Luka 19
19
Sakayo
1Nake avota Yeliko avĩtĩla vo. 2Na sisya, nĩvo vaĩ mũndũ wetawa Sakayo; nake aĩ mũnene wa aumya ma koti, na aĩ mũthwii. 3Nake nĩwendaa kũmwona Yesũ amanye nũũ; na aaĩwa nũndũ wa ĩkomano, nũndũ aĩ mũkuvĩ. 4Nake asemba mbee, alĩsa mũkũyũnĩ nĩ kana amwone: nũndũ nĩwokĩte avĩtĩle nzĩanĩ ĩsu. 5Yesu avika vala vandũ, ang’elela ĩũlũ, amwĩa, Sakayo, theea nthĩ mĩtũkĩ; nũndũ ũmũnthi nditĩa kũtinda nyũmba kwaku. 6Nake atheea nthĩ mĩtũkĩ, amũthokya kwake na mũyo. 7#Lk 15.2.Na moona ũu, onthe manyungunyĩsya, makyasya, Nĩwathi kwĩkala kwa mũndũ mwathe. 8#Kuma 22.1; Mot 5.6,7.Na Sakayo aũngama, na amwĩa Mwĩaĩi, Sisya, Mwĩaĩi, nyunzu ya syĩndũ syakwa nĩngũnenga ngya; na ethĩwa nĩnĩvenete mũndũ kĩndũ na nzĩa ya ũkengani, nĩngũmũtũngĩa kũndũ kũna. 9#Lk 13.16; Meko 3.25; 16.31.Yesũ amwĩa, Ũmũnthĩ ũtangĩĩo nĩwooka nyũmbanĩ ĩno, nũndũ ũũ nake nĩ mwana wa Avalaamu. 10#Esek 34.16; Yoa 3.17; Lk 5.32; 1 Tim 1.15.Nũndũ Mwana mũndũ nĩwokie kũmantha na kũtangĩĩa kĩla kyaaie.
Ngelekan’yo ya latili sya vetha
(MATHAYO 25.14–30)
11 #
Lk 24.21; Meko 1.6. Nao meew’a maũndũ asu, ongeleela kũneena ngelekan’yo, nũndũ nĩwathengeee Yelusaleme, na nũndũ nĩmatalĩthasya kana ũsumbĩ wa Ngai ũkilĩlye kwoneka. 12#Mko 13.34.Kwondũ wa ũu asya, Mũndũ mũnene ũmwe nĩwaendie nthĩ yĩ kũasa anengwe ũsumbĩ, na akĩsyoka. 13Asyĩta ngombo syake ĩkũmi, aiaan’ya latili ĩkũmi sya vetha, asyĩa, Tandĩthyai nasyo mũvaka naalũka. 14#Yoa 1.11.Ĩndĩ andũ make mamũmena, na matũma andũ mamũatĩĩe, makyasya, Tũtikwenda mũndũ ũũ atũsumbĩke. 15Na kweethĩwa, asyoka, anengetwe ũsumbĩ, aumya mwĩao kana ngombo ila wanengie mbesa syĩtwe, nĩ kana amanye ũndũ itandĩthĩtye nasyo. 16Na ĩla ya mbee yooka, yasya, Vwana, latili yaku nĩtandĩthĩtye latili ingĩ ĩkũmi. 17#Lk 16.10.Na amĩtavya, Nĩwĩkĩte nesa, we ngombo nzeo: nũndũ waĩ na kĩthito na kĩndũ kĩnini, ĩthĩwa na ũkũmũ ĩũlũ wa ndũa ĩkũmi. 18Na ĩla ya kelĩ yooka, yasya, Vwana, latili yaku nĩtandĩthĩtye latili itano. 19Nake amĩtavya o ta ĩla ĩngĩ, Ĩthĩwa ĩũlũ wa ndũa itano. 20Na ĩngĩ yooka, yasya, Vwana, latili yaku, nĩ ĩno, nĩnaiie noveee kĩtambaanĩ: 21nũndũ nĩnakũkĩie, nĩkwĩthĩwa wĩ mũndũ mwai: nĩwosaa kĩla ũtaiĩte, na nũkethaa kĩla ũtaavuĩa. 22Amĩtavya, Ngombo nthũku we, nĩngũkũsilĩla na ndeto sya kanyw’a waku, Nĩweesĩ kana nĩ mũndũ mwai, nosaa kĩla ndaaia, na ngethaa kĩla ndaavuĩa; 23nũndũ wa kĩ ĩndĩ waleile kwia mbesa syakwa venginĩ, kana nooka nĩnengwe mbesa syakwa vamwe na ũtandithyo wasyo? 24Na ĩndĩ amea ala maũngamĩte vo, Mĩvenei latili ĩla ĩ nayo, mĩnenge ĩla ĩ na latili ĩkũmi. 25Nao mamwĩa, Vwana, ĩ na latili ĩkũmi. 26#Lk 8.18; Mt 13.12.Nĩngũmũtavya kana kĩla mũndũ ũkwete kĩndũ akanengwa; ĩndĩ ũla ũte na kĩndũ, o na kĩla wĩ nakyo akavenwa. 27Ĩndĩ amaitha aa makwa ala matendaa nĩmasumbĩke, maetei vaa, mũmoaĩe mbee wakwa.
Kũlika kwa ndaĩa kwa Yesũ Yelusaleme
(MATHAYO 21.1–11; MALIKO 11.1–11; YOANA 12.12–19)
28Na amina kũneena maũndũ asu, aendaa mbee, ambatĩte Yelusaleme.
29Na kweethĩwa, athengeea Vethivake na Vethania, vala ve kĩĩma kĩla kĩtawa Oliveti, atũma elĩ ma amanyĩw’a make, 30akyasya, Endai mũsyĩ ũla ũmwelekele; na mwavota mũkoona ndena ya ĩng’oi yovetwe, ĩla ĩtaamba kũkua mũndũ: mĩthasyei, mũmĩete vaa. 31Na mwakũlw’a nĩ mũndũ, Mwĩmĩthaĩsya kĩ? Asyai, Mwĩaĩi e na vata nayo. 32Na ala matũmiwe mathi, na meethĩa o tondũ mataviw’e. 33Na makĩthasya ĩla ndena, ene mayo mamakũlya, Mwĩmĩthaĩsya ndena kĩ? 34Na masya, Mwĩaĩi e na vata nayo. 35Nao mamĩtwaa kwa Yesũ: na mailĩĩla ngũa syoo ĩũlũ wa ndena, na mamũtũlya Yesũ ĩũlũ wayo. 36#2 Asu 9.13.Na akĩthi, mamwalanĩlya ngũa syoo nzĩanĩ. 37Na athengeea, e kĩtheeonĩ kya kĩĩma kya Mĩthata, ĩkomano yonthe ya amanyĩw’a mambĩlĩlya kũtana na kũmũkumya Ngai na wasya mũnene, ũndũ wa mavinya ala moonie; 38#Sav 118.26; Lk 2.14.makyasya, Nĩ mũathime Mũsumbĩ ũla wũkĩte syĩtwanĩ ya Mwĩaĩi: mũuo wĩthĩwe ĩtunĩ, na ndaĩa yĩthĩwe ku ĩũlũ mũno. 39Na Avalisi amwe ala maĩ ĩkomanonĩ mamwĩa, Mũmanyĩsya, makan’ye amanyĩw’a maku. 40Nake asũngĩa, akyasya, Nĩngũmũtavya, ethĩwa aa makavindya, mavia makalonzan’ya.
Yesũ akĩĩa Yelusaleme
41 #
2 Asu 8.11; Yoa 11.35. Na avika vakuvĩ, amyona ĩla ndũa na aĩa nũndũ wayo, 42#Kũt 32.29; Mt 13.14; Yoa 12.38.akyasya, Kethĩwa nĩweesĩ we mũthenya ũũ wa ũmũnthĩ, maũndũ ma mũuo waku ũndũ mailyĩ! Ĩndĩ yu nĩmavithĩtwe methonĩ maku. 43Ĩndĩ mĩthenya nĩyũkĩte kwaku, yĩla amaitha maku makakũthyũlũlũkĩlya wiio, na kũkwĩlingĩla, na kũkũsiĩĩa ngalĩ syonthe, 44#Lk 21.6; Sav 137.9.na makakũvalũkya nthĩ, syana syaku syĩ nthĩnĩ waku; na matikatia nthĩnĩ waku ĩvia yĩmwe ĩũlũ wa yĩngĩ; nĩkwĩthĩwa ndwaamanya ĩvinda ya kũsiw’a kwaku.
Yesũ aithesya ĩkalũ
(MATHAYO 21.12–17; MALIKO 11.15–19; YOANA 2.13–22)
45 #
Isa 56.7; Yel 7.11. Nake avota ĩkalũnĩ, na ambĩlĩlya kũmakuthũa ala mathooanĩasya, 46akĩmea, Nĩkũandĩkĩtwe, Nyũmba yakwa ĩkethĩwa nyũmba ya kũvoyea: ĩndĩ inywĩ mũmĩtw’ĩte ngunga ya avutani.
47 #
Lk 21.37; 22.53; Yoa 18.20. Na amanyĩasya ĩkalũnĩ kĩla mũthenya. Ĩndĩ athembi anene na aandĩki na ala anene andũnĩ mamantha kũmũaa: 48na maaĩw’a nĩ ũndũ wa kwĩka; nũndũ andũ onthe nĩmateete matũ, makĩmwĩthukĩĩsya.
Currently Selected:
Luka 19: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
