Mk 5

Yesũ Aivosya Mũndũ Walikĩtwe nĩ Maimũ

(Mat 8.28-34; Lk 8.26-39)

1Yesũ na amanyĩw'a make nĩmainganĩisye ĩia, mavika nthĩ ya Akelasinĩ. 2Yesũ auma ĩsiwanĩ oou, nĩwakomanie na mũndũ waumĩte kũla kwathikawa andũ. Mũndũ ũsu alikĩtwe nĩ maimũ, 3na ekalaa kũu kwathikawa andũ. Vai mũndũ waĩ atonya kũmwova akalũma, o na amwovete na nyololo. 4Mavinda maingĩ andũ nĩmamwovaa na mbĩngũ na nyololo, ĩndĩ akĩtusanga nyololo vyũ na kũtilanga mbĩngũ isu tũlungu. Aĩ na vinya mwingĩ mũno ũkethĩa vai mũndũ waĩ atonya kũmũlũmya. 5Ekalaa ũtukũ na mũthenya kũu mbũanĩ na iĩmanĩ, akyua mbu na kwĩtemanga na mavia.

6Mũndũ ũsu nĩwamwonie Yesũ e vaasa, na asemba athi atulya ndu mbee wake. 7Nĩwakayie na wasya mũnene asya atĩĩ, “We Yesũ, Mwana wa Ngai Ũla wĩ Ĩũlũ Mũno, wĩenda kyaũ vala nĩĩ? Ĩvĩte kũla kwĩ Ngai kana ndwĩnthĩny'a!” 8Mũndũ ũsu aneenie ũu nũndũ Yesũ aĩ anasya atĩĩ, “Ĩimũ yĩĩ, uma mũndũnĩ ũũ!”

9Nĩvo ĩndĩ Yesũ wamũkũlilye atĩĩ, “Wĩtawa ata we?” Nake amwĩa, “Nĩtawa Nguthu, nũndũ twĩ aingĩ!” 10Mũndũ ũsu nĩwathetheeisye kũmwĩsũva Yesũ ndakalũngye maimũ asu maume nthĩ ĩsu.

11Vau ũkuvĩnĩ vaĩ ndĩthya nene ya ngũlũe yaĩsaa vau nguumo wa kĩĩma. 12Kwoou maimũ asu mamwĩsũva Yesũ maimwĩa atĩĩ, “Twĩtĩkĩlye tũkalike ngũlũenĩ iya.” 13Yesũ nĩwamanengie mwanya wa kwĩka ũu, na kwoou mauma ũla mũndũnĩ malika ndĩthyanĩ ya ngũlũe. Nĩvo ĩndĩ ngũlũe isu syonthe, ila syaĩ ta ngili ilĩ, syatheeie kĩvaũũkonĩ isembete na syeeyĩkya kĩw'ũnĩ syakw'ĩĩa vo.

14Andũ ala maĩthasya ngũlũe isu nĩmasembie matavany'a ũvoo ũsu kũu ndũanĩ na motũinĩ. Andũ nĩmookie mone ũndũ kweekĩka. 15Yĩla mavikie vala ve Yesũ, nĩmoonie ũla mũndũ walikĩtwe nĩ maimũ. Nĩwailyĩ nthĩ, ekĩĩte ngũa nesa na e na kĩlĩko kĩseo, na onthe makwatwa nĩ w'ĩa. 16Andũ ala moonete ũndũ ũsu nĩmatavisye andũ kĩla kyeekĩka kwa mũndũ ũsu walikĩtwe nĩ maimũ, na ĩũlũ wa ngũlũe. 17Andũ onthe nĩmamwĩsũvie Yesũ aume nthĩ yoo.

18Yesũ akĩlika ĩsiwanĩ athi, ũla mũndũ nĩwamwĩsũvie maendany'e. 19Ĩndĩ Yesũ alea na amwĩa atĩĩ, “Ĩnũka kwa andũ menyu, na ũimatavya maũndũ manene ala Ngai wakwĩka na ũndũ wakwĩw'ĩa tei.” 20Kwoou mũndũ ũsu nĩwaendie, na atavany'a kĩsionĩ kĩtawa Ndekavolisi maũndũ manene ala Yesũ wamwĩkĩte. Andũ onthe ala mamwĩthukĩĩisye nĩmaseng'ie mũno.

Mwĩĩtu wa Yailasi na Mũndũ Mũka ũla Wakwatie Ngũa ya Yesũ

(Mat 9.18-26; Lk 8.40-56)

21Yesũ nĩwasyokie mũingo ũla ũngĩ wa ĩia. E ũtee wa ĩia, andũ aingĩ nĩmoombanie mamũthyũlũlũkĩte. 22Nĩvo ĩndĩ mũtongoi ũmwe wa nyũmba ya Ayuti ya kũthaithĩa na kũmbanĩa weetawa Yailasi wookie, na amwona Yesũ atulya ndu maũũnĩ make, 23na amwĩsũva mũno aimwĩa atĩĩ, “Kelĩtu kakwa ke vakuvĩ kũkw'a. Ũka ũkakailĩĩle moko nĩ kana kavoe, kekale thayũ.”

24Kwoou Yesũ aendany'a nake. Andũ aingĩ nĩmamũatĩĩie Yesũ na nĩmamũvivinyaa kuma kĩla ngalĩko. 25Vaĩ mũndũ mũka ũmwe wekalĩte ayumwa nĩ nthakame vandũ va myaka ĩkũmi na ĩlĩ. 26Nĩwathĩnĩte mũno akĩiitwa nĩ ndakĩtalĩ mbingĩ na nĩwatũmĩĩte syĩndũ syake ikathela akĩyĩiitĩthya, ĩndĩ vandũ va kwĩw'a kavaa, nĩwaendeeie na kũwaĩĩa. 27Mũndũ mũka ũsu nĩweew'ĩte ũvoo ĩũlũ wa Yesũ, na kwoou avĩtĩla mũvivinyanonĩ ũsu wa andũ kuma ĩtina, athi akwata ngũa ya Yesũ. 28We nĩwaneenete na ngoo akasya, “O na ethĩwa nĩkwata ngũa yake, nĩngũvoa.” 29O vau kwa vau nĩwaekie kumwa nĩ nthakame, na eew'a mwĩĩnĩ wake kana nĩwavoa thĩna ũsu eĩ naw'o. 30Kavindanĩ o kau Yesũ nĩwamanyie kana ve vinya wauma nthĩnĩ wake, na kwoou athyũũka amakũlya andũ atĩĩ, “Ũla wakwata ngũa yakwa nũũ?”

31Amanyĩw'a make nĩmamũkũlilye atĩĩ, “Ũtonya ata kũkũlya, ‘Ũla wakwata ngũa yakwa nũũ,’ na nũkwona ũndũ andũ mavivinyanĩĩte vala ũĩ?”

32Ĩndĩ Yesũ asiangya ngalĩko syonthe one ũla weeka ũu. 33Mũndũ mũka ũsu nĩwamanyie kĩla kyeekĩka kwake, na kwoou eeyumĩlya athĩlĩĩte nĩ w'ĩa atulya ndu mbee wa Yesũ na amũtavya ũw'o w'onthe. 34Yesũ nĩwamwĩie atĩĩ, “Mwĩĩtu wakwa, nĩwavow'a nũndũ wa mũĩkĩĩo waku; enda na mũuo.”

35Yesũ aendee na kũneena ũu, andũ amwe nĩmookie vala ve ũla mũtongoi wa nyũmba ya Ayuti ya kũthaithĩa na kũmbanĩa, maumĩte mũsyĩ kwake na mamwĩa atĩĩ, “Kelĩtu kaku nĩkakw'a. Ve vata mwaũ wa kũendeea kũnyamasya Mũmanyĩsya?” 36Yesũ nĩweewie kĩla maneena ĩndĩ eea mũtongoi ũsu atĩĩ, “Ndũkethĩwe na w'ĩa, ĩkĩĩa tũ.” 37Yesũ ndaaĩtĩkĩla mũndũ o na ũmwe aendany'e nake, ate o Vetelo na Yakovo na Yoana mwana-a-inyia.

38Yĩla mavikie mũsyĩ kwa mũtongoi ũsu, Yesũ nĩweethĩie kĩlonzo kingĩ na andũ makĩĩa na kua mbu na wasya mũnene. 39Yesũ nĩwalikile nyũmba na amea atĩĩ, “Kĩlonzo kĩĩ na kũĩa kũũ nĩ kwakĩ? Kana ti kakw'ũ, kekĩte kũkoma!”

40Nĩmamũthekeeie mũno, nake amaumaalya onthe nza, na eeta ĩthe na inyia wa kana na ala amanyĩw'a atatũ, malika nyũmba vala kana kaĩ. 41Yesũ nĩwakakwatie kw'oko na akea atĩĩ, “Talitha kũmi,” ĩla ũalyũlo wayo nĩ, “Kelĩtu nĩkwĩa, ũkĩla!”

42O vau kwa vau kelĩtu kau nĩkookĩlile na kambĩĩa kũtũũanga vau. Kaĩ ka myaka ĩkũmi na ĩlĩ. Andũ nĩmaseng'ie mũno moona ũu, 43ĩndĩ Yesũ amakany'a maikatavye mũndũ o na ũmwe ũndũ kweekĩka. Nĩvo ĩndĩ wameie nĩmanenge kelĩtu kau kĩndũ kaye.

Currently Selected:

Mk 5: KAMBA

Highlight

Copy