialile syausũa ikavũ mũonza. 9Andũ ala maĩe maĩ ta ngili inya. Yesũ amina kwĩa andũ nĩmenũke, 10nĩwalikile ĩsiwanĩ mĩtũkĩ vamwe na amanyĩw'a make na mathi ndũanĩ ya Ndalimanutha.

Yesũ Ailea Kwĩka kyama

(Mat 12.38-42; 16.1-4)

11 # Mat 12.38; Lk 11.16 Avalisi amwe nĩmaendie vala ve Yesũ na mambĩĩa kũkananĩa nake. Nĩmamanthaa nzĩa ya kũmũkwatya na kwoou mamwĩa atĩĩ, “Ĩka kyama kuma kwa Ngai.” 12#Mat 12.39; Lk 11.29 Yesũ nĩwavevũũkie mũno na asya atĩĩ, “Nĩkĩ andũ ma ĩvinda yĩĩ makũlasya monw'e kyama? Nĩmũtavya w'o, vai kyama mwĩonw'a.” 13Nĩwamatiie alika ĩngĩ ĩsiwanĩ e na amanyĩw'a make, mathi mũingo ũla ũngĩ wa ĩia.

Yesũ Aikany'a Amanyĩw'a make Mesũvĩane na Momanyĩsyo ma Avalisi na ma Elote

(Mat 16.5-12)

14Amanyĩw'a nĩmoolilwe nĩ kũkua mĩkate ĩmeanĩe; no mũkate o ũmwe maĩ naw'o ĩsiwanĩ. 15#Lk 12.1 Yesũ nĩwamakanisye amea atĩĩ, “Ĩsũvĩei na mũyĩsianĩa na mbota#8.15 mbota: Ndawa ya kũkaatya na ya kwimbya mũtu wa mĩkate ya Avalisi na ya Elote.”

16Namo meeana atĩĩ, “Eneena ũu nũndũ tũi na mĩkate.”

17Yesũ nĩwamanyie ũndũ mekwasya, na kwoou amakũlya atĩĩ, “Nĩkĩ mũũneenany'a ĩũlũ wa kwĩthĩwa mũte na mĩkate yĩanĩe? O nayu mũikũelewa kana kũmanya? Ilĩko syenyu no ikwatasya mĩtũkĩ? 18#Yel 5.21; Esek 12.2; Mk 4.12 Mũitonya kwona na mwĩ na metho? Mũitonya kwĩw'a na mwĩ na matũ? Inyw'ĩ mũililikene 19yĩla natilangile mĩkate ĩtano yaĩwa nĩ andũ ngili ĩtano, mwoombanisye ikavũ syĩana ata syusũĩte ilungu sya mĩkate ila syatialile?”

Namo mamũsũngĩa, “Twoombanisye ikavũ ĩkũmi na ilĩ.”

20“Na yĩla natilangile mĩkate mũonza yaĩwa nĩ andũ ngili inya, mwoombanisye ikavũ syĩana ata syusũĩte ilungu ila syatialile?”

Namo masũngĩa, “Twoombanisye ikavũ mũonza.”

21Nĩvo ĩndĩ Yesũ wamakũlilye atĩĩ, “Kũvika o nayu mũinesa kũelewa?”

Yesũ Aivosya Kĩlalinda Mbethisaita

22Yĩla mookie Mbethisaita, andũ amwe nĩmaeteie Yesũ kĩlalinda na mamwĩsũva akilĩĩle moko. 23Yesũ nĩwakĩkwatie kw'oko na akĩtwaa nza wa ndũa ĩsu. Nĩwakĩtw'ĩlile mata metho na amina ũkilĩĩla moko make akĩkũlya atĩĩ, “Ve kĩndũ ũkwona?” 24Nakyo kyasalukya na kyasya atĩĩ, “Ĩĩ nĩngwona andũ mailyĩ ta mĩtĩ, ĩndĩ maendete.” 25Yesũ akilĩĩla moko ĩngĩ methonĩ makyo, na ĩvindanĩ yĩu kyaketeea mũno na metho makyo mavoa, kyambĩĩa kwona kĩla kĩndũ nesa. 26Nĩvo ĩndĩ Yesũ wamwĩie mũndũ ũsu atĩĩ, “Ĩnũka na ndũkasyokele ndũanĩ ĩsu.”

Vetelo Aikũsĩĩa kana Yesũ nĩwe Klĩsto#8.27 Klĩsto: Nĩ ĩsyĩtwa ya ũla wanyuvĩtwe nĩ Ngai ethĩwe Mũtangĩĩi wa andũ. Kwa Kĩevelania nĩ Masia

(Mat 16.13-20; Lk 9.18-21)

27Yesũ nĩwaumie vau na athi e na amanyĩw'a make ndũanĩ ila ithyũlũlũkĩte Kaisalea Vilivi. Me nzĩanĩ maendete, Yesũ nĩwamakũlilye atĩĩ, “Kwa ndavyei, mo andũ maasya ninyie ũũ?”

28 # Mk 6.14-15; Lk 9.7-8 Namo mamwĩa atĩĩ, “Andũ amwe maasya nue Yoana Mũvatisi na angĩ mayasya nue Eliya. O na angĩ maasya we wĩ ũmwe wa athani.”

29 # Yoa 6.68-69 Yesũ amakũlya atĩĩ, “Inyw'ĩ nenyu mwĩasya ninyie ũũ?”

Vetelo asũngĩa asya, “We nue Klĩsto.”

30Ĩndĩ Yesũ amakany'a amea atĩĩ, “Mũikatate kũtavya mũndũ o na ũmwe ũvoo wakwa.”

Yesũ Aineena ĩũlũ wa Kũthĩna, Kũkw'a na Kũthayũũka kwake

(Mat 16.21-28; Lk 9.22-27)

31Nĩvo ĩndĩ Yesũ wambĩĩie kũmanyĩsya amanyĩw'a make aimea atĩĩ, “Mwana wa Mũndũ ndatĩa kũthĩnw'a, na kũlewa nĩ atumĩa vamwe na athembi anene na amanyĩsya ma Mĩao. Akooawa na ĩtina wa mĩthenya ĩtatũ aithayũũka kuma kwa akw'ũ.” 32Amatavisye ũndũ ũsu ateũvithany'a. Nĩvo ĩndĩ Vetelo wamwĩtie Yesũ mathi nzama na amwĩa atĩĩ, “Eka kũneena ũu.” 33Ĩndĩ Yesũ eethyũũa na amasisya amanyĩw'a make na amũkany'a Vetelo aimwĩa atĩĩ, “Uma vala nĩĩ we Satani! Mosũanĩo maku nĩ ma kĩ-mũndũ na ti ma Ngai.”

34 # Mat 10.38; Lk 14.27 Nĩvo ĩndĩ Yesũ weetie ĩkomano vamwe na amanyĩw'a make mathengee vala ũĩ na amea atĩĩ, “Ethĩwa mũndũ nũkwenda kũtw'ĩka mũatĩĩi wakwa, no nginya elee mwene, akue ngelany'o yake na aingatĩĩa. 35#Mat 10.39; Lk 17.33; Yoa 12.25 Nũndũ ũla wendaa kũsũvĩa thayũ wake akawasya, ĩndĩ ũla waasya thayũ wake nũndũ wakwa na nũndũ wa Ũvoo Mũseo, akawona ĩngĩ. 36Ve ũtethyo mwaũ, mũndũ akamesya nthĩ yonthe na ayasya thayũ wake? 37Nĩ kyaũ mũndũ ũtonya kũnengane akakũany'a na thayũ wake? 38Kwoou ethĩwa mũndũ akeew'a nthoni kũwetanĩw'a nakwa, kana kũkũsĩĩa ndeto yakwa andũnĩ aa ma ĩvinda yĩĩ mate na mũĩkĩĩo na eki ma naĩ, o nake Mwana wa Mũndũ yĩla wĩũka kũũ nthĩ, e na vinya mũnene wa ĩthe wake na e na alaĩka ma Ngai, akeew'a nthoni kwĩta mũndũ ũsu mũatĩĩi wake.”

Currently Selected:

Mk 8: KAMBA

Highlight

Copy