Luka 15
15
Ĩlondu yau
(MATHAYO 18.12–14)
1Na aumya ma koti onthe na ala athe mamũthengeea kũmwĩthukĩĩsya. 2#Lk 5.30.Na Avalisi na aandĩki manyungunyĩsya, makyasya, Mũndũ ũũ nũnũkwosa ala athe na kũĩsanĩa nao.
3Na amatavya ngelekan’yo ĩno, akyasya, 4#Esek 34.11,16; Lk 19.10.Nĩ mũndũ wĩva kwenyu, ũla wĩ na malondu ĩana, na akyasya yĩmwe, ũtatia ala mĩongo kenda na kenda weũnĩ, akamanthe yĩla yaie, mũvaka ayona? 5Na ayona, akĩyilĩĩla ituonĩ syake, akĩw’a mũyo. 6Na avika kwake, aimeta anyanyae na atũi make, akĩmea, Tanai vamwe nakwa, nũndu nĩnoona ĩlondu yakwa yĩla yĩĩ yau. 7Nĩngũmũtavya, ta ũu vakeethĩwa ũtanu ĩtunĩ nũndũ wa ũmwe mwathe akĩalyũla ngoo, kwĩ ala alũngalu mĩongo kenda na kenda, ala mate vata wa kũalyũla ngoo.
Silingi mbau
8Kana mũndũ mũka nĩ wĩva ũla wĩ na silingi ĩkũmi, akyasya ĩmwe, ũtakwatya taa, na kũtuta nyũmba, akĩmantha na kĩthing’ĩĩsyo mũvaka amyona? 9Na amyona, aimeta anyanyae na atũi make, akyasya, Tanai vamwe nakwa, nĩkwĩthĩwa nĩnoona ĩla silingi nĩnaaĩtye. 10#Aev 3.10.O ta ũu, nĩngũmwĩa, ve ũtanu kwa alaĩka ma Ngai ũndũ wa ũmwe mwathe akĩalyũla ngoo.
Mwana kĩmaamai
11Nake asya, Mũndũ ũmwe aĩ na ana elĩ: 12na ĩlumaita yamwĩa ĩthe, Asa, nenga kĩlungu kya ũthwii kĩla kĩkethĩwa kĩ kyakwa. Na amaan’ya syĩndũ syake. 13#Nth 29.3.Na matũkũ manini mavĩta, ĩlumaita yoomban’ya mĩio yayo yonthe yathi nthĩ ĩngĩ yĩ kũasa; na nĩkw’o yaanangĩe syĩndũ syayo na mothũku onthe. 14Na yamina kwananga syonthe, nĩw’o kwookie yũa ĩnene nthĩ ĩsu; nayo yambĩlĩlya kũthĩna. 15Na yathi kwĩkala kwa mũndũ ũmwe wa nthĩ ĩsu; nake ayĩnenga wĩa wa kũĩthya ngũlũe isesinĩ syake. 16#Nth 23.31.Na kweethĩwa nĩyendaa kũvũnw’a nĩ mosyao ma mũtĩ wa mũkalavi ala ngũlũe syaĩsaa: ĩndĩ vaiaĩ mũndũ waayĩnenga. 17Na yĩla yavindũkie yasya, Nĩ athũkũmi meana ata ma asa wakwa ala me na lĩu ũla matatonya ũmina, nakwa nĩngũkw’ĩa kũũ nĩ nzaa! 18#Yel 3.12,13; Sav 51.4.Nĩngũkĩla nĩthi kwa asa wakwa, na ngĩmwĩa, Asa, nĩnĩvĩtĩtye ĩtunĩ, na mbee waku: 19na yu ndyaĩlĩtwe nĩ kwĩtwa mwana waku: mbĩkalya ta ũmwe wa athũkũmi maku. 20Na yookĩla yathi kwa ĩthe. Ĩndĩ yĩ kũasa, ĩthe wayo ayona, na eew’a ĩnee, asemba, ayĩkwatĩla ngingonĩ, ayĩmumunya. 21Na ũla mwana amwĩa, Asa, nĩnĩvĩtĩtye ĩtunĩ, na mbee waku: na ndyaĩlĩtwe nĩ kwĩtwa mwana waku ĩngĩ. 22Ĩndĩ ĩthe asyĩa ngombo syake, Latyai mĩtũkĩ ngũa ĩla nzeo, mũmwĩkĩe; na mwĩkĩei ngome kyaa, na iatũ maũũ: 23na etei kasalũ kala kanou, mũae, tũye, tũtane: 24#Aev 2.1,5; 5.14.nĩkwĩthĩwa mwana ũũ wakwa aĩ mũkw’ũ, na nĩwathayũũka; aĩ mwau, na nĩwaumbũka. Na mambĩlĩlya kũtana. 25Ĩndĩ mwana wake ũla mũkũũ aĩ mũũndanĩ: nake athengeea nyũmba, eew’a wathi ũkinwa. 26Na amwĩta ũmwe wa athũkũmi, amũkũlya kĩtumi kya maũndũ asu. 27#Lk 15.2.Nake amwĩa, Mũinau nĩwoka; na au ooaa kasalũ kala kanou, nũndũ nĩwamwona e mũima. 28Ĩndĩ athata, na alea kũvota: na ĩthe wake aumaala amwĩsũva. 29Ĩndĩ amũsũngĩa, amwĩa ĩthe, Sisya, myaka ĩsu mingĩ nĩngũthũkũmaa, na ndyaavĩtan’ya mwĩao ũmwe waku; ĩndĩ ndwaanenga katena ka mbũi, ngatana vamwe na anyanyawa: 30ĩndĩ yĩla mwana ũũ waku woka, ũla, wanangie syĩndũ syaku syonthe na malwaya, nĩwamũaĩa kasalũ kala kanou. 31#Yoa 17.10.Nake amwĩa, Mwana wakwa, matukũ onthe wĩ nakwa, na ila nĩ nasyo syonthe nĩ syaku. 32Ĩndĩ nĩtwaĩlĩtwe nĩ kũtana na kwĩw’a mũyo: nũndũ mũinau ũũ aĩ mũkw’ũ, na nĩwathayũũka: aĩ mwau, na nĩwaumbũka.
Currently Selected:
Luka 15: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
